Headlines:

កីឡាករ​ចិន​ផ្តួល​ជើង​ខ្លាំង​ឥណ្ឌា រីឯ បញ្ញារ៉ា ចាញ់​កីឡាករ​អូទ្រីស



121121_26
កីឡាករកម្ពុជា ម៉ម បញ្ញារ៉ា (ឆ្វេង) បាន​ចាញ់​ក្រោម​ថ្វី​ដៃ​កីឡាករ​អូទ្រីស Maximilian Neuchrist នា​ជំនួប​កាល​ពី​ថ្ងៃម្សិលមិញ​។ ស្រេង ម៉េង​ស្រ៊ុន​

ភ្នំពេញៈ កីឡាករ​វាយ​កូន​បាល់​មិន​សូវ​ល្បី​របស់​ចិន Gao Wan បាន​បង្ហាញ​ពី​ទម្រង់​លេង​យ៉ាង​ល្អ​បំផុត​របស់​ខ្លួន​ក្នុង​ពេល​ផ្តួល​កីឡាករ​ឥណ្ឌា Jeevan Nedunchezhiyan ដែល​មាន​លេខ​១​ប្រចាំ​ព្រឹត្តិ​ការណ៍ ក្នុង​លទ្ធ​ផល ៦-៣ និង​៦-២ នៅ​ក្នុង​ការ​ប្រកួត​ជុំ​ទី​១​នៃ​ព្រឹត្តិ​ការណ៍ ITF NagaWorld Futures Championship នៅ​ឯ​មជ្ឈ​មណ្ឌល​ជាតិ​ហ្វឹក​ហ្វឺន​កាល​ពី​ថ្ងៃ​ម្សិល​មិញ​។

ក្នុង​នាម​ជា​កីឡាករ​មាន​ភាព​ល្បី​ល្បាញ​ជាង​គេ​ក្នុង​ព្រឹត្តិ​ការណ៍ Pro Circuit សម្រាប់​ការ​ប្រកួត​ជា​គូ​ជា​មួយ​នឹង​បង​ប្អូន​ភ្លោះ​របស់​គេ Gao Peng កីឡាករ​សញ្ជាតិ​ស្ថិត​ក្នុង​លេខ​រៀង​៩៨៤​ប្រើ​ដៃ​ស្តាំ​រូប​នេះ បាន​ធ្វើ​ឲ្យ​កីឡាករ​ឥណ្ឌា​ដែល​មាន​ចំណាត់​ថ្នាក់​ទី​៣៣០ មិន​មាន​ឱកាស​វាយ​បក​វិញ​ឡើយ​។

Jeevan បាន​ប្រាប់​ភ្នំពេញ ប៉ុស្តិ៍ ថា៖ «នៅ​ត្រឹម​ពេល​ដែល​ខ្ញុំ​អាច​បង្ហាញ​ខ្លួន​ជា​មួយ​នឹង​ផែន​ការ​នៃ​ការ​ប្រកួត​ដើម្បី​ប្រកួត​ជា​មួយ​នឹង​ភាព​ខ្លាំង​ក្លា​របស់​គេ រូប​គេ​បាន​ត្រៀម​លក្ខណៈ​រួច​ជា​ស្រេច​ទុក​ជា​មុន​។ គេ​ពិត​ជា​ខ្លាំង​ក្លា និង​លេង​បាន​យ៉ាង​ល្អ​»។

ចំណែក​កីឡាករ Gao បាន​និយាយ​ថា រូប​គេ​មាន​អារម្មណ៍ «ល្អ​ណាស់» ទៅ​លើ​ការ​ប្រកួត​របស់​ខ្លួន​នៅ​ថ្ងៃ​នោះ​។ រូប​គេ​បាន​ឲ្យ​ដឹង​ថា៖ «ខ្ញុំ​បាន​គិត​ថា គូ​ប្រជែង​របស់​ខ្ញុំ​បាន​ចាប់​ផ្តើម​យឺត​បន្តិច ហើយ​ខ្ញុំ​អាច​ធ្វើ​ការ​គ្រប់​គ្រង​យ៉ាង​រហ័ស​។ ពិត​ណាស់ ខ្ញុំ​មាន​ភាព​ជោគ​ជ័យ​ធំ​ៗ​មួយ​ចំនួន​ក្នុង​រយៈ​ពេល​៤​ឆ្នាំ​នៃ​ជីវិត​អាជីព​របស់​ខ្ញុំ ប៉ុន្តែ​ចំណាត់​ថ្នាក់​របស់​គេ​ស្ថិត​ក្នុង​ចំណោម​កីឡាករ​ឆ្នើម​ៗ​ផ្នែក​ឯកត្ត​ជន​»។

