សួស្តីឆ្នាំថ្មី! កាសែត​ភ្នំពេញ ប៉ុស្តិ៍ សូម​ជម្រាប​ជូន​ដំណឹង​ដល់​ប្រិយ​មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំង​អស់​ឲ្យ​បាន​ជ្រាប​ថា ដើម្បី​ចូល​រួម​អបអរ​ពិធី​បុណ្យ​ចូល​ឆ្នាំ​ខ្មែរ ប្រពៃណី​ជាតិ​ខាង​មុខ​នេះ ​ភ្នំពេញ ប៉ុស្តិ៍ នឹង​ផ្អាក​ចេញ​ផ្សាយ​ពី​ថ្ងៃទី​១៤ ១៥ ១៦ និង​១៧ មេសា ​២០១៤ ហើយ​នឹង​ចាប់​ផ្តើម​ចេញ​ផ្សាយ​ជា​ធម្មតា​ឡើង​វិញ​នៅ​ថ្ងៃ​ទី ១៨ មេសា ឆ្នាំ​២០១៤។ ភ្នំពេញ ប៉ុស្តិ៍ ​សូម​ជូន​ពរ មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំងអស់ ជួប​តែ​សេចក្តី​សុខ សុភមង្គល​គ្រប់​ៗ​គ្នា និង​គ្រប់​ពេល​វេលា នាឆ្នាំថ្មី​​នេះ។
Headlines:

FunRun មាន​ទិ​ស​ដៅ​ប្រមូល​ប្រាក់​ជួយ​ដល់​ជន​ក្រីក្រ



121114_25a
ពី​ឆ្វេង​ទៅ​ស្តាំៈ លោក Alex Hales លោក Onishi Shizuo និង​លោក អ៊ុក សុវណ្ណ នា​សន្និសីទ​សារព័ត៌មាន​នៅភោជនីយដ្ឋាន​ Le Lotus Blanc។ ស្រេង ម៉េង​ស្រ៊ុន​

ភ្នំពេញៈ ធនាគារ​ជប៉ុន​ម៉ារ៉ូហាន់​បាន​សហការ​ជាមួយ ក្រុម​ហ៊ុន Eightball Production ក្នុង​ការ​រៀប​ចំ​ឲ្យ​មាន​ការ​ប្រកួត​រត់​ប្រណាំង​សប្បុរស​ធម៌​កម្សាន្ត​មួយ​ដែល​មាន​ឈ្មោះ​ថា MARUHAN Japan Bank Charity FunRun នៅ​ពហុ​កីឡ​ដ្ឋាន​អូឡាំ​ពិក វេលា​ម៉ោង​៧​ព្រឹក​នា​ថ្ងៃ​ទី​១០ ខែ​ធ្នូ​ខាង​មុខ​នេះ ដើម្បី​ប្រមូល​មូល​និធិ​ជួយ​គាំ​ទ្រ​ដល់​កម្ម​វិធី​បណ្តុះ​បណ្តាល​វិជ្ជាជីវៈ នៅ​អង្គការ​ដើម្បី​ភាព​ញញឹម​នៃ​កុមារ​(PSE) សម្រាប់​ជន​ក្រី​ក្រ​នៅ​កម្ពុជា។

នៅ​ក្នុង​ការ​សន្និសីទ​សារព័ត៌មាន​នៅ​ឯ​ភោជនីយ​ដ្ឋាន Le Lotus Blanc ក្នុង​សង្កាត់​បឹង​កេង​កង១ កាល​ពី​រសៀល​ថ្ងៃ​អង្គារ​ម្សិល​មិញ​នេះ ទាំង​តំណាង​ធនាគារ​ម៉ារ៉ូហាន Eightball Production និង​តំណាង PSE បាន​និយាយ​ផ្តោត​សំខាន់​ទៅ​លើ​ការ​ប្រមូល​មូល​និធិ​ពី​សប្បុរស​ជន ដើម្បី​ជួយ​ដល់​យុវជន និង​កុមារ​ក្រីក្រ​នៅ​កម្ពុជា​ឲ្យ​ទទួល​បាន​នូវ​ឱកាស​សិក្សា​នៅ​លើ​មុខ​វិជ្ជា​ផ្សេងៗ​សម្រាប់​លើក​កម្ពស់​ការ​រស់​នៅ​របស់​ពួក​គេ​ទៅ​ថ្ងៃ​អនាគត។

