Headlines:

បង្កើត​ព្រឹត្តិ​ការណ៍​កីឡា​វាយ​សី​ដើម្បី​រំឭក​ខួប​២ធ្នូ​



121114_26a
ការ​ប្រកួត​កីឡា​វាយ​សី​ជ្រើស​រើស​ជើង​ឯក​ថ្នាក់​ជាតិ​ប្រចាំ​ឆ្នាំ​២០១២ ដែល​ទើប​តែ​ត្រូវ​បញ្ចប់​កាល​ពី​សប្តាហ៍មុន​។ ស្រេង ម៉េង​ស្រ៊ុន​

ភ្នំពេញៈ បន្ទាប់​ពី​ការ​បញ្ចប់​ព្រឹត្តិ​ការណ៍​ប្រកួត​ជ្រើស​រើស​ជើង​ឯក​ថ្នាក់​ជាតិ​ដែល​រៀប​ចំ​ដោយ​ក្រសួង​អប់រំ យុវ​ជន និង​កីឡា​ក្រុម​កីឡា​វាយ​សី​កម្ពុជា​នឹង​មាន​កាល​វិភាគ​ដ៏​មមាញឹក​មួយ​បន្ថែម​ទៀត ក្នុង​ព្រឹតិ្តការណ៍​ប្រកួត​កីឡា​វាយ​សី​ដណ្តើម​ពាន​រង្វាន់​រណ​សិរ្ស​២​ធ្នូ។

ព្រឹត្តិ​ការណ៍​ដ៏​ធំ​នេះ ត្រូវ​បាន​បង្កើត​ឡើង​ដោយ​សមា​គម​កីឡា​វាយ​សី​ក្រសួង​មហា​ផ្ទៃ​ដើម្បី​រំឭក​ដល់​ខួប​លើក​ទី​៣៤​(១៩៧៨-២០១៣) នៃ​ថ្ងៃ​បង្កើត​រណ​សិរ្ស​សាមគ្គី​សង្គ្រោះ​ជាតិ​កម្ពុជា (ថ្ងៃ​ទី​២ ខែ​ធ្នូ)។ វា​ជា​ការ​ផ្តួច​ផ្តើម​គំនិត​របស់​អ្នក​លេង​កីឡា​វាយ​សី​ចាស់​ៗ និង​ថ្នាក់​ដឹកនាំ​កីឡា​វាយ​សី​របស់​សមាគម​នៃ​ក្រសួង​មហា​ផ្ទៃ។

ក្រុម​ចំនួន​៦​មក​ពី​ប្រទេស​វៀតណាម​ត្រូវ​បាន​អញ្ជើញ​ឲ្យ​ចូល​រួម​នៅ​ក្នុង​ព្រឹត្តិ​ការណ៍​នេះ។ បើ​តាម​អ្នក​រៀប​ចំ​កម្ម​វិធី ខ្លឹម​សារ និង​កម្មវត្ថុ​មិន​សំដៅ​លើ​ប្រាក់​រង្វាន់​ជា​សំខាន់​នោះ​ឡើយ ប៉ុន្តែ​វា​ជា​ការ​ប្រកួត​ដើម្បី​ពង្រឹង​ចំណង​មិត្ត​ភាព សុខភាព និង​កិច្ច​សហ​ប្រតិបត្តិការ ជា​ពិសេស​ដើម្បី​រំឭក​ខួប​២​ធ្នូ។

លោក​ជា​ប៊ុនហេង​ប្រធាន​លេខា​ធិការ​ដ្ឋាន​នៃ​សម្ព័ន្ធ​កីឡា​នគរ​បាល​ជាតិ​ដែល​ជា​អ្នក​ផ្ដើម​គំនិត​មួយ​រូប​ក្នុង​ការ​បង្កើត​ឲ្យ​មាន​ព្រឹត្តិ​ការណ៍​នេះ បាន​ឲ្យ​ភ្នំពេញ​ប៉ុស្តិ៍​ដឹង​ថា​ការ​ប្រកួត​នេះ​មាន​រយៈ​ពេល​៣​ថ្ងៃ​គឺ​ថ្ងៃ​ទី​២១​ដល់​ទី​២៣​ខែ​ធ្នូ​ដោយ​មាន​ជាង​៦០​ប្រកួត​។

