Headlines:

Budokon​ ជា​ការ​បញ្ចូល​គ្នា​រវាង​យូហ្គា​និង​សិល្បៈ​​​គុន



121226_26a
​មនុស្ស​ម្នា​ចូល​រួម​វគ្គ​ហ្វឹក​ហាត់​កីឡា Budokon យូ​ហ្គា​នៅ​ក្នុង​ទីក្រុង​ញូវ​យ៉ក សហ​រដ្ឋ​អាមេ​រិក។ Reuters

ក្រុង ញូវយ៉ក: Budokon (ប៊ូ​ដូ​ខុន) ដែល​ជា​កម្ម​វិធី​លំហាត់​ប្រាណ​ដែល​ត្រូវ​បាន​អភិវឌ្ឍ​នៅ​ក្នុង​ប្រទេស​អាមេរិក​នៅ​សតវត្សរ៍​ទី២១​នេះ ជា​កីឡា​ច្របាច់​បញ្ចូល​គ្នា​រវាង​ការ​អនុវត្ត​លំហាត់​ប្រាណ​ផ្នែក​រាង​កាយ និង​ស្មារតី​នៃ​កីឡា Yoga (យូហ្គា) និង​សិល្បៈ​ក្បាច់​គុន​បុរាណ​ឲ្យ​ក្លាយ​ទៅ​ជា​កម្មវិធី​មួយ​ដែល​មាន​បំណង​ផ្តល់​ឲ្យ​អ្នក​ដែល​ប្រតិបត្តិ​តាម​ជាមួយ​នឹង​រាង​កាយ​រឹង​មាំ ស្មារតី​ល្អ និង​ការ​បំពាក់​ប្រភេទ​នៃ​ខ្សែ​ក្រវាត់​ដូច​កីឡា​ការ៉ា​តេដូ​ដែរ​។

លោកស្រី Mimi Rieger ដែល​ជា​គ្រូ​បង្រៀន​លំហាត់​ប្រាណ​ប្រភេទ​កីឡា​មិន​មែន​បុរាណ​ពេក​មួយ​នេះ​នៅ​មជ្ឈ​មណ្ឌល​កាយ​សម្ព័ន្ធ ស្ទូឌីយ៉ូ និង​នៅ​ក្នុង​កន្លែង​សិក្ខា​សាលា​ផ្សេងៗ​ក្នុង​ទីក្រុង Washington, DC នោះ បាន​និយាយ​ថា៖ «​Budokon គឺជា​កីឡា​យូហ្គា​មួយ ជា​សិល្បៈ​ក្បាច់​គុន និង​ជា​ការ​អនុវត្ត​ដែល​ធ្វើ​ឲ្យ​ការ​គិត​ពិចារណា​ស្ថិត​ក្នុង​ភាព​ត្រឹម​ត្រូវ​ល្អ​ប្រសើរ​»។

ក្នុង​នាម​ជា​គ្រូ​បង្រៀន​ម្នាក់​ទៅ​លើ​ការ​អនុវត្ត​នៃ​កីឡា​យូហ្គា​ដែល​មាន​អាយុ​៣​ពាន់​ឆ្នាំ​មួយ​នេះ​បើ​គិត​ចាប់​តាំង​ពី​ឆ្នាំ​២០០៣ លោកស្រី Rieger ដែល​ជា​អ្នក​បង្កើត​មជ្ឈ​មណ្ឌល​កាយ​សម្ព័ន្ធ Pure Fitness DC នោះ គឺជា​គ្រូ​បង្រៀន​ម្នាក់​ក្នុង​ចំណោម​គ្រូ​បង្រៀន​ប្រមាណ​ជា​៤០០​នាក់​ទូទាំង​ពិភពលោក​ដែល​ត្រូវ​បាន​ទទួល​ការ​ហ្វឹក​ហាត់​ទៅ​លើ​កីឡា Budokon ដែល​ជា​ប្រភេទ​លំហាត់​ប្រាណ​មិន​ធ្លាប់​មាន​ពី​មុន​មក​ឡើយ​នៅ​មុន​ឆ្នាំ​២០០២​។

បើ​ទោះ​បី​មាន​ការ​អនុវត្ត​ជា​ច្រើន​នៅ​ក្នុង​សហរដ្ឋ​អាមេរិក លោកស្រី Rieger បាន​និយាយ​ថា លោកស្រី​នឹង​បង្រៀន​កីឡា Budokon​នេះ​នៅ​ក្នុង​ប្រទេស​តួកគី ដាណឺម៉ាក និង​ប្រទេស​ស៊ុយអែត​នៅ​ឆ្នាំ​ក្រោយ ហើយ​សិក្ខា​សាលា​ផ្សេងៗ​ក៏​នឹង​ត្រូវ​គ្រោង​រៀប​ចំ​នៅ​ក្នុង​ទីក្រុង​ឡុងដ៍ ក្នុង​ប្រទេស​អាល្លឺម៉ង់ កូរ៉េ និង​ប្រទេស​ជប៉ុន​ផង​ដែរ​។

លោកស្រី​បាន​បញ្ជាក់​យ៉ាង​ច្បាស់​ថា កីឡា​ប្រភេទ​កូន​កាត់​នេះ នឹង​ផ្តល់​ឲ្យ​សិស្ស​នូវ​ភាព​ខ្លាំង​ក្លា និង​លំហាត់​ប្រាណ​ពេញ​រាង​កាយ ខណៈ​ដែល​វា​ជា​ប្រភេទ​កីឡា​ច្របាច់​បញ្ចូល​គ្នា​រវាង​មូល​ដ្ឋាន​នៃ​ចលនា​សិល្បៈ​ក្បាច់​គុន​រួម​ជាមួយ​នឹង​ភាព​លំនឹង​នៃ​កីឡា​យូហ្គា​។

