Headlines:

Wiggins កំពុង​តែ​សម្រាក​ព្យាបាល​នៅ​មន្ទីរ​ពេទ្យ​



121109_26b
កីឡាករ​ប្រណាំង​កង់​ឆ្នើម Bradley Wiggins កំពុង​តែរង​ការញាំញី​ដោយ​សារ​បញ្ហា​របួស។ Reuters

ក្រុង​ប៉ារីសៈ កីឡាករ​ប្រណាំង​កង់ Bradley Wiggins ដែល​ជា​ម្ចាស់​ជើង​ឯក​ព្រឹត្តិ​ការណ៍ Tour de France និង​ជា​ម្ចាស់​មេ​ដាយ​មាស​អូឡាំ​ពិក បាន​រង​របួស​លើ​ឆ្អឹង​ជំនីរ និង​ថ្លោះ​ម្រាម​ដៃ​ក្រោយ​ពី​រង​ការ​បុក​ដោយ​រថ​យន្ត​ដឹក​ជំនិញ​មួយ ខណៈ​ដែល​ចេញ​ទៅ​ហ្វឹក​ហាត់​កាល​ពី​ល្ងាច​ថ្ងៃ​ពុធ​។

Wiggins វ័យ​៣២​ឆ្នាំ ដែល​បាន​ឈ្នះ​មេ​ដាយ​អូឡាំ​ពិក​ចំនួន​៧ ក្នុង​នោះ​រាប់​បញ្ចូល​ទាំង​មេដាយ​ចំនួន​៤ ត្រូវ​បាន​បញ្ជូន​ទៅ​កាន់​មន្ទីរ​ពេទ្យ​ក្នុង​ទីក្រុង Preston ដែល​កន្លែង​រូប​គេ​ត្រូវ​បាន​ផ្តល់​នូវ​ឱសថ​បំបាត់​ការ​ឈឺ​ចុង​ចាប់ និង​ជា​កន្លែង​ត្រូវ​បាន​ផ្តល់​ការ​ពិនិត្យ​ដោយ​ម៉ា​ស៊ីន​ស្កែន​លើ​ក្បាល​របស់​គេ​យ៉ាង​ប្រុង​ប្រយ័ត្ន​។

ក្រុម Team Sky របស់ Wiggins បាន​និយាយ​ក្នុង​សេច​ក្តី​ថ្លែង​ការណ៍​មួយ​ថា៖ «រូប​គេ​កំពុង​តែ​ត្រូវ​បាន​ថែ​រក្សា​ក្នុង​មន្ទីរ​ពេទ្យ​រយៈ​ពេល​ពីរ​សប្តាហ៍​ដើម្បី​ធ្វើ​ការ​អង្កេត ប៉ុន្តែ​របួស​ដែល​រូប​គេ​បាន​ជួប​មិន​ត្រូវ​បាន​គិត​ថា ធ្ងន់​ធ្ងរ​ឡើយ ហើយ​គេ​ត្រូវ​បាន​រំពឹង​ទុក​ថា នឹង​ជា​សះ​ស្បើយ​ទាំង​ស្រុង​»។

Wiggins កំពុង​តែ​ស្ថិត​ក្នុង​ដំណើរ​នៃ​ការ​វិល​ត្រឡប់​មក​ហ្វឹក​ហាត់​ក្នុង​រដូវ​រងា​របស់​គេ ក្រោយ​ពី​ការ​សម្រាក​ក្នុង​រដូវ​ស្លឹក​ឈើ​ជ្រុះ​របស់​គេ ដែល​ជា​អំឡុង​ពេល​ដែល​គេ​បាន​ចំណាយ​ដើម្បី​បោះ​ពុម្ព​ផ្សាយ​សៀវ​ភៅ​ស្តី​ពី​ការ​ប្រកួត Tour de France របស់​គេ​ឈ្មោះ​ថា My Time ដែល​កំពុង​តែ​ត្រូវ​បាន​ចេញ​ផ្សាយ​ក្នុង​កាសែត Guardian ហើយ​ត្រូវ​បាន​ចេញ​ផ្សាយ​កាល​ពី​ថ្ងៃ​ម្សិល​មិញ​។

ការ​ប៉ះ​ទង្គិច​នេះ គឺ​ជា​សំណាង​អាក្រក់​ទាំង​កម្រ​មួយ​សម្រាប់​កីឡាករ​ប្រណាំង​កង់​សញ្ជាតិ​អង់​គ្លេស​រូប​នេះ ដែល​បាន​បំពេញ​ការ​ហ្វឹក​ហាត់ និង​កម្ម​វិធី​ប្រណាំង​ទាំង​មូល​របស់​គេ​សម្រាប់​ឆ្នាំ​២០១២​ដោយ​គ្មាន​ការ​ប៉ះ​ទង្គិច​មួយ ឬ​សូម្បី​តែ​ជំងឺ​ដ៏​តូច​មួយ និង​បាន​គេច​ផុត​ពី​ការ​ប៉ះ​ទង្គិច​ជា​ច្រើន​លើ​ផ្លូវ​ឆ្ពោះ​ទៅ​រក​ពាន​រង្វាន់ Tour de France របស់​គេ​។
ការ​រង​របួស​ចុងក្រោយ​ដែល​រំខាន​ដល់​អាជីព​របស់​គេ គឺ​របួស​បាក់​ឆ្អឹង​ដង​កាំបិត​ដែល​បាន​កើត​ឡើង​អំឡុង​ពេល​នៃ​ការ​ប្រកួត​ក្រប​ខ័ណ្ឌ​Tour de France កាល​ពី​ឆ្នាំ​២០១១ បន្ទាប់​ពី​នោះ​រូប​គេ​បាន​ចេញ​ឆ្ងាយ​ពី​កង់​របស់​គេ​រយៈ​ពេល​៤​សប្តាហ៍​៕ IS