Headlines:

ក្រុម​ហ៊ុន Daimler ទិញ​សិទ្ធិ​គ្រប់​គ្រង​លើ​ក្រុម​ប្រណាំង​រថយន្ត​Mercedes



121121_26d
ក្រុម Mercedes ត្រូវ​បាន​ទិញ​ផ្តាច់​ដោយ​ក្រុម​ហ៊ុន Daimler។ Reuters​

ក្រុង​មុយ​និចៈ ក្រុម​ហ៊ុន​ផលិត​រថ​យន្ត​ទំនើប​ៗ Daimler របស់​អាល្លឺ​ម៉ង់ បាន​ទទួល​សិទ្ធិ​គ្រប់​គ្រង​ទាំង​ស្រុង​លើ​ក្រុម Mercedes ក្នុង​ការ​ប្រណាំង​រថ​យន្ត Formula One ក្រោយ​ពី​ទិញ​ភាគ​ហ៊ុន​ចំនួន​៤០​ភាគ​រយ​ដែល​ជា​កម្ម​សិទ្ធិ​របស់​ក្រុម​ហ៊ុន Aabar Investments នៃ​ត្រកូល​ក្សត្រ​នៅ Abu Dhabi។

ការ​លូក​ដៃ​ចូល​ទៅ​ក្នុង​ការ​ប្រណាំង​រថយន្ត Formula One ធ្វើ​ឲ្យ​ស្លាក​យីហោ​រថ​យន្ត​មួយ​ដូច​ជា Mercedes អាច​ធ្វើ​ការ​ផ្សព្វ​ផ្សាយ​នៅ​លើ​កញ្ចក់​ទូរ​ទស្សន៍​ដល់​ទូរ​ទស្ស​និក​ជន​ទូ​ទាំង​ពិភព​លោក ក្រោយ​ពី​ការ​ប្រណាំង​ចំនួន​២០​លើក និង​ព្រម​ទាំង​បាន​អនុ​ញ្ញាត​ដល់​ពួក​គេ​ឲ្យ​ប្រើ​ប្រាស់​អ្នក​បើក​បរ​ដើម្បី​ជួយ​ធ្វើ​ពាណិជ្ជ​កម្ម​លក់​រថ​យន្ត​ទៀង​ផង​។

បច្ចុប្បន្ន​ក្រុម Mercedes កំពុង​តែ​ឈរ​ក្នុង​ចំណាត់​ថ្នាក់​លេខ​៥​លើ​តារាង​ពិន្ទុ​រួម​នៃ​ការ​ប្រណាំង​រថ​យន្ត Formula One ខណៈ​ដែល​នៅ​សល់​ការ​ប្រណាំង​ត្រឹម​តែ​មួយ​លើក​ទៀត​ប៉ុណ្ណោះ​ក្នុង​រដូវ​កាល​នេះ​។

ក្រុម​នេះ បាន​ចុះ​ហត្ថ​លេខា​លើ​កិច្ច​ព្រម​ព្រៀង​ពាណិជ្ជ​កម្ម​មួយ​ដើម្បី​ប្រកួត​ក្នុង​កីឡា​នេះ​រហូត​ដល់​ឆ្នាំ​២០២០​។

ពួក​គេ​សង្ឃឹម​ថា នឹង​ធ្វើ​បាន​ល្អ​ប្រសើរ​នៅ​រដូវ​កាល​ក្រោយ ក្រោយ​ពី​ផ្ទេរ​ចូល​អតីត​ម្ចាស់​ជើង​ឯក​ពិភព​លោក Lewis Hamilton ក្នុង​កិច្ច​សន្យា​រយៈ​ពេល​បី​ឆ្នាំ​ដែល​មាន​តម្លៃ​៤៥​លាន​ផោន (ស្មើ​នឹង​៧១,៣​លាន​ដុល្លារ​អាមេ​រិក)​។

Hamilton ដែល​បាន​ទទួល​ជ័យ​ជម្នះ​ក្នុង​ការ​ប្រណាំង US Grand Prix កាល​ពី​ថ្ងៃ​អាទិត្យ​នោះ គឺ​ជា​កីឡាករ​ម្នាក់​ក្នុង​ចំណោម​កីឡាករ​ដ៏​គួរ​ឲ្យ​កត់​សម្គាល់​បំផុត​ក្នុង​កីឡាករ​នេះ និង​ត្រូវ​បាន​ចាត់​ទុក​ថា ជា​ជំនួយ​ដ៏​សំខាន់​ក្នុង​ការ​បន្ថែម​ភាព​ស្រស់​បំព្រង​ដល់​ស្លាក​យី​ហោ​របស់ Mercedes​៕ IS