Headlines:

ព្យុះ​រដូវ​រងា​មួយ​បាន​នាំ​ទុក្ខ​សោក​ថ្មី​ដល់​អាមេរិក​



121109_18c
បុរសម្នាក់ដើរ​កាត់ព្រឹល​ ដែលបណ្តាល​មក​ពីព្យុះ​ឦសាននៅ​ញូវ​ជឺស៊ី។ Reuters

ក្រុង​ញូវ​យ៉កៈ ព្យុះ​រដូវ​រងា​មួយ បាន​បង្ក​ឲ្យ​មាន​ព្រឹល និង​ទឹក​ភ្លៀង​នៅ​ភាគ​ឦសាន​អាមេរិក​កាល​ពី​ថ្ងៃ​ពុធ​ដោយ​នាំ​មក​នូវ​ខ្យល់​បក់​ដ៏​គ្រោះ​ថ្នាក់​ហើយ​បាន​ធ្វើ​ឲ្យ​ដាច់​ចរន្ត​អគ្គិសនី​នៅ​តំបន់​មួយ​ដែល​មនុស្ស​រាប់​សែន​នាក់​នៅ​តែ​គ្មាន​ភ្លើង​ប្រើ​ប្រាស់​នៅ​ឡើយ​បន្ទាប់​ពី​ព្យុះ​កំណាច​សែនឌី​។

ព្យុះ​ឦសាន​បាន​នាំ​មក​នូវ​ទុក្ខ​សោក​ថ្មី​ដល់​មនុស្ស​រាប់​ពាន់​នាក់​នៅ​រដ្ឋ​ញូវជឺស៊ី ញូវ​យ៉ក និង​ខុន ណិកធីខាត់​ដែល​ផ្ទះ​របស់​ពួក​គេ ត្រូវ​បំផ្លាញ​ដោយ​ព្យុះ​សែនឌី នៅ​ពេល​ដែល​វា​បាន​វាយ​ប្រហារ​ដល់​ច្រាំង​កាល​ពី​ថ្ងៃ​២៩ ខែ​តុលា​ដោយ​នាំ​ឲ្យ​មាន​ទឹក​ជំនន់ និង​ខ្យល់​បក់​ខ្លាំង​ជា​ប្រវតិ្ត​សាស្រ្ត​។

លំនៅ​ដ្ឋាន​និង​ទី​តាំង​ធ្វើ​អាជីវកម្ម​ប្រមាណ​២២​ពាន់​កន្លែង​ចាប់​ពី​រដ្ឋ​ខារ៉ូ​ឡៃណា ដល់​រដ្ឋញូវ​យ៉ក បាន​ដាច់​ភ្លើង​កាល​ពី​ថ្ងៃ​ពុធ ដូច ជា​អតិ​ថិជន​ជាង​៦៤​ម៉ឺន​នាក់​ដែល​នៅ​តែ​គ្មាន​ភ្លើង​ប្រើ​ប្រាស់​ដោយ​សារ​តែ​ព្យុះ​ធំ​បំផុត និង​ចំណាយ​ប្រាក់​ច្រើន​បំផុត​ដែល​ពុំ​ធ្លាប់​បាន​វាយ​ប្រហារ​អាមេរិក​។

រដ្ឋ​ញូវ​យ៉ក និង​រដ្ឋ​ញូវជឺស៊ី បាន​ជម្លៀស​មនុស្ស​ចេញ​ពី​តំបន់​ឆ្នេរ​សមុទ្រ​ដែល​ងាយ​រង​គ្រោះ​បំផុត​មុន​ព្យុះ​ឦសាន​ដែល​ត្រូវ​បាន​គេ​ព្យាករ​ថា​នឹង​នាំ​មក​នូវ​ទឹក​ជោរ​កម្ពស់​៦០​ស.ម.​លើស​កម្រិត​ធម្មតា​នៅ​ព្រឹក​ថ្ងៃ​សុក្រ។

ព្យុះ​នេះ ក៏​បាន​បង្ក​ការ​ខូច​ខាត​ដល់​ការ​ធ្វើ​ដំណើរ​ពេល​យប់​ចេញ​ពី​ក្រុង​ញូវ​យ៉ក​ដោយ​ធ្វើ​ឲ្យ​ផ្លូវ​ដែក​Long Island Rail បិទ​បណ្តោះ​អាសន្ន​គ្រប់​ប្រតិបត្តិការ​ទៅ​កាន់​ជាយ​ក្រុង​ភាគ​ខាង​កើត​និង​បាន​ធ្វើ​ឲ្យ​អាជ្ញា​ធរ​បិទ​ស្ថានីយ Penn របស់​ក្រុង​ញូវ​យ៉ក​។

មិន​មាន​ទឹក​ជំនន់​ធំ​ណា​មួយ ត្រូវ​បាន​គេ​រាយការណ៍​ទេ​ក្នុង​អំឡុង​ព្យុះ​ប៉ុន្មាន​ម៉ោង​ដំបូង ទោះ​បី​ក្រុង​ញូវ​យ៉ក បាន​ព្រមាន​ថា​អ្នក​ក្រុង​ដែល​ផ្ទះ​របស់​ពួក​គេ បាន​ជន់​លិច​ក្នុង​អំឡុង​ព្យុះ​សែនឌី​ឲ្យ​ពិចារណា​ផ្លាស់​ទៅ​ផ្ទះ​របស់​មិត្ត​ភក្តិ​នៅ​តំបន់​ខ្ពស់​ជាង​ឬ​ទៅ​ជម្រក​ក្រុង​។

អ្នក​ស្រី​គ្រីស្ទីន ចូន​វ័យ​៧៣​ឆ្នាំ បាន​ថ្លែង​ថា​អ្នក​ស្រី​បន្ត​រស់​នៅ ដោយ​គ្មាន​ប្រព័ន្ធ​កម្ដៅ ឬ​ភ្លើង​នៅ​ក្នុង​អគារ​ផ្ទះ​ល្វែង​មាត់​សមុទ្រ​នៅ​ឆ្នេរ​សមុទ្រ​Far Rockaway នៅ​ក្នុង​រដ្ឋ​ញូវយ៉ក​ថ្វី​បើ​ត្រូវ​ឡើង​តាម​កាំ​ជណ្តើរ​ទៅ​ផ្ទះ​ល្វែង​ជាន់​ទី​១០​របស់​អ្នក​ស្រី​ដោយ​ប្រើ​ពិល​កាន់​នឹង​ដៃ​ក៏​ដោយ​។

អ្នក​ស្រី បាន​បញ្ជាក់​ថា​៖«​ពួក​គេ ប្រាប់​យើង​ឲ្យ​ជម្លៀស​។ ពួក​គេ​បារម្ភ​ថា ពួក​គេ​នឹង​ត្រូវ​ប្លន់​ពី​ក្រុម​ក្មេង​ប្រុស​ជំទង់​ដែល​ព្យាយាម​មក​គាស់​ផ្ទះ​»​។ អ្នក​ស្រី បាន​បន្ថែម​ថា ប៉ុន្តែ​អ្នក​ស្រី និង​អ្នក​ជិត​ខាង​មិន​ចង់​ចាក​ចេញ​ទេ​»​៕ ​NR