​កម្ពុជា​បើក​វគ្គ​ហ្វឹក​ហ្វឺន​លំហាត់​ឆ្មាំ​អង្គរ ២០១៤ រវាង​កង​ទ័ព​ជើង​គោក​កម្ពុជា និង​កង​ទ័ព​​អាមេរិក​ប្រចាំ​អាស៊ី​ប៉ាស៊ីហ្វិក​ នៅ​ព្រឹក​ថ្ងៃ​ចន្ទ​​នេះ​ក្នុង​ខេត្ត​កំពង់​ស្ពឺ លើ​ការ​ងារ​សហ​ប្រតិ​បត្តិ​ការ​សន្តិ​សុខ និង​ដើម្បី​កសាង​សមត្ថភាព​ជួយ​សង្គ្រោះ​គ្រោះ​មហន្តរាយនិង​ជំនួយ​មនុស្ស​ធម៌។
Headlines:

គណបក្ស​កុម្មុយនីស្ត​ចិន​នឹង​ប្រកាស​ក្រុម​មេដឹកនាំ​ថ្មី​នៅ​ក្នុង​ថ្ងៃ​ព្រហស្បតិ៍



121114_17a
លោកស៊ី ដើរ​ពី​ក្រោយ ខណៈលោក​ហ៊ូ និងលោកជាំង ពិភាក្សា។ Reuters

ក្រុង​ប៉េកាំងៈ ក្រុម​មន្រ្តី បាន​និយាយ​កាល​ពី​ថ្ងៃ​អង្គារ​ថា បក្ស​កុម្មុនីស្ត​ចិន​នៅ​ថ្ងៃ​ព្រហស្បតិ៍​នឹង​ប្រកាស​ក្រុម​មេដឹក​នាំ​កំពូល​ថ្មី​ៗ​ដែល​នឹង​ដឹក​នាំ​ប្រទេស​សម្រាប់​រយៈ​ពេល​មួយ​ទសវត្សរ៍​ខាង​មុខ​គឺ មួយ​ថ្ងៃ​បន្ទាប់​ពី​សមាជ​រយៈ​ពេល មួយ​សប្តាហ៍​របស់​ខ្លួន​បញ្ចប់​។

ការ​កំណត់​ពេល​វេលា​ដែល​គេ​រំពឹង​ជា​ទូ​ទៅ​នេះ ត្រូវ​បាន​បញ្ជាក់​ដល់​បុគ្គលិក​យក​ព័ត៌​មាន​សមាជ​កំពុង​ដំណើរ​ការ​នៅ​ក្រុង​ប៉េកាំង ដែល​ត្រូវ​បាន​ធ្វើ​ឡើង​រាល់​៥​ឆ្នាំ ម្តង​។ ប្រធានាធិតី​ចិន​លោក ហ៊ូ​ជីនតាវ ដែល​កាន់​អំណាច​១០​ឆ្នាំ ជា​ទូទៅ​ត្រូវ​បាន​គេ​រំពឹង​ថា​នឹង​ផ្ទេរ​ការ​គ្រប់​គ្រង​របស់​បក្ស​កំពុង​កាន់​អំណាច​ទៅ​ឲ្យ​អនុ​ប្រធានា​ធិបតី​របស់​លោក​គឺ​លោក ស៊ី ជីនភីង​។

ថ្នាក់​ដឹក​នាំ​ដែល​គេ​សម្រេច​ចិត្ត​ក្នុង​ការ​តថ្លៃ​គ្នា​សម្ងាត់​រវាង​ក្រុម​ជា​ច្រើន​នៅ​ក្នុង​បក្ស នឹង​ត្រូវ​ប្រកាស​ឲ្យ​ពល​រដ្ឋ​ក្នុង​ប្រទេស​ដឹង​នៅ​ពេល​ដែល​សមា​ជិក​គណៈ​កម្មា​ធិការ​អចិន្រៃ្តយ៍​ការិយាល័យ​នយោ​បាយ បង្ហាញ​ខ្លួន​ជា​ជួរ​នៅ​មុខ​ម៉ាស៊ីន​ថត​នៅ​មហា​សាល​ប្រជាជន​នៅ​ក្នុង​ក្រុង​ប៉េកាំង​។ ក្រុម​បុគ្គលិក​បក្ស បាន​ប្រាប់​អ្នក​យក​ព័ត៌មាន​ថា គណៈ​កម្មា​ធិការ​អចិន្រៃ្ដយ៍​ថ្មី ដែល​ពេល​នេះ​មាន​សមា​ជិក​៩​រូប​នឹង​«​ជួប​សារ​ព័ត៌​មាន​»​នៅ​ថ្ងៃ​ព្រហស្បតិ៍​។​រហូត​មក​ដល់​ពេល​នេះ​គណ​បក្ស​ពុំ​ទាន់​បាន​បញ្ជាក់​ជា​ផ្លូវ​នូវ​ការ​កំណត់​ពេល​ទេ​។

