Headlines:

ក្រុម​ប៉ូលិស​ចិន​បំបែក​សំបុក​ក្រុម​ជួញ​ដូរ​មនុស្ស ជួយ​សង្គ្រោះ​កុមារ​៨៩​នាក់​



121226_17c
ទារក​ត្រូវ​បានសមត្ថ​កិច្ច​សង្គ្រោះ​​ពី​ក្រុម​ជួញ​ដូរនៅ​ក្នុង​ខេត្ត​ហ៊្វូជាន។ Reuters

ក្រុង ប៉េកាំង​: ប្រព័ន្ធ​ផ្សព្វ​ផ្សាយ​រដ្ឋ​បាន​រាយការណ៍​ពី​ថ្ងៃ​ចន្ទ​ថា ក្រុម​ប៉ូលិស​ចិន​បាន​ជួយ​សង្គ្រោះ​ក្មេង​៨៩​នាក់​និង​ចាប់​ខ្លួន​ជន​សង្ស័យ​៣៥៥​នាក់​ក្នុង​អំឡុង​ពេល​ចុះ​បង្ក្រាប​ទៅ​លើ​ក្រុម​ជួញ​ដូរ​កុមារ​៩​ក្រុម​នៅ​ទូទាំង​ប្រទេស​។

ប្រធាន​ការិយាល័យ​ប្រឆាំង​ការ​ជួញ​ដូរ​កុមារ នៅ​ក្នុង​ក្រសួង​សន្តិសុខ​សាធារណៈ​លោក​ឈិន ស៊ីគូ បាន​និយាយ​ថា ប៉ូលិស​បាន​ចាប់​ផ្ដើម​ប្រតិ​បត្តិ​ការ​កាល​ពី​ថ្ងៃ​ទី​១៨​ធ្នូ​នៅ​ក្នុង​ខេត្ត​ជា​ច្រើន ក្នុង​នោះ​មាន​ខេត្ត​ក្វាង​ទុង​និង​ខេត្ត​ស៊ី​ឈន់​ដែល​ខេត្ត​ពីរ​នេះ​មាន​ប្រជាជន​ច្រើន​ជាង​គេ​បំផុត​នៅ​ចិន​។

ទីភ្នាក់​ងារ​ព័ត៌មាន​ស៊ីនហួ​ផ្លូវ​ការ​បាន​រាយការណ៍​ថា​កុមារ​ទាំង​នេះ​កំពុង​ត្រូវ​បាន​ថែ​ទាំ​នៅ​ក្នុង​អគារ​ថែ​ទាំ​មនុស្ស​ចាស់​ក្នុង​តំបន់​ហើយ​ប៉ូលិស​កំពុង​ស្វែង​រក​ម្ដាយ​ឪពុក​ពួកគេ​។

ទីភ្នាក់​ងារ​នេះ​បាន​ស្រង់​សម្ដី​លោក​ឈិន​ដូច​បាន​និយាយ​ថា៖ «​យើង​នឹង​ប្រមូល​ឌី​អិន​អេ​(DNA)​របស់​កុមារ​ទាំង​នេះ​ហើយ​ប្រើ​វា​ដើម្បី​ស្វែង​រក​ឪពុក​ម្ដាយ​ពួកគេ​នៅ​ក្នុង​មូល​ដ្ឋាន​ទិន្នន័យ DNA ជាតិ ដែល​បាន​បង្កើត​ឡើង​ក្នុង​គោល​បំណង​ប្រឆាំង​ការ​ជួញ​ដូរ​មនុស្ស»។

ការ​ជួញ​ក្មេង​ទាំង​នេះ គឺជា​បញ្ហា​ដ៏​ធ្ងន់​ធ្ងរ​មួយ​នៅ​ចិន​ដែល​គេ​បាន​ចោទ​ទៅ​លើ​គោល​នយោ​បាយ​«មាន​កូន​តែ​មួយ​»​ដ៏​តឹង​រ៉ឹង​ដែល​បាន​ដាក់​ប្រាក់​ធានា​ភ័យ​លើ​ទារក​។

មន្ត្រី​អនុវត្ត​ច្បាប់​កម្រិត​ខ្ពស់​នៅ​ក្នុង​ខេត្ត​ហ្វូជាន លោក វ៉ាង ស៊ីចាង​បាន​ថ្លែង​ថា ប្រាក់​កម្រៃ​ដ៏​ច្រើន​បាន​ជំរុញ​ឲ្យ​មាន​ពាណិជ្ជកម្ម​។

លោក វ៉ាង ត្រូវ​បាន​ស្រង់​សម្ដី​ដូច​ដែល​បាន​និយាយ​ថា ក្មេង​ប្រុស​មាន​សុខភាព​ល្អ​ម្នាក់​ដែល​គេ​ទិញ​ត្រឹម​តម្លៃ​៤.៨១០​ដុល្លារ​នៅ​ក្នុង​ខេត្ត​ក្រីក្រ​ដូចជា​ខេត្ត​យុន​ណាន​ជា​ដើម​អាច​លក់​បាន​ចំនួន​ពី​៩ម៉ឺន​ទៅ​១០​ម៉ឺន​ដុល្លារ​នៅ​ក្នុង​ខេត្ត​អ្នក​មាន​ដូច​ជា​ខេត្ត​ហ្វូជាន​និង​ក្វាងទុង​ជា​ដើម​៕ PN