លោក Onishi Shizuo នាយក​គ្រប់​គ្រង​នៃ​ម៉ារ៉ូហាន់​ធនាគារ​ជប៉ុន បាន​ថ្លែង​ឲ្យ​ដឹង​ថា​៖​«​ម៉ារ៉ូហាន់​ដែល​ជា​សមា​ជិក​មួយ​នៃ MARUHAN Japan Bank ASEAN Financial Group មាន​ការ​ជឿជាក់​ខ្លាំង​ទៅ​ការ​លើក​តម្កើង​ការ​លូត​លាស់ និង​សុខុមាល​ភាព​នៅ​ក្នុង​សង្គម​។ យើង​ចង់​ប្រើ​ប្រាស់​ការ​សហការ និង​ទំនួល​ខុស​ត្រូវ​របស់​យើង ដើម្បី​ជួយ​ឧបត្ថម្ភ​យុវជន​ក្រី​ក្រ​នូវ​គ្រប់​សកម្ម​ភាព​»។

លោក​បាន​បន្ថែម​ថា​៖​«​ការ​វិនិយោគ​សម្រាប់​យុវជន​កម្ពុជា​នា​ពេល​បច្ចុប្បន្ន គឺ​ជា​គន្លឹះ​ដ៏​សំខាន់​សម្រាប់​កម្ពុជា​ឆ្ពោះ​ទៅ​កាន់​អនាគត​ដ៏​ត្រចះ​ត្រចង់​មួយ ហេតុ​នេះ​ថវិកា​ដែល​ប្រមូល​បាន​ពី​កម្ម​វិធី​នេះ នឹង​ត្រូវ​ប្រគល់​ឲ្យ​អង្គការ​PSE​ទាំង​អស់ សម្រាប់​ជួយ​ឧបត្ថម្ភ​កុមារ​ក្រី​ក្រ​ចំនួន​១៥០០​នាក់​ក្នុង​វគ្គ​បណ្តុះ​បណ្តាល​វិជ្ជាជីវៈ​នៅ​PSE ដើម្បី​ឲ្យ​ពួក​គេ​ចាប់​យក​ជំនាញ​នៅ​លើ​មុខ​វិជ្ជា​ប្រមាណ​៣០​ប្រភេទ​នៅ​ទី​នោះ សម្រាប់​យក​ទៅ​រក​ការងារ​ធ្វើ​រក​ប្រាក់​មក​ចិញ្ចឹម​ជីវិត​នៅ​ថ្ងៃ​អនាគត»។

ចាប់​តាំង​ពី​ឆ្នាំ​១៩៩៤​មក PSE បាន​ធ្វើ​ការ​ផ្តល់​អាហារ ជម្រក តំហែ​រក្សា​សុខ​ភាព ចំណេះ​ដឹង និង​វិជ្ជាជីវៈ​ទៅ​ដល់​កុមារ​រង​គ្រោះ ក៏​ដូច​ជា​កុមារ​មិន​មាន​ឱកាស​ទទួល​យក​ចំណេះ​ដឹង នៅ​ក្នុង​ក្រុង​ភ្នំពេញ ខេត្ត​ព្រះ​សីហនុ និង​សៀម​រាប។

មក​ដល់​ពេល​នេះ​PSE​បាន​ជួយ​កុមារ​លើស​ពី​៦៥០០​នាក់ ជួយ​ឧបត្ថម្ភ​ដល់​សិស្ស​ប្រហែល​៣០០០​នាក់​ឲ្យ​ចូល​សិក្សា​នៅ​តាម​សាលា​រដ្ឋ ១៥០០​នាក់​ក្នុង​កម្ម​វិធី​ពន្លឿន និង​១៥០០​នាក់​ផ្សេង​ទៀត​នៅ​ក្នុង​ការ​បណ្តុះ​បណ្តាល​វិជ្ជាជីវៈ។

