Headlines:

មណ្ឌល​កីឡា​ហែល​ទឹក «តេជោ​សែន» នៅ​កំពង់ចាម​នឹង​ចំណាយ​អស់​ទឹក​ប្រាក់​ជិត​មួយ​លាន​ដុល្លារ



121121_25a
លោក ស៊ុន ចាន់​ថុល នា​ពិធី​ចែក​រង្វាន់​ដល់​ជើង​ឯក​កីឡា​ហែល​ទឹក​កន្លងមក។ យឺន ពន្លក​

ភ្នំពេញៈ មណ្ឌល​កីឡា​ហែល​ទឹក​ស្តង់​ដារ​អន្តរជាតិ​ស្ថិត​នៅ​ក្នុង​ខេត្ត​កំពង់​ចាម​ក្រោម​ការ​ផ្តួច​ផ្តើម​របស់​លោក​ស៊ុន​ចាន់​ថុល​ទេស​រដ្ឋ​មន្ត្រី​និង​ជា​ប្រធាន​សហព័ន្ធ​ខ្មែរ​កីឡា​ហែល​ទឹក​ស្ម័គ្រ​ចិត្ត​និង​លោក​ថោង​ខុន​ប្រធាន​គណៈ​កម្មាធិការ​ជាតិ​អូឡាំពិក​កម្ពុជា​និង​ជា​រដ្ឋ​មន្ត្រី​ក្រសួង​ទេស​ចរណ៍​នឹង​គ្រោង​ដំណើរ​ការ​សាងសង់​នា​ដើម​ខែ​ធ្នូ​ខាង​មុខ​នេះ។

លោក ហ៊ុន ណេង អភិបាល​ខេត្ត​កំពង់​ចាម ជា​អ្នក​ដែល​បាន​ឯក​ភាព​និង​សហ​ការ​ក្នុង​ការ​ស្វែង​រក​ទី​តាំង​សាងសង់។

លោក​ហែម​ថុន​អគ្គ​លេខា​ធិការ​សហ​ព័ន្ធ​ខ្មែរ​កីឡា​ហែល​ទឹក​ស្ម័គ្រ​ចិត្ត​បាន​មាន​ប្រសាសន៍​ប្រាប់​ភ្នំពេញ​ប៉ុស្តិ៍​ថា​គម្រោង​នេះ​បាន​ទទួល​នូវ​ការ​អនុញ្ញាត​យល់​ព្រម​ពី​លោក​នាយក​រដ្ឋមន្ត្រី​ហ៊ុន​សែន​កាល​ពី​ខែ​តុលា​ឆ្នាំ​២០១២​។

លោក​បាន​បន្ត​ថា៖ «​តាម​គម្រោង​ដំបូង​យើង​ចង់​សាង​សង់​លើ​ទីតាំង​ចាស់​នា​សម័យ​សង្គម​រាស្ត្រ​និយម ដែល​បច្ចុប្បន្ន ជា​ទីតាំង​របស់​មន្ទីរ​ទេសចរណ៍ ខេត្ត​កំពង់​ចាម​។ យើង​គ្រោង​ចំណាយ​អស់​ប្រមាណ​៦០ម៉ឺន​ដុល្លារ​អាមេរិក ប៉ុន្តែ​នា​ការ​សម្រេច​ជា​លើក​ចុង​ក្រោយ យើង​នឹង​សាង​សង់​ក្នុង​ទីលាន​កីឡា​បាល់​ទាត់​ខេត្ត​វិញ ដោយ​មាន​បន្ថែម​នូវ​វេទិកា កន្លែង​កម្តៅ​សាច់​ដុំ និង​អាង​លោត​ទំហំ​២៥​គុណ​២៥​ម៉ែត្រ។ ដូច្នេះ​ទឹក​ប្រាក់​ដែល​ត្រូវ​ចំណាយ​គឺមាន​កើន​រហូត​ដល់​ជិត​មួយ​លាន​ដុល្លារ​អាមេរិក»។

បច្ចុប្បន្ន​ប្លង់​នៃ​អាង​ហែល​ទឹក​ដែល​មាន​ទំហំ​ធំ​ខ្នាត​អន្តរជាតិ​មួយ​នេះ​កំពុង​ស្ថិត​ក្នុង​ដំណើរ​ការ​រចនា​ដោយ​អ្នក​ជំនាញ​។

មូល​ហេតុ​សំខាន់ៗ​ចម្បង​ដែល​សហព័ន្ធ​សម្រេច​សាង​សង់​អាង​ហែល​ទឹក​នៅ​ខេត្ត​កំពង់ចាម​នោះ​គឺ​ដោយ​សារ​តែ​តាំង​ពី​ទសវត្សរ៍​១៩៦០​កីឡាករ​ល្អៗ​សឹង​តែ​៩៥​ភាគរយ​មាន​ប្រភព​មក​ចេញ​ពី​ទឹក​ដី​ខេត្ត​កំពង់​ចាម​ដែល​មាន​បឹង​មាន​ទន្លេ​ហើយ​ក្មេងៗ​ចេះ​ហែល​ទឹក​តាំង​ពី​តូច​។

