Headlines:

ការ​ជួល​វីឡា​​ធ្វើ​Bouti​que​​​Hotel​កំពុង​​​កើន​ឡើង​



121122_06a
ផ្ទះវីឡា​មួយ​នៅ​ក្នុង​សង្កាត់បឹងកេងកង​១ ដែល​គេ​បើក​ជា​ភោជនីយដ្ឋាន មាន​​លក្ខណៈ​ជា​ Boutique ។ រូបថត ហ៊ឹន ពិសី

ភ្នំពេញ:​ប៉ុន្មាន​ឆ្នាំ​ចុង​ក្រោយ​នេះ​មាន​និន្នាការ​ថ្មី​មួយ​នៅ​កម្ពុជា​ដោយ​គេ​បាន​ប្រែ​ក្លាយ​ផ្ទះ​វីឡា​ទៅ​ធ្វើ​ជា​Boutique Hotel​ព្រោះ​តម្រូវ​ការ​សណ្ឋាគារ​ខ្នាត​តូច​បែប​នេះ​កំពុង​មាន​និន្នាការ​កើន​ឡើង​ជា​បន្ត​បន្ទាប់​។

លោក ស៊ឹង​ប៊ុណ្ណា​អគ្គ​នាយក​ក្រុម​ហ៊ុន​ប៊ុណ្ណា​រៀលធី​គ្រុប​និង​ជា​ប្រធាន​សមាគម​អ្នក​វាយ​តម្លៃ​និង​ភ្នាក់​ងារ​អចលន​វត្ថុ​កម្ពុជា បាន​ប្រាប់​ថា​ការ​ជួល​វីឡា និង​ប្រែ​ក្លាយ​វីឡា​ទៅ​ធ្វើ​ជា Boutique​Hotel​កំពុង​តែ​មាន​ការ​រីក​ចម្រើន​នៅ​កម្ពុជា​ព្រោះ​មាន​តម្រូវ​ការ​កើន​ឡើង​ជា​លំដាប់​។​លោក​បាន​បន្តថា​អ្នក​ជំនួញ​និង​អ្នក​មាន​ជីវភាព​ធូរធារ​មួយ​ចំនួន​ពួក​គេ​មិន​ចូល​ចិត្ត​ស្នាក់​នៅ​សណ្ឋាគារ​បែប​ពាណិជ្ជ​កម្ម​នោះ​ទេ ដោយ​សារ​វា​មាន​ភាព​អ៊ូអរ​និង​មិន​សូវ​មាន​លក្ខណ​ឯកជន​ផ្ទុយ​ទៅ​វិញ​Boutique Hotel​ជា​កន្លែង​ស្នាក់​នៅ​មាន​ភាព​ស្ងប់​ស្ងាត់​និង​មាន​លក្ខណ​ឯកជន​ដែល​ធ្វើ​ឲ្យ​អ្នក​ស្នាក់​នៅ​មាន​អារម្មណ៍​ប្រៀប​ដូច​ជា​ផ្ទះ​របស់​ខ្លួន​។

លោក​បាន​ថ្លែង​ថា៖​«​វប្បធម៌​នេះ​បាន​ហូរ​ចូល​មក​កម្ពុជា នា​រយៈ​ពេល​បី​ឆ្នាំ​ចុង​ក្រោយ​នេះ​ហើយ​កំពុង​មាន​និន្នាការ​រីក​ចម្រើន​ដោយ​សារ​តម្រូវ​ការ​មាន​ការ​កើន​ឡើង​»​។ លោក​បាន​ប្រាប់​ឲ្យ​ដឹង​ទៀត​ថា​៖​«​រហូត​មក​ដល់​ពេល​នេះ​នៅ​រាជធានី​ភ្នំពេញ​មាន​សណ្ឋាគារ បែប​នេះ​ប្រហែល​១៥​កន្លែង ហើយ​ភាគ​ច្រើន​ប្រមូល​ម្តុំ​គ្នា​នៅ​ក្នុង​ខណ្ឌ​ចំការមន​និង​ខណ្ឌ​ដូនពេញ​»​។

