ភ្នំពេញ ប៉ុស្តិ៍
តូក្យូៈ ប្រទេសជប៉ុននឹងព្យាយាមរៀបចំកិច្ចព្រមព្រៀងលុបបំណុល សម្រាប់ប្រទេសមីយ៉ាន់ម៉ាដែលមានកំណែទម្រង់យ៉ាងលឿននេះ នៅក្នុងកិច្ចប្រជុំមូលនិធិរូបិយវត្ថុអន្តរជាតិ (IMF)នាពេលខាងមុខ ក្នុងទីក្រុងតូក្យូ។ នេះបើយោងតាមរដ្ឋមន្ត្រីហិរញ្ញវត្ថុជប៉ុនលោក Jun Azumi បានឲ្យដឹងនៅថ្ងៃសុក្រនេះ។
ជប៉ុនបានលើកលែង បំណុលដែលមិនទាន់សងរបស់មីយ៉ាន់ម៉ាចំនួន ៣.៧ពាន់លានដុល្លារម្តងហើយ កាលពីខែមេសា ដែលនេះជាការបង្ហាញសញ្ញាយ៉ាងច្បាស់ចំពោះគោលបំណងរបស់ទីក្រុងតូក្យូ ក្នុងការឆ្លៀតយកប្រយោជន៍លើការធ្វើឲ្យប្រសើរឡើង ក្នុងបរិបទវិនិយោគ និងតម្រូវការហេដ្ឋារចនាសម្ព័ន្ធជាបន្ទាន់ របស់ប្រទេសមីយ៉ាន់ម៉ា។
ការបោះឆ្នោតនាំម្ចាស់ពាន់រង្វាន់សន្តិភាព Nobel លោកស្រីអ៊ុង សាងស៊ូជីឲ្យក្លាយជាសមាជិកសភាកាលពីខែមេសា គឺជាការជួយផ្លាស់ប្តូរមុខមាត់ប្រទេសសូទ្រះ មីយ៉ាន់ម៉ានេះ និងបានជម្រុញឲ្យលោកខាងលិចចាប់ផ្តើមដកទណ្ឌកម្ម បន្ទាប់ពីមានកំណែទម្រង់យ៉ាងខ្លាំង ក្នុងរយៈពេលមួយ១ ឆ្នាំមកនេះ។
អ្នកវិភាគខ្លះបាននិយាយថា ប្រទេសនេះនឹងមានឳកាស សម្រាប់ឲ្យវិនិយោគបរទេសសម្លឹងមើល ក្នុងការវិនិយោគផ្នែកឧស្សាហកម្ម រាប់ចាប់តាំងពី វិស័យថាមពល រ៉ែ និងសំណង់ រហូតដល់កសិកម្ម ហិរញ្ញវត្ថុនិងទេសចរណ៍ ផងដែរ។
ជប៉ុនដែលបានគ្រប់គ្រងមីយ៉ាន់ម៉ា ដែលគេស្គាល់ថាជាភូមា ក្នុង១៩៤២-៤៥ គឺជាម្ចាស់បំណុលធំជាងគេលើប្រទេសមីយ៉ាន់ម៉ា។
លោក Azumi បានប្រាប់អ្នកសារព័ត៌មាននៅទីក្រុងតូក្យូថា «ពួកយើងចង់ដាក់បញ្ហាបំណុលរបស់មីយ៉ាន់ម៉ា នៅក្នុងការជជែកពិភាក្សាក្នុងកិច្ចប្រជុំ IMF ជាមួយប្រទេសដែលមានការពាក់ព័ន្ធ ដែលជប៉ុនជាអ្នករៀបចំលើបញ្ហានេះ»។
«ប្រសិនបើពួកយើងរៀបចំជម្រុញលើបញ្ហានេះ ប្រទេសមីយ៉ាន់ម៉ានឹងរួចផុតពីទណ្ឌកម្មសេដ្ឋកិច្ច និងក្រុមហ៊ុននានា រួមទាំងក្រុមហ៊ុនជប៉ុន ក៏នឹងអាចទៅវិនិយោគនៅទីនោះយ៉ាងរលូនផងដែរ»។
ក្រសួងហិរញ្ញវត្ថុប្រទេសជប៉ុននិងរៀបចំសន្និសិទ្ធអន្តរជាតិលើបញ្ហាមីយ៉ា់ន់ម៉ា ក្នុងទីក្រុងតូក្យូ នៅថ្ងៃទី ១១ ខែតុលា បន្ទាប់ពីកិច្ចប្រជុំប្រចាំឆ្នាំរបស់ មូលនិធិរូបិយវត្ថុអន្តរជាតិ (IMF) និងធនាគារពិភពលោក។
ជប៉ុនក៏នឹងផ្តល់ប្រាក់កម្ចីចំនួន ៩០០លានដុល្លារ ដើម្បីដោះបំណុលឲ្យមីយ៉ាន់ម៉ា ដែលជំពាក់ធនាគារពិភពលោក និងធនាគារអភិវឌ្ឍន៍អាស៊ី (ADB) តាមរយៈក្រុមធនាគាររបស់ប្រទេសជប៉ុនផ្ទាល់។
សូមបញ្ជាក់ថា ក្រុមធុរៈកិច្ចរបស់ប្រទេសជប៉ុនបានចុះព្រមព្រៀងជាមួយប្រទេសមីយ៉ាន់ម៉ា ក្នុងការរួមគ្នាអភិវឌ្ឍតំបន់សេដ្ឋកិច្ចពិសេសមួយ នៅក្នុងទីក្រុងពាណិជ្ជកម្ម យ៉ានហ្គូន កាលពីខែសីហាកន្លងទៅ។Reuters/លាង ផាន់ណារ៉ា
