Headlines:

ពេល​មេ​ដឹក​នាំ​អាមេរិក​ឱន​គោរព​ចំពោះ​ព្រះ​បរមសព​សម្តេច​ឪ



121114_02
លោក​បារ៉ាក់​ អូបាម៉ា ប្រធា​នា​ធិបតី​អា​មេរិក​ នឹង​មក​បំពេញ​ទស្ស​ន​កិច្ច​នៅ​កម្ពុជា​ឆាប់ៗនេះ​​។ រូបថត Rueters

ប្រសិន បើ​មិន​មាន​ការ​ផ្លាស់​ប្ដូរ​កម្មវិធី​ទេ លោក​ប្រធានាធិបតី បារ៉ាក់ អូបាម៉ា (Barack Obama) លោក​ស្រី​រដ្ឋ​មន្ត្រី​ការ​បរទេស ហ៊ីលឡារី គ្លីនតុន (Hillary Clinton) និង​លោក​រដ្ឋ​មន្ត្រី​ការពារជាតិ ឡេអូន ផែនីតា (Leon Panetta) នៃ​ប្រទេស​មហា​យក្ស​ផ្នែក​អំណាច​យោធា​នឹង​មក​កាន់​ប្រទេស​កម្ពុជា​នា សប្ដាហ៍​នេះ។

ដំណើរ​ទស្សនកិច្ច​នេះ​ ពិត​ជា​មោទនភាព​ដ៏​ធំធេង​ សម្រាប់​ប្រទេស​កម្ពុជា​ដែល​ជា​ប្រទេស​តូចតាច ដោយ​មាន​មេ​ដឹក​នាំ​នៃ​ប្រទេស​មហា​អំណាច​លើ​ចក្ក​វាឡ បាន​មក​ស្នាក់​អាស្រ័យ។ ម្យ៉ាង​ទៀត ការ​មក​ដល់​ប្រទេស​កម្ពុជា​របស់​លោក​អូបាម៉ា គឺជា​ឱកាស​របស់​លោក​ ក្នុង​ការ​បាន​ជួប​មេដឹកនាំ​កំពូលៗ​ នៅ​អាស៊ី និង​អឺរុប ដើម្បី​ពង្រឹង​ចំណង​ការ​ទូត​និង​សហប្រតិបត្តិការ​សេដ្ឋកិច្ច ពាណិជ្ជកម្ម​បន្ថែម​ទៀត​បន្ទាប់​ពី​លោក​ទើប​តែ​ជាប់​ឆ្នោត​ជា​ប្រធានាធិបតី​អាមេរិក​អាណត្តិ​ទីពីរ។

ដោយ​ឡែក​នៅ​កម្ពុជា សម្រាប់​ដំណើរ​ទស្សនកិច្ច​របស់​ប្រធានាធិបតី​អាមេរិក​នា​ពេល​នេះ ​គឺ​យ៉ាង​ហោច​ណាស់​ ក៏​ជា​លើក​ដំបូង​ដែរ​ចាប់​តាំង​ពី​សម្ដេច​ព្រះនរោត្តម សីហនុ ត្រូវ​បាន​គេ​បណ្ដេញ​ចេញ​ពី​ព្រះ​ប្រមុខ​រដ្ឋ​នា​ថ្ងៃ​ទី១៨ មីនា ឆ្នាំ​១៩៧០​តាម​រយៈ​រដ្ឋ​ប្រហារ​។

កាល​ពី​ជាង ៣០ ឆ្នាំ មុន​សហរដ្ឋ អាមេរិក​ បាន​ផ្ដល់​មធ្យោបាយ​ទាំង​យោធា​និង​ហិរញ្ញវត្ថុ​ឲ្យ​លោក​សេនាប្រមុខ លន់ នល់ និង​ព្រះ​អង្គម្ចាស់ ស៊ីសុវត្ថិ សិរីមតៈ ដែល​ត្រូវ​ជា​បង​ប្អូន​ជី​ទួត​មួយ​របស់​សម្ដេច​សីហនុ បណ្ដេញ​សម្ដេច សីហនុ ចេញ​ពី​ព្រះ​ប្រមុខ​រដ្ឋ។

