Headlines:

ក្រិក​​អនុ​ម័ត​ផែន​ការ​ត្បិត​ត្បៀត​បន្ថែម ​ផ្គើន​​​ការ​តវ៉ា​



121109_18d
លោក​សាម៉ារ៉ាស់ ចាប់​ដៃជាមួយ​រដ្ឋ​មន្ត្រីហិរញ្ញវត្ថុ បន្ទាប់​ពីការ​បោះឆ្នោត។ Reuters

ក្រុង​អាថែនៈរដ្ឋា​ភិបាល​ក្រិក​បាន​បោះ​ឆ្នោត​ឈ្នះ​ក្នុង​គម្លាត​តែ​បន្តិច​កាល​ពី​ថ្ងៃ​ព្រហស្បតិ៍​ដើម្បី​អនុ​ម័ត​កញ្ចប់​ត្បិត​ត្បៀត​មួយ​ដែល​គេ​ត្រូវ​ការ​ដើម្បី​ទទួល​បាន​ជំនួយ​សំខាន់ និង​បញ្ចៀស​ការ​ក្ស័យ​ធន​ថ្វី​បើ​ជម្លោះ​ផ្ទៃ​ក្នុង​មួយ និង​ការ​តវ៉ា​ដោយ​ហិង្សា​នៅ​ឯ​ខ្លោង​ទ្វារ​សភា​ក្តី។

សមា​ជិក​សភា​បាន​អនុ​ម័ត​ការ​កាត់​បន្ថយ​ចំណាយ ការ​ដំឡើង​ពន្ធ និង​វិធាន​ការ​នានា​ដែល​ធ្វើ​ឲ្យ​កាន់​តែ​ងាយ​ស្រួល​ក្នុង​ការ​ជួល និង​បណ្តេញ​កម្មករ​បន្ទាប់​ពី​ពល​រដ្ឋ​ក្រិក​ជិត​១០​ម៉ឺន​នាក់​គ្រវី​ទង់​ជាតិ និង​បាន​ស្រែក​ព្រម​ៗ​គ្នា​ថា​«ប្រយុទ្ធ!​ពួក​គេ កំពុង​តែ​ជញ្ជក់​ឈាម​យើង​ហើយ​!​»​បាន​មក​ដល់​ទី​លាន​Syntagma​នៅ​កណ្តាល​ក្រុង​អាថែន​។

ថ្វី​បើ​មិន​មាន​សំឡេង​ឆ្នោត​ពី​ដៃ​គូ​កាន់​អំណាច​តូច​របស់​ពួក​គេ​គឺ​បក្ស​ប្រជា​ធិបតេយ្យ​ឆ្វេង​ក៏​ដោយ ក៏​បក្ស​ប្រជា​ធិបតេយ្យ​ថ្មី​របស់​លោក​នាយក​រដ្ឋ​មន្រ្តី អាន់​តូនីស សាម៉ារ៉ាស់ និង​បក្ស​សម្ព័ន្