Headlines:

លទ្ធ​ផល​ចាប់​ឆ្នោត​រើស​ពូល​Hun Sen Cup ឆ្នាំ​២០១៣



121123_28b
ក្រុម​កីឡាករ​ព្រះខ័នរាជលើក​ពាន​រង្វាន់​សម្តេច​ហ៊ុន សែន​ឆ្នាំ​២០១២ ក្រោយ​ឈ្នះ​ណាហ្គាខប។ ស្រេង ម៉េង​ស្រ៊ុន​

ភ្នំពេញ: កាល​ពី​ព្រឹក​ថ្ងៃ​ព្រហស្បតិ៍​ម្សិលមិញ​នេះ សហ​ព័ន្ធ​កីឡា​បាល់​ទាត់​កម្ពុជា បាន​រៀប​ចំ​ពិធី​ចាប់​ឆ្នោត​រើស​ពូល​សម្រាប់​ក្រុម​ដែល​ត្រូវ​ចូល​រួម​ក្នុង​ព្រឹត្តិការណ៍​ដណ្តើម​ពាន​រង្វាន់​សម្តេច​អគ្គ​មហា​សេនា​បតី​តេជោ ហ៊ុន សែន ឆ្នាំ​២០១៣។

ព្រឹត្តិ​ការណ៍​ដែល​រៀប​ចំ​ប្រចាំ​ឆ្នាំ​ជា​លើក​ទី​៧​នេះ នឹង​ត្រូវ​ប្រព្រឹត្ត​ទៅ​ពី​ថ្ងៃ​ទី​៣ ខែ​ធ្នូ ឆ្នាំ​២០១២ ដល់​ថ្ងៃ​ទី​១៦ ខែ​កុម្ភៈ​ឆ្នាំ​២០១៣ ដោយ​មាន​ការ​បែង​ចែក​ជា​ពី​តំណាក់​កាល​។

ចាប់​ពី​ថ្ងៃ​ទី​៣ ដល់​ថ្ងៃ​ទី​១១ ខែ​ធ្នូ ជា​ការ​ប្រកួត​ជុំ​បឋម​នៅ​តំបន់​ចំនួន​៦ គឺ​តំបន់​រាជ​ធានី​ភ្នំពេញ តំបន់​ខាង​កើត​(​ស្វាយ​រៀង​ជា​ម្ចាស់​ផ្ទះ) តំបន់​កណ្តាល​(សៀមរាប) តំបន់​ខាងលិច (បាត់​ដំបង) តំបន់​ខាង​ត្បូង (កំពត) និង​តំបន់​ខាង​ជើង (រតនគិរី)។

តំបន់​រាជធានី​ភ្នំពេញ មាន​៩​ក្រុម​ចូល​រួម​ដោយ​ត្រូវ​បាន​បែង​ចែក​ជា​បី​ពូល។ ពូល A ក្រុម​ពោធិ៍​សែន​ជ័យ​ត្រូវ​ជួប​ជា​មួយ​ក្រុម​ឫស្សី​កែវ​និង​ដូន​ពេញ រីឯ​ក្រុម​ដែល​កាត់​ចេញ​ពី​លីក​នា​រដូវកាល​មុន វេស្ទើន​អែហ្វ​ស៊ី ត្រូវ​តទល់​ជាមួយ​ក្រុម​ដង្កោ និង​៧មករា ខណៈ​ឆ្លាម​សមុទ្រ​ដែល​ធ្លាប់​មាន​បទ​ពិសោធ​ខ្ពស់ ត្រូវ​ប្រជែង​ជា​មួយ​ក្រុម​ទួល​គោក និង​ចំការមន។

