Headlines:

បញ្ចប់​ការ​ប្រកួត​កីឡា​ហែល​ទឹក​ដណ្តើម​ពាន​រង្វាន់​កំពត​ខេស៊ី​មេន​ប្រចាំ​ឆ្នាំ​២០១២



121119_26c
លោក ស៊ុន ចាន់​ថុល នា​ពិធី​ចែក​រង្វាន់​ក្រុម​កុមារា-កុមារី​អាយុ​ក្រោម​១៤​ឆ្នាំ​​។ យឺន ពន្លក​

ភ្នំពេញៈ ព្រឹត្តិ​ការណ៍​ប្រកួត​កីឡា​ហែល​ទឹក​ដណ្តើម​ពាន​រង្វាន់​កំពត​ខេស៊ី​មេន​លើក​ទី​បួន​ដែល​បាន​ចាប់​ផ្តើម​កាល​ពី​ថ្ងៃ​ទី​១៤ ខែ​វិច្ឆិកា​នោះ បាន​រក​ឃើញ​ម្ចាស់​ជើង​ឯក​ជា​ផ្លូវ​ការ​ហើយ​កាល​ពី​ថ្ងៃ​សៅរ៍ ដោយ​ពិ​ធី​ចែក​រង្វាន់​បាន​ប្រព្រឹត្ត​ទៅ​ក្រោម​អធិបតីភាព​របស់​លោក ស៊ុន ចាន់​ថុល ប្រធាន​សហ​ព័ន្ធ​កីឡា​ហែល​ទឹក​ស្ម័គ្រ​ចិត្ត​កម្ពុជា។

លោក ស៊ុន ចាន់​ថុល បាន​មាន​ប្រសាសន៍​នា​ឱកាស​នោះ​ថា៖ «នេះ​គឺ​ជា​ពេល​វេលា​ដ៏​សំខាន់​ក្នុង​ការ​ជំរុញ​ឲ្យ​ក្មេង​ៗ​បញ្ចេញ​សមត្ថភាព​និង​ទេព​កោសល្យ​របស់​ពួក​គេ»។

ការ​ប្រកួត​នេះ គឺ​ជា​ផ្នែក​មួយ​ក្នុង​ការ​សម្រិត​សម្រាំង​ស្វែង​រក​កីឡាករ-ការិនី​ឆ្នើម​ដើម្បី​ហ្វឹក​ហាត់​ក្នុង​ក្រុម​ជម្រើស​ជាតិ​នា​ពេល​ខាង​មុខ។

លោក ហែម ថុន អគ្គ​លេខា​ធិការ​នៃ​សហ​ព័ន្ធ​កីឡា​ហែល​ទឹក​ស្ម័គ្រ​ចិត្ត​កម្ពុជា បាន​មាន​ប្រសាសន៍​ថា៖ «គោល​បំណង​របស់​សហ​ព័ន្ធ និង​ក្រុម​ហ៊ុន​ខេស៊ី​មេន​គឺ​ដើម្បី​ពង្រឹង​សមត្ថភាព​បច្ចេក​ទេស​របស់​កីឡាករ-ការិនី ឲ្យ​កាន់​តែ​រឹង​មាំ ព្រោះ​ថា​នៅ​ឆ្នាំ​២០១៣ ខាង​មុខនេះ កម្ពុជា​នឹង​ចូល​រួម​ព្រឹត្តិការណ៍​កីឡា​ស៊ី​ហ្គេម​នៅ​ប្រទេស​មីយ៉ាន់ម៉ា រួម​ទាំង​ការ​ត្រៀម​ខ្លួន​នៅ​ក្នុង​ព្រឹត្តិ​ការណ៍​យុវជន​អូឡាំពិក​ឆ្នាំ​២០១៤ នៅ​ប្រទេស​ចិន»។

ចំពោះ​លទ្ធ​ផល​នៃ​ការ​ប្រកួត​ដ៏​ស្វិត​ស្វាញ​អស់​រយៈ​ពេល​៤​ថ្ងៃ​នៅ​ក្នុង​អាង​ហែល​ទឹក​នៃ​ពហុ​កីឡដ្ឋាន​ជាតិ​អូឡាំ​ពិក​មាន​ដូច​ខាង​ក្រោម៖​

ការ​ប្រកួត​ហែល​សេរី​ចម្ងាយ​១០០ម៉ែត្រ​ផ្នែក​បុរស​អាយុ​លើស​១៦​ឆ្នាំ លេខ​មួយ​បាន​ទៅ​លើ​កីឡាករ ម៉ាក់​ស៊ី​ម៉ូហ្វ ចំរើន យូរី មក​ពី​វិទ្យាល័យ​ជម្ពូ​វ័ន​លេខ​ពីរ​បាន​ទៅ​លើ​កីឡាករ​ហែម ថុន​ពន្លឺ មក​ពី​ក្លិប​គមនា​គមន៍ និង​ចំណាត់​ថ្នាក់​លេខ​បី បាន​ទៅ​លើ​កីឡាករ ធឿន ថុល មក​ពី​ក្លិប​អូឡា​វី​អេស ខេត្ត​កំពង់​ចាម។

សម្រាប់​ការ​ប្រកួត​ក្នុង​វិញ្ញាសា​ហែល​សេរី​ចម្ងាយ​១០០​ម៉ែត្រ​ផ្នែក​នារី​អាយុ​លើស​១៦​ឆ្នាំ លេខ​មួយ​បាន​លើ​កីឡា​ការិនី ហែម ថុនវិទិនី មក​ពី​ក្លិប​គមនា​គមន៍ លេខ​ពីរ​បាន​លើ​កីឡាការិនី សេង សម្ផស្ស មក​ពី​វិទ្យាល័យ​ជម្ពូ​វ័ន និង​លេខ​បី បាន​លើ​កីឡា​ការិនី សុវណ្ណ បុទុម​ពរ មក​ពី​មជ្ឈ​មណ្ឌល​ជាតិ​ហ្វឹក​ហ្វឺន​កីឡា។

រី​ឯ​ការ​ប្រកួត​ហែល​ទឹក​សេរី​ចម្ងាយ​១០០​ម៉ែត្រ​ផ្នែក​ជន​ពិការ លេខ​មួយ​បាន​ទៅ​លើ​កីឡាករ ឈឹម ទាត់ មក​ពី​វិទ្យាល័យ​ជម្ពូវ័ន លេខ​ពីរ​បាន​ទៅ​លើ​កីឡាករ កន កាន មក​ពី​មជ្ឈ​មណ្ឌល​ជាតិ​ហ្វឹក​ហ្វឺន​កីឡា និង​លេខ​បី បាន​ទៅ​លើ​កីឡាករ សេង គង់ មក​ពី​ក្លិប​គមនា​គមន៍។

ក្រៅ​ពី​ជ័យ​លាភី​សំខាន់​ទាំង​នេះ មាន​លទ្ធ​ផល​នៃ​ការ​ប្រកួត​ជា​ក្រុម​តាម​កម្រិត​អាយុ និង​ចម្ងាយ​ផ្សេង​ៗ​ទៀត​៕