Headlines:

អាជីវកម្ម​​​ក្រុម​ហ៊ុន​ខ្មែរ​រៀល​អេស្ទេត​កាន់​តែ​ល្អ​ប្រសើរ



121220_05
លោក គីម ហ៊ាង​ ប្រធានក្រុមហ៊ុនអចលន​ទ្រព្យ ខ្មែរ រៀលអេស្ទេត ។ រូប​ថត សហការី

ភ្នំពេញ : ខណៈ​ការ​រីក​ចម្រើន​កម្រិត​ជីវភាព និង​តម្រូវ​ការ​លំនៅដ្ឋាន​ក៏​ដូច​ជា​ដី​សម្រាប់​ប្រកប​របរ​ផ្សេងៗ​កំពុង​តែ​កើត​មាន​ឡើង​ជា​ប្រចាំ​នោះ​គេ​សង្កេត​ឃើញ​ថា នា​ពេល​បច្ចុប្បន្ន​នេះ​មាន​ក្រុមហ៊ុន​បម្រើ​សេវាកម្ម​ផ្នែក​អចលន​ទ្រព្យ​ជា​ច្រើន​បាន​កើត​ឡើង​បន្ទាប់​ពី​បាន​បិទ​ទ្វារ​អស់​យ៉ាង​ច្រើន​កាល​ពី​អំឡុង​ចុង​ឆ្នាំ​២០០៨​។

សេវាកម្ម​អចលន​ទ្រព្យ​នេះ​មាន​ជា​យូរ​ណាស់​មក​ហើយ​នៅ​កម្ពុជា ប៉ុន្តែ​វា​មិន​មាន​រូប​ភាព​ជា​ក្រុមហ៊ុន​ច្បាស់​លាស់​នោះ​ទេ រហូត​ដល់​ឆ្នាំ​១៩៩១ គឺ​នៅ​ពេល​មាន​កង​រក្សា​សន្តិភាព​របស់​អង្គការ​សហ​ប្រជា​ជាតិ​ចូល​មក​រក្សា​សន្តិភាព​នៅ​កម្ពុជា​ទើប​ក្រុមហ៊ុន​អចលន​ទ្រព្យ​ចាប់​ផ្តើម​មាន​រូប​រាង​ជា​បណ្តើរ​ៗ។

ដោយ​មើល​ឃើញ​ពី​តម្រូវ​ការ​នៃ​ទីផ្សារ​សេវាកម្ម​អចលន​ទ្រព្យ​ចេះ​តែ​មាន​ទំហំ​កាន់​តែ​ធំ​ឡើង​ៗ​ជា​ប្រចាំ​លោក គីម ហ៊ាង ដែល​ធ្លាប់​មាន​បទ​ពិសោធ​ច្រើន​ជាមួយ​នឹង​មុខ​ជំនាញ​នេះ​ក៏​សម្រេច​ចិត្ត​បើក​ក្រុមហ៊ុន​ផ្ទាល់​ខ្លួន​មួយ​ដែល​មាន​ឈ្មោះ​ថា ខ្មែរ រៀល​អេស្ទេត​មាន​ទីតាំង​នៅ​តាម​បណ្តោយ​មហា​វិថី​កម្ពុជា​ក្រោម នា​ដើម​ឆ្នាំ​២០០៧។

អគ្គ​នាយក​ក្រុមហ៊ុន ខ្មែរ រៀល​អេស្ទេត លោក គីម ហ៊ាង បាន​ថ្លែង​ថា ការ​ដែល​លោក​សម្រេច​ចិត្ត​បើក​ក្រុមហ៊ុន​ដោយ​ខ្លួន​ឯង​នោះ​ពីព្រោះ​លោក​គិត​ថា បច្ចុប្បន្ន​នេះ​ប្រជាពល​រដ្ឋ​មាន​ការ​យល់​ដឹង​ច្រើន ដូច្នេះ​នៅ​ពេល​ដែល​ពួក​គេ​ចង់​ទិញ-លក់​អចលន​ទ្រព្យ​ពួក​គេ​តែង​ត្រូវ​ការ​អ្នក​ដែល​មាន​ជំនាញ​ច្បាស់​លាស់​ឲ្យ​ជួយ​បំពេញ​ការងារ​របស់​ពួក​គេ​។

