Headlines:

ក្រុម​កុមារី​អាយុ​ក្រោម​១៥​ឆ្នាំ​ចេញ​ទៅ​ប្រកួត​នៅ​សិង្ហបុរី



121123_26c
សកម្ម​ភាព​ប្រកួត​របស់​ក្រុម​កុមារី​កម្ពុជា (អាវ​ខៀវ) នា​ការ​បង្ហាញ​ខ្លួន​លើក​ដំបូងនៅ​ប្រទេស​សិង្ហបុរី​កាលពី​ឆ្នាំ​២០១០។ សហការី​

ភ្នំពេញៈ ក្រោម​កិច្ច​សហប្រតិ​បត្តិ​ការ​ជា​មួយ​អង្គការ​កម្ម​វិធី​សលត៍ និង​ការ​គាំ​ទ្រ​ពី​សំណាក់​សហ​ព័ន្ធ​កីឡា​បាល់​ទាត់​កម្ពុជា អង្គការ​ផ្កាយ​សមុទ្រ​នឹង​បញ្ជូន​ក្រុម​កីឡា​បាល់​ទាត់​កុមារី​ចំនួន​២៣​នាក់​ដើម្បី​ទៅ​ចូល​រួម​ក្នុង​ព្រឹត្តិការណ៍​U-15 Girls នៅ​ប្រទេស​សិង្ហបុរី។

ការ​ប្រកួត​នឹង​ប្រព្រឹត្ត​ទៅ​ពី​ថ្ងៃ​ទី​២៥ ខែ​វិច្ឆិកា ដល់​ថ្ងៃ​ទី​២ ខែ​ធ្នូ ដែល​ក្រុម​កម្ពុជា​គឺ​តំណាង​ឲ្យ​កិច្ច​សហ​ប្រតិបត្តិ​ការ​លើ​កម្មវិធី​បាល់​ទាត់​រវាង​អង្គការ​ផ្កាយ​សមុទ្រ និង​កម្មវិធី​សលត៍ (ISF/SALT)។

ព្រឹត្តិ​ការណ៍​នេះ​ទទួល​បាន​នូវ​ការ​គាំ​ទ្រ​ដោយ​ស្ថាប័ន UWCSEA East Campus របស់​សិង្ហបុរី ក្នុង​គោល​បំណង​លើក​កម្ពស់​ការ​ចូល​រួម​របស់​នារី​នៅ​ក្នុង​សកម្ម​ភាព​កីឡា​បាល់​ទាត់។

យោង​ទៅ​តាម​សេចក្តី​ប្រកាស​ព័ត៌មាន​របស់​អង្គ​ការ​ផ្កាយ​សមុទ្រ ក្រុម​កុមារី​កម្ពុជា ធ្លាប់​បាន​ចេញ​ទៅ​ប្រកួត​នៅ​សិង្ហ​បុរី​ម្តង​កាល​ពី​ឆ្នាំ​២០១០ ហើយ​នៅ​ឆ្នាំ​នេះ ក្នុង​ចំណោម​ជម្រើស​ទាំង​២៣​នាក់ ១៦​នាក់​គឺ​ជា​កីឡា​ការិនី ៦នាក់​ជា​សិស្ស​ឆ្នើម​នៅ​សាលា​រដ្ឋ​និង​២​នាក់​ជា​កុមារី​គ​ថ្លង់​ដែល​ចូល​រួម​ក្នុង​កម្មវិធី​កីឡា​បាល់​ទាត់​។

កញ្ញា​ជួប​វិច្ឆិកា​អនុ​ប្រធាន​អង្គការ​ផ្កាយ​សមុទ្រ​បាន​ប្រាប់​ភ្នំពេញ​ប៉ុស្តិ៍​កាល​ពី​ម្សិលមិញ​ថា​កុមារី​កម្ពុជា​មួយ​ក្រុម​នេះ នឹង​ដឹកនាំ​ដោយ​លោក Leo Brogan ប្រធាន​ក្រុម​ប្រឹក្សា​ភិបាល និង​លោក Sam Scheingruber ដែល​ជា​គ្រូ​បង្វឹក​រួម​ទាំង​ជំនួយ​ការ​ពីរ​នាក់​ទៀត។

ពួក​គេ​នឹង​ចេញ​ដំណើរ​នៅ​ថ្ងៃ​អាទិត្យ ទី​២៥ ខែ​វិច្ឆិកា ខាង​មុខ​នេះ ដោយ​នៅ​ក្នុង​ប្រទេស​សិង្ហបុរី ពួក​គេ​ត្រូវ​ប្រកួត​ជា​មួយ​ក្រុម​ម្ចាស់​ផ្ទះ​និង​ក្រុម​សាលា​ផ្សេង​ៗ​ទៀត ដែល​មាន​សរុប​ជាង​១០​ប្រកួត។ ដោយ​ឡែក នៅ​ថ្ងៃ​ទី​១ ខែធ្នូ នឹង​មាន​ការ​ប្រកួត​ក្រោម​ទម្រង់​ជា​ក្រុម​ដែល​មាន​ម្ខាង​ៗ​ចំនួន​៧​នាក់៕