នៅ​តំបន់​ខាង​កើត ក្រុម​ម្ចាស់​ផ្ទះ​ស្វាយ​រៀង ប៉ះ​ជាមួយ​ក្រុម​ខេត្ត​កណ្តាល និង​ព្រៃវែង។ រីឯ​តំបន់​កណ្តាល​មាន​ការ​ចូល​រួម​រហូត​ដល់​ទៅ​៥​ក្រុម ដោយ​ក្រុម​ម្ចាស់​ផ្ទះ​សៀម​រាប នឹង​មាន​ជំនួប​ដ៏​តឹង​តែង​ជាមួយ​ក្រុម​ខេត្ត​ឧត្តរមាន​ជ័យ កំពង់​ធំ បន្ទាយ​មាន​ជ័យ និង​អាស៊ី​អឺរ៉ុប (ព្រះវិហារ)។ នៅ​តំបន់​ខាង​លិច​ក្រុម​ខេត្ត​បាត់​ដំបង​ត្រូវ​ស្វាគមន៍​ក្រុម​ដែល​មក​ពី​ខេត្ត​ជាប់​របងគឺ ប៉ៃលិន និង​កំពង់​ឆ្នាំង។ នៅ​តំបន់​ខាង​ត្បូង ម្ចាស់​ផ្ទះ​កំពត​ទទួល​ភ្ញៀវ​មក​ពី​តំបន់​សមុទ្រ​កោះកុង កែប រួម​ទាំង​ក្រុម​នៃ​ខេត្ត​តាកែវ។ ចំណែក​ឯ​តំបន់​ខាង​ជើង​ម្ចាស់​ផ្ទះ​រតនគិរី ត្រូវ​ប្រជែង​ពិន្ទុ​ជាមួយ​ខេត្ត​ក្រចេះ និង​មណ្ឌលគិរី។

ក្រុម​ដែល​បញ្ចប់​ក្នុង​ចំណាត់​ថ្នាក់​កំពូល​នៃ​ពូល​ទាំង​បី​ក្នុង​តំបន់​រាជធានី​ភ្នំពេញ និង​ជើង​ខ្លាំង​កំពូល​នៃ​តំបន់​៥​ទៀត នឹង​ត្រូវ​ឡើង​បន្ត​ទៅ​កាន់​ជុំ​ចុង​ក្រោយ​ដែល​រៀប​ចំ​នៅ​ក្នុង​រាជធានី​ភ្នំពេញ ចាប់​ពី​ថ្ងៃ​ទី​២០ ខែ​ធ្នូ ឆ្នាំ​២០១២ ដល់​ថ្ងៃ​ទី​១៦ ខែ​កុម្ភៈ ឆ្នាំ​២០១៣ ដែល​ប្រព្រឹត្ត​ទៅ​នៅ​ទី​លាន​នៃ​ពហុកីឡដ្ឋាន​ជាតិ​អូឡាំពិក និង​ស្តាត​ចាស់។

ការ​ប្រកួត​ជុំ​ចុង​ក្រោយ​ត្រូវ​បាន​បែង​ចែក​ជា​៤ពូល​បន្ត​ទៀត ដោយ​នៅ​ក្នុង​ពូល A ជើង​ឯក​រង​បី​ជំនាន់​ណា​ហ្គាខប ត្រូវ​ប៉ះ​ជាមួយ​ម្ចាស់​ជើង​ឯក​ឆ្នាំ​២០១០ ក្រសួង​ការពារ​ជាតិ រួម​ទាំង​លេខ​មួយ​ពូល​C នៃ​តំបន់​ភ្នំពេញ និង​លេខ​មួយ​នៃ​តំបន់​ខាង​ជើង។ រីឯ​ពូល B ក្រុម​អគ្គ​ស្នងការ​ដ្ឋាន​នគរ​បាល​ជាតិ​ប៉ះ​ជើង​ឯក​រង​ឆ្នាំ​២០១១ បៀល​ប្រាយយូណាយ​ធីត ក្រុម​លេខ​មួយ​ពូល B នៃ​តំបន់​ភ្នំពេញ និង​លេខ​មួយ​នៃ​តំបន់​ខាង​ត្បូង។ ម្ចាស់​ជើង​ឯក​ពាន​រង្វាន់​មិត្ត​ហ្វូន​ខេម​បូ​ឌាន​លីក​ឆ្នាំ​២០១២ ចម្ការ​កៅ​ស៊ូ​បឹង​កេត ស្ថិត​នៅ​ក្នុង​ពូល C ជាមួយ​គិរីវង់​សុខសែន​ជ័យ ក្រុម​លេខ​មួយ​តំបន់​ខាង​លិច និង​លេខ​មួយ​តំបន់​ខាង​កើត។ ពូល​D នឹង​បង្ក​ឲ្យ​មាន​ការ​ប្រកួត​ដ៏​តឹង​តែង​ដោយ​ក្រុម​លេខ​មួយ​ពូល A នៃ​តំបន់​ភ្នំពេញ និង​លេខ​មួយ​នៃ​តំបន់​កណ្តាល ត្រូវ​ប្រជែង​យក​ពិន្ទុ​ជាមួយ​ក្រុម​ដែល​ធ្លាប់​ទទួល​បាន​តំបន់​តំណែង​ជើង​ឯក​ពីរ​ជំនាន់ គឺ​ព្រះ​ខ័នរាជ និង​ភ្នំពេញ​ក្រោន។