សណ្ឋាគារ​បែប​នេះ​មាន​រៀបចំ​សម្ភារ ឧបករណ៍​ប្រើ​ប្រាស់​របៀប​ជា​សណ្ឋាគារ​ផ្កាយ​ប្រាំ​ហើយ​អាច​មាន​តម្លៃ​ជួល​ថ្លៃ​ជាង​សណ្ឋាគារ​ធំៗ​មួយ​ចំនួន​ទៀត​ផង​។​សណ្ឋាគារ​ប្រភេទ Boutique​នេះ​មាន​បន្ទប់​ស្នាក់​នៅ​តិច​និង​មាន​ភាព​ស្ងប់​ស្ងាត់​ងាយ​ស្រួល​ធ្វើ​ការ​ជួប​ពិភាក្សា​អំពី​ការ​ធ្វើ​ជំនួញ​ផ្សេងៗ​។

លោក ខាត់ សុវណ្ណ​នាយក​គ្រប់​គ្រង​ក្រុម​ហ៊ុន​Cam Top​Property​Group បាន​សម្តែង​ការ​យល់​ស្រប​នឹង​ការ​លើក​ឡើង​ខាង​លើ​ដោយ​លោក​បាន​និយាយ​ថា​តម្រូវ​ការ​ផ្ទះ​វីឡា​ដើម្បី​ប្រែ​ក្លាយ​ទៅជា​Boutique​Hotel​កំពុង​មាន​កំណើន​ខ្ពស់ ដោយ​សារ​អាជីវ​កម្ម​បែប​នេះ​កំពុង​មាន​ការ​រីក​ចម្រើន​។​តំបន់​ដែល​មាន​សណ្ឋាគារ​បែប​នេះ​ច្រើន​មាន​នៅ​ក្នុង​សង្កាត់​បឹង​កេងកង ដូន​ពេញ និង​ទន្លេ​បាសាក់​។​លោក​ប្រាប់​ទៀត​ថា​បច្ចុប្បន្ន​ម្ចាស់​គ្រប់​គ្រង​សណ្ឋាគារ​បែប​នេះ​មាន​ជន​បរទេស​និង​ខ្មែរ​ប្រហាក់​ប្រហែល​គ្នា​ប៉ុន្តែ​កាល​ពី​ឆ្នាំ​២០០៧​ដល់​ឆ្នាំ​២០១០​ម្ចាស់​សណ្ឋា​គារ​បែប​នេះ​ភាគ​ច្រើន​ជា​ជន​បរទេស។

លោក​មាន​ប្រសាសន៍​ថា​៖​«​អ្នក​ស្នាក់​នៅ​សណ្ឋា​គារ​ប្រភេទ​នេះ​ភាគ​ច្រើន​ជា​អ្នក​មាន​ជីវភាព​ធូរធារ​អ្នក​ទេសចរ​ជា​លក្ខណៈ​គ្រួសារ​និង​អ្នក​ជំនួញ​ដែល​ចូល​ចិត្ត​ភាព​ស្ងប់​ស្ងាត់​ព្រោះ​សណ្ឋាគារ​បែប​នេះ​អាច​មាន​តម្លៃ​ចាប់​ពី​៤០​ដល់​១៨០​ដុល្លារ​ក្នុង​មួយ​យប់​»​។​លោក​បន្ត​ថា​៖​«​សណ្ឋគារ​បែប​នេះ​មាន​បន្ទប់​មិន​ច្រើន​ទេ​ប៉ុន្តែ​មាន​ទីតាំង​ល្អ​បរិយាកាស​ល្អ​មាន​អាង​ហែល​ទឹក​មាន​សួន​ច្បារ​ដែល​ជា​ទី​មនោរម្យ​ដល់​ការ​ស្នាក់​នៅ​លំហែ​កាយ​។