ការ​ធ្លាក់​ចេញ​ពី​មុខ​តំណែង​ដោយ​សារ​តែ អំពើ​ក្បត់​របស់​អ្នក​ក្រោម​ឱវាទ​និង​សាច់​ញាតិ​រាជ​វង្ស​មួយ​ចំនួន​តូច ក្រោម​ការ​គាំទ្រ​និង​ឧបត្ថម្ភ​ពី​រដ្ឋាភិបាល​អាមេរិក បាន​ធ្វើ​ឲ្យ​ប្រទេស​កម្ពុជា​ ធ្លាក់​ចូល​ក្នុង​ភ្លើង​សង្គ្រាម​និង​មាន​អំពើ​ប្រល័យ​ពូជសាសន៍​ឯង។ ដោយ​ឡែក​ដោយ​សារ​តែ​រដ្ឋ​ប្រហារ​នេះ​ហើយ បាន​ធ្វើ​ឲ្យ​សម្ដេច ព្រះ​នរោត្តម សីហនុ និង​ព្រះមហេសី មុនីនាថ ព្រម​ទាំង​សមាជិក​រាជវង្សានុវង្ស​ភាគ​ច្រើន​និរទេស​ព្រះ​កាយ​ឃ្លាត​ឆ្ងាយ ពី​ព្រះ​បរម​រាជវាំង​អស់​ជាង​១៥ ឆ្នាំ​(លើក​ទីមួយ ខែ​មករា ១៩៧០ -កក្កដា​១៩៧៥ និង​លើក​ទីពីរ ខែ​មករា​១៩៧៩-វិច្ឆិកា ១៩៩១)។

នៅ​ក្នុង​សៀវភៅ «ហ៊ុន សែន នយោបាយ ​និង​អំណាច​ក្នុង​ប្រវត្តិសាស្ត្រ​ខ្មែរ​ជាង​ ៤០ ឆ្នាំ» អ្នក​និពន្ធ​បាន​ដក​ស្រង់​សំណេរ​របស់​សម្ដេច នរោត្តម សីហនុ ពី​ភាព​សោកសៅ​របស់​ព្រះ​អង្គ និង​ពី​ការ​ធ្វើ​ទុក្ខ​ទោ​ម្នេញ​របស់​ពួក​ស៊ីអាយអេ (CIA) អាមេរិក ក្នុង​ការ​តាម​ធ្វើ​ឃាត និង​ផ្ដួល​រំលំ​ព្រះអង្គ។