លោក​ស៊ុន​ចាន់ថុល​ដែល​ជា​អ្នក​ស្វែង​រក​ថវិកា​មក​ធ្វើ​កិច្ច​ការ​នេះ​បាន​មាន​ប្រសាសន៍​ប្រាប់​ភ្នំពេញ ប៉ុស្តិ៍ កាល​ពី​សប្តាហ៍​មុន​ថា នៅ​ឆ្នាំ​២០១៣ យើង​នឹង​មាន​អាង​ហែល​ទឹក​ខ្នាត​អន្តរ​ជាតិ​នៅ​ខេត្ត​កំពង់​ចាម​។

ទោះ​បី​ជា​យ៉ាង​ណា លោក​មិន​ហ៊ាន​បញ្ជាក់​ឲ្យ​ដឹង​ពី​ការ​ចំណាយ​ពិត​ប្រាកដ​នោះ​ឡើយ​ពី​ព្រោះ​ត្រូវ​ឆ្លង​កាត់​ការ​ដេញ​ថ្លៃ​ត្រឹម​ត្រូវ​និង​ស្វែង​រក​ដៃគូ​ឧបត្ថម្ភ សហ​ការ និង​សប្បុរស​ជន​នានា។

អ្នក​ជំនាញ​ម្នាក់​ប្រាប់​ឲ្យ​ដឹង​ថា​ចំពោះ​ការ​សាង​សង់​ដែល​មាន​សក្តានុ​ពល​គ្រប់​គ្រាន់​អាច​ស៊ី​ពេល​ប្រហែល​៨​ខែ​។

បច្ចុប្បន្ន សហព័ន្ធ​មាន​អាង​ហែល​ទឹក​នៅ​ពហុ​កីឡដ្ឋាន​ជាតិ​តែ​មួយ​គត់​ដែល​អាច​ប្រើ​ប្រាស់​ក្នុង​កម្មវិធី​ផ្សេងៗ​ដោយ​ត្រូវ​ជួល​ពី​ក្រុម​ហ៊ុន​វិនិយោគ​ឯក​ជន​(ក្រុម​ហ៊ុន​វិនិយោគ​ស្តាត​នេះ​តាម​ការ​អះអាង​ពី​លោក​ហែម​ថុន​) នៅ​ពេល​ដែល​សហ​ព័ន្ធ​ត្រូវ​ការ​ប្រើ​ប្រាស់​។

តាំង​ពី​សម័យ​សង្គម​រាស្ត្រ​និយម​កម្ពុជា​មាន​អាង​ហែល​ទឹក​ចំនួន​៦​កន្លែង​ដូច​ជា​អាង​នៅ​វត្ត​ភ្នំ​(បច្ចុប្បន្ន​ទូត​អាមេរិក​)​អាង​ហែល​ទឹក​នៅ​ខេត្ត​បាត់ដំបង​អាង​នៅ​សាកល​វិទ្យាល័យ​ភូមិន្ទ​ភ្នំពេញ​អាង​នៅ​ស្តាត​ចាស់​និង​អាង​មួយ​ចំនួន​ទៀត​ត្រូវ​បាត់បង់​និង​ទុក​ចោល​មិន​ប្រើ​ប្រាស់​ឬ​ប្រើ​ប្រាស់​ជា​ទីតាំង​ផ្សេងៗ​។

លោក​វ៉ាត់​ចំរើន​អគ្គ​លេខាធិការ​នៃ​គណៈ​កម្មា​ធិការ​ជាតិ​អូឡាំពិក​កម្ពុជា បាន​ឲ្យ​ដឹង​ថា​៖​«វា​ជា​ការ​ល្អ​ណាស់​ដែល​មាន​ថ្នាក់​ដឹក​នាំ​ជួយ​គិត​គូ​ពី​ហេដ្ឋា​រចនា​សម្ព័ន្ធ​កីឡា​នៅ​កម្ពុជា»។

លោក​ស៊ុន​ចាន់​ថុល ជា​អតីត​កីឡា​ហែល​ទឹក​ម្នាក់​ហើយ​បច្ចុប្បន្ន​លោក​នៅ​តែ​ចូល​រួម​ក្នុង​សកម្មភាព​កីឡា​ដោយ​លោក​តែង​តែ​មាន​វត្តមាន​ក្នុង​ការ​ប្រកួត​រត់​ពាក់​កណ្តាល​ម៉ារ៉ាតុង​៕