Headlines:

ស្វាយ រដ្ឋា ​វិល​មក​សម្រេច​គោល​បំណង​ចុង​ក្រោយ​



121226_25a
ស្វាយ រដ្ឋា (អាវខ្មៅ) ទទួល​ប្រាក់​​​លើក​ទឹក​ចិត្ត​ពី​លោករដ្ឋមន្រ្តី ថោង ខុន មុន​​ទៅ​​ស៊ីហ្គេម​​​លើក​ទី​២៦។ ម៉េងស្រ៊ុន

ភ្នំពេញ​: នៅ​ក្នុង​ចំណោម​កីឡាករ​ប្រដាល់​សកល​ជម្រើស​ជាតិ​កម្ពុជា ស្វាយ រដ្ឋា បាន​ក្លាយ​ជា​កីឡាករ​របស់​កម្ពុជា​តែ​ម្នាក់​គត់ ដែល​អាច​រក្សា​ការ​ដណ្តើម​បាន​មេដាយ​សំរឹទ្ធ​ចំនួន​២​លើក​ជាប់​ៗ​គ្នា សម្រាប់​ការ​ប្រកួត​កីឡា​ស៊ីហ្គេម​លើក​ទី​២៥ និង​លើក​ទី​២៦​នា​ពេល​កន្លង​មក ប៉ុន្តែ​មក​ដល់​ពេល​នេះ ស្វាយ រដ្ឋា បាន​ឃ្លាត​ឆ្ងាយ​ពី​សង្វៀន​ប្រដាល់​ជាង​១​ឆ្នាំ​ហើយ។

អ្នក​ជំនាញ​ប្រើ​កណ្តាប់​ដៃ​ឆ្វេង ស្វាយ រដ្ឋា បាន​ឈប់​សម្រាក​ពី​អាជីព​ជា​អ្នក​ប្រដាល់ កាល​ពី​ចុង​ឆ្នាំ​២០១១ បន្ទាប់​ពី​រូប​គេ​វិល​ត្រឡប់​មក​ពី​ប្រកួត​ស៊ីហ្គេម​លើក​ទី​២៦​នៅ​ប្រទេស​ឥណ្ឌូនេស៊ី ហើយ​នៅ​ពេល​នេះ​រូប​គេ​បាន​និង​កំពុង​ប្រើ​ដៃ​ជើង​ដ៏​រឹង​មាំ ដែល​កើត​ចេញ​ពី​ការ​ហ្វឹក​ហាត់​រយៈ​ពេល​ជាង​១០​ឆ្នាំ​របស់​គេ ធ្វើ​ការ​ងារ​ជា​អ្នក​ដាំ​ដំឡូង នៅ​ឯ​ខេត្ត​កំពង់​ធំ​ជាមួយ​មីង​របស់​ខ្លួន ដើម្បី​ស្វែង​រក​ប្រាក់​កម្រៃ​ផ្គត់​ផ្គង់​ប្រពន្ធ និង​កូន​ប្រុស​ដែល​ទើប​ចាប់​កំណើត​បាន​ជាង​១​ខែ​របស់​គេ។

តែ​ទោះ​បី​ជា​យ៉ាង​ណា ការ​ផ្ញើ​ខ្លួន​ជា​អ្នក​ដាំ​ដំឡូង​ជាមួយ​ផ្ទៃ​ដី​ជាង​២០​ហិកតា​នោះ មិន​មែន​ជា​មុខ​របរ​ពិត​ប្រាកដ ឬ​ជា​ទិស​ដៅ​សំខាន់​សម្រាប់​ការ​រក​ប្រាក់​រយៈ​ពេល​យូរ​មក​ចិញ្ចឹម​ជីវិត​នៃ​គ្រួសារ​ដ៏​ថ្មោង​ថ្មី ដែល​ទើប​មាន​កំណើត​ជាង​១​ឆ្នាំ​របស់ ស្វាយ រដ្ឋា នោះ​ទេ ព្រោះ​ចិត្ត​គំនិត​របស់ ស្វាយ រដ្ឋា មិន​អាច​កាត់​ផ្តាច់​ចេញ​ពី​ការ​បង្ហូរ​ញើស​ឈាម​ស្រស់ៗ នៅ​លើ​សង្វៀន​ប្រដាល់​នោះ​ឡើយ។

