​កម្ពុជា​បើក​វគ្គ​ហ្វឹក​ហ្វឺន​លំហាត់​ឆ្មាំ​អង្គរ ២០១៤ រវាង​កង​ទ័ព​ជើង​គោក​កម្ពុជា និង​កង​ទ័ព​​អាមេរិក​ប្រចាំ​អាស៊ី​ប៉ាស៊ីហ្វិក​ នៅ​ព្រឹក​ថ្ងៃ​ចន្ទ​​នេះ​ក្នុង​ខេត្ត​កំពង់​ស្ពឺ លើ​ការ​ងារ​សហ​ប្រតិ​បត្តិ​ការ​សន្តិ​សុខ និង​ដើម្បី​កសាង​សមត្ថភាព​ជួយ​សង្គ្រោះ​គ្រោះ​មហន្តរាយនិង​ជំនួយ​មនុស្ស​ធម៌។
Headlines:

កម្ពុជា​ត្រៀម​កីឡា​៥​ប្រភេទ​ទៅ​ដណ្តើម​ជើង​ឯក​សាកល​វិទ្យាល័យ​អាស៊ាន​



121121_25b
កីឡាការិនី​តេក្វាន់​ដូ ស៊ន សៀវមីុ គឺ​ជា​កីឡាការិនី​ម្នាក់​ដែល​អាច​ដណ្តើម​បាន​មេដាយ​នាព្រឹត្តិការណ៍​ខាង​មុខ​។ ស្រេង ម៉េង​ស្រ៊ុន​

ភ្នំពេញៈ កីឡាករ-ការិនី​១៥​នាក់ ក្នុង​ប្រភេទ​កីឡា​អាទិ​ភាព​ចំនួន​៥ កំពុង​ហ្វឹក​ហាត់​បន្ថែម​នៅ​តាម​សហព័ន្ធ​រៀងៗ​ខ្លួន ដើម្បី​ត្រៀម​លក្ខណៈ​ក្នុង​ព្រឹត្តិការណ៍​ប្រកួត​ដណ្តើម​ពាន​រង្វាន់​សាកល​វិទ្យាល័យ​អាស៊ាន លើក​ទី​១៦ ដែល​នឹង​រៀប​ចំ​ឡើង​នៅ​ប្រទេស​ឡាវ។

ការ​ប្រកួត​នឹង​ដំណើរ​ការ​ចាប់​ពី​ថ្ងៃ​ទី​១២ ដល់​ថ្ងៃ​ទី​២០ ខែ​ធ្នូ ខាង​មុខ​ដោយ​មាន​ការ​ចូល​រួម​ពី​ប្រទេស​១១​ក្នុង​តំបន់​រួម​មាន​កម្ពុជា វៀតណាម ឡាវ ថៃ ឥណ្ឌូនេស៊ី ម៉ា​ឡេស៊ី សិង្ហបុរី ប្រ៊ុយណេ ហ្វីលីពីន មីយ៉ាន់ម៉ា និង​ទី​ម័រ​ខាង​កើត។ វិញ្ញាសា​ដែល​ត្រូវ​បាន​កំណត់​ដោយ​ម្ចាស់​ផ្ទះ​រួម​មាន អត្តពល​កម្ម វាយសី បាល់​បោះ បាល់​ទះ បាល់​ទាត់ ការ៉ាតេដូ សីប៉ាក់តាក្រ ហែល​ទឹក តេក្វាន់​ដូ យូ​ដូ វាយ​កូន​ឃ្លី​លើតុ វាយ​កូន​បាល់ ប៉េតង់ បញ្ចសីលា បាញ់​ធ្នូ វូស៊ូ និង​មួយ (ប្រដាល់)។

កម្ពុជា​បាន​សម្រេច​បញ្ចូល​កីឡាករ-ការិនី​ចំនួន​១៥​នាក់​ឲ្យ​ចូល​រួម​ប្រកួត ក្នុង​នោះ​កីឡា​ប៉េតង់​មាន​៥​នាក់ តេក្វាន់ដូ​៣​នាក់ យូដូ​២នាក់ អត្ត​ពល​កម្ម ២​នាក់ និង​វាយ​កូន​បាល់​ចំនួន​៣​នាក់ ហើយ​នេះ​ជា​លើក​ទី​៤​ហើយ ដែល​កម្ពុជា​បាន​ចូល​រួម​នៅ​ក្នុង​ការ​ប្រកួត​នេះ ខណៈ​ការ​ចូល​រួម​បី​លើក​កន្លង​មក កម្ពុជា​ដណ្តើម​បាន​មេ​ដាយ​ប្រាក់​១ និង​មេដាយ​សំរឹទ្ធ​២​។

