Headlines:

Bali Scenery គ្រោង​បញ្ចប់​គម្រោង​នៅ​ឆ្នាំ​២០១៥



121220_02
ការ​ដ្ឋាន​គម្រោង Bali Scenery ដែល​មានទីតាំង​ជិត​ស្ពាន​ហង្ស នៃ​ទីក្រុង​កោះពេជ្រ ​។ រូបថត ហុង មិនា

ភ្នំពេញៈ ក្រុមហ៊ុន Bali Resort គ្រោង​បញ្ចប់​គម្រោង​ខុនដូ Bali Scenery ដែល​មាន​កម្ពស់​កប់​ពពក​នៅ​ឆ្នាំ​២០១៥​ខាង​មុខ បន្ទាប់​ពី​បាន​ចាប់​ផ្តើម​ដំណើរ​ការ​សាង​សង់​កាល​ពី​ពាក់​កណ្តាល​ខែ​តុលា​កន្លង​មក​។

លោក​វិស្វករ អួង គឹមសាយ ប្រធាន​គ្រប់​គ្រង​ការ​ដ្ឋាន​សាង​សង់​នៃ​គម្រោង Bali Scenery បាន​ប្រាប់​ថា គម្រោង​សាង​សង់​ខុនដូ​នេះ​ជា​ផ្នែក​មួយ​នៃ​គម្រោង​សាង​សង់​អាផាតមិន និង​ខុនដូ​ជា​ច្រើន​របស់​ក្រុមហ៊ុន Bali Resort។ គម្រោង​ដែល​មាន​ទី​តាំង​នៅ​កោះ​ពេជ្រ​នេះ​មាន​ខុនដូ​ចំនួន​ពីរ​គឺទី១​អគារ​កម្ពស់​២០​ជាន់​ចំនួន១ ដែល​គ្រោង​នឹង​បញ្ចប់​ការ​សាង​សង់​ឆ្នាំ​២០១៤​និង​គម្រោង​ទី​២ អគារ​ខុនដូ​កម្ពស់​៣១​ជាន់​ដែល​គ្រោង​នឹង​បញ្ចប់​ការ​សាង​សង់​នៅ​ឆ្នាំ​២០១៥​ខាង​មុខ​ដោយ​គ្រោង​ចំណាយ​ថវិកា​សរុប​ប្រមាណ​៣០​លាន​ដុល្លារ​អាមេរិក​ដោយ​មិន​ទាន់​គិត​បញ្ចូល​តម្លៃ​ដីធ្លី​នៅ​ឡើយ​ទេ​។

លោក​បន្តថា​៖​«គម្រោង​នេះ​នឹង​ទទួល​បាន​ជោគ​ជ័យ​ដោយ​សារ​វា​ស្ថិត​នៅ​ទីតាំង​ល្អ​អំណោយ​ផល​ដល់​ការ​រស់​នៅ»​។ អគារ​ខុនដូ​ទី១​មាន​ចំនួន​៩ Unit ក្នុង​មួយ​ជាន់​ដោយ​មាន​ទំហំ​៨៦០​ម៉ែត្រ​ការ៉េ​ក្នុង​មួយ​ជាន់​ឯ​អគារ​ទី២​មាន​ចំនួន​១៤​Unit មាន​ទំហំ​១១៤៤​ម៉ែត្រ​ការ៉េ​ក្នុង​មួយ​ជាន់ៗ​។

លោក គឹម​សាយ បាន​បន្ត​ថា គម្រោង​នេះ​ត្រូវ​បាន​គូរ​ប្លង់​ហើយ​សាង​សង់​ដោយ​វិស្វករ​និង​ស្ថាបត្យករ​ជនជាតិ​ខ្មែរ​ទាំង​អស់ ព្រោះ​បច្ចុប្បន្ន​ខ្មែរ​មាន​បទ​ពិសោធ និង​ចំណេះ​ដឹង​មិន​ចាញ់​វិស្វករ​មក​ពី​បរទេស​ឡើយ​។