លោក ស៊ី ត្រូវ​គេ​រំពឹង​ជា​ទូ​ទៅ​ថា​នឹង​ចាក​ចេញ​ពី​តំណែង​ដំបូង​របស់​លោក​ក្នុង​គណៈ​កម្មា​ធិការ​នេះ​ដោយ​បង្ហាញ​ថា លោក នឹង​ក្លាយ​ជា​មេដឹក​នាំ​បក្ស​ថ្មី​។ បន្ទាប់​មក​លោក នឹង​ត្រូវ​តែង​តាំង​ជា​ផ្លូវ​ការ​ជា​ប្រធានា​ធិបតី​របស់​ប្រទេស​នេះ​នៅ​ខែ​មីនា​ឆ្នាំ​ក្រោយ​ដោយ​សភា​ប្រថាប់​ត្រា​របស់​ចិន​។ សមា​ជិក​គណៈ​កម្មា​ធិការ​អចិន្ត្រៃយ៍​ដូច​ជា​លោក​ស៊ី គឺ​លោក​ឧបនាយក​រដ្ឋ​មន្រ្តី​លី កេ​ឈាង ក៏​នឹង​ត្រូវ​គេ​រំពឹង​យ៉ាង​មុត​មាំ​ថា​នឹង​ឡើង​ទៅ​ជា​ថ្នាក់​ដឹក​នាំ​កំពូល​របស់​គណៈ​កម្មា​ធិការ​នេះ​ហើយ​ត្រូវ​គេ​ដាក់​នៅ​លើ​ផ្លូវ​ដែល​គេ​នឹង​ត្រូវ​តែង​តាំង​ជា​នាយក​រដ្ឋ​មន្រ្តី ដោយ​ជំនួស​លោក វេន ជាប៉ាវ ដែល​កំពុង​កាន់​តំណែង​បច្ចុប្បន្ន​។

ពួក​គេ​នឹង​កាន់​តំណែង​នៅ​ពេល​លំបាក​មួយ​នៅ​ពេល​ប្រទេស​មហា​អំណាច សេដ្ឋ​កិច្ច​នេះ កំពុង​តែ​ជួប​ការ​ធ្លាក់​ចុះ​ដ៏​កម្រ​មួយ ហើយ​មាន​តម្រូវ​ការ​ឲ្យ​កែ​ប្រែ​កើន​ឡើង​ពី​អ្នក​ប្រើ​ប្រាស់​ប្រព័ន្ធ​អ៊ីន​ធឺណិត​ឥត​សំចៃ​របស់​ប្រទេស​នេះ​។​ប្រសិន​បើ​អ្វីៗ​ដំណើរ​ការ​ទៅ​បាន​តាម​ទម្លាប់​លោក ស៊ី និង​លោក លី នឹង​រំពឹង​ថា​នឹង​កាន់​តំណែង​បាន​១០​ឆ្នាំ​។

ទោះ​ជា​យ៉ាង​នេះ​ក្តី​ក៏​គណៈ​កម្មា​ធិការ​អចិន្ត្រៃយ៍ តាម​ធម្មតា​ធ្វើ​ការ​កែ​ប្រែ​បន្តិច​បន្តួច​រៀង​រាល់​៥​ឆ្នាំ​ដោយ​រុះ​រើ​គណៈ​កម្មា​ធិការ​ថ្នាក់ ទាប​។ សមា​ជិក​ភាព​ផ្សេង​ទៀត នៃ​គណៈ​កម្មា​ធិការ​ដែល​គេ​នឹង​ប្រកាស​នៅ​ថ្ងៃ​ព្រហស្បតិ៍ នៅ​តែ​ជា​បញ្ហា​ចចាម​អារ៉ាម​ដដែល​។

ក្នុង​សុន្ទរកថា​បើក​សមាជ​កាល​ពី​ថ្ងៃ​ព្រហស្បតិ៍​សប្តាហ៍​មុន លោក ហ៊ូ បាន​សរសើរ​សមិទ្ធ​ផល​របស់​ប្រទេស​ក្នុង​អំឡុង​អាណត្តិ​របស់​លោក​។ ប៉ុន្តែ​លោក ក៏​បាន​ព្រមាន​ខ្លាំង​ៗ​អំពី​តម្រូវ​ការ​ចាំបាច់​ដើម្បី​ដោះ​ស្រាយ​បញ្ហា​ក្តៅ​គគុក ជុំវិញ​អំពើ​ពុក​រលួយ ការ​បំផ្លាញ​បរិស្ថាន និង​សម្ពាធ​សាធារណ​ដើម្បី​លទ្ធិ​ប្រជា​ធិបតេយ្យ​។

លោក​បាន​ថ្លែង​ថា អំពើ​ពុក​រលួយ​អាច​បង្ហាញ​ពី​ការ​ស្លាប់​ចំពោះ​បក្ស និង​អាច​ជា​បុព្វ​ហេតុ​នៃ​ការ​ដួល​រលំ​របស់​ខ្លួន​ដោយ​បន្ថែម​ថា បក្ស​ដ៏​មាន​អំណាច​គ្រប់​យ៉ាង​ត្រូវ​តែ​កែ​ប្រែ​រចនា​សម្ព័ន្ធ នយោបាយ និង​ផ្តល់​ឲ្យ​ប្រជាជន​នូវ​លទ្ធិ​ប្រជាធិបតេយ្យ​ឲ្យ​កាន់​តែ​ទូលំ​ទូលាយ​៕ ​NR