សួស្តីឆ្នាំថ្មី! កាសែត​ភ្នំពេញ ប៉ុស្តិ៍ សូម​ជម្រាប​ជូន​ដំណឹង​ដល់​ប្រិយ​មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំង​អស់​ឲ្យ​បាន​ជ្រាប​ថា ដើម្បី​ចូល​រួម​អបអរ​ពិធី​បុណ្យ​ចូល​ឆ្នាំ​ខ្មែរ ប្រពៃណី​ជាតិ​ខាង​មុខ​នេះ ​ភ្នំពេញ ប៉ុស្តិ៍ នឹង​ផ្អាក​ចេញ​ផ្សាយ​ពី​ថ្ងៃទី​១៤ ១៥ ១៦ និង​១៧ មេសា ​២០១៤ ហើយ​នឹង​ចាប់​ផ្តើម​ចេញ​ផ្សាយ​ជា​ធម្មតា​ឡើង​វិញ​នៅ​ថ្ងៃ​ទី ១៨ មេសា ឆ្នាំ​២០១៤។ ភ្នំពេញ ប៉ុស្តិ៍ ​សូម​ជូន​ពរ មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំងអស់ ជួប​តែ​សេចក្តី​សុខ សុភមង្គល​គ្រប់​ៗ​គ្នា និង​គ្រប់​ពេល​វេលា នាឆ្នាំថ្មី​​នេះ។
Headlines:

៤​នាក់​បើក​ឆាក​ការ​ប្រកួត​ដណ្តើម​ប្រាក់​ក្នុង​ធនាគារ​នៅ​លើ​សង្វៀន​ប៉ុស្តិ៍​លេខ​បី​



121115_25b
ឆាយ មាស (ឆ្វេង) ត្រូវ​តទល់​ជាមួយ​ សារឿន​ ចាន់ នា​ជំនួប​បើក​ឆាក​។ សហការី

ភ្នំពេញៈ កីឡាករ​ស្ថិត​ក្នុង​ប្រភេទ​ទម្ងន់​៦០​គីឡូ​ក្រាម​ចំនួន​៨​នាក់ ត្រូវ​បាន​ជ្រើស​រើស​ឲ្យ​ចូល​រួម​ការ​ប្រកួត​ដណ្តើម​ប្រាក់​ក្នុង​ធនាគារ ដែល​ឧបត្ថម្ភ​ដោយ​ក្រុមហ៊ុន​ទឹក​បរិសុទ្ធ​ហាយតិច នៅ​លើ​សង្វៀន​ប៉ុស្តិ៍​លេខ​៣ ហើយ​៤​នាក់​ក្នុង​ចំណោម​ពួក​គេ នឹង​ត្រូវ​ឡើង​ប្រឈម​មុខ​ដាក់​គ្នា នៅ​ថ្ងៃ​សៅរ៍ ទី​១៧​ចុង​សប្តាហ៍​នេះ ដើម្បី​ដណ្តើម​យក​៣​ពិន្ទុ​នា​ថ្ងៃ​ប្រកួត​បើក​ឆាក​។

ទាក់​ទង​ទៅ​នឹង​ការ​ប្រកួត​នេះ លោក ទី រ៉ាណាត នាយក​ផ្នែក​ផលិត​កម្ម​វិធី​ប៉ុស្តិ៍​លេខ​៣ បាន​ប្រាប់​ភ្នំពេញ​ប៉ុស្តិ៍​ឲ្យ​ដឹង កាល​ពី​រសៀល​ម្សិល​មិញ​ថា កីឡា​ករ​ទាំង​៨​នាក់ ដែល​ត្រូវ​ធ្វើ​ការ​ប្រកួត​នៅ​ក្នុង​កម្ម​វិធី​នេះ បាន​ជ្រើស​រើស​គ្រប់​ចំនួន​ហើយ។

ពួក​គេ​ត្រូវ​បាន​បែង​ចែក​ការ​ប្រកួត​ជា​២​ពូល ហើយ​ការ​ប្រកួត​បើក​ឆាក នឹង​ចាប់​ផ្តើម​អនុវត្ត​ចាប់​ពី​ថ្ងៃ​សៅរ៍ ទី​១៧ ខែ​វិច្ឆិកា ចុង​សប្តាហ៍​នេះ​តទៅ។

លោក ទី រ៉ាណាត បាន​គូស​បញ្ជាក់​ថា​៖​«​នៅ​ក្នុង​ពូល​នីមួយៗ ត្រូវ​ធ្វើ​ការ​ប្រកួត​វិល​ជុំ​ជម្រុះ​យក​២​នាក់ សម្រាប់​ឡើង​ទៅ​ប្រកួត​នៅ​វគ្គ​ពាក់​កណ្តាល​ផ្តាច់​ព្រ័ត្រ ហើយ​អ្នក​ឈ្នះ​២​រូប​នៅ​ក្នុង​វគ្គ​នេះ នឹង​ឡើង​ទៅ​ប្រកួត​គ្នា​នៅ​វគ្គ​ផ្តាច់​ព្រ័ត្រ ដោយ​ចំណាត់​ថ្នាក់​លេខ​១ នឹង​ទទួល​បាន​ទឹក​ប្រាក់​៥០០​ដុល្លារ និង​ចំណាត់​ថ្នាក់​លេខ​២ ទទួល​បាន​ទឹក​ប្រាក់​១០០​ដុល្លារ បូក​នឹង​ប្រាក់​តម្លៃ​ខ្លួន​១០០​ដុល្លារ​បន្ថែម​ទៀត»។