លោក លឿង ជី ប្រធាន​ផ្នែក​ទីផ្សារ​នៃ​គម្រោង Bali Scenery បាន​និយាយ​ថា រហូត​មក​ដល់​ពេល​នេះ​គម្រោង​ទាំង​ពីរ​លក់​បាន​ជាង​៥០​ភាគរយ​ហើយ​។​យើង​រំពឹង​ថា គម្រោង​ទាំង​មូល​នឹង​លក់​អស់​នា​ពេល​ឆាប់​ៗ​នេះ ព្រោះ​គម្រោង​នេះ​ស្ថិត​នៅ​ចំ​ទីតាំង​ល្អ​មាន​បរិយា​កាស​អំណោយ​ផល។ លោក​បន្ត​ថា​៖​«​គម្រោង Bali Scenery ល្អ​ណាស់​បើ​ទោះបី​ជា​មិន​ទិញ​សម្រាប់​ស្នាក់​នៅ​ក៏​អតិថិជន​អាច​ទិញ​ទុក​សម្រាប់​ជួល​បាន​ផង​ដែរ ដោយ​ក្នុង​១ Unit មាន​តម្លៃ​ចាប់​ពី​១០០.០០០ដុល្លារ​ឡើង​ទៅ»។

លោក ឌឹត ចណ្ណា ប្រធាន​គ្រប់​គ្រង​ក្រុមហ៊ុន​អចលន​ទ្រព្យ​វីអឹមស៊ី មាន​ប្រសាសន៍​ថា​ទីតាំង​ខុនដូ​នេះ​ស្ថិត​នៅ​ចំ​កន្លែង​ល្អ​លេខ​១​ព្រោះ​មាន​ទីតាំង​នៅ​ជាប់​ទន្លេ​និង​តំបន់​ពាណិជ្ជកម្ម​ដែល​មាន​សេវាកម្ម​ចម្រុះ​ដូច​ជា​ផ្សារ​ទំនើប​សាលារៀន​អន្តរជាតិ​ធនាគារ និង​សេវាកម្ម​ជា​ច្រើន​ទៀត​ដែល​សម្រួល​ដល់​ការ​រស់​នៅ​ប្រកប​ដោយ​ផាសុកភាព​។ គម្រោង​នេះ​ក៏​ជា​ផ្នែក​មួយ​ដែល​ជួយ​លើក​កម្ពស់​សោភណ​ភាព​រាជធានី​ភ្នំពេញ​និង​ទាក់​ទាញ​ភ្ញៀវ​ទេសចរ​ផង​ដែរ​។

លោក​បាន​បញ្ជាក់​ថា​៖​«​ខ្ញុំ​គិត​ថា គម្រោង​Bali Scenery នឹង​ទទួល​បាន​ជោគ​ជ័យ ប៉ុន្តែ​អ្វី​ៗក៏​អាស្រ័យ​ទៅ​លើ​ការ​ដាក់​តម្លៃ និង​គុណភាព​សំណង់​ផង​ដែរ»៕

លោក ស៊ឹង ប៊ុណ្ណា អគ្គ​នាយក​ក្រុមហ៊ុន ប៊ុណ្ណា រៀល​ធី​គ្រុប និង​ជា​ប្រធាន​សមាគម​អ្នក​វាយ​តម្លៃ និង​ភ្នាក់​ងារ​អចលន​វត្ថុ​កម្ពុជា មាន​ប្រសាសន៍​ថា​ទីតាំង​នេះ​អាច​ចាត់​ទុក​ថា ជា​តំបន់​លំនៅ​ដ្ឋាន​លេខ​១​បើ​គិត​ពី​គោល​ដៅ​របស់​អតិថិជន​គឺ​អាច​ប្រៀប​ធៀប​ជាមួយ​Rose Condo បាន​ប៉ុន្តែ​អ្វី​ដែល​សំខាន់​គឺ​គុណភាព​និង​ការ​រចនា​អគារ​របស់​ក្រុមហ៊ុន​អភិវឌ្ឍន៍​ផ្ទាល់​តែ​ប៉ុណ្ណោះ។

លោក​បាន​អះអាង​ថា​៖​«​ភាព​ជោគជ័យ​របស់​គម្រោង​នេះ​វា​អាស្រ័យ​ទៅ​លើ​ការ​លក់​ការ​គ្រប់​គ្រង​ការ​លក់​ការ​រចនា​និង​គុណភាព​របស់​អគារ»​៕