Headlines:

កីឡា​យុទ្ធ​សិល្ប៍​ចម្រុះ​នឹង​ប្រកួត​សាក​ជា​លើក​ដំបូង​នៅ​ស៊ីធីអិន



121226_28a
លោក David Minetti បាន​បង្ហាញសិក្ខាកាម​​ពី​រ​បៀប​​វាយ​​​​​ថែម​ទៅ​លើ​គូ​ប្រកួតដែល​​​អស់​លទ្ធ​ភាព​តដៃ​​។​យឺន ពន្លក

ភ្នំពេញៈ ប្រភេទ​កីឡា​ដ៏​ពេញ​និយម​នៅ​ប្រទេស​ជឿន​លឿន និង​កំពុង​តែ​ទទួល​បាន​ការ​គាំទ្រ​យ៉ាង​ច្រើន​នៅ​តំបន់​អាស៊ី គឺ​កីឡា​យុទ្ធ​សិល្ប៍​ចម្រុះ Mixed Martial Arts(MMA) ដែល​គេ​ស្គាល់​ជា​ទូទៅ​ថា​ជា​ប្រភេទ​កីឡា​វាយ​ដាក់​ទ្រុង​នោះ នឹង​បើក​ការ​ប្រកួត​សាក​ល្បង​ជា​លើក​ដំបូង​នៅ​លើ​សង្វៀន​ស៊ីធីអិន នា​ល្ងាច​ថ្ងៃ​ពុធ​នេះ។

មុន​នឹង​ឈាន​ដល់​បើក​ឲ្យ​មាន​ការ​ប្រកួត​សាក​ល្បង​នេះ សមាគម​កីឡា​យុទ្ធ​សិល្ប៍​ចម្រុះ​កម្ពុជា Cambodia Mixed Martial Arts Association (CMMAA) បាន​បើក​សិក្ខា​សាលា​ផ្សព្វ​ផ្សាយ​ស្តី​ពី​ក្បាច់​គុន ច្បាប់​នៃ​ការ​ប្រកួត នឹង​លក្ខណៈ​វិនិច្ឆ័យ​ផ្សេងៗ​របស់​ចៅ​ក្រម ទាក់​ទង​ទៅ​នឹង​ការ​ប្រកួត​វាយ​ដាក់​ទ្រុង​នេះ​។

នៅ​ក្នុង​សិក្ខា​សាលា​ក្បាច់​គុន​ដ៏​កម្រ​មួយ នៅ​ក្លិប​កីឡា K1 ដែល​មាន​អាសយ​ដ្ឋាន​ជិត​សាលា​រៀន​ទួល​ស្វាយ​ព្រៃ ខណ្ឌ​ចំការមន កាល​ពី​ល្ងាច​ថ្ងៃ​ចន្ទ​កន្លង​មក គឺ​មាន​កីឡាករ​កម្ពុជា​ចំនួន​១៥​នាក់ មក​ពី​ក្លិប​កីឡា​ប្រយុទ្ធ​ចំនួន​៦ និង​កីឡាករ​បរទេស​ជាង​១០​នាក់​ភាគ​ច្រើន​នៅ​ក្នុង​ក្លិប K1 បាន​ទទួល​ការ​បង្ហាត់​បង្ហាញ​ខ្លះៗ​ពី​របៀប​ប្រកួត និង​លក្ខខណ្ឌ​មួយ​ចំនួន​ទាក់​ទង​ទៅ​នឹង​ការ​ប្រកួត​នេះ។

លោក វ៉ាត់ ចំរើន អគ្គ​លេខាធិការ​គណៈកម្មា​ធិការ​ជាតិ​អូឡាំពិក​កម្ពុជា និង​ជា​ប្រធាន​សមាគម​កីឡា​យុទ្ធ​សិល្ប៍​ចម្រុះ​កម្ពុជា និង​ជា​គ្រូ​ឧទ្ទេស​នាម​ពោរ​ពេញ​ទៅ​ដោយ​បទ​ពិសោធ​ក្នុង​វគ្គ​សិក្ខា​សាលា​នេះ បាន​ពន្យល់​ប្រាប់​ដល់​សិក្ខាកាម​ឲ្យ​ដឹង​ថា CMMAA ត្រូវ​បាន​រៀប​ចំ​ឲ្យ​ស្ថិត​នៅ​ក្នុង​គណៈ​កម្មា​ធិការ​ជាតិ​អូឡាំពិក​កម្ពុជា ហើយ​លក្ខខ​ណ្ឌ​មួយ​ចំនួន​នឹង​ត្រូវ​សម្រួល​តាម​ច្បាប់​កីឡា​ជាតិ​និង​អន្តរជាតិ។