លោក​បាន​ថ្លែង​ថា​៖​«​ចាប់​តាំង​ពី​ខ្ញុំ​បើក​ក្រុមហ៊ុន​មក​មាន​អតិថិជន​យ៉ាង​ច្រើន ទាំង​ជន​ជាតិ​ខ្មែរ និង​បរទេស​បាន​មក​រក​ឲ្យ​ក្រុមហ៊ុន​របស់​ខ្ញុំ​ជួយ​ដល់​ពួក​គេ​ទាក់​ទង​ទៅ​នឹង​ការ​ទិញ-លក់​អចលន​ទ្រព្យ​គ្រប់​ប្រភេទ​។ បច្ចុប្បន្ន​នេះ​ក្រុមហ៊ុន ខ្មែរ រៀល​អេស្ទេត គឺ​ប្រៀប​ដូច​ជា​ធនាគារ​ឯក​ទេស​មួយ​អ៊ីចឹង ដោយ​ក្រុមហ៊ុន​របស់​យើង​កំណត់​ជ្រើស​រើស​យក​តំបន់​ធ្វើ​ពាណិជ្ជកម្ម​និង​លំនៅ​ដ្ឋាន​តែ​នៅ​ក្នុង​រាជធានី​ភ្នំពេញ​តែ​ប៉ុណ្ណោះ»។

ជា​ទូទៅ​ក្រុមហ៊ុន​អចលនទ្រព្យ​មាន​ប្រាក់​ចំណូល​មិន​ថេរ​នោះ​ទេ ពីព្រោះ​ក្រុមហ៊ុន​បម្រើ​សេវា​កម្ម​អចលន​ទ្រព្យ គឺ​ប្រៀប​បាន​ទៅ​នឹង​ក្រុម​ហ៊ុន​ឱកាស​និយម​ដែរ គឺ​តែង​មាន​ការ​ប្រកួត​ប្រជែង​គ្នា​ជា​ប្រចាំ។ ទោះបី​យ៉ាង​ណា​នៅ​ឆ្នាំ​២០១២​នេះ ការ​ប្រកប​អាជីវកម្ម​របស់​ក្រុមហ៊ុន​ខ្មែរ រៀល​អេស្ទេត បាន​កើន​ឡើង​រហូត​ដល់​ទៅ​៥០​ភាគ​រយ​បើ​ប្រៀប​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​២០១១​កន្លង​មក។

លោក គីម ហ៊ាង បាន​និយាយ​ថា ការ​ដែល​ក្រុមហ៊ុន​ខ្មែរ រៀល​អេស្ទេត មាន​ដំណើរ​ការ​ល្អ​បែប​នេះ​ក៏​ដោយ​សារ​តែ​លោក​មាន​យុទ្ធសាស្រ្ត​ល្អ​គឺ​វាយ​លុក​ចំ​គោល​ដៅ​ដោយ​ប្រើ​ពេល​ខ្លី និង​ចំណាយ​ថវិកា​តិច ចំណែក​ឯ​បុគ្គលិក​របស់​លោក​សុទ្ធ​តែ​ជា​អ្នក​ដែល​មាន​ចំណេះ​ដឹង​ខ្ពង់​ខ្ពស់ អាច​ប្រើប្រាស់​ភាសា​បរទេស​បាន​ល្អ​និង​មាន​ក្រម​សីលធម៌​វិជ្ជា​ជីវៈ​ទៀត​ផង​។ លោក​បាន​ថ្លែង​ថា៖​«​ការ​កំណត់​ពេល​វេលា ខ្ទង់​ចំណាយ​និង​ការ​ធ្វើ​ការងារ​ជាមួយ​អតិថិជន​ប្រកប​ដោយ​ភាព​ច្បាស់​លាស់ ជា​ហេតុ​ផល​ដែល​ធ្វើ​ឲ្យ​ក្រុមហ៊ុន​របស់​ខ្ញុំ​ទទួល​បាន​ជោគ​ជ័យ​»។

