Headlines:

ឡុង សុវណ្ណឌឿន បរាជ័យ​ក្នុង​ការ​សង​សឹក​



121113_25a
ឡុង សុវណ្ណ​ឌឿន បាន​វាយ​ចំ​ថ្គាម​របស់​ ឡៅ សីុណាត នា​ជំនួប​សង​សឹក។ ស្រេង ម៉េង​ស្រ៊ុន​

ភ្នំពេញៈ អ្នក​ប្រដាល់​និស្សិត ឡុង សុវណ្ណឌឿន មិន​អាច​បំពេញ​មហិច្ឆតា ការ​ឡើង​ប្រកួត​សង​សឹក​ជា​លើក​ទី​២ ចំពោះ​រៀម​ច្បង ឡៅ ស៊ីណាត បាន​នោះ​ទេ ខណៈ​ការ​ព្យាយាម​វាយ​លុក​របស់​គេ ទទួល​បាន​ផល​ចំណេញ​តិច​ជាង​អ្វី​ដែល ស៊ីណាត បាន​ធ្វើ​ការ​វាយ​បក​មក​លើ​រូប​គេ​វិញ​នោះ។

សិស្ស​គុន​ក្លិប​សាល​វ័ន្ត​កីឡា ឡុង សុវណ្ណឌឿន ធ្លាប់​បាន​ទទួល​ការ​ឈឺ​ចាប់​ក្រោម​ស្នាដៃ ឡៅ ស៊ីណាត ម្តង​រួច​មក​ហើយ ហើយ​ការ​ចាញ់ ស៊ីណាត កាល​ណោះ បាន​ធ្វើ​ឲ្យ​រូប​គេ​បាន​ធ្លាក់​ចេញ​ពី​ការ​ប្រកួត​ដណ្តើម​ប្រាក់​ក្នុង​ធនាគារ ក្នុង​ប្រភេទ​ទម្ងន់​៦៩​គីឡូ​ក្រាម នៅ​លើ​សង្វៀន​ប៉ុស្តិ៍​លេខ​៣ ទាំង​មិន​អស់​ចិត្ត។

សម្រាប់​ការ​ឡើង​ប្រកួត​សង​សឹក នៅ​លើ​សង្វៀន​ស៊ីធីអិន កាល​ពី​ថ្ងៃ​អាទិត្យ​កន្លង​មក​នេះ សុវណ្ណឌឿន បាន​ព្យាយាម​ទាត់​ខ្លាំងៗ​ទៅ​លើ​ជន្ទល់​ក្រោម​របស់ ឡៅ ស៊ីណាត ប៉ុន្តែ​ស្នៀត​ទាំង​នេះ ហាក់​ទទួល​បាន​ផល​តិច ខណៈ ស៊ីណាត បាន​ព្យាយាម​ទប់ និង​ច្រាស​កណ្តាប់​ដៃ​សង​បាន​យ៉ាង​ល្អ​នោះ។

ដោយ​មាន​ការ​ជួយ​ប្រាប់​ពី​អ្នក​ឲ្យ​ទឹក បឺត ខាំ និង ឡុង សុភី ដែល​ជា​រៀម​ច្បង​របស់​ខ្លួន​នោះ សុវណ្ណឌឿន បាន​បង្ខំ​ចិត្ត​ចូល​ប្តូរ​កណ្តាប់​ដៃ​ជា​មួយ ស៊ីណាត បន្ថែម​ទៅ​លើ​ការ​ទាត់​របស់​គេ ហើយ​ការ​ប្តូរ​ឥរិយា​បថ​នៃ​ការ​ប្រកួត​នេះ បាន​ធ្វើ​ឲ្យ​ស្ថាន​ភាព​ប្រកួត​របស់​អ្នក​ទាំង​២ កាន់​តែ​មាន​លក្ខណៈ​ស្វិត​ស្វាញ និង​ទទួល​បាន​ការ​គាំ​ទ្រ​ច្រើន ព្រោះ​ពួក​គេ​បាន​បង្កើន​ការ​ម៉ាត់ និង​ទាត់​សង​គ្នា​ចំ​គោល​ដៅ​ពេញៗ​ដូច​គ្នា។

