Headlines:

រឿង​ក្តី​ប្រមាថ​សាសនា ប៉ា​គីស្ថាន​ត្រូវ​លុប​ចោល​



121121_17b
នាង​រីម​សា ម៉ាស៊ីស ដែល​ត្រូវ​កម្លាំង​សន្តិ​សុខ​ជម្លៀស​ពី​ខែ​កញ្ញា។ Reuters

ក្រុង​អ៊ិស្លាម៉ាបាដៈ តុលាការ​មួយ​នៅ​ប៉ាគីស្ថាន​កាល​ពី​ថ្ងៃ​អង្គារ បាន​លុប​ចោល​នូវ​រឿង​ក្តី​ប្រមាថ​សាសនា​អ៊ិស្លាម​ចម្រូង​ចម្រាស​មួយ​ប្រឆាំង​ក្មេង​ស្រី​សាសនិក​ម្នាក់​ដែល​ត្រូវ​ចោទ​ប្រកាន់​ដោយ​អ្នក​ជិត​ខាង​នាង​ថា​បាន​ដុត​គម្ពីរ​ធម៌​«គួរអាន»​ជា​ច្រើន​ទំព័រ​។

ក្មេង​ស្រី​ដែល​គេ​ស្គាល់​ថា រីមសា និង​មាន​វ័យ​១៤​ឆ្នាំ ត្រូវ​បាន​គេ​ឃុំ​ខ្លួន​ក្នុង​ពន្ធនាគារ​ដែល​មាន​សន្តិ​សុខ​តឹង​រ៉ឹង​កាល​ពី​ខែ​កក្កដា​ដោយ​ញ៉ាំង​ឲ្យ​មាន​ក្តី​បារម្ភ​យ៉ាង​ខ្លាំង​ពី​អន្តរជាតិ​។

ការ​ចាប់​ខ្លួន​នាង បាន​កើត​មាន​បន្ទាប់​ពី​ការ​ចោទ​ប្រកាន់​ជា​ច្រើន​របស់​បព្វ​ជិត​មូស្លីម​ដែល​ពេល​នេះ​កំពុង​ប្រឈម​មុខ​នឹង​រឿង​ក្តី​មួយ​ដែល​តាម​ចោទ​ប្រកាន់​ថា បាន​ប្រឌិត​ភស្តុតាង​។

មេ​ធាវី​របស់​នាង​រីមសា បាន​និយាយ​ថា​រឿង​ក្តី​នេះ គឺជា​ការ​យល់​ច្រឡំ​ខាង​ច្បាប់​។ គ្រួសារ​របស់​នាង ទទួល​ការ​គំរាម​កំហែង​ជីវិត​ហើយ​ក៏​បាន​លាក់​ខ្លួន។

បន្ទាប់​ពី​ការ​ស្រែក​តវ៉ា​ជុំវិញ​រឿង​ក្តី​នេះ នាង​រីមសា ដែល​ក្រុម​វេជ្ជ​បណ្ឌិត​បាន​និយាយ​ថា ក្មេង​ស្រី​មាន​ស្មារតី​ក្មេង​ជាង​វ័យ​១៤​ឆ្នាំ​ត្រូវ​បាន​ដោះ​លែង​ឲ្យ​នៅ​ក្រៅ​ឃុំ​ដោយ​មាន​បង់​ប្រាក់​ធានា​ជា​ទង្វើ​ដ៏​កម្រ​មួយ​ក្នុង​រឿង​ក្តី​ប្រមាថ​។

អ្នក​យក​ព័ត៌​មាន​នៃ​ទូរទស្សន៍​ប៊ីប៊ីស៊ី ក្នុង​ក្រុង​អ៊ិស្លាម៉ាបាដ បាន និយាយ​ថា ករណី​ប្រឆាំង​នឹង​បព្វ​ជិត​មូស្លីម​ដែល​គេ​ចោទ​ថា​បាន​ទម្លាក់​កំហុស​លើ​ក្មេង​ស្រី​នោះ នឹង​ដំណើរ​ការ។ លោក នឹង​ត្រូវ​គេ​ជំនុំ​ជម្រះ​ពី​បទ​បង្កើត​ការ​ចោទ​ប្រកាន់​មិន​ពិត​។

ពុំ​មាន​ការ​ឆ្លើយ​តប​ណា​មួយ​ពី​នាង​រីម​សា ឬ​គ្រួសារ​របស់​នាង​នៅ​ឡើយ​ទេ។ ពួក​គេ នៅ​តែ​កំពុង​លាក់​ខ្លួន​។

សមា​ជិក​សាសនា​គ្រិស្ត​តែ​ម្នាក់​គត់​នៅ​ក្នុង​គណៈ​រដ្ឋ​មន្រ្តី​សហព័ន្ធ​របស់​ប៉ាគីស្ថាន​លោក ប៉ូល ផាទី បាន​បញ្ជាក់​ថា រឿង​ក្តី​នេះ ត្រូវ​លុប​ចោល​ដោយ​តុលាការ​កំពូល​នៅ​រដ្ឋ​ធានី​អ៊ិស្លាម៉ាបាដ​។ លោក បន្ត​ថា​៖«​ខ្ញុំ​សូម​ស្វាគមន៍​បញ្ជា​នេះ​។ យុត្តិ​ធម៌​ពិត​ជា​មាន ហើយ​ច្បាប់​ប្រទេស​នេះ ត្រូវ​បាន​ប្រកាន់​ដោយ​តុលាការ​»​៕ ​NR