បុរស​វ័យ​២៧​ឆ្នាំ មាន​ដើម​កំណើត​នៅ​ខេត្ត​បាត់ដំបង ស្វាយ រដ្ឋា បាន​ប្រាប់​ភ្នំពេញ ប៉ុស្តិ៍ តាម​ទូរស័ព្ទ​កាល​ពី​ព្រឹក​ម្សិល​មិញ​ថា​៖​«​ខ្ញុំ​សុំ​គេ​សម្រាក​រយៈ​ពេល​១​ឆ្នាំ ព្រោះ​មាន​ការ​ងារ​រវល់ មិន​មែន​ខ្ញុំ​ឈប់​ប្រដាល់​រហូត​នោះ​ទេ ហើយ​ខ្ញុំ​នឹង​វិល​ទៅ​ហ្វឹក​ហាត់​នៅ​ក្នុង​ក្រុម​ជម្រើស​ជាតិ​វិញ នៅ​ពេល​គេ​ប្រមូល​ផ្តុំ​ហ្វឹក​ហាត់ ក្នុង​អំឡុង​ខែ​មីនា​នា​ឆ្នាំ​២០១៣​ខាង​មុខ​នេះ»។

កើត​ក្នុង​ត្រកូល​កសិករ ដែល​មាន​បង​ប្អូន​ប្រុស​ស្រី​៨​នាក់ រស់​នៅ​ក្រោម​ការ​ចិញ្ចឹម​បី​បាច់​ថែ​រក្សា​របស់​លោក​ឪពុក ស្វាយ ធឿន និង​អ្នក​ម្តាយ ហ៊ុន គឹមហូ នៅ​លើ​ទឹក​ដី​នៃ​ស្រុក​រតន​មណ្ឌល​ខេត្ត​បាត់ដំបង ស្វាយ រដ្ឋា ដែល​បាន​ទទួល​ការ​បណ្តុះ​បណ្តាល​ក្បាច់​គុន​បុរាណ​ខ្មែរ​ពី​បង​ប្រុស​ធំ​របស់​ខ្លួន ស្វាយ រិទ្ធី តាំង​ពី​នៅ​ក្មេង​នោះ បាន​សម្រេច​បោះ​បង់​ការ​សិក្សា​នៅ​ត្រឹម​ថ្នាក់​ទី​៦ រួច​បាន​ធ្វើ​ដំណើរ​មក​ផ្សង​ព្រេង​ជា​អ្នក​ប្រដាល់​គ្មាន​គោល​ដៅ​នៅ​ភ្នំពេញ។

ដោយ​មាន​ការ​ណែ​នាំ​ពី​អតីត​កីឡាករ​ប្រដាល់​ជើង​ចាស់ ភិន សុផល ដែល​ជា​មិត្ត​ភក្តិ​របស់ ស្វាយ រិទ្ធី បាន​ធ្វើ​ឲ្យ​ក្មេង​ប្រុស​ដែល​ទើប​មាន​អាយុ​១៧​ឆ្នាំ ស្វាយ រដ្ឋា បាន​ចូល​ហ្វឹក​ហាត់​នៅ​ក្នុង​ក្លិប​កង​រាជ​អាវុធ​ហត្ថ​រាជធានី​ភ្នំពេញ​នៅ​ឆ្នាំ​២០០៣ ហើយ​អត្ត​ចរិត​ដ៏​ស្លូត​បូត​របស់​គេ​បាន​ធ្វើ​ឲ្យ​គ្រូ​បង្វឹក​ប្រចាំ​ក្លិប​គឺ​លោក វ៉ែន សុផល បាន​យក​គេ​ធ្វើ​ជា​កូន​ចិញ្ចឹម ព្រម​ទាំង​ផ្តល់​ការ​ជ្រោម​ជ្រែង​គ្រប់​បែប​យ៉ាង​ចំពោះ​រដ្ឋា។

