Headlines:

សម្រេចឃុំ​ខ្លួន​មេ​ភូមិ​ម្នាក់​និង​ប្រពន្ធ ពី​បទ​ជួញ​ដូរ​គ្រឿង​ញៀន



តុលាការ​សាលា​ដំបូង​ខេត្ត​ឧត្តរ​មាន​ជ័យ បាន​សម្រេច​ឃុំខ្លួន​លោក​មេភូមិ​សែន​សុខ និង​ប្រពន្ធ​របស់​គាត់ បន្ទាប់​ពីបាន​ធ្វើ​ការ​ចោទ​ប្រកាន់​លើ​សំណុំ​រឿង «ជួញដូរ​ដោយ​ខុស​ច្បាប់​នូវ​សារធាតុ​ញៀន» ប្រភេទ​យ៉ាម៉ា​ប្រមាណ​៧០​គ្រាប់ ដែល​បាន​ប្រព្រឹត្ត​កាល​ពី​ថ្ងៃ​ពុធ​សប្តាហ៍​មុន​នេះ នៅ​ចំណុច​ផ្ទះ​ជន​ជាប់​ចោទ ស្ថិត​ក្នុង​ភូមិ​សែន​សុខ ឃុំ​ទំនប់​ដាច់ ស្រុកត្រពាំងប្រាសាទ។

លោក​គយ កាន់យ៉ា ព្រះ​រាជ​អាជ្ញារអម​សាលា​ដំបូង​ខេត្ត​ឧត្តរមាន​ជ័យ​បាន​មាន​ប្រសាសន៍​ប្រាប់​ភ្នំពេញ ប៉ុស្តិ៍​នៅ​ថ្ងៃ​ច័ន្ទនេះថា តុលាការ​ខេត្ត​ឧត្តរ​មាន​ជ័យ កាល​ពី​ថ្ងៃ​សុក្រ​សប្តាហ៍​មុន បាន​សម្រេច​ធ្វើ​ការ​ចោទ​ប្រកាន់​ប្រធាន​ភូមិ​ម្នាក់​ឈ្មោះ​សេង រ៉ា អាយុ​៦០​ឆ្នាំ និង​ប្រពន្ធ​របស់​គាត់ ឈ្មោះ​ភោគ មឿន អាយុ​៥៧​ឆ្នាំ បន្ទាប់​ពី​កម្លាំង​កង​រាជ​អាវុធ​ហត្ថ​ស្រុក​ត្រពាំង​ប្រាសាទ បាន​ចុះ​ស៊ើប​អង្កេត​រក​ឃើញ​វត្ថុ​តាង​ថ្នាំ​ញៀន​ប្រភេទ​យ៉ាម៉ា​ចំនួន​៧០​គ្រាប់ និង​ឧបករណ៍​ប្រើ​ប្រាស់​មួយ​ចំនួន​ទៀត ដែល​មាន​ដប​ទឹក​សុទ្ធ​ ដែក​កេះ និង​ប្រដាប់​ជក់​ផងដែរ ទើប​សម្រេច​ធ្វើ​ការ​ឡោម​ព័ន្ធ​ឃាត់​ខ្លួន​ជន​សង្ស័យ​បញ្ជូន​មក​តុលាការ ដើម្បីចាត់​វិធានការណ៍​តាម​ផ្លូវ​ច្បាប់​តែម្តង។

លោក​បន្តថា បច្ចុប្បន្ន ជន​ជាប់​ចោទ​ទាំង​២នាក់​នេះ កំពុង​រស់នៅ​ក្នុង​តំបន់​កើត​ហេតុ​ខាង​លើ ហើយ​ពួកគេ​ត្រូវ​បាន​តុលាការ​ចោទ​ប្រកាន់​ពី​បទ​ «ជួញដូរ​ខុស​ច្បាប់​នូវ​សារធាតុ​ញៀន» ដោយ​យោង​តាម​មាត្រា​ទី៤០​នៃ​ច្បាប់​ស្តីពី​ការ​ត្រួត​ពិនិត្យ​គ្រឿង​ញៀន​ឆ្នាំ​២០១២។

លោក​បញ្ជាក់​ថា៖​«តុលាការ​បាន​សម្រេច​ឃុំ​ខ្លួន​ជន​ជាប់​ចោទ​ទាំងពីរ​នាក់​នេះ​បណ្តោះ​អាសន្ន នៅ​ពន្ធនាគារ​ខេត្ត​ឧត្តរ​មាន​ជ័យ ហើយ​យើង​មិន​ដឹង​ថា តើ​សំណុំ​រឿង​នេះ​និង​ត្រូវ​ធ្វើ​ការ​កាត់​ក្តី​នៅ​ពេល​ណា​នោះ​ទេ»។

បើ​តាម​ចម្លើយ​សារភាព​របស់​ជន​ជាប់​ចោទ​ទាំង​២នាក់​ខាង​លើនេះ បាន​អះអាង​ប្រាប់​សមត្ថកិច្ច​ថា ឈ្មោះសេង រ៉ា បាន​ធ្វើ​ការ​បដិសេធន៍​ថា ខ្លួន​មិន​បាន​ជាប់​ពាក់​ព័ន្ធ​និង​ករណី​លក់​ថ្នាំ​ញៀន​ទាំង​អស់​នេះ​ទេ ប៉ុន្តែ​កន្លង​មក​នេះ គឺ​មាន​ជន​សង្ស័យ​ម្នាក់​ទៀត បាន​ផ្ញើថ្នាំ​ញៀន​ទាំង​អស់​នេះ​ទុក​នៅ​ក្នុង​ផ្ទះ​របស់​គាត់។

បើ ទោះ​បីជា​ជន​ជាប់​ចោទ​សេង រ៉ា បាន​ឆ្លើយ​យ៉ាង​នេះក្តី ប៉ុន្តែ​បើ​តាម​ចម្លើយ​សារភាព​របស់​ឈ្មោះ​ភោគ មឿន ដែល​ត្រូវ​ជា​ប្រពន្ធ​បាន​ប្រាប់​ឲ្យ​ដឹង​ថា គាត់​ទើប​តែ​ចាប់​ផ្តើម​លក់​ថ្នាំ​ញៀន​លើក​ទី១​ប៉ុណ្ណោះ​នៅ​ក្នុង​តំបន់​របស់​គាត់។

This content has been locked. You can no longer post any comments.
Show/hide comments
busy