Headlines:

លោក Zwanziger ថា លោក Platini ជំរុញ​ឲ្យ​មាន​ផ្ទះ​ច្រើន​នា​ព្រឹត្តិការណ៍​Euro២០២០​



121115_27a
លោក Michel Platini ប្រធាន​សហ​ព័ន្ធ​កីឡ​ាបាល់​ទាត់​ទ្វីប​អឺរ៉ុប​ UEFA។ Reuters

ក្រុង​ហ្សឺណែវៈ អង្គ​ភាព​គ្រប់​គ្រង​កីឡា​បាល់​ទាត់​ទ្វីប​អឺរ៉ុប​ហៅ​កាត់​ថា UEFA ធ្វើ​ដំណើរ​ឆ្ពោះ​ទៅ​មុខ​ជា​មួយ​នឹង​សំណើ​មួយ​សម្រាប់​ព្រឹត្តិ​ការណ៍ Euro ឆ្នាំ​២០២០ ដែល​ត្រូវ​បាន​ធ្វើ​ជា​ម្ចាស់​ផ្ទះ​ដោយ​ប្រទេស​ចំនួន​១២ និង​មិន​មែន​រៀប​ចំ​ដោយ​ប្រទេស​មួយ ឬ​ពីរ​ដូច​ធម្មតា​ឡើយ នេះ​បើ​តាម​ការ​បញ្ជាក់​របស់​លោក Theo Zwanziger សមា​ជិក​គណៈ​កម្មា​ធិការ​ប្រតិបត្តិ UEFA របស់​អាល្លឺ​ម៉ង់ កាល​ពី​ថ្ងៃ​អង្គារ​។

លោក Zwanziger ដែល​ជា​អតីត​ប្រធាន​សមា​គម​កីឡា​បាល់​ទាត់​អាល្លឺ​ម៉ង់ (DFB) បាន​និយាយ​ថា ផែន​ការ​នេះ ដែល​នៅ​តែ​ត្រូវ​ទទួល​សច្ចានុ​មតិ​ពី​សំណាក់​សមា​ជិក​ប្រតិ​បត្តិ​របស់ UEFA នោះ អាច​នឹង​ផ្តល់​ឲ្យ​ដល់​ប្រទេស​ចំនួន​១២​ក្នុង​ការ​ធ្វើ​ជា​ម្ចាស់​ផ្ទះ​នៃ​យុទ្ធ​នាការ​ដែល​ពង្រីក​នេះ ដែល​នឹង​មាន​ក្រុម​រហូត​ដល់​ទៅ​២៤ មិន​មែន​១៦​ដូច​បច្ចុប្បន្ន​ឡើយ​។

លោក Zwanziger បាន​និយាយ​ប្រាប់​កាសែត Bild ថា៖ «លោក Michel Platini បាន​ប្រាប់​ខ្ញុំ​អំពី​គម្រោង​របស់​លោក​នៅ​ក្នុង​កិច្ច​ពិភាក្សា​ជា​ឯក​ជន​មួយ​។ ប៉ុន្តែ​វា​នៅ​តែ​ត្រូវ​ការ​សច្ចា​នុមតិ​ពី​សំណាក់​សមាជិក​នៃ​គណៈ​កម្មា​ធិការ​ប្រតិ​បត្តិ​»។

បើ​យោង​ទៅ​តាម​លោក Zwanziger គម្រោង​នេះ នឹង​ផ្តល់​ឱកាស​ដល់​ប្រទេស​ចំនួន​១២​ក្នុង​ការ​ធ្វើ​ជា​ម្ចាស់​ផ្ទះ​រៀប​ចំ​ការ​ប្រកួត ខណៈ​ប្រទេស​ដែល​ត្រូវ​ជ្រើស​រើស​គឺ​អាស្រ័យ​ទៅ​លើ​ចំណាត់​ថ្នាក់​ក្នុង UEFA របស់​ពួក​គេ​នៅ​ពេល​នោះ និង​អាស្រ័យ​ទៅ​លើ​ថា តើ​ពួក​គេ​បាន​ឆ្លង​ផុត​វគ្គ​ជម្រុះ​សម្រាប់​យុទ្ធ​នាការ​នេះ ឬ​យ៉ាង​ណា​។

បើ​យោង​ទៅ​តាម​ការ​ផ្សាយ​របស់​កាសែត Bild ដដែល​នេះ មាន​ការ​លើក​ឡើង​ថា ប្រសិន​បើ​ប្រទេស​អាល្លឺម៉ង់ បាន​ឆ្លង​ផុត​វគ្គ​ជម្រុះ​សម្រាប់​ព្រឹត្តិ​ការណ៍​នេះ ពួក​គេ​នឹង​ចូល​រួម​ការ​ប្រកួត​ជម្រុះ​តាម​ពូល​របស់​ពួក​គេ​នៅ​ឯ​កីឡ​ដ្ឋាន Olympic ក្នុង​ទី​ក្រុង​ប៊ែរឡាំង​។

លោក Platini បាន​និយាយ​កាល​ពី​ខែ​តុលា​ថា លោក​ត្រឹម​តែ​ជំរុញ​ឆ្ពោះ​ទៅ​មុខ​ជា​មួយ​នឹង​គំនិត​នៃ​ការ​រៀប​ចំ​ព្រឹត្តិ​ការណ៍ Euro ឆ្នាំ​២០២០​ទូទាំង​ទ្វីប​នេះ​ប៉ុណ្ណោះ ប្រសិន​បើ​សមា​គម​ដែល​ជា​សមា​ជិក​គាំ​ទ្រ​ផែន​ការ​នេះ​។

លោក​ក៏​បាន​ឲ្យ​ដឹង​ផង​ដែរ​ថា យុទ្ធនា​ការ​ដែល​មាន​ការ​ប្រកួត​កើន​ឡើង​ក្នុង​ឆ្នាំ​២០២០​នេះ នឹង​នាំ​ឲ្យ​មាន​ការ​ចំណាយ​ច្រើន​ពេក​សម្រាប់​ប្រទេស​ម្ចាស់​ផ្ទះ​តែ​មួយ ឬ​ក៏​សហ​ម្ចាស់​ផ្ទះ​ដេញ​ថ្លៃ​។ គំនិត​របស់​លោក Platini នៃ​មាន​ការ​ប្រកួត​ក្នុង​ប្រទេស​ចំនួន​១២ ដោយ​ការ​ប្រកួត​វគ្គ​ផ្តាច់​ព្រ័ត្រ​នឹង​ត្រូវ​រៀប​ចំ​នៅ​លើ​ទី​លាន​តែ​មួយ នឹង​ត្រូវ​យក​មក​ពិភាក្សា​ដោយ​ក្រុម​ប្រឹក្សា​ប្រតិ​បត្តិ​ក្នុង​ខែ​ធ្នូ ខណៈ​សេចក្តី​សម្រេច​មួយ​នឹង​ត្រូវ​ធ្វើ​ឡើង​នៅ​ដើម​ឆ្នាំ​ក្រោយ​៕ IS