ជា​មួយ​គ្នា​នេះ ក្តី​សង្ឃឹម​ចុង​ក្រោយ​របស់​កម្ពុជា​លើ​ការ​ប្រកួត​ឯក​ត្ត​ជន បាន​ត្រឡប់​ទៅ​ជា​ការ​ខក​ចិត្ត​កាល​ពី​ថ្ងៃ​ព្រឹក​ម្សិល​មិញ ក្រោយ​ពី ម៉ម បញ្ញា​រ៉ា បាន​ទទួល​បរា​ជ័យ​ក្រោម​ស្នា​ដៃ​របស់​កីឡាករ​លេខ​៦​ប្រចាំ​ព្រឹត្តិ​ការណ៍ Maximilian Neuchrist សញ្ជាតិ​អូទ្រីស ក្នុង​លទ្ធ​ផល ៦-៤ និង​៧-៥​។

លោក ទេព រិទ្ធី​វិត អគ្គ​លេខា​ធិការ​នៃ​សហ​ព័ន្ធ​កីឡា​វាយ​កូន​បាល់​កម្ពុជា (TFC) បាន​មាន​ប្រសាសន៍​ថា៖ «ទម្រង់​លេង​របស់​បញ្ញារ៉ា គឺ​មាន​ភាព​ខ្លាំង​គួរ​ឲ្យ​កត់​សម្គាល់​ក្នុង​ចំណោម​កីឡាករ​របស់​កម្ពុជា​ទាំង​បី​រូប​។ គេ​បាន​លេង​ដោយ​ទឹក​ចិត្ត​។ គេ​បាន​ខ្វះ​នូវ​ភាព​មុត​ស្រួច​ក្នុង​ការ​ប្រកួត​បន្តិច​បើ​គិត​ចាប់​តាំង​ពី​គេ​មិន​ធ្លាប់​បាន​ប្រកួត​កីឡា​វាយ​កូន​បាល់​ក្រោយ​ពី​យុទ្ធ​នា​ការ Davis Cup ក្នុង​ទីក្រុង​ដូ​ហា​»។

ការ​ទទួល​ជ័យ​ជម្នះ​ដ៏​មាន​ប្រជា​ប្រិយ​ភាព​បំផុត​ប្រចាំ​ថ្ងៃ​បាន​ធ្លាក់​ទៅ​លើ​កីឡាករ​វាយ​កូន​បាល់​ជើង​ចាស់​ជប៉ុន Katsushi Fukuda​។

ស្ថិត​ក្នុង​វ័យ​៣៦​ឆ្នាំ គេ​គឺ​ជា​កីឡាករ​ចាស់​ជាង​គេ​បំផុត​ក្នុង​វគ្គ​ចាប់​ឆ្នោត​នេះ ហើយ​រូប​គេ​បាន​ផ្តួល​កីឡាករ Sarvar Ikramov របស់​អ៊ូស​បេ​គី​ស្ថាន ដែល​មាន​លេខ​៧​ប្រចាំ​ព្រឹត្តិ​ការណ៍ ក្នុង​លទ្ធ​ផល ៦-៣ និង​៦-៣​។

ខណៈ​ដែល​ត្រូវ​បាន​ផ្តល់​នូវ​សំឡេង​គាំ​ទ្រ​ពី​សំណាក់​អ្នក​គាំ​ទ្រ​របស់​ជប៉ុន​នៅ​ក្បែរ​ទី​លាន​នោះ Fukuda ដែល​បាន​ចំណាយ​ពេល​ក្នុង Pro Circuit សម្រាប់​រយៈ​ពេល​ស្ទើរ​តែ​១៥​ឆ្នាំ​នោះ មិន​ដែល​ជួប​បញ្ហា​ឡើយ និង​បាន​ធ្វើ​ការ​គ្រប់​គ្រង​លើ​ល្បឿន​នៃ​ការ​វាយ​បក​បាន​យ៉ាង​ល្អ​។

Fukuda បាន​ប្រាប់​ភ្នំពេញ ប៉ុស្តិ៍ ថា៖ «ខ្ញុំ​សូម​ថ្លែង​អំណរ​គុណ​យ៉ាង​ខ្លាំង​ដល់ TFC សម្រាប់​ការ​ផ្តល់​ឲ្យ​រូប​ខ្ញុំ​នូវ​លិខិត​អនុ​ញ្ញាត ហើយ​ខ្ញុំ​ក៏​សូម​អរ​គុណ​យ៉ាង​ជ្រាល​ជ្រៅ​ដល់​មូល​និធិ​អភិ​វឌ្ឍន៍​អាស៊ី (Asian Development Fund) និង​លោក​ប្រធាន President Mitsuji Konoshita សម្រាប់​ការ​ឧបត្ថម្ភ​ដល់​ខ្ញុំ​រាល់​ឆ្នាំ​ទាំង​អស់​»៕ IS