លោក អ៊ុក សុវណ្ណ នាយក​រង​នៃ​អង្គ​ការ PSE បាន​ថ្លែង​ឲ្យ​ដឹង​ដែរ​ថា​៖​«​បច្ចុប្បន្ន​នេះ ប្រជាជន​កម្ពុជា​មាន​សន្ទុះ និង​កម្លាំង​កើន​ឡើង​យ៉ាង​ខ្លាំង​ក្នុង​ការ​ជួយ​ប្រទេស និង​សមាគម​ក្រីក្រ។ យើង​បាន​ប្រទះ​ឃើញ​កំណើន​បុគ្គលិក​ស្ម័គ្រ​ចិត្ត​គួរ​ឲ្យ​កត់​សម្គាល់ នៅ​ក្នុង​អង្គ​ការ PSE សម្រាប់​ជួយ​គាំ​ទ្រ​បុព្វ​ហេតុ​កម្ម​វិធី និង​សិស្ស​របស់​យើង។ ពួក​យើង​ពិត​ជា​មាន​មោទន​ភាព​ខ្លាំង​ណាស់​ចំពោះ​សាមគ្គី​ភាព និង​ការ​យក​ចិត្ត​ទុក​ដាក់​ពី​គ្នា​ទៅ​វិញ​ទៅ​មក​ហេតុ​នេះ​យើង​សង្ឃឹម​ថា ប្រជាជន​កម្ពុជា និង​អ្នក​ផ្សេង​ទៀត​ចូល​រួម​នៅ​ក្នុង​កម្ម​វិធី FunRun ដើម្បី​ប្រមូល​មូល​និធិ​ជួយ​ដល់​យុវជន និង​កុមារ​ក្រី​ក្រ ឲ្យ​បាន​ទទួល​ឱកាស​សិក្សា​នៅ​PSE​របស់​យើង​កាន់​តែ​ច្រើន»។

ចំណែក​លោក Alex Hales អ្នក​គ្រប់​គ្រង​ម្នាក់​នៅ Eightball Production និង​ជា​អ្នក​ផ្តួច​ផ្តើម​បង្កើត​កម្ម​វិធី MARUHAN Japan Bank Charity Fun Run បាន​ពន្យល់​ថា គ្រប់​គ្នា​អាច​ចូល​រួម​រត់​កម្សាន្ត​នៅ​ក្នុង​កម្ម​វិធី​នេះ​ដោយ​សេរី​មិន​ចាំ​បាច់​បង់​ប្រាក់​អ្វី​ទេ ហើយ​អ្នក​ចង់​រត់​ក៏​បាន​ដើរ​ក៏​បាន ប៉ុន្តែ​អ្នក​ត្រូវ​ព្យាយាម​រៃ​អង្គាស​ប្រាក់​ឧបត្ថម្ភ​ពី​សហគមន៍ គ្រួសារ និង​មិត្ត​ភក្តិ​របស់​អ្នក ទៅ​តាម​ជុំ​ដែល​អ្នក​ធ្វើ​បាន។

លោក​បាន​បន្ថែម​ថា​៖​«​សំណួរ​សួរ​ថា តើ​អ្នក​ប្រមូល​លុយ​ដោយ​របៀប​ណា? ចម្លើយ​គឺ​វា​អាស្រ័យ​ទៅ​លើ សហគមន៍ គ្រួសារ និង​មិត្ត​ភក្តិ​របស់​អ្នក ថា​តើ​ពួក​គេ​ជួយ​ឧបត្ថម្ភ​ឲ្យ​អ្នក​រត់​បាន​ប៉ុន្មាន​ជុំ។

បើ​សិន​អ្នក​រត់​១​ជុំ ហើយ​អ្នក​មាន​ឧបត្ថម្ភ​១០​នាក់ ដែល​អាច​ឲ្យ​១​ដុល្លារ​សម្រាប់​អ្នក​រត់​ក្នុង​១​ជុំ ដូច្នេះ​អ្នក​នឹង​ស្វែង​រក​ប្រាក់​បាន​១០​ដុល្លារ​សម្រាប់​ចូល​រួម​មូល​និធិ​របស់​យើង ហើយ​បើ​សិន​អ្នក​ចង់​ចូល​រួម​ជួយ​យុវជន​និង​កុមារ​ក្រីក្រ​របស់​យើង សូម​ចូល​រួម​ចុះ​ឈ្មោះ​រត់​ឲ្យ​មាន​មុន​ថ្ងៃ​ទី​៥ ខែ​ធ្នូ តាម​រយៈ E-mail: funrun@site-pse.org ឬ​តាម​ទូរ​ស័ព្ទ ០៧៧ ៥៨ ៦៧ ៦៨»៕