ភ្នំពេញ ប៉ុស្តិ៍
ភ្នំពេញៈ អង្គការផ្កាយសមុទ្រក្នុងនាមជាដៃគូរបស់សហព័ន្ធកីឡាបាល់ទាត់កម្ពុជានឹងប្រារព្ធពិធីបើកការប្រកួតកីឡាបាល់ទាត់វិលជុំBarclays/ISF លើកទីបួនកាលពីថ្ងៃទី១៨ ខែវិច្ឆិកា ម្សិលមិញនេះ។
ព្រឹត្តិការណ៍នេះ នឹងប្រព្រឹត្តទៅនៅលើទីលានកីឡាបាល់ទាត់នៃវិទ្យាស្ថានអប់រំកាយ និងកីឡាពេញមួយថ្ងៃ ដោយមានការចូលរួមពីកុមារា-កុមារីចំនួន៤៤ក្រុមមកពីសាលារៀន អង្គការ និងសមាគមជាដៃគូនានា។
បើយោងតាមកញ្ញា Kate Griffin នាយិកាអង្គការផ្កាយសមុទ្រ ការប្រកួតនឹងត្រូវបែងចែកជា៥ក្របខ័ណ្ឌផ្សេងៗ។ បន្ទាប់ពីបើកការប្រកួតនៅថ្ងៃ១៨ ខែវិច្ឆិកា ជំនួបប្រកួតវិលជុំនឹងត្រូវចាប់ដំណើរការពីថ្ងៃទី២៥ ខែវិច្ឆិកា ដល់ចុងខែមីនាឆ្នាំ២០១៣។
កុមារា-កុមារីដែលចូលរួមក្នុងព្រឹត្តិការណ៍នេះ គឺស្ថិតនៅអាយុក្រោម១០ឆ្នាំ ក្រោម១៤ឆ្នាំ និងក្រោម១៨ឆ្នាំ។
កញ្ញា ជួប វិច្ឆិកា អនុប្រធានអង្គការផ្កាយសមុទ្រ បានរំឭកថា កាលពីឆ្នាំ២០១១ ការប្រកួតបានប្រព្រឹត្តទៅនៅលើទីលានក្លិបភ្នំពេញក្រោនដោយមាន៤៦ក្រុមចូលរួម និងកុមារា-កុមារីជិត១០០០នាក់។
កញ្ញាបានលើកឡើងថា៖ «យើងមានគោលបំណងឲ្យកុមារា-កុមារីនៅកម្ពុជាជាពិសេសក្មេងកំព្រាទទួលបាននូវការអប់រំផ្នែកកីឡាបាល់ទាត់ និងចំណេះដឹងទូទៅ ដែលវាជាយានមួយនៃវាសនារបស់ពួកគេ»។
Kate បានគូសបញ្ជាក់ថា ការប្រកួតនេះមិនសំដៅលើប្រាក់រង្វាន់នោះឡើយ ប៉ុន្តែពួកគេនឹងទទួលបានសម្ភារសិក្សាផ្សេងៗ ហើយអ្វីដែលចម្បងនោះ គឺផ្តល់ឲ្យពួកគេចៀសផុតគឺគ្រឿងញៀន និងការដើរលេងអនាថា៕