លោក​បាន​អះអាង​ថា​នឹង​ធ្វើ​ឲ្យ​កម្ម​វិធី​នេះ​ក្លាយ​ទៅ​ជា​ព្រឹត្តិ​ការណ៍​ប្រកួត​ប្រចាំ​ឆ្នាំ​តែ​ម្ដង​។

ក្រុម​កីឡាករ​វាយ​សី​វៀតណាម​ដែល​ត្រូវ​បាន​អញ្ជើញ​នោះ​មាន​ក្រុម​ក្រុង​ហូជី​មិញ ក្រុម​កាន់​ថឺ​ក្រុម​ខេត្ត​ទៀង​យ៉ាង​ខេត្ត​ដុង​ថាប់​ខេត្ត​អាងយ៉ាង​និង​ក្រុម​ជម្រើស​ខេត្ត​គៀង​យ៉ាង​។

លោក​បន្ត​ទៀត​ថា​ក្នុង​ក្រុម​ទាំង​៦​របស់​វៀតណាម​នោះ​ក្រុម​ជម្រើស​ក្រុង​ហូជីមិញ ជម្រើស​ខេត្ត​កាន់​ថឺ​និង ជម្រើស​ខេត្ត​ទៀង​យ៉ាង​ជា​ក្រុម​ដែល​ខ្លាំង​ជាង​គេ​ដូច្នេះ​ក្រុម​កម្ពុជា​ត្រូវ​ត្រៀម​ក្រុម​ឆ្នើម​ដើម្បី​តទល់​ជាមួយ​ពួក​គេ។

ចំពោះ​វិញ្ញាសា​ដែល​ដាក់​ឲ្យ​ប្រកួត​នោះ​រួម​មាន​ការ​ប្រកួត​វាយ​ជា​គូ​បុរស​សម្រាប់​ប្រភេទ​អាយុ​ក្រោម​៣០​ឆ្នាំ​អាយុ​ពី​៣០​ទៅ​៣៩​ឆ្នាំ អាយុ​ពី​៤០​ទៅ​៤៩​ឆ្នាំ និង អាយុ​ចាប់ពី​៥០​ឆ្នាំ​ឡើង ។

ចំពោះ​ក្រុម​កីឡាការិនី​វិញ​មាន​តែ​ការ​ប្រកួត​វាយ​គូ​សម្រាប់​ប្រភេទ​អាយុ​ក្រោម ៣០​ឆ្នាំ​ប៉ុណ្ណោះ​។

លក្ខ​ខណ្ឌ​នៃ​ការ​ប្រកួត​នោះ​គឺ​សម្រាប់​មួយ​ក្រុម​លេង​បាន​តែ​មួយ​វិញ្ញាសា​ប៉ុណ្ណោះ​មិន​អនុញ្ញាត​ឲ្យ​ក្រុម​តែ​មួយ​លេង​២​ឬ​៣ វិញ្ញាសា​បាន​ឡើយ ។

តាម​ប្រភព​ពី​សមាគម​កីឡា​វាយ​សី​ក្រសួង​មហាផ្ទៃ​ការ​ប្រកួត​នេះ មិន​ប្រើ​ប្រាស់​ថវិកា​ជាតិ​នោះ​ឡើយ​គឺ​បាន​មក​ពី​ថ្នាក់​ដឹក​នាំ​ដែល​និយម​ស្រឡាញ់​វិស័យ​កីឡា​ដោយ​ពួក​គាត់​ជួយ​ចេញ​ថវិកា​ផ្ទាល់​ខ្លួន​និង​មាន​មន្ត្រី​ចាស់​ទុំ​និង​សប្បរស​ជន​ក្នុង​វិស័យ​ឯក​ជន​ជួយ​គាំ​ទ្រ​ដើម្បី​លើក​ស្ទួយ​វិស័យ​កីឡា​៕