Headlines:

កម្ចី​ឥណ​ទាន​អចលន​ទ្រព្យ​ធនាគារ​អេស៊ីលីដា​បន្ត​កើន​



121115_09
ប្រាក់​កម្ចី​របស់​ធនាគារ អេស៊ីលីដា ទាក់​ទង​នឹង​វិស័យ​អចលន​ទ្រព្យ​ បន្ត​កើន​ឡើង​។ ម៉ៃ វិរៈ​

ភ្នំពេញៈ ការ​ប្រើ​ប្រាស់​ប្រាក់​កម្ចី​ពី​ធនាគារ​ដើម្បី​ទិញ និង​អភិវឌ្ឍ ឬ​កែ​លម្អ​លំនៅ​ដ្ឋាន​នៅ​ដំណាច់​ខែ​កញ្ញា​ឆ្នាំ​២០១២​នេះ​បាន​កើន​ឡើង​ខណៈ​សេដ្ឋ​កិច្ច​នៅ​តែ​មាន​កំណើន​ខ្ពស់ ហើយ​តម្រូវ​ការ​ប្រាក់​កម្ចី​នៅ​តែ​បន្ត​កើន​ដែរ នេះ​បើ​យោង​តាម​ការ​ឲ្យ​ដឹង​ពី​អ្នក​ជំនាញ​ផ្នែក​ធនាគារ​នៅ​កម្ពុជា។

អ្នកស្រី​សូ​ភណ្ឌនារី​អនុ​ប្រធាន​នាយក​ប្រតិបត្តិ​ធនាគារ​អេស៊ីលីដា​បាន​ថ្លែង​ថា ចាប់​តាំង​ពី​វិស័យ​ធនាគារ​នៅ​កម្ពុជា​បើក​ឲ្យ​មាន​សេវាកម្ម​កាន់​តែ​ទូលាយ ស្រប​គ្នា​ទៅ​នឹង​កំណើន​សេដ្ឋកិច្ច​នោះ​យើង​ឃើញ​ថា​កម្រិត​ជីវភាព​ប្រជាជន​កាន់​តែ​មាន​ការ​កើន​ឡើង​រីឯ​ចំនួន​អ្នក​ខ្ចី​ប្រាក់​ពី​ធនាគារ​របស់​យើង​ក៏​បាន​កើន​ឡើង​ដែរ ដោយ​នៅ​ដំណាច់​ខែ​កញ្ញា​មាន​ចំនួន​១០​១៥៧​នាក់ ដែល​មាន​ទឹក​ប្រាក់​ប្រមាណ​១៣២,១១​លាន​ដុល្លារ​អាមេរិក ខណៈ​កាល​ពី​ឆ្នាំ​២០១០ មាន​អតិថិជន​៤៣២១​នាក់ គិត​ជា​ទឹក​ប្រាក់​កម្ចី​មាន​៧១,៨​លាន​ដុល្លារ​ប៉ុណ្ណោះ ដោយ​ចំនួន​អ្នក​ខ្ចី​បាន​កើន​ឡើង​១៣៥​ភាគរយ។

អ្នក​ស្រី​បន្ត​ថា មិន​ត្រឹម​តែ​កម្ចី​ឥណទាន​វិស័យ​អចលន​ទ្រព្យ​ប៉ុណ្ណោះ​ទេ​ដែល​កើន​ឡើង​ពេល​នេះ​វិស័យ​កសិកម្ម​ក៏​កើន​ឡើង​ដែរ ពោល​គឺ​កម្ចី​ឥណទាន​វិស័យ​កសិកម្ម​មាន​អ្នក​ខ្ចី​ដល់​ទៅ​១៣៥,៧៧៤​នាក់​ដែល​មាន​ប្រាក់​សរុប​ចំនួន​២១៤,២៥លាន​ដុល្លារ​អាមេរិក។ អ្នក​ស្រី​បាន​បញ្ជាក់​ថា​៖​«កម្ចី​ឥណទាន​នេះ​អាច​ឲ្យ​ប្រជាជន​មាន​លំនៅ​ដ្ឋាន​ស្នាក់​នៅ​ផង និង​អាច​មាន​ដើម​ទុន​សម្រាប់​ធ្វើ​អាជីវកម្ម​ផ្ទាល់​ខ្លួន​ផង​ដែរ។ កាល​ពី​មិន​ទាន់​មាន​ឥណទាន​ប្រភេទ​នេះ​ប្រជាជន​ណា​ចង់​មាន​លំនៅដ្ឋាន​ឬ​ចង់​បង្កើត​មុខ​របរ​អ្វី​មួយ​ទាល់​តែ​មាន​ប្រាក់​ខ្លួន​ឯង ឬ​ខ្ចី​បុល​ពី​បង​ប្អូន​និង​មិត្ត​ភក្តិ​ទើប​អាច​បំពេញ​បំណង​នេះ​បាន ប៉ុន្តែ​ឥឡូវ​នេះ​មាន​ធនាគារ គឺ​វា​គ្រប់​គ្រាន់​ហើយ​ងាយ​ស្រួល​ទៀត​ផង»។

