ភ្នំពេញ ប៉ុស្តិ៍
ភ្នំពេញៈ ក្រសួងការបរទេស និងសហប្រតិបត្តិការកម្ពុជា បានចេញនូវសេចក្តីជូនដំណឹងមួយ ដែលនឹងមានប្រមុខរដ្ឋ ប្រមុខរដ្ឋាភិបាល និងប្រធាន នៃបណ្តាអង្គការដែគូរអភិវឌ្ឍន៍អាស៊ាន ដែលនឹងអញ្ជើញមកចូលរួមកិច្ចប្រជុំ កំពូលអាស៊ានលើកទី២១ និងកិច្ចប្រជុំពាក់ព័ន្ធផ្សេងៗនោះ ក៏នឹងមកគោរពព្រះវិញ្ញាណក្ខន្ធ សម្តេចព្រះនរោត្តម សីហនុផងដែរ។
ប៉ុន្តែ ក្នុងសេចក្តីជូនដំណឹងនោះ មិនមានឈ្មោះលោក បារ៉ាក់ អូបាម៉ាឡើយ។
យោងតាមសេចក្តីជូនដំណឹងបានឲ្យដឹងថា នៅថ្ងៃទី១៨ ខែវិច្ឆិកា ឆ្នាំ២០១២ វេលាម៉ោង ១៧ ល្ងាច លោក យ៉ូស៊ីហ៊ីកូ ណូដា ( Yoshihiko Noda ) នាយករដ្ឋមន្ត្រីជប៉ុន និងលោកជំទាវ។ និង នៅវេលាម៉ោង ១៨ និង ៣០ នាទី លោក វេន ជាប៉ាវ ( Wen Jiabao ) នាយករដ្ឋមន្ត្រីនៃសាធារណរដ្ឋប្រជាមានិតចិន។
នៅថ្ងៃទី១៩ ខែវិច្ឆិកា ឆ្នាំ២០១២ វេលាម៉ោង ៩ ព្រឹក លោក ណាអូយ៉ូគី ស៊ីណូហារ៉ា ( Naoyuki Shinohara ) នាយករងគ្រប់គ្រងរូបិយវត្ថុអន្តរជាតិ IMF។ នៅវេលាម៉ោង ១០ និង ៣០ នាទី ព្រឹក លោក ម៉ាន់ម៉ូហាន់ ស៊ីង ( Manmohan Singh ) នាយករដ្ឋមន្ត្រី នៃសាធារណរដ្ឋឥណ្ឌា និងលោកជំទាវ។ ហើយវេលាម៉ោង ១៥ និង ៤៥ នាទី រសៀល លោក ម៉ូហាមាដ ណាជីប ហាជី អាប់ឌុល រ៉ាហ្សាស ( Modh Najib Hj Abdul Razak ) នាយករដ្ឋមន្ត្រី ម៉ាឡេស៊ី និងលោកជំទាវ។ ចំណែកឯ វេលាម៉ោង ១៦ ល្ងាច លោកស្រី ជូលា ហ្គៀលឡាត ( Julia Gillard ) នាយករដ្ឋមន្ត្រីអូស្ត្រាលី និងស្វាមី។
នៅថ្ងៃទី២០ ខែវិច្ឆិកា ឆ្នាំ២០១២ វេលាម៉ោង ១១ និង ១៥ នាទី ព្រឹក លោក សៀរ៉ាហ្គៃ ឡាវរ៉ូវ ( Sergey Lavrov ) រដ្ឋមន្ត្រីការបរទេស រុស្ស៊ី។ វេលាម៉ោង ១១ និង ៣០ នាទី ព្រឹក លោក ស៊ូស៊ីឡូ បាមបាំង យ៉ូដូយូណូ ( Susilo Bambang Yudhoyono ) ប្រធានាធិបតី នៃសាធារណរដ្ឋ ឥណ្ឌូណេស៊ី។ នៅវេលាម៉ោង ១១ និង ៤៥ នាទី ព្រឹក លោកស្រី ស្រី មូលីយ៉ានី អ៊ីឌ្រាវ៉ាទី ( Sri Mulyani Indrawati ) នាយកគ្រប់គ្រងធនាគារពិភពលោក។ វេលាម៉ោង ១២ លោក ប៉ាស្កាល ឡាមី ( Pascal lamy ) អគ្គនាយកអង្គការពាណិជ្ជកម្មពិភពលោក។ វេលាម៉ោង ១៥ និង ៣០ នាទី រសៀល លោក ហារ៉ូហ៊ីកូ កូរុដា ( Haruhiko Kuroda ) ប្រធានធនាគារអភិវឌ្ឍន៍អាស៊ី។
នៅថ្ងៃទី២១ ខែវិច្ឆិកា ឆ្នាំ២០១២ វេលាម៉ោង ៩ និង ៣០ នាទី ព្រឹក លោក ចន ឃី ( John Key ) នាយករដ្ឋមន្ត្រី ញ៉ូវ ហ្សឺឡែន។