ការ​បោះ​ជំហាន​ជាន់​សង្វៀន​ប្រដាល់​រយៈ​ពេល​ជាង​១​ឆ្នាំ ស្វាយ រដ្ឋា ហាក់​មិន​បាន​ធ្វើ​ឲ្យ​ខ្លួន​ឯង​មាន​ភាព​ល្អ​ប្រសើរ​នោះ​ទេ ខណៈ​ការ​ប្រកួត​ក្បាច់​សេរី​របស់​គេ​ទទួល​លទ្ធផល​ចាញ់​ច្រើន​ជាង​ឈ្នះ​នោះ​។ ភាព​ល្វីង​ជូរ​ចត់​នេះ បាន​បង្ខំ​ឲ្យ​អ្នក​ប្រដាល់​ជំនាញ​ខាង​ម៉ាត់​ម្នាក់​នេះ ផ្លាស់​ប្តូរ​ពី​ការ​ប្រកួត​សេរី មក​ប្រកួត​សកល​វិញ​ម្តង។

ក្រោម​ការ​បង្ហាត់​បង្ហាញ​បន្ថែម​ពី​លោក វ៉ែន សុផល បាន​ជំរុញ​ឲ្យ ស្វាយ រដ្ឋា ក្លាយ​ជា​កីឡាករ​ជើង​ខ្លាំង​ម្នាក់​ផ្នែក​ប្រដាល់​សកល ដោយ​រូប​គេ​បាន​ឈ្នះ​ជើង​ឯក​រៀង​រាល់​ការ​ប្រកួត​កីឡា​ប្រដាល់​(សកល)​ជ្រើស​រើស​ជើង​ឯក​ប្រចាំ​ឆ្នាំ។ ជ័យ​ជម្នះ​នេះ ស្វាយ រដ្ឋា ត្រូវ​បាន​គេ​ជ្រើស​រើស​ឲ្យ​ចូល​ហ្វឹក​ហាត់​នៅ​ក្នុង​ក្រុម​ជម្រើស​ជាតិ ចាប់​តាំង​ពី​ឆ្នាំ​២០០៥ រហូត​មក​ដល់​ឆ្នាំ​២០១១​។

ស្វាយ រដ្ឋា បាន​និយាយ​ថា​៖​«​កាល​ពី​ដំបូង​ឡើយ​ខ្ញុំ​ជា​អ្នក​ប្រដាល់​សេរី​ម្នាក់ ប៉ុន្តែ​ខ្ញុំ​ប្រកួត​ចាញ់​ច្រើន​ពេក ទើប​ខ្ញុំ​ប្តូរ​មក​ប្រកួត​សកល​វិញ​នៅ​ក្នុង​ឆ្នាំ​២០០៤ ហើយ​ចាប់​តាំង​ពី​ការ​ប្រកួត​កីឡា​ប្រដាល់​(សកល)​ជ្រើស​រើស​ជើង​ឯក​ប្រចាំ​ឆ្នាំ​២០០៥ មក​ដល់​ឆ្នាំ​២០១១ ខ្ញុំ​បាន​គ្រប់​គ្រង​ជើង​ឯក​រហូត»។

នៅ​ក្នុង​រយៈ​ពេល​ហ្វឹក​ហាត់​នៅ​ក្នុង​ក្រុម​ជម្រើស​ជាតិ​នោះ ស្វាយ រដ្ឋា ត្រូវ​បាន​បញ្ជូន​ឲ្យ​ទៅ​ប្រកួត​នៅ​ក្រៅ​ប្រទេស​ជា​បន្ត​បន្ទាប់ ប៉ុន្តែ​ការ​ប្រកួត​ដែល​ធ្វើ​ឲ្យ​ពិភពលោក​ស្គាល់​រូប​គេ​កាន់​តែ​ច្បាស់​នោះ​គឺ​ការ​ប្រកួត​កីឡា​ស៊ីហ្គេម​លើក​ទី​២៥ នា​ឆ្នាំ​២០០៩ នៅ​ប្រទេស​ឡាវ និង​ស៊ីហ្គេម​លើក​ទី​២៦ នៅ​ប្រទេស​ឥណ្ឌូនេស៊ី កាល​ពី​ខែ​វិច្ឆិកា ឆ្នាំ​២០១១​កន្លង​មក​នេះ ដោយ​រូប​គេ​បាន​ឈ្នះ​មេដាយ​សំរឹទ្ធ​ជាប់ៗ​គ្នា។

