Headlines:

ជម្លោះ​ផ្ទុះ​​ប្រឆាំង​ឱសថ​ក្លែង​ក្លាយ​​ទូទាំង​ពិភព​លោក​



121115_19b
គ្រឿងចក្រត្រូវ​គេ​ប្រើ​កិន​កម្ទេច​ឱសថ​ក្លែង​ក្លាយ​នៅជាំង​ស៊ូ ចិន។ Reuters

ក្រុង​ឡុងដ៍ៈ អ្នក​ជំនាញ​មួយ​ក្រុម​ដែល​កំពុង​អំពាវ​នាវ​ឲ្យ​មាន​សន្ធិសញ្ញា​ពិភព​លោក​មួយ​ឲ្យ​បញ្ឈប់​ពាណិជ្ជ​កម្ម​សម្លាប់​ជីវិត​នៃ​ឱសថ​ក្លែង​ក្លាយ​ត្រូវ​បាន​គេ​រារាំង​មិន​ឲ្យ​ចូល​រួម​ជំនួប​អង្គការ​សុខ​ភាព​ពិភពលោក​(WHO)​មួយ​ទេ ដោយ​បង្ហាញ​ពី​ការ​បែក​បាក់​គ្នា​ដ៏​ជ្រាល​ជ្រៅ​ដែល​កំពុង​តែ​រារាំង​ដល់​ការ​វិវត្ត​លើ​ប្រធាន​បទ​នេះ។

សាស្រ្តាចារ្យ​ល្បី​ឈ្មោះ និង​អ្នក​អាជីព​សុខា​ភិបាល​សង្ឃឹម​ថា​នឹង​ជំរុញ​ឲ្យ​មាន​ការ​ដេញ​ដោល​គ្នា​លើ​តម្រូវ​ការ​សម្រាប់​ច្បាប់​អន្តរ​ជាតិ​ថ្មី​មួយ​ដើម្បី​ទប់​ស្កាត់​ឱសថ​ក្លែង​ក្លាយ និង​ក្រោម​ស្តង់​ដារ​ដែល​ទៅ​ដល់​ទី​ផ្សារ​ជា​មួយ​ឯកសារ​មួយ​ដែល​គេ​បោះ​ពុម្ព​ក្នុង​ទស្សនាវដ្តី​វេជ្ជ​សាស្រ្ត​អង់​គ្លេស​ពី​ថ្ងៃ​ពុធ​។

អត្ថបទ​របស់​ពួក​គេ​ដែល​បង្ហាញ​ករណី​ច្បាស់​សម្រាប់​សន្ធិ​សញ្ញា​ថ្នាំ​ក្លែង​ក្លាយ​ដូច​គ្នា​នឹង​សន្ធិ​សញ្ញា​មាន​ស្រាប់​ស្តី​ពី​ការ​លាង​លុយ​កខ្វក់ និង​ការ​ជួញ​ដូរ​មនុស្ស​បាន​កើត​មាន​មួយ​សប្តាហ៍​មុន​ពេល​រដ្ឋ​ចំនួន​១០០ រៀបចំ​ធ្វើ​ជំនួប​ដំបូង​ដើម្បី​ពិភាក្សា​អំពី​បញ្ហា​នេះ​នៅ​ក្នុង​ក្រុង​ប៊ុយណូស៊ែរ។

ប៉ុន្តែ​អ្នក​និពន្ធ​ឆ្នើម​លោក អាមៀរ អាត់​តារ៉ាន់​នៃ​សាកល​វិទ្យា​ល័យ អូតាវ៉ា បាន​ថ្លែង​ថា លោក​ត្រូវ​បាន​WHO ប្រាប់​ពី​ថ្ងៃ​ចន្ទ​ថា លោក និង​អ្នក​តំណាង​ក្រៅ​រដ្ឋា​ភិបាល​ជា​ច្រើន​នាក់​ទៀត​មិន​អាច​ចូល​រួម​ជំនួប​បាន​ទេ បន្ទាប់​ពី​មាន​ការ​ជំទាស់​ពី​ឥណ្ឌា​។

ស្រ្តី​អ្នក​នាំ​ពាក្យWHO បាន​បដិសេធ​មិន​ធ្វើ​អត្ថា​ធិប្បាយ​លម្អិត​អំពី​ការ​អញ្ជើញ​ពិសេស​ណា​មួយ​ទេ ប៉ុន្តែ​បាន​ថ្លែង​ថា​វា​អាស្រ័យ​លើ​រដ្ឋ​សមា​ជិក​ក្នុង​ការ​កំណត់​ថា​អ្នក​ណា​ត្រូវ​គេ​អនុ​ញ្ញាត​ឲ្យ​ចូល​រួម​។ ក្រុម​មន្រ្តី​ឥណ្ឌា​ដែល​រដ្ឋា​ភិបាល​ពួក​គេ​មាន​ការ​ប្រុង​ប្រយ័ត្ន​ចំពោះ​ក្រុម​ហ៊ុន​ឱសថ​អន្តរ​ជាតិ​ដែល​ប្រើ​ប្រាស់​បញ្ហា​នេះ​ដើម្បី​ទប់​ស្កាត់​ការ​ប្រកួត​ប្រជែង​ភ្លាម​ៗ​នេះ​មិន​អាច​ធ្វើ​អត្ថា​ធិប្បាយ​បាន​ទេ​។

លោក​អាត់​តារ៉ាន់​បាន​ហៅ​វា​ថា​ជា​«​រឿង​អាស្រូវ​»​មួយ​ដែល​មាន​តែ​មន្រ្តី​រដ្ឋា​ភិបាល​ទេ​នឹង​ចូល​រួម​ជំនួប​នៅ​អាហ្សង់​ទីន​៕