លោក​បន្ត​ថា CMMAA មាន​ប្រភព​និង​មរតក​បាន​មក​ពី​កីឡា​យុទ្ធ​សិល្ប៍​កម្ពុជា ប៉ុន្តែ​នឹង​សម្រួល​ឲ្យ​នៅ​ក្នុង​ការ​គ្រប់​គ្រង​របស់​គណៈ​កម្មា​ធិការ​ជាតិ​អូឡាំពិក​កម្ពុជា ដើម្បី​តម្រូវ​សេចក្តី​ត្រូវ​ការ​និង​អភិវឌ្ឍន៍​ឈាន​ទៅ​រក​ការ​ប្រកួត​ដ៏​ពេញ​និយម ហើយ​កីឡា​ប្រយុទ្ធ​ប្រភេទ​ណា​ក៏​អាច​ចូល​រួម​ប្រកួត​បាន​ដែរ គ្រាន់​តែ​គោរព​ច្បាប់ និង​លក្ខខណ្ឌ​នៃ​ការ​ប្រកួត ដែល​មាន​ចែង​ទៅ​បាន​ហើយ។

លោក វ៉ាត់ ចំរើន បាន​បញ្ជាក់​ថា​៖​«​គោល​បំណង​របស់​CMMAA គឺ​ផ្តល់​ឲ្យ​អ្នក​ចេះ​ក្បាច់​គុន​គ្រប់​ប្រភេទ​មាន​ឱកាស​ដក​ស្រង់​ផ្លាស់​ប្តូរ​បទ​ពិសោធ​គ្នា និង​ធ្វើ​ឲ្យ​អ្នក​គុន​និយម​មាន​ស្មារតី​ស្រឡាញ់​រាប់​អាន​សាមគ្គី​គ្នា​ស្រប​តាម​ទស្សន​វិជ្ជា​កីឡា​សាមគ្គី​ភាព​មិត្ត​ភាព​ភាតរភាព​រវាង​មនុស្ស​ជាតិ​នៅ​លើ​សកលលោក​។ បន្ថែម​លើ​នេះ វា​ក៏​បាន​ផ្តល់​ឱកាស​ឲ្យ​អ្នក​គុន​និយម​បង្កើន​សមត្ថភាព លើ​វិជ្ជា​ជីវៈ​និង​ជំនាញ​របស់​ខ្លួន​ផង​ដែរ ហើយ​នៅ​ខែ​ក្រោយ យើង​នឹង​មាន​សិក្ខា​សាលា​ក្បាច់​គុន​របៀប​នេះ​រយៈ​ពេល​វែង​ក្រោម​ការ​ជួយ​ឧបត្ថម្ភ​ជា​ដៃ​គូ​ជាមួយ​បណ្តាញ​ទូរទស្សន៍​ស៊ី​ធី​អិន»។

ចំណែក​លោក ហុក ឈាង​គីម លេខាធិការ​នៃ CMMAA បាន​ប្រាប់​ឲ្យ​ដឹង​កាល​ពី​ម្សិល​មិញ​ដែរ​ថា​៖​«​បន្ទាប់​ពី​សិក្ខា​សាលា​រយៈ​ពេល​ពីរ​ថ្ងៃ​នេះ​បាន​បញ្ចប់ គឺ​នៅ​ថ្ងៃ​ពុធ​ទី​២៦ ខែ​ធ្នូ វេលា​ម៉ោង​៤​ល្ងាច នឹង​មាន​ការ​ប្រកួត​ចំនួន​៥​គូ​នៅ​ស៊ីធីអិន ដើម្បី​វាស់​ស្ទង់​កម្រិត​បច្ចេកទេស​របស់​កីឡាករ ដែល​បាន​ស្ម័គ្រ​ចិត្ត​ចូល​មក​ហ្វឹក​ហាត់​និង​ប្រកួត​»។