នៅ​ពេល​ដែល​ពិភពលោក​ជួប​នឹង​វិបត្តិ​សេដ្ឋកិច្ច​កាល​ពី​អំឡុង​ឆ្នាំ​ពាក់​កណ្តាល​ឆ្នាំ​២០០៨​មាន​ក្រុមហ៊ុន​បម្រើ​សេវាកម្ម​អចលន​ទ្រព្យ​ជា​ច្រើន​បាន​ផ្អាក​សកម្មភាព ឬ​ក៏​បិទ​ទ្វារ​តែ​ម្តង​ខណៈ​ពេល​នោះ​ក្រុមហ៊ុន ខ្មែរ រៀល​អេស្ទេត ក៏​ជួប​បញ្ហា​បាត់​បង់​អតិថិជន​និង​ប្រាក់​ចំណូល​ផង​ដែរ​។ លោក​គីម ហ៊ាង បាន​និយាយ​ថា នៅ​ពេល​នោះ​សេវាកម្ម​ធនាគារ សេវាកម្ម​រៀប​ចំ​និង​សិក្សា​គម្រោង​ប្លង់ ឬ​សេវាកម្ម​រៀប​ចំ​តុប​តែង​លម្អ​ផ្សេងៗ​សុទ្ធ​តែ​ជួប​នឹង​បញ្ហា​ដូច​ៗគ្នា​ប៉ុន្តែ​ពេល​នេះ​អ្វី​ៗ​បាន​ល្អ​ប្រសើរ​ឡើង​វិញ​ហើយ។

តែ​ទោះ​បី​ជា​យ៉ាង​ណា លោក​បាន​និយាយ​ថា ស្ថានភាព​ទីផ្សារ​អចលន​ទ្រព្យ​នៅ​កម្ពុជា​នា​ពេល​បច្ចុប្បន្ន​នេះ មិន​គួរ​ពង្រីក​ក្រុមហ៊ុន​បម្រើ​សេវា​បែប​នេះ​បន្ថែម​ទៀត​ទេ​ព្រោះ​នៅ​ពេល​នេះ​យើង​ត្រូវ​ពង្រឹង​គុណ​ភាព​របស់​ក្រុមហ៊ុន​ទាំង​អស់​ជា​ចម្បង​សិន។ ប៉ុន្តែ​រយៈ​ពេល​៣​ទៅ​៥​ឆ្នាំ​ខាង​មុខ​ទៀត​តម្រូវ​ការ​ក្រុមហ៊ុន​បម្រើ​សេវាកម្ម​អចលន​ទ្រព្យ​នឹង​មាន​ការ​កើន​ឡើង​ព្រោះ​នៅ​ឆ្នាំ​២០១៥​ខាង​មុខ​កម្ពុជា​នឹង​ត្រូវ​ធ្វើ​សមាហរណកម្ម​ក្នុង​តំបន់​អាស៊ាន​។

លោក គីម ហ៊ាង បាន​បញ្ជាក់​ថា៖​«​យើង​សង្ឃឹម​ថា​នៅ​ថ្ងៃ​អនាគត​វិស័យ​អចលន​ទ្រព្យ​ប្រទេស​កម្ពុជា​អាច​នឹង​មាន​ភាព​ល្អ​ប្រសើរ​ខ្លាំង​ជាង​ពេល​នេះ ពី​ព្រោះ​កំណើន​ប្រជាជន​នៅ​កម្ពុជា​មាន​ជា​រៀង​រាល់​ឆ្នាំ​ដូច្នេះ​តម្រូវ​ការ​លំនៅ​ដ្ឋាន​ស្នាក់​នៅ​និង​តម្រូវ​ការ​ដី​ធ្លី​សម្រាប់​ការ​ប្រកប​អាជីវកម្ម​ផ្សេង​ៗ​ប្រាកដ​ជា​កើន​ឡើង​ជា​មិន​ខាន​»​៕