Headlines:

មីយ៉ាន់​ម៉ា​សន្យា​ពិនិត្យ​សិទ្ធិ​របស់​អម្បូរ​រ៉ូហ៊ីង​យ៉ា



121119_17b
ស្ត្រី និង​កុមារអម្បូររ៉ូហ៊ីង​យ៉ា លាក់​ខ្លួន​នៅ​ក្នុង​ផ្ទះតំបន់​តេក​ណាហ្វ។ Reuters

ក្រុង​ញូវ​យ៉ក​: ប្រធានា​ធិបតី​មីយ៉ាន់​ម៉ា​បាន​សន្យា​ពិចារណា​ពី​សិទ្ធិ​ថ្មី​សម្រាប់​ជន​ជាតិ​ភាគ​តិច​រ៉ូហ៊ីង​យ៉ា​គ្មាន​រដ្ឋ​នៅ​មុន​ពេល​ដំណើរ​ទស្សន​កិច្ច​ជា​ប្រវត្តិ​សាស្ត្រ​របស់​លោក​ប្រធានា​ធិបតី​បារ៉ាក់​អូបាម៉ា​ប៉ុន្តែ​មិន​បាន​ធ្វើ​ការ​ប្ដេជ្ញា​ចិត្ត​ទាំង​ស្រុង​ថា ភាព​ជា​ពល​រដ្ឋ​និង​សេរី​ភាព​ថ្មី​ផ្សេង​ទៀត​នឹង​ត្រូវ​បាន​ផ្ដល់​ឲ្យ​នោះ​ទេ។

ក្នុង​លិខិត​មួយ​ដែល​បាន​ផ្ញើ​ទៅ​អ.ស.ប.​កាល​ពី​ថ្ងៃ​សុក្រ​ប្រធានា​ធិបតី​ថេន សេន​បាន​ធ្វើ​សេចក្តី​ថ្លែង​ការណ៍​ផ្សះ​ផ្សា​គ្នា​ដែល​បាន​ថ្កោល​ទោស​«​អំពើ​ហិង្សា​គ្មាន​ន័យ​»​នៅ​ក្នុង​រដ្ឋ​រ៉ាក់​ឃីន​ភាគ​ខាង​លិច​រវាង​ក្រុម​ពុទ្ធ​សាសនិក​រ៉ាក់​ឃីន និង មូស្លីម​រ៉ូហ៊ីង​យ៉ា។

លោក ថេន សេន​បាន​ប្រាប់​ក្រុម​មេដឹក​នាំ​សាសនា​ថា៖ «​មាន​ក្រុម​ជាតិ​និយម​និង​ក្រុម​សាសនា​ជ្រុល​និយម​ដែល​បាន​ញុះ​ញង់​និង​អុជ​បញ្ឆេះ​ដោយ​មិន​សម​ហេតុ​ផល​នៅ​ពីក្រោយ​ហេតុ​ការណ៍​នេះ​ដើម្បី​ធ្វើ​ឲ្យ​រាល​ដាល​អំពើ​ហិង្សា​ក្នុង​សាសនា​»។

ដោយ​មិន​បញ្ជាក់​អត្ត​សញ្ញាណ​ពួកគេ​លោក​បាន​ថ្លែង​ថា៖ «​ក្រៅ​ពីនេះ​មាន​អង្គការ​ជាតិ​និង​អន្តរជាតិ​ខ្លះ​ដែល​បាន​ព្យា​យាម​បញ្ឆេះ​ភ្លើង​ដោយ​ផ្សព្វ​ផ្សាយ​ព័ត៌​មាន​មិន​ពិត​និង​ប្រឌិត​»។

ដោយ​អំពាវ​នាវ​ឲ្យ​មាន​ការ​រួប​រួម​គ្នា​រវាង​រដ្ឋាភិបាល​ព្រះ​សង្ឃ​ពុទ្ធ​សាសនា​និង​ពល​រដ្ឋ​គ្រប់​ជាតិ​សាសន៍​និង​សាសនា​លោក​បាន​ថ្លែង​ថា៖​ «​ប្រទេស​នេះ​នឹង​បាត់​បង់​មុខ​មាត់​នៅ​ក្នុង​ចំណោម​សហគមន៍​អន្តរជាតិ​បើ​សិន​យើង​មិន​អាច​បន្ត​បទ​ដ្ឋាន​សិទ្ធិ​មនុស្ស​និង​កិច្ច​ការ​មនុស្ស​ធម៌​ដែល​ប្រទេស​ជា​ច្រើន​កំពុង​តែ​អនុវត្ត​នោះ​ទេ​»។

មនុស្ស​ជិត​២០០​នាក់​ត្រូវ​បាន​ស្លាប់​និង​ជាង​១០ម៉ឺន​នាក់​ទៀត​ត្រូវ​បាន​ខ្ចាត់​ព្រាត់​ចាប់​តាំង​ពីខែ​មិថុនា​មក នៅ​ក្នុង​ការ​ប្រយុទ្ធ​គ្នា​រវាង​សហ​គមន៍​ទាំង​ពីរ​។

ការ​ធ្វើ​ទុក្ខ​បុក​ម្នេញ​អម្បូរ​រ៉ូហ៊ីងយ៉ា​ក៏​ប៉ះ​ពាល់​ដល់​បង់​ក្លា​ដែស​ផង​ដែរ​។ នៅ​ពេល​មាន​អំពើ​ហិង្សា​សហគមន៍​កើត​ឡើង​នៅ​មីយ៉ាន់ម៉ា​ក្រុម​ជន​ជាតិ​ភាគ​តិច​តែង​នាំ​គ្នា​រត់​ចូល​បង់​ក្លា​ដែស​តាម​តំបន់​ព្រំដែន​តិក​ណាហ្វ​៕ PN