ពីរ​ក្រុម​ដែល​ទទួល​បាន​ពិន្ទុ​លើស​គេ​នៃ​ពូល​នីមួយ​ៗ នឹង​ឈាន​បន្ត​ទៅ​ប្រកួត​វគ្គ​ខ្វែង ហើយ​ក្រុម​ដែល​ទទួល​ជ័យ​ជម្នះ​ជា​បន្ត​បន្ទាប់ ត្រូវ​ឆ្ពោះ​ទៅ​កាន់​វគ្គ​១/៤​ផ្តាច់​ព្រ័ត្រ ១/២ផ្តាច់​ព្រ័ត្រ និង​វគ្គ​ផ្តាច់​ព្រ័ត្រ​នៅ​ថ្ងៃ​ទី​១៦ ខែ​កុម្ភៈ ឆ្នាំ​២០១៣។

ពាន​រង្វាន់​មិត្ត​ភាព​ទូរទស្សន៍ ខេត្ត​ប៊ិញ​ភឿក

ក្រុម​ចំនួន​បី​ដែល​តំណាង​ឲ្យ​កម្ពុជា គឺ​ភ្នំពេញ​ក្រោន ព្រះ​ខ័នរាជ និង​ចម្ការ​កៅ​ស៊ូ​បឹង​កេត​កំពុង​មាន​សកម្ម​ភាព​នៃ​ក្នុង​ព្រឹត្តិ​ការណ៍​ដណ្តើម​ពាន​រង្វាន់​មិត្ត​ភាព​ទូរ​ទស្សន៍​ខេត្ត​ប៊ិញ​ភឿក ប្រទេស​វៀតណាម។

កាល​ពី​ថ្ងៃ​ពុធ ភ្នំពេញ​ក្រោន​បាន​ទទួល​ជ័យ​ជម្នះ​លើ​ក្រុម Lao TV ៥-១ ដោយ​ឃឹម បូរី និង​ហុង ផេង ស៊ុត​បាន​ម្នាក់​២​គ្រាប់ ហើយ ម៉ាត់ ហា​សាន់ បន្ថែម​បាន​មួយ​គ្រាប់។ នា​ការ​ប្រកួត​បន្ទាប់ ទុំ សារាយ ប្រាក់ មុន្នីឧត្តម និង​សុក​ចាន់​រស្មី ស៊ុត​បាល់​បញ្ចូល​ទី​ម្នាក់​មួយ​គ្រាប់​សម្រាប់​ព្រះខ័នរាជ ដែល​បាន​បញ្ចប់​ក្នុង​លទ្ធ​ផល​ស្មើ ៣-៣ ជាមួយ​ក្រុម U21 T&T Hanoi។ កាលពី​ថ្ងៃ​ម្សិលមិញ ចាន់ វឌ្ឍនាកា រក​បាន​បី​គ្រាប់ និង​ស៊ីន ដាលីន បន្ថែម​មួយ​គ្រាប់ ខណៈ​ចម្កា​កៅ​ស៊ូ​បឹង​កេត​បំបាក់​ក្រុម​សៃហ្គន ៤-១​។

លោក អោក សំណាង អគ្គ​លេខាធិការ​ក្លិប​ព្រះ​ខ័នរាជ បាន​ឲ្យ​ដឹង​ថា​ក្រុម​របស់​លោក​និង​ក្រុម​បឹង​កេត បាន​រៀប​ចំ​ការ​រំឭក​ព្រះ​វិញ្ញាណ​ក្ខន្ធ​សម្តេច​ព្រះ​វរ​រាជ​បិតា និង​ពាក់​ប្រឡង់​ដៃ​កាន់​ព្រះរាជ​មរណ​ទុក្ខ។ កាល​ពី​ម្សិញមិញ​ក៏​មាន​ជម្លោះ​ដ៏​តឹង​តែង​រវាង​U21 ឡាវ និង​ក្រុម​ម្ចាស់​ផ្ទះ ប៊ិញ​ភឿក​ផង​ដែរ៕