លោក សុវណ្ណ​បាន​ប្រាប់​ឲ្យ​ដឹង​ទៀត​ថា​បច្ចុប្បន្ន​មាន​តម្រូវ​ការ​វីឡា​សម្រាប់​ធ្វើ​Boutique Hotel ច្រើន​ដោយ​សារ​ចំនួន​ភ្ញៀវ​មាន​ការ​កើន​ឡើង ប៉ុន្តែ​ការ​រក​វីឡា​សម្រាប់​ធ្វើ​សណ្ឋាគារ​បែប​នេះ​បាន​ជួប​នឹង​ការ​លំបាក​ព្រោះ​គេ​ត្រូវ​ការ​រយៈ​ពេល​កុង​ត្រា​យូរ​ចាប់​ពី​១០​ដល់​១៥​ឆ្នាំ​ចំណែក​វីឡា​ខ្លះ​មិន​មាន​អំណោយ​ផល​សម្រាប់​ធ្វើ​សណ្ឋាគារ​បែប​នេះ​ឡើយ​។

លោក ឌឹត​ចណ្ណា​ប្រធាន​គ្រប់គ្រង​ក្រុម​ហ៊ុន​អចលន​ទ្រព្យ​វីអឹមស៊ី​បាន​និយាយ​ស្រដៀង​គ្នា​នឹង​ការ​លើក​ឡើង​ខាង​លើ​ដែរ​ប៉ុន្តែ​លោក​បាន​បន្ថែម​ថា សណ្ឋាគារ​បែប​នេះ​ត្រូវ​បាន​គេ​តុប​តែង​ឡើង​ជា​លក្ខណៈ​ធម្មជាតិ​មាន​ដាំ​ដើម​ឈើ​ច្រើន​មាន​អាង​ហែល​ទឹក​មាន​បរិយា​កាស​ស្ងប់​ស្ងាត់​និង​មាន​រៀប​ចំ​បែប​លក្ខណៈ​បុរាណ​អាច​ដែល​ផ្តល់​នូវ​ភាព​ពេញ​ចិត្ត​ដល់​អ្នក​ស្រឡាញ់​ធម្មជាតិ​និង​មាន​តម្លៃ​មិន​ខ្ពស់​នោះ​ទេ គឺ​អាច​រក​បាន​ក្នុង​តម្លៃ​ចាប់ពី​២០​ទៅ៣០​ដុល្លារ​ក្នុង​មួយ​យប់​។ លោក​បន្ត​ថា​សណ្ឋាគារ​បែប​នេះ​កំពុង​មាន​និន្នា​ការ​រីក​ចម្រើន​នៅ​កម្ពុជា​ហេតុ​នេះ​អ្នក​ដែល​មាន​ផ្ទះ​នៅ​សង្កាត់​បឹង​កេង​កង១​ដែល​មាន​ចាប់​ពី​៧​ទៅ១០​បន្ទប់​គួរ​ចាប់​អារម្មណ៍​វិនិយោគ​បែប​នេះ​ជា​ការ​ប្រសើរ​ព្រោះ​វា​ជួយ​បង្កើន​ចំណូល​សម្រាប់​គ្រួសារ​។

លោក ចណ្ណា​បាន​បន្ត​ទៀត​ថា​លោក​មិន​មាន​តួ​លេខ​ចំនួន​សណ្ឋាគារ​បែប​នេះ​នៅ​កម្ពុជា​ទេ ប៉ុន្តែ​អ្វី​ដែល​លោក​បាន​ដឹង​នោះ​គឺ​មាន​ចំនួន​ច្រើន​ហើយ​នៅ​ពេល​នេះ​និន្នាការ​បែប​នេះ​ក៏​កំពុង​កើន​ឡើង​ជា​លំដាប់​ដែរ​ព្រោះ​មាន​តម្រូវ​ការ​ពី​ភ្ញៀវ​ច្រើន​ហើយ​ពេល​នេះ​ក៏​មាន​អតិថិ​ជន​ជា​ច្រើន​កំពុង​ប្រាប់​ឲ្យ​លោក​ជួយ​រក​វីឡា​ឲ្យ​ដើម្បី​បើក​សណ្ឋាគារ​បែប​នេះ​ជា​បន្ត​បន្ទាប់​ផង​ដែរ​៕