នៅ​ដើម​ទឹក​ទី​៣ ស៊ីណាត ហាក់​បាន​បង្ហាញ​ភាព​ទន់​ជ្រាយ​ផ្នែក​ល្វែង​ខាង​ក្រោម នៅ​ពេល សុវណ្ណឌឿន បាន​ទាត់​រូប​គេ​ឲ្យ​ដួល​ចំនួន​២​ដង និង​បាន​ម៉ាត់​បន្ថែម​ភ្លាមៗ​នោះ ប៉ុន្តែ​អ្នក​ប្រដាល់​សម្បូរ​ល្បិច​កល មក​ពី​ក្លិប​ទ័ព​ពិសេស​ឆត្រ​យោង​៩១១​ម្នាក់​នេះ នៅ​តែ​អាច​គ្រប់​គ្រង​ស្ថាន​ភាព​ប្រកួត​បាន​ល្អ​ដដែល ដោយ​រូប​គេ​បាន​ដក​ថយ​យ៉ាង​លឿន រួច​បាន​ទាត់​ស្កាត់​ចូល​ឆ្អឹង​ជំនីរ សុវណ្ណឌឿន វិញ​ពេញៗ និង​បាន​បន្ថែម​ដោយ​ការ​ម៉ាត់​យ៉ាង​រហ័ស។

ថ្វី​បើ​ត្រូវ​ទទួល​រង​ការ​ម៉ាត់ ទាត់ និង​ការ​បុក​ជង្គង់​របស់ ស៊ីណាត យ៉ាង​ណា​ក្តី ប៉ុន្តែ ឡុង សុវណ្ណឌឿន នៅ​តែ​សន្សំ​ចិត្ត​តាម​ទាត់ និង​ម៉ាត់​សន្ធាប់​សង​ទៅ​លើ ស៊ីណាត ទៅ​តាម​អ្វី​ដែល​រៀម​ច្បង​ទាំង​២​បាន​ប្រាប់ ហើយ​ភាព​អំណត់​នេះ បាន​ធ្វើ​ឲ្យ ឡៅ ស៊ីណាត ហាក់​បង្ហាញ​ភាព​ហេវ​ហត់​ច្រើន​នៅ​ចុង​ទឹក​ទី​៤។

ស្ថិត​ក្នុង​ស្ថាន​ភាព​បែប​នេះ​កីឡាករ​វ័យ​២៤​ឆ្នាំ ឡុង សុវណ្ណឌឿន បាន​បង្កើន​ការ​វាយ​លុក​ទៅ​លើ ស៊ីណាត កាន់​តែ​ខ្លាំង​នៅ​ក្នុង​ទឹក​ទី​៥ ដោយ​រូប​គេ​សង្ឃឹម​ថា ឡៅ ស៊ីណាត អាច​នឹង​អស់​កម្លាំង​ស៊ុហ្វ ហើយ​ចាញ់​ក្រោម​ការ​តាម​ទាត់ និង​ម៉ាត់​របស់​ខ្លួន។ ប៉ុន្តែ​អ្វីៗ​វា​ខុស​ពី​ការ​រំពឹង​ទុក​ទាំង​ស្រុង។

ឡៅ ស៊ីណាត ដែល​ស្ទើរ​តែ​ត្រូវ​បាន​គេ​ពិន័យ​ពី​បទ​មិន​មក​ប្រកួត​តាម​ពេល​កំណត់ នៅ​ស៊ីធីអិន កាល​ពី​ថ្ងៃ​អាទិត្យ​សប្តាហ៍​មុន​នោះ មិន​ត្រឹម​តែ​មិន​ទន់​ជ្រាយ​ប៉ុណ្ណោះ​ទេ ប៉ុន្តែ​គេ​ថែម​ទាំង​អាច​ឈរ​យ៉ាង​រឹង​មាំ រួម​បាន​ទាត់​ស្កាត់ និង​ម៉ាត់​សង​ចំ​គោល​ដៅ​ពេញៗ ហើយ​ទម្ងន់​នៃ​ការ​វាយ​សង​នេះ បែរ​ជា​ធ្វើ​ឲ្យ សុវណ្ណឌឿន មាន​អារម្មណ៍​ខ្លាច​រអា​ក្នុង​ការ​បន្ត​ចូល​វាយ​លុក​ទៅ​លើ ស៊ីណាត នៅ​ចុង​ទឹក​ទៅ​វិញ​។

នៅ​ទី​បំផុត ឡៅ ស៊ីណាត​ត្រូវ​បាន​កាត់​សេចក្តី​ឲ្យ​ឈ្នះ​ពិន្ទុ ឡុង សុវណ្ណឌឿន យ៉ាង​ស័ក្តិ​សម​បំផុត៕