Headlines:

ជុំ​ទីពីរ​​​ដំណើរ​​​ទៅ​ដណ្តើម​ខ្សែ​ក្រវាត់​ទម្ងន់​៦០​គីឡូ​



121115_25c
ង៉ែត រដ្ឋា (ឆ្វេង) និង អ៊ុំ ចំរើន នឹង​មាន​អ្នក​ចាញ់​លើក​ដំបូង។ យឺន ពន្លក​​

ភ្នំពេញៈ ជម្រើស​អ្នក​ប្រដាល់​ទម្ងន់​៦០​គីឡូក្រាម​១២​នាក់​មក​ពី​ក្លិប​ផ្សេង​ៗ​គ្នា​ដែល​កំពុង​តែ​មាន​ឈ្មោះ​ប្រកួត​រៀង​រាល់​ថ្ងៃ​សៅរ៍​ដើម្បី​សន្សំ​ពិន្ទុ​ឆ្ពោះ​ទៅ​ដណ្តើម​ខ្សែ​ក្រវាត់​ប្រយុទ្ធ​ប្រឆាំង​គ្រឿង​ញៀន​ឆ្នាំ​២០១៣​នៅ​សង្វៀន​ប៉ុស្តិ៍​បាយ័ន បាន​ឈាន​ចូល​ដល់​ជុំ​ទី២​ហើយ​ក៏​ជា​សប្តាហ៍​ទី​៣​នៃ​ការ​ប្រកួត​ដែល​គ្រោង​ពេល​វេលា​ចំនួន​១៤​សប្តាហ៍​ដល់​ថ្ងៃ​ផ្តាច់​ព្រ័ត្រ​នា​ដើម​ឆ្នាំ​២០១៣​។

នៅ​ថ្ងៃ​សៅរ៍​សប្តាហ៍​នេះ​ការ​ប្រកួត​ជា​ការ​ជម្រុះ​សន្សំ​ពិន្ទុ​ក្នុង​ពូល​A​ដែល​មាន​សមាសភាព​ដូច​ខាង​ក្រោម៖​

គូ​ទី​១​សេង​ហៀង​មក​ពី​ក្លិប​កីឡា​ប្រដាល់​ចាក់​អង្រែ​មាន​ជ័យ​និង​នឿន​សាវឌី​មក​ពី​ក្លិប​អេ​ភូ​ថង​កីឡា​។

គូ​ខ្សែ​ក្រវាត់​មួយ​គូ​នេះ​បាន​ឆ្លង​កាត់​ការ​ប្រកួត​ត្រឹម​តែ​មួយ​លើក​ដូច​គ្នា​ហើយ​លទ្ធ​ផល​គឺ​ចាញ់​ដូច​គ្នា​មាន​តែ​មួយ​ពិន្ទុ​ម្នាក់​ប៉ុណ្ណោះ​។

សេង​ហៀង​ប្រកួត​ថ្ងៃ​ទី​៣​ខែ​វិច្ឆិកា​បាន​ចាញ់​សុខ​ចិន្តា​ដោយ​ពិន្ទុ​។​ចំណែក​នឿន​សាវឌី​ប្រកួត​ថ្ងៃ​ដូច​គ្នា បាន​បាញ់​ង៉ែត​រដ្ឋា​មក​ពី​ក្លិប​ក្រសួង​មហាផ្ទៃ​។

គូ​ទី​២​ង៉ែត​រដ្ឋា​ត្រូវ​ប៉ះ​ជាមួយ​អ៊ុំ​ចំរើន​មក​ពី​ក្លិប​តាឡី​មាន​រិទ្ធ​។​អ្នក​ប្រដាល់​ទាំង​ពីរ​ធ្លាប់​ឆ្លង​កាត់​មួយ​ប្រកួត​ដូច​គ្នា​និង​ឈ្នះ​ដូច​គ្នា​ដោយ​មាន​៣​ពិន្ទុ​។

ង៉ែត​រដ្ឋា​ប្រ​កួត​ឈ្នះ​នឿន​សាវឌី​ហើយ​អ៊ុំ ចំរើន​ប្រកួត​ឈ្នះ​កីឡាករ​ខុម​ពិសិដ្ឋ​។

គូទី៣​ខុម​ពិសិទ្ធ​មក​ពី​ក្លិប​អូរដឹម​កីឡា​ត្រូវ​ប្រកួត​ជាមួយ​សុខ​ចិន្តា​មក​ពី​ក្លិប​ឃ្លាំង​មឿង​ខេត្ត​ពោធិ៍សាត់​។

ខុម​ពិសិដ្ឋ​ទើប​តែ​មាន​១​ពិន្ទុ​ដោយ​ប្រកួត​ចាញ់​អ៊ុំ​ចំរើន​ចំណែក​សុខ​ចិន្តា​មាន​៣ពិន្ទុ​ក្នុង​ដៃ​ទៅ​ហើយ​។

យោង​តាម​ប្រវត្តិ​ប្រកួត​និង​កម្រិត​វិជ្ជា​គុន​របស់​កីឡាករ​ដណ្តើម​ខ្សែ​ក្រវាត់​ទាំង​៦​នាក់​នេះ​អាច​ឲ្យ​អ្នក​វិភាគ​តាម​ដាន​សកម្ម​ភាព​ប្រដាល់​ព្យាករ​ឃើញ​ថា​នឿន​សាវឌី​មាន​ប្រៀប​លើ​សេង​ហៀង​ផ្នែក​ជង្គង់​និង​កែង​ខណៈ​ដែល​សេង​ហៀង​មាន​ចិត្ត​ធំ​និង​មាន​ប្រៀប​ផ្នែក​កណ្តាប់​ដៃ​ហើយ​ពួក​គេ​កំពុង​មាន​ពិន្ទុ​១​ស្មើ​គ្នា​។

រី​ឯ​ង៉ែត​រដ្ឋា​និង​អ៊ុំ ចំរើន​មាន​ចំណុច​ខ្លាំង​ផ្សេង​ពី​គ្នា​គឺ​ង៉ែត​រដ្ឋា​ជំនាញ​ជង្គង់​ហើយ​អ៊ុំ​ចំរើន​ជំនាញ​កណ្តាប់​ដៃ​ហើយ​ការ​ព្យាករ​គឺ​ប្រហាក់​ប្រហែល​គ្នា​មិន​អាច​និយាយ​ថា​ខាង​ណា​មាន​ប្រៀប​ជាង​ខាង​ណា​នោះ​ទេ​ពី​ព្រោះពួក​គេ​មាន​៣​ពិន្ទុ​ដូច​គ្នា​។

ក្រៅ​ពី​គូ​ប្រកួត​ដណ្តើម​ខ្សែ​ក្រវាត់​មាន​គូ​ទាក់​ទាញ​ពេញ​និយម​មួយ​គូ​ទៀត​គឺ​កីឡា​ការិនី​វី​ស្រី​ខួច​មក​ពី​ក្លិប​នាគ​មាន​ជ័យ​ប្រកួត​ជា​មួយ សុខ​ស្រី​ម៉ៅ​មក​ពី​កង​រាជ​អាវុធ​ហត្ថ​ខេត្ត​កំពង់​ស្ពឺ​៕