ទោះ​បី​ជា​យ៉ាង​ណា ការ​ឃ្លាត​ឆ្ងាយ​ពី​សង្វៀន​ប្រដាល់ អស់​រយៈ​ពេល​ជាង​១​ឆ្នាំ​កន្លង​មក​នេះ ស្វាយ រដ្ឋា មិន​មាន​ពេល​បាន​រំឭក​ឡើង​វិញ​នូវ​វិជ្ជា​គុន និង​ល្បិច​ប្រកួត​ដែល​ខ្លួន​ធ្លាប់​បាន​ឆ្លង​កាត់​យ៉ាង​លំបាក​រយៈ​ពេល​ជាង​១០​ឆ្នាំ​នោះ​ឡើយ ដោយ​រូប​គេ​មាន​ការ​មមា​ញឹក​ខ្លាំង​ពេក​ទៅ​លើ​ការ​ដាំ​ដំឡូង​មី និង​ការ​ចំណាយ​ពេល​ធ្វើ​ដំណើរ​ពី​ខេត្ត​កំពង់​ធំ មក​មើល​ប្រពន្ធ​កូន​ខ្ចី នៅ​ផ្ទះ​ម្តាយ​ក្មេក​នៅ​ឯ​ខេត្ត​កំពង់​ចាម។

អ្នក​ប្រដាល់​ទម្ងន់​៦៥​គីឡូ​ក្រាម រដ្ឋា បាន​ត្អូញ​ត្អែរ​ថា​៖​«បង​អើយ! សមត្ថ​ភាព​របស់​ខ្ញុំ​នៅ​ពេល​នេះ មិន​ដូច​មុន​នោះ​ទេ ព្រោះ​តាំង​តែ​ពី​សុំ​ឈប់​សម្រាក​ពី​ក្រុម​ជម្រើស​ជាតិ នៅ​ចុង​ឆ្នាំ​២០១១​រហូត​មក​ដល់​ពេល​នេះ ខ្ញុំ​មិន​ដែល​បាន​ហាត់ ឬ​ឡើង​ប្រកួត​នៅ​កន្លែង​ណា​ឡើយ​ព្រោះ​ខ្ញុំ​រវល់​ខ្លាំង​ពេក»។

តែ​ទោះ​បី​ជា​យ៉ាង​ណា ស្វាយ រដ្ឋា បាន​ប្តេជ្ញា​ថា​៖​«​នៅ​ពេល​ខ្ញុំ​វិល​ត្រឡប់​ទៅ​ហ្វឹក​ហាត់​នៅ​ក្នុង​ក្រុម​ជម្រើស​ជាតិ​វិញ ខ្ញុំ​នឹង​ព្យាយាម​ហ្វឹក​ហាត់ ដើម្បី​ពង្រឹង​សមត្ថភាព​របស់​ខ្ញុំ​ឡើង​វិញ។ ខ្ញុំ​ចង់​ឈ្នះ​មេដាយ​ជា​បន្ត​ទៀត ក្នុង​ការ​ប្រកួត​ស៊ីហ្គេម នៅ​មីយ៉ាន់ម៉ា នា​ឆ្នាំ​២០១៣​ខាង​មុខ ហើយ​ខ្ញុំ​នឹង​នៅ​តែ​ចាប់​យក​អាជីព​ជា​អ្នក​ប្រដាល់ ដរាប​ណា​ខ្ញុំ​ទៅ​មុខ​លែង​រួច ព្រោះ​ខ្ញុំ​ចង់​សាង​កេរ្តិ៍​ឈ្មោះ​នៅ​ក្នុង​វិស័យ​កីឡា​ប្រដាល់ និង​ចង់​ទទួល​បាន​ប្រាក់​កាស​ពី​ការ​ឈ្នះ​មេដាយ​របស់​ខ្ញុំ យក​ទៅ​ផ្គត់​ផ្គង់​ប្រពន្ធ និង​កូន​របស់​ខ្ញុំ»៕