ការ​ប្រកួត​នេះ​គូ​ទី​១​គឺ​ប្រកួត​ក្នុង​ទម្ងន់​៦០​គ.ក្រ រវាង​កីឡាករ ឈុត ឈុនលី របស់​ក្លិប​ឃ្លាំង​មឿង និង អ៊ូ តារា ក្លិប​អង្គរ​រាជ​។ គូ​ទី២ ឈិន ក្វាន់ង៉ុយ មក​ពី​ក្លិប​មកុដ​រាជ ប្រកួត​ក្នុង​ទម្ងន់​៦៥​គ.ក្រ ជាមួយ Derrek Bidaut ក្លិប​អង្គររាជ​។ គូទី​៣ ទន់ សេរី ក្លិប​អង្គរ​រាជ ប្រកួត​ជាមួយ មហា រាជ មក​ពី​ក្លិប​ដំបង​ដែក​គិរី​សុវណ្ណ​វន័ន្ន ក្នុង​ទម្ងន់​៦៥​គ.ក្រ រីឯ​គូ​ទី​៤ សុខ ស្រី​ណុច​ក្លិប​ដំបង​ដែក​គិរី​សុវណ្ណ​វន័ន្ន ជួប សុខ សុវណ្ណដែន ក្លិប​បុរី​កំពត ក្នុង​ទម្ងន់​៦៥​គ.ក្រ ហើយ​គូ​ទី​៥​ចុង​ក្រោយ​គឺ​កីឡាករ​ចំបាប់ ចាប លឿន ក្លិប​វិហារ​សួគ៌ ត្រូវ​ប្រកួត​ក្នុង​ទម្ងន់​៨០​គ.ក្រ​ជាមួយ យ៉ាំង បុរី មក​ពី​ក្លិប​បុរី​កំពត។

ចំណែក​ឯ​លោក David Minetti នាយក​បច្ចេកទេស​មក​ពី​ក្លិប K1 បាន​បង្ហាញ​ថា កីឡា​ប្រភេទ​ប្រយុទ្ធ​នេះ គេ​បាន​បែង​ចែក​ជា​៨​ប្រភេទ​ទម្ងន់​ចាប់​ពី​៥២​ដល់​១២០​គីឡូក្រាម ដែល​មាន​ឈ្មោះ​ត្រឹម​ត្រូវ គឺ​ទម្ងន់​រុយ ទម្ងន់​មាន់ ទម្ងន់​ស្លាប ទម្ងន់​ស្រាល ទម្ងន់​ស្រាល​មធ្យម ទម្ងន់​មធ្យម ទម្ងន់​ស្រាល​លើ​មធ្យម ទម្ងន់​លើ​មធ្យម​ទម្ងន់​ធ្ងន់​។

លោក Minettin David បញ្ជាក់​ថា គណៈ​កម្មការ​បច្ចេក​ទេស​ក្នុង​ពេល​ប្រកួត​របស់​កីឡា​MMA​នេះ​មាន​ពីរ​ផ្នែក​។ ទី​១ អ្នក​នៅ​ក្រៅ​សង្វៀន​គឺ​មាន​គ្រូ​ពេទ្យ​២​នាក់ សម្រាប់​ត្រួត​ពិនិត្យ​តាម​ដាន​កីឡាករ​តាម​លក្ខខ័ណ្ឌ​៤​ចំណុច​មុន​ឡើង​សង្វៀន និង​មាន​ចៅ​ក្រម​វិនិច្ឆ័យ​ចំនួន​៣​នាក់​ព្រម​ទាំង​លេខា​តុ​ម្នាក់​ទៀត​ធ្វើ​កំណត់​ហេតុ​គ្រប់​អ្វីៗ ដែល​កើត​មាន​ឡើង​ក្នុង​ពេល​ប្រកួត ហើយ​ទី​២​អ្នក​នៅ​ក្នុង​សង្វៀន​គឺ​មាន​អាជ្ញា​កណ្តាល​នៅ​ក្នុង​សង្វៀន​ម្នាក់​និង​កីឡាករ​២​នាក់​។