សម្រាប់​ការ​ប្រកួត​បើក​ឆាក នៅ​ថ្ងៃ​សៅរ៍​ចុង​សប្តាហ៍​នេះ គឺ​ជា​ការ​ជួប​គ្នា​របស់​កីឡាករ​៤​រូប​នៅ​ក្នុង​ពូល​A ដោយ​ក្នុង​នោះ សារឿន ចាន់ មក​ពី​ក្លិប​សម្រែក​រាជសីហ៍​បង្រ្កាប​គ្រឿង​ញៀន ត្រូវ​ធ្វើ​ការ​ប្រកួត​ជា​មួយ​សិស្ស​គុន​ក្លិប​តេជះ​រាជសីហ៍​ខេត្ត​ក្រចេះ ឆាយ មាស ខណៈ​អ្នក​ប្រដាល់​ជើង​ថ្មី ធី តុងហ៊ី របស់​ក្លិប​សាល​វ័ន្ត​កីឡា ត្រូវ​ប្រឈម​មុខ​ជាមួយ​កីឡាករ​កំពុង​សាង​ភាព​ល្បី តក់ សោភ័ណ្ឌ មក​ពី​ក្លិប​អេភូថង​កីឡា។

ចំពោះ​សមត្ថ​ភាព​អ្នក​ទាំង​៤​នេះ មិន​ធ្លាប់​បាន​ជួប​គ្នា​ពីមុន​មក​នោះ​ទេ ប៉ុន្តែ​៣​នាក់​ក្នុង​ចំណោម​អ្នក​ទាំង​៤​សុទ្ធ​តែ​ទទួល​ការ​បរាជ័យ​ដូច​គ្នា នា​ជំនួប​ចុង​ក្រោយ​របស់​ពួក​គេ​កន្លង​មក​នេះ​ដោយ​ក្នុង​នោះ សារឿន ចាន់ បាន​ចាញ់​ពិន្ទុ យ៉េន ឌីណា ឆាយ មាស ចាញ់​ពិន្ទុ រិន មុន្នី រីឯ ធី តុងហ៊ី ចាញ់ រឿម វណ្ណៈ តែ តក់ សោភ័ណ្ឌ ឈ្នះ​ពិន្ទុ ថុល មករា។

តែ​ទោះ​បី​ជា​យ៉ាង​ណា ផ្អែក​លើ​សមត្ថ​ភាព និង​បទ​ពិសោធ​ប្រកួត​កន្លង​មក សារឿន ចាន់ នៅ​តែ​ជា​កីឡាករ ដែល​មាន​អាទិភាព​ខ្ពស់ ក្នុង​ការ​គ្រង​តំណែង​លេខ​១​ប្រចាំ​ពូល​មួយ​នេះ ហើយ​គេ​ក៏​អាច​ក្លាយ​ជា​បេក្ខ​ភាព ឈ្នះ​ប្រាក់​ក្នុង​ធនាគារ​លើក​នេះ​ផង​ដែរ បើ​សិន​ជា​រូប​គេ ត្រៀម​ខ្លួន​បាន​ល្អ​១០០​ភាគ​រយ​។

ដោយ​ឡែក​អ្នក​ប្រដាល់​៤​រូប​ផ្សេង​ទៀត ដែល​ឈរ​នៅ​ក្នុង​ពូល​B វិញ​នោះ មាន​អ្នក​លេង​ស្នៀត​កែង រឿម វណ្ណៈ របស់​សមាគម​កីឡា​ប្រដាល់​ក្រសួង​ការ​ពារ​ជាតិ សិស្ស​គុន​ក្លិប​ព្រះខ័ន​រាជ ផាន់ គ្រាន់ កីឡាករ ថុល មករា មក​ពី​ក្លិប​ឃ្លាំង​មឿង​កីឡា និង​អ្នក​ប្រដាល់​ជើង​ចាស់ វ៉ាន់ ចាន់វ៉េត មក​ពី​ក្លិប​សិង្ហ​កីឡា ហើយ​អ្នក​ទាំង​៤​នឹង​ធ្វើ​ការ​ប្រកួត​គ្នា​នៅ​ថ្ងៃ​សៅរ៍ ទី​២៤ ខែ​វិច្ឆិកា ដោយ​ក្នុង​នោះ រឿម វណ្ណៈ ជួប ផាន់ គ្រាន់ ខណៈ ថុល មករា ប៉ះ វ៉ាន់ ចាន់វ៉េត៕