ដោយ​ដឹង​សភាព​ការណ៍​មុន​សម្ដេច សីហនុ នៅ​ថ្ងៃ​៧មករា​ឆ្នាំ​១៩៧០​បាន​យាង​ចេញ​ពី​ប្រទេស​កម្ពុជា​ជាមួយ​មហេសី​ដោយ​យក តែ​វ៉ាលិស​តូច​មួយ​ប៉ុណ្ណោះ។ ការ​យាង​ចេញ​នេះ ព្រះ​អង្គ​បាន​ឡាយ​ថា «​ខ្ញុំ​ត្រូវ​ការ​សម្រាក​ទាំង​ស្រុង និង​ត្រូវ​ការ​ព្យាបាល​ជំងឺ​រ៉ាំរ៉ៃ​មួយ​ចំនួន ហើយ​ខ្ញុំ​បាន​គិត​ថា វា​នឹង​ជា​មេរៀន​ដែល​ជា​បទពិសោធ​មិន​ល្អ​សម្រាប់ សិរិមតៈ និង​អ្នក​គាំទ្រ​របស់​ទ្រង់» ដើម្បី​មាន​អ្វីៗ​ទាំង​អស់​នៅ​ក្នុង​ដៃ ហើយ​ទុក​ឲ្យ​ពួក​គេ​ដឹង​ថា តើ​ពួក​គេ​អាច​ដោះស្រាយ​ភាព​ទ្រុឌទ្រោម​ផ្នែក​សេដ្ឋកិច្ច​របស់ ប្រទេស​ដោយ​វិធី​ណា នៅ​ពេល​ដែល​ពួក​គេ​បាន​បោះបង់​គោល​នយោបាយ​របស់​ព្រះ​អង្គ​នោះ។ ក្រោយ​មក បើ​ទោះ​ជា​ដឹង​ថា អាមេរិក​មិន​មែន​ជា​មិត្ត​របស់​ទ្រង់​ក៏​ដោយ ក៏​ព្រះអង្គ​បាន​ស្នើ​សុំ​រដ្ឋាភិបាល​អាមេរិក​នូវ​សិទ្ធិ​ជ្រក​កោន​នយោបាយ បន្ទាប់​ពី​របប​ប៉ុលពត បាន​ដួល​រលំ​នៅ​ថ្ងៃ ៧ មករា​ឆ្នាំ​១៩៧៩ ហើយ​វៀតណាម ​បាន​ចូល​មក​កាន់​កាប់​ប្រទេស​កម្ពុជា។ នៅ​ក្នុង​សៀវភៅ «អ្នក​ម្ដាយ និង​កូន​អង្គការ» អ្នក​និពន្ធ បាន​ដក​ស្រង់​សំណេរ​របស់​សម្ដេច សីហនុ ថា ទាំង​អាមេរិក​និង​បារាំង​បាន​បដិសេធ​ពី​ការ​សុំ​សិទ្ធិ​ជ្រក​កោន​នយោបាយ​នេះ គឺ​មាន​តែ​ប្រទេស​ចិន​ប៉ុណ្ណោះ​ បាន​ទទួល​យក​ព្រះ​អង្គ។

បើ​ទោះ​ជា សម្ដេច សីហនុ តែង​តែ​បាន​បន្ទោស​សហរដ្ឋ​អាមេរិក​ពី​កំហុស​ឆ្គង​ ក្នុង​ការ​គាំទ្រ​ឲ្យ​មាន​រដ្ឋ​ប្រហារ ទម្លាក់​ព្រះ​អង្គ​ក៏​ដោយ ក៏​ប្រជាជន​កម្ពុជា ក៏​ដូចជា​ពិភពលោក​ទាំង​មូល​ដូច​ជា​មិន​ដែល​បាន​ឮ​ថា ព្រះអង្គ​ បាន​ឲ្យ​អាមេរិក​សូម​ទោស​ព្រះអង្គ និង​ប្រជារាស្ត្រ​ខ្មែរ​ជា​សាធារណៈ​ឡើយ។ បន្ទាប់​ពី​រដ្ឋ​ប្រហារ​នេះ​មក ប្រទេស​កម្ពុជា ដែល​ធ្លាប់​តែ​សម្បូរ​រុងរឿង បាន​ធ្លាក់​ចូល​ក្នុង​សង្គ្រាម​ស៊ីវិល និង​ប្រល័យ​ពូជ​សាសន៍​ដែល​បណ្ដាល​ឲ្យ​មនុស្ស​រាប់​លាន​នាក់​ស្លាប់ ហើយ​អ្នក​រស់រាន​មាន​ជីវិត​រាប់​លាន​នាក់​ទៀត​បាន​ធ្លាក់​ខ្លួន​ជា​ស្ត្រី មេម៉ាយ ជា​កូន​កំព្រា​ឪពុក-ម្ដាយ និង​ជា​ជន​ពិការ។