លោក​បញ្ជាក់​ទៀត​ថា​៖​«ចំពោះ​បែប​ផែន​នៃ​ការ​ប្រកួត ត្រូវ​បាន​ចែង​យ៉ាង​ច្បាស់​លាស់​គឺ​មាន​ក្បាច់​ប្រយុទ្ធ​ស្រប​ច្បាប់ ហើយ​ក្បាច់​ដែល​ឲ្យ​ប្រើ​ក្នុង​ពេល​ប្រកួត​មាន ដាល់ តប់ ទះ ខោក ដោយ​ប្រើ​កណ្តាប់​ដៃ​ឬ​ក​ដៃ ទាត់ ធាក់ អុក ដោយ​ប្រើ​កែង ជង្គង់ ជើង ព្រម​ទាំង បោក គាប ឃ្នាប រឹត កាច់​សន្លាក់​។ ចំណែក​ក្បាច់​ហាម​មិន​ឲ្យ​ប្រើ​មាន ពុះ​កែង​ពី​លើ​ក្បាល ប្រើ​ម្រាម​ដៃ​ខ្ញាំ ខ្វេះ ក្តិច បុក រុក​ចំណុច​ខ្សោយ​គូ​ប្រកួត វាយ និង​ពុះ​កែង​ផ្នែក​ខាង​ក្រោយ​ឆ្អឹង​ខ្នង​និង​ហាម​ទាត់​ឬ​ធាក់​ចំ​មុខ​ក្បាល​គូ​ប្រកួត នៅ​ពេល​គូ​ប្រកួត​ដួល​បាត់​បង់​លទ្ធភាព​ត​ដៃ»​។

ទាក់ទង​និង​ការ​វិនិច្ឆ័យ​នៃ​ការ​ប្រកួត​លោក Minettin David បាន​ធ្វើ​ពន្យល់​ថា​ការ​សុំ​ចុះ​ចាញ់​របស់​កីឡាករ​មាន ពេល​ទះ​កម្រាល​រន្ថើន ទះ​ខ្លួន​គូ​ប្រកួត​រន្ថើន ទន្ទ្រាំ​ជើង​រន្ថើន ឬ​ស្រែក​សុំ​ចុះ​ចាញ់ រីឯ​ការ​បោះ​បង់​ការ​ប្រកួត​ដោយ សន្លប់ វង្វេង​ស្មារតី​ឬ​របួស​ធ្ងន់ គ្រូ​ពេទ្យ​បញ្ឈប់​កីឡាករ​នោះ​ដោយ​ចាត់​ទុក​ថា​គេ​អសមត្ថភាព​(TKO)។

លោក​បាន​សង្កត់​ធ្ងន់​ថា​៖​«​ការ​វិនិច្ឆ័យ​ផ្តល់​ឲ្យ​កីឡាករ​ឈ្នះ​ឬ​ចាញ់​មាន​៣​របៀប។ ទី​មួយ ឈ្នះ​ដោយ​ឯកច្ឆ័ន្ទ គឺ​ចៅ​ក្រុម​ទាំង​៣​នាក់​ឲ្យ​កីឡាករ​A​ឈ្នះ​ដូច​គ្នា ទី​២​ឈ្នះ​ដោយ​ឧត្តម​ភាព គឺ​ចៅ​ក្រម​២​នាក់​ឲ្យ​កីឡាករ​A​ឈ្នះ តែ​ចៅ​ក្រម​ម្នាក់​ទៀត​ឲ្យ​ស្មើ រីឯ​ទី​៣​ឈ្នះ​ដោយ​ការ​ទូទាត់​ពិន្ទុ គឺ​ចៅក្រម​២​នាក់​ឲ្យ​កីឡាករ​A​ឈ្នះ ប៉ុន្តែ​ចៅ​ក្រម​ម្នាក់​ទៀត​ឲ្យ​កីឡាករ​B​ឈ្នះ ហើយ​ការ​ផ្តល់​ពិន្ទុ​របស់​ចៅ​ក្រម​នោះ​គឺ​អ្នក​ឈ្នះ​ទទួល​បាន​១០​ពិន្ទុ និង​អ្នក​ចាញ់​ទទួល​បាន​៩​ឬ៨​ពិន្ទុ​ទៅ​តាម​ស្ថាន​ភាព​ជាក់​ស្តែង»៕