អ្នកស្រី​ងួន​សុខា​អគ្គ​នាយក​ធនាគារ​ជាតិ​កម្ពុជា​មាន​ប្រសាសន៍​ថា កម្ចី​ឥណទាន​ពី​ធនាគារ និង​វិស័យ​អចលន​ទ្រព្យ​ធ្លាប់​បាន​កើន​ឡើង​យ៉ាង​ច្រើន​នៅ​មុន​ពេល​មាន​វិបត្តិ​សេដ្ឋកិច្ច​ពិភព​លោក ប៉ុន្តែ​នៅ​ពេល​មាន​វិបត្តិ​មក​ដល់​វិស័យ​ទាំង​នេះ​ក៏បាន​ថមថយ​វិញ គឺ​វា​ទើប​តែ​រីក​ចម្រើន​វិញ​តែ​ប៉ុណ្ណោះ​ពេល​នេះ។ អ្នក​ស្រី​បន្ត​ថា កំណើន​ផលិត​ផល​សរុប​នៅ​ក្នុង​ស្រុក​ត្រូវ​រាជ​រដ្ឋាភិបាល​កម្ពុជា​បាន​ប៉ាន់​ប្រមាណ​ថា​បាន​កើន​ឡើង​៧​ភាគរយ រួម​នឹង​វិស័យ​កសិកម្ម ឧស្សាហកម្ម និង​សេវាកម្ម។

អ្នក​ស្រី​បញ្ជាក់​ថា បច្ចុប្បន្ន​នេះ​កម្ពុជា​ជា​ប្រទេស​ដែល​មាន​ប្រជាជន​ពេញ​វ័យ​ច្រើន​ហើយ​នៅ​ពេល​នេះ​ពួក​គេ​ភាគ​ច្រើ​មាន​គូ​ស្រករ​និង​ត្រូវ​ការ​ផ្ទះ​ស្នាក់​នៅ​ជា​ច្រើន។​ហេតុ​នេះ​ហើយ​ទើប​វិស័យ​អចលន​ទ្រព្យ​បន្ត​ការ​កើន​ឡើង​បែប​នេះ​។ កំណើន​នេះក៏​បាន​ជួយ​ឲ្យ​បង្កើត​ការ​ងារ​ឲ្យ​ប្រជាជន​ខ្មែរ​ក៏​ដូច​ជា​ជួយ​ឲ្យ​ក្រុមហ៊ុន​វិនិយោគ​វិស័យ​អចលន​ទ្រព្យ​ក្រុម​ហ៊ុន​លក់​សម្ភារ​សំណង់​រីក​ចម្រើន​ផង​ដែរ ជា​ពិសេស​វា​បាន​ជួយ​ជំរុញ​ធ្វើ​ឲ្យ​មាន​កំណើន​សេដ្ឋកិច្ច​នៅ​ក្នុង​ប្រទេស​ផង​ដែរ​។

លោក​នៅ សីហា អ្នក​ជំនាញ​សេដ្ឋកិច្ច​កម្ពុជា​មាន​ប្រសាសន៍​ថា​នេះ​ជា​សញ្ញា​ល្អ​ក្រោយ​ពី​មាន​វិបត្តិ ប៉ុន្តែ​វា​មិន​ខ្លាំង​ក្លា​ដូច​មុន​ពេល​មាន​វិបត្តិ​នោះ​ទេ​ដែល​ពេល​នោះ​គ្រប់​វិស័យ​ទាំង​អស់​នៅ​ទ្រឹង​មិន​កម្រើក​ទាល់​សោះ។ លោក​បញ្ជាក់​ថា ឥឡូវ​នេះ​វា​ចាប់​ផ្តើម​កើន​ម្តង​បន្តិចៗ​ជា​សញ្ញា​មួយ​ដ៏​ល្អ​សម្រាប់​សេដ្ឋកិច្ច​កម្ពុជា​ប៉ុន្តែ​បើ​វា​កើន​យ៉ាង​គំហុក​ដូច​ឆ្នាំ​២០០៧-២០០៨​ទើប​យើង​មាន​ការ​បារម្ភ​ទៅ​វិញ។

លោក​បាន​បន្ថែម​ថា បើ​ទោះ​បី​ជា​វិស័យ​ធនាគារ​នៅ​កម្ពុជា​មាន​ចំនួន​ច្រើន​ក៏​ដោយ​ក៏​ការ​ប្រតិបត្តិ​របស់​គេ​នៅ​មិន​ទាន់​មាន​លក្ខណៈ​ទូលំ​ទូលាយ​នៅ​ឡើយ​ទេ ព្រោះ​ធនាគារ​ខ្លះ​ទាល់​តែ​មាន​ឯក​សារ​ពាក់​ព័ន្ធ​ប្លង់​កម្ម​សិទ្ធិ​ដីធ្លី​ទើប​អាច​ខ្ចី​បាន៕