បើ​ទោះ​ជា រដ្ឋ​ការ​អាមេរិក​ក្រោម​ការ​គ្រប់គ្រង​របស់​លោក​ប្រធានាធិបតី រីឆាត និចសុន (Richard Nixon) ជា​សត្រូវ​របស់​ព្រះ​អង្គ​ក៏​ដោយ ក៏​រដ្ឋការ​អាមេរិក​ជំនាន់​ក្រោយ បាន​ខិតខំ​ខ្នះខ្នែង​ជួយ​ឲ្យ​មាន​ កិច្ច​ព្រមព្រៀង​សន្តិភាព​ទីក្រុង​ប៉ារីស ២៣ តុលា ឆ្នាំ ១៩៩០ ដែរ ដែល​បាន​បើក​ផ្លូវ​ឲ្យ​ព្រះអង្គ​បាន​យាង​ចូល​នគរ​វិញ​នា​ថ្ងៃ​ទី ១៤ វិច្ឆិកា ១៩៩១ និង​បាន​គ្រង​រាជ្យ​ជា​ថ្មី នា​ឆ្នាំ​១៩៩៣ ហើយ​រាជានិយម​ក៏​បាន​បន្ត​មាន​រហូត​មក​ដល់​សព្វ​ថ្ងៃ។

ឥឡូវ​នៅ​សប្ដាហ៍​នេះ ប្រធានាធិបតី រដ្ឋ​មន្ត្រី​ការ​បរទេស​និង​មេទ័ព​របស់​ប្រទេស​មហា​អំណាច​ដែល​បាន​គាំទ្រ​ដល់​សកម្មភាព​នាំ​ឲ្យ​មាន​ការ​បណ្ដេញ​ ព្រះ​អង្គ​ចេញ​ពី​ព្រះ​ប្រមុខ​រដ្ឋ​កាល​ពី​អតីត​កាល នឹង​មក​ឱន​ក្បាល​នៅ​ចំពោះ​មុខ​ព្រះ​បរមសព​របស់​ព្រះ​អង្គ ដោយ​មិន​បាន​បង្ខំ។

បើ​ទោះ​ជា​លោក អូបាម៉ា និង​មេដឹកនាំ​កំពូល​របស់​អាមេរិក​ផ្សេងៗ​ទៀត ចូល​គោរព​ព្រះ​វិញ្ញា​ណ​ក្ខន្ធ​ព្រះបរមសព​របស់​ព្រះអង្គ ក្នុង​នាម​ជា​បុគ្គលឬ​ក៏​ក្នុង​នាម​អ្នក​​ដឹកនាំ​ជំនាន់​ក្រោយ​គោរព​អ្នក​ ដឹកនាំ​ជំនាន់​មុន​ក៏​ដោយ ក៏​អ្នក​វិភាគ​នយោបាយ​ការបរទេស​មួយ​ចំនួន​បាន​និយាយ​ប្រហាក់​ប្រហែ​ល​គ្នា​ ថា ទី​បំផុត​សត្រូវ​នយោបាយ​របស់​ «នរោត្តម សីហនុ» បាន​មក​ឱន​ក្បាល​នៅ​ចំពោះ​ព្រះ​បរមសព​របស់​ព្រះ​អង្គ។ ការ​ឱន​ក្បាល​នេះ​គឺ​ជា​សំណង​នយោបាយ​មួយ​ដ៏​ធំ​ពី​សំណាក់​មេដឹកនាំ​អាមេរិក មក​ឲ្យ​ព្រះអង្គ និង​សមាជិក​រាជវង្សានុវង្ស​វិញ។

