Headlines:

ការ​បង់​ពន្ធ​អចលន​ទ្រព្យ​ត្រូវ​ពន្យារ​ពេល​ដល់​ចុង​ខែ​វិច្ឆិកា



121108_04b
អគារ​របស់​អគ្គនាយកដ្ឋាន​ពន្ធដារ ។ រូបថត ផា លីណា

ភ្នំពេញ:​អគ្គ​នាយក​ដ្ឋាន​ពន្ធដារ​នៃ​ក្រសួង​សេដ្ឋកិច្ច​និង​ហិរញ្ញវត្ថុ​បាន​ចេញ​សេចក្តី​ជូន​ដំណឹង​មួយ​ស្តី​អំពី​ការ​ពន្យារ​ពេល​នៃ​ការ​បង់​ពន្ធ​លើ​អចលន​ទ្រព្យ​សម្រាប់​ឆ្នាំ​២០១២​នេះ ខណៈ​ដែល​ការ​ផ្តល់​សេវា​កម្ម​ប្រមូល​ពន្ធ​មិន​បាន​ទាន់​ពេល​វេលា​ជូន​ប្រជា​ពលរដ្ឋ។

យោង​តាម​សេចក្តី​ជូន​ដំណឹង​របស់​អគ្គនាយក​ដ្ឋាន​ពន្ធដារ​ដែល​បាន​ចុះ​ហត្ថលេខា​កាល​ពី​ថ្ងៃទី​២៦​ខែ​តុលា ឆ្នាំ​២០១២​បាន​ឲ្យ​ដឹង​ថា អគ្គនាយក​ដ្ឋាន​ពន្ធដារ​សម្រេច​ពន្យារ​ពេល​ប្រមូល​ពន្ធ​លើ​អចលន​ទ្រព្យ​ម្តង​ទៀត​រហូត​ដល់​ថ្ងៃ​ទី៣០​ខែ​វិច្ឆិកា​ឆ្នាំ​២០១២​នេះ។

សេចក្តី​ជូន​ដំណឹង​បាន​បញ្ជាក់​ថា​៖«នៅ​មាន​ម្ចាស់​អចលន​ទ្រព្យ​ជា​ច្រើន​បាន​និង​កំពុង​មមា​ញឹក​មក​ប្រកាស​បង់​ពន្ធ​នៅ​តាម​បណ្តា​សាខា​ពន្ធដារ​ខេត្ត​ខណ្ឌ ដូច្នេះ​បាន​ជា​ការ​ផ្តល់​សេវា​ជូន​អ្នក​ជាប់​ពន្ធ​មិន​បាន​ទាន់​ពេល​វេលា​»។

ជាង​នេះ​ទៅ​ទៀត​ដើម្បី​ផ្តល់​លទ្ធ​ភាព​កាន់​តែ​ងាយ​ស្រួល​ដល់​ម្ចាស់​អចលន​ទ្រព្យ​អគ្គ​នាយក​ដ្ឋាន​ពន្ធដារ​បាន​រៀប​ចំ​ចាត់​ចែង​ផ្តល់​សេវា​ប្រមូល​ពន្ធ​នៅ​ថ្ងៃ​សៅរ៍​និង​ថ្ងៃ​អាទិត្យ​បន្ថែម​ទៀត។

លោក​អោម ចន អគ្គនាយក​រង​នៃ​អគ្គនាយក​ដ្ឋាន​ពន្ធដារ មិន​បាន​ធ្វើ​សេចក្តី​អត្ថា​ធិប្បាយ​លម្អិត​ទាក់​ទង​នឹង​បញ្ហា​នេះ​ទេ​ដោយ​លោក​មាន​ប្រសាសន៍​យ៉ាង​ខ្លី​ថា៖​«​នេះ​ជា​កិច្ចការ​របស់​ថ្នាក់​លើ​ខ្ញុំ​មិន​ដឹង​ឆ្លើយ​ថា​ម៉េច​ទេ ហើយ​ពេល​នេះ​ខ្ញុំ​កំពុង​ជាប់​រវល់​ប្រជុំ»​។

យោង​តាម​របាយ​ការណ៍​របស់​អគ្គ​នាយក​ដ្ឋាន​ពន្ធដារ​កាល​ពី​ឆ្នាំ​២០១១​បង្ហាញ​ថា ចំណូល​ពន្ធ​លើ​អចលន​ទ្រព្យ​មាន​ចំនួន​ជិត​១២​លាន​ដុល្លារ​អាមេរិក ដែល​មាន​អចលន​ទ្រព្យ​សរុប​ទាំង​អស់​ចំនួន​១១៣ ៨៨៥​កន្លែង​៕