លោកស្រី Rieger ដែល​ស្ថិត​ក្នុង​ចំណោម​ស្ត្រី​ក្នុង​ការ​ទទួល​បាន​ខ្សែ​ក្រវាត់​ពណ៌​ត្នោត​ក្នុង​ខ្សែ​ក្រវាត់​ទាំង​៦​របស់​កីឡា Budokon ដោយ​រួម​មាន​ពណ៌​ស ក្រហម ខៀវ ស្វាយ ត្នោត និង​ពណ៌​ខ្មៅ​នោះ បាន​ឲ្យ​ដឹង​ថា៖ «វា​ហាក់​ដូច​ជា​កីឡា​ពីរ​ប្រភេទ​បញ្ចូល​គ្នា​អ៊ី​ចឹង​ដែរ»។

Budokon ដែល​ជា​ឈ្មោះ​ជា​ភាសា​ជប៉ុន​តំណាង​ឲ្យ «ផ្លូវ​នៃ​ស្មារតី​អ្នក​ប្រយុទ្ធ» នោះ បាន​ចាប់​ផ្តើម​ក្នុង​ឆ្នាំ​២០០០ ក្នុង​នាម​ជា​គំនិត​ច្នៃ​ប្រឌិត​របស់​លោក Cameron Shayne ដែល​ជា​អ្នក​ជំនាញ​ផ្នែក​សិល្បៈ​ក្បាច់​គុន និង​ជា​អ្នក​ស្រឡាញ់​កីឡា​យូហ្គា​ដែល​មាន​ដើម​កំណើត​មក​ពី​ទីក្រុង Charlotte រដ្ឋ North Carolina។

លោក​កំពុង​តែ​សម្លឹង​រក​នូវ​ដំណោះ​ស្រាយ​លើ​បញ្ហា​ដ៏​លំបាក​មួយ​ដែល​ត្រូវ​បាន​ប្រឈម​មុខ​ក្នុង​ការ​អនុវត្ត​លំហាត់​ប្រាណ​ផ្ទាល់​ខ្លួន​របស់​លោក​។

លោក Shayne ដែល​ជា​អ្នក​បង្កើត​សាកល​វិទ្យា​ល័យ Budokon ក្នុង​ទីក្រុង Miami រដ្ឋ Florida បាន​មាន​ប្រសាសន៍​ថា៖ «តាម​រយៈ​សិល្បៈ​ក្បាច់​គុន​ដែល​ខ្ញុំ​ធ្លាប់​មាន​បទ​ពិសោធ​ទៅ​លើ​ផ្នែក​ការ​គិត​ពិចារណា ទាំង​កីឡា​យូហ្គា និង​សិល្បៈ​ក្បាច់​គុន​សុទ្ធ​សឹង​ចែក​រំលែក​នូវ​ការ​ផ្តល់​ផល​សង​មក​វិញ​ផ្ទាល់​ខ្លួន ប៉ុន្តែ​ទោះ​បី​ជា​យ៉ា​ណា កីឡា​ទាំង​ពីរ​សុទ្ធ​សឹង​ផ្តល់​នូវ​ផល​អាក្រក់​ដូច​គ្នា​ទៅ​លើ​ការ​ធ្វើ​លំហាត់​ប្រាណ​តាម​បែប​តំបន់​ខាង​លិច​»។

វគ្គ​ហ្វឹក​ហាត់​កីឡា Budokon មួយ ចាប់​ផ្តើម​ជាមួយ​នឹង​ការ​ហ្វឹក​ហាត់​កីឡា​យូហ្គា​ក្រោម​ពន្លឺ​ព្រះអាទិត្យ​រយៈ​ពេល​២០​នាទី ខណៈ​ដែល​លោក Shayne បាន​និយាយ​ថា វា​ជា​ការ «ធ្វើ​ឲ្យ​ភ្លឺ និង​ការ​បើក​ចំហ​លើ​រាង​កាយ» បន្ទាប់​មក​អនុវត្ត​ដូច​ជា​ការ​ហាត់​សិល្បៈ​ក្បាច់​គុន​មួយ ដែល​មាន​ចលនា​ដូចជា​ការ​រាំ​។ នៅ​ក្នុង​ដំណាក់​កាល​ចុង​ក្រោយ​គឺ​ការ​ណែ​នាំ​ធ្វើ​ឲ្យ​មាន​ស្មារតី​គិត​ពិចារណា​ល្អ​។

លោក Shayne ដែល​បាន​បង្ហើប​ថា ចលនា​ផ្សេង​ៗ​មាន​លក្ខណៈ​ដូច​ជា​ញ័រ​នោះ បាន​និយាយ​បន្ថែម​ថា៖ «វា​គ្មាន​នូវ​ការ​រាប់​ពី​ដង្ហើម​ឡើយ ព្រោះ​យើង​មិន​បាន​ឈប់​ឡើយ​។ អ្នក​អង្កេត​នឹង​កត់​សម្គាល់​នូវ​សំឡេង​ផ្សេងៗ​ដូចជា​កីឡា​តៃ​ជិ​។ កីឡា​យូហ្គា​សម័យ​ទំនើប​អាច​នឹង​មាន​ចលនា​ចុះ​ឡើង​គ្រប់​ជ្រុង​ទាំង​អស់​។ ស៊េរី​ជា​បឋម​របស់​យើង​គឺជា​ធ្វើ​ជា​រង្វង់​មូល ដែល​ជា​ដំណើរ​អនុវត្ត​ផ្លាស់​ប្តូរ​ជា​បន្ត​បន្ទាប់​»៕ IS