អ្នក​វិភាគ​នយោបាយ​ទាំង​នោះ​បាន​លើក​ឡើង​ដូចៗ​គ្នា​ថា ព្រះ​បរមសព​របស់​ព្រះវររាជបិតា​ឯករាជ្យជាតិ​ខ្មែរ នរោត្តម សីហនុ ពិត​ជា​សំណាង​និង​មាន​មហា​កិត្តិយស​ដ៏​ធំធេង​ជាង​សព​លោក​ហូ ជីមិញ មេ​ដឹកនាំ​ប្រទេស​វៀតណាម។ កាល​ពី​ថ្ងៃ​ទី ៣ កញ្ញា ឆ្នាំ ១៩៦៩ សម្ដេច សីហនុ បាន​យាង​ទៅ​ទីក្រុង​ហាណូយ ​ដើម្បី​ចូល​រួម​បុណ្យ​សព​លោក ហូ ជីមិញ ដែល​បាន​ទទួល​មរណភាព​នៅ​ថ្ងៃ​ដដែល​នោះ ហើយ​សម្ដេច សីហនុ គឺជា​ប្រមុខ​រដ្ឋ​នៃ​ប្រទេស​តែ​មួយ​គត់​ដែល​បាន​ទៅ​ចូល​រួម​បុណ្យ​សព​នេះ។ ខុស​ប្លែក​ពី​សម័យ​កាល​សព​លោក ហូ ជីមិញ និង​មេដឹក​នាំ​មួយ​ចំនួន​ក្នុង​ជំនាន់​របស់​ព្រះ​អង្គ ព្រះ​បរម​សព​របស់​សម្ដេច សីហនុ ត្រូវ​បាន​មេដឹកនាំ​កំពូលៗ​ក្នុង​លោក បាន​និង​កំពុង​មក​ឱន​សិរសា នៅ​ចុង​ជើង​នៃ​ព្រះ​បរមសព​របស់​ព្រះ​អង្គ។ ប្រសិន​បើ​ប្រធានាធិបតី​អាមេរិក​លុប​ចោល​ដំណើរ​ទស្សកិច្ច​របស់​ខ្លួន​នៅ នាទី​ចុង​ក្រោយ ឬ​ក៏​មក​ដែរ​តែ​មិន​ចូល​ព្រះបរមរាជវាំង ដើម្បី​ឱន​ក្បាល​គោរព​នៅ​ចុង​ជើង​ព្រះ​បរមសព​ទេ នោះ​ជា​រឿង​ចម្លែក​មួយ​ទៀត​៕

ឆាយ សុផល អ្នកនិពន្ធ​សៀវភៅ និង​អតីត​អ្នក​កាសែត

This content has been locked. You can no longer post any comments.
Show/hide comments
...
លោក​ សុផល សរសេរអត្ថបទហើយ ហេតុអ្វីមិនពិនិត្យផង ៖
១. កិច្ចព្រមព្រៀងក្រុងបារីសគឺ ២៣ តុលា ១៩៩១ មិនមែន ២៣ តុលា ១៩៩០ ទេ
២​. ប្រធានាធិបតី សហរដ្ឋអាមេរិក មកកម្ពុជា ជារឿងមួយរបស់ អាស៊ាន ជាមួយនិងសហរដ្ឋ តែរឿងចូល ប្រធានាធិបតី និងមន្រ្តីជាន់ខ្ពស់អាមេរិក ចូលគោរពវិញ្ញាណក្ខន្ធ ឬ ដែលលោក ប្រើពាក្យ (ឧិនក្បាលគោរព) ព្រះមហាវីរះក្សត្រ នរោត្តម សីហនុ នោះ វាមិនមែនជាសំណងនយោបាយ ស្អីទេ វាជាបុគ្គលជ្រុលនិយមពេកហើយ តែផ្ទុយទៅវិញនេះជា មនោសញ្ជេតនារបស់មនុស្សជាតិ សុទ្ធសាធ ហើយក៏ជាតួនាទីរបស់ថ្នាក់ដឹកនាំ តែប៉ុណ្ណោះ ​........................។
បន្ទាយស្រី on November 14, 2012 Report
vote down vote up Votes: 0
...
What's your purpose to write this topic????? When I read the whole story I know what you want to let other people know already........ unbeleiveable with your purpose.
monyrath on November 14, 2012 Report
vote down vote up Votes: 0
...
If no ASEAN Summit, it is not necessary for the American Leaders to come to Cambodia.
Respect the late king or not , it is up to them .
Veasna on November 14, 2012 Report
vote down vote up Votes: 0
...
ការគោរពគឺជាការជួយរំលែកទុក្ខមិនមែនគេខ្កាចទេ ហើយវាក៍ជាសីលធម៏របស់បុគ្គល​ម្នាក់ៗនេះបើតាមខ្ញុំយល់​
dy on November 14, 2012 Report
vote down vote up Votes: 0
busy