លោក​ព្រំ ប៊ុណ្ណ​យី អគ្គ​នាយក​រង​កីឡា និង​ជា​អគ្គលេខាធិការ​សហព័ន្ធ​កីឡា​និស្សិត បាន​ប្រាប់​ឲ្យ​ដឹង​កាល​ពី​ព្រឹក​ថ្ងៃ​អង្គារ ម្សិល​មិញ​ថា​៖​«ចំនួន​នេះ​នឹង​មិន​មាន​ការ​ផ្លាស់​ប្តូរ​ទៀត​នោះ​ទេ។ យើង​ស្នើ​សុំ​ដល់​សហព័ន្ធ​នីមួយៗ បន្ត​ឲ្យ​ជួយ​យក​ចិត្ត​ទុក​ដាក់​បង្ហាត់​ដល់​កីឡាករ-ការិនី​បន្ថែម​ទៀត ដើម្បី​ពួក​គេ​ត្រៀម​ខ្លួន​ឲ្យ​បាន​ល្អ​មុន​ការ​ប្រកួត​ហើយ​នេះ​ជា​សកម្ម​ភាព​ដើម្បី​ជំរុញ​ឲ្យ​វិស័យ​កីឡា​របស់​យើង​បោះ​ជំហាន​ទៅ​មុខ​បន្តិច​ម្តងៗ»។

សមាស​ភាព ដែល​គ្រោង​បញ្ជូន​ទៅ​ប្រកួត​នៅ​ក្នុង​ការ​ប្រកួត​លើក​នេះ កីឡា​តេ​ក្វាន់​ដូ មាន​កីឡាការិនី ឈឿង ពុទ្ធា​រីម ស៊ន សៀវ​ម៉ី និង​កីឡាករ រិន ប៊ុនហួត កីឡា​អត្តពលកម្ម មាន​កីឡាការិនី ចាន់ សីហា និង កីឡាករ ម៉ា វីរ៉ូ រីឯ​កីឡា​យូដូ មាន​កីឡាករ ជឹម កែវ និង កីឡាការិនី សំ សុភា ខណៈ​កីឡា​ប៉េតង់​មាន​កីឡាករ ឯក ណា​រ័ត្ន ម៉ី សុភ័ក្ត្រ កីឡាការិនី ដួង ឌី​ណា ឈិន ស្រី​ពេជ្រ និង​ម៉ៃ រតនា ប៉ុន្តែ​សម្រាប់​កីឡាវាយ​កូន​បាល់​មាន​ការ​ផ្លាស់​ប្តូរ​សមាស​ភាព​កីឡាករ ប៊ុន កេននី និង ម៉ម បញ្ញារ៉ា ហើយ​ជំនួស​វិញ​ដោយ ឡុង សំនៀង និង ឡុង ជំនិត ហើយ អន សម្បត្តិ រក្សា​ទុក​នៅ​ដដែល។

លោក ព្រំ ប៊ុណ្ណយី បាន​ធ្វើ​ការ​វាយ​តម្លៃ​ទៅ​លើ​សមត្ថ​ភាព​ក្រុម​កីឡា​របស់​លោក​ថា​៖​«​យើង​មិន​ហ៊ាន​និយាយ​ដល់​ថ្នាក់​ថា ក្រុម​កីឡាករ-ការិនី​របស់​យើង មាន​អាទិ​ភាព​ខ្ពស់​ក្នុង​ការ​ដណ្តើម​យក​មេដាយ​នោះ​ទេ ប៉ុន្តែ​អ្នក​ដែល​យើង​នឹង​បញ្ជូន​ទៅ​ក៏​មាន​សមត្ថ​ភាព​ល្អ​ដែរ។ ជាក់​ស្តែង​ដូច​ជា​កីឡា​ប៉េតង់ តេក្វាន់ យូដូ និងវាយ​កូន​បាល់​សុទ្ធ​តែ​ធ្លាប់​មាន​ស្នាដៃ ដណ្តើម​បាន​មេដាយ​នៅ​លើ​ឆាក​អន្តរ​ជាតិ ហេតុ​នេះ​ខ្ញុំ​សង្ឃឹម​ថា ការ​ចេញ​ទៅ​ប្រកួត​លើក​នេះ នឹង​ទទួល​បាន​លទ្ធ​ផល​ល្អ​វិល​ត្រឡប់​មក​វិញ»។

លោក​បាន​បញ្ជាក់​ពី​សារៈសំខាន់​នៃ​ការ​ចូល​រួម​នេះ​ថា​៖​«​យើង​ជា​សមា​ជិក​អាស៊ាន ហើយ​សព្វ​ថ្ងៃ​នេះ​អាស៊ាន​តែង​តែ​ធ្វើ​សមាហរណ​កម្ម​ស្ទើរ​គ្រប់​វិស័យ រួម​ទាំង​វិស័យ​កីឡា​ផង​ដែរ ព្រោះ​អាស៊ាន​ចង់​ពង្រឹង​វិស័យ​កីឡា​ឲ្យ​មាន​ការ​រីក​ចម្រើន​នៅ​ទូទាំង​ក្នុង​តំបន់​របស់​ខ្លួន។ ជា​ពិសេស​ទៀត​នោះ​អាស៊ាន​បាន​ផ្តោត​ក្តី​សង្ឃឹម​មួយ​យ៉ាង​សំខាន់​ថា ប្រទេស​ណា​មួយ​នៅ​ក្នុង​តំបន់​របស់​ខ្លួន នឹង​អាច​មាន​លទ្ធ​ភាព​ធ្វើ​ជា​ម្ចាស់​ផ្ទះ​នៃ​ការ​ប្រកួត​ព្រឹត្តិ​ការណ៍​លំដាប់​ពិភព​លោក​នា​ឆ្នាំ​២០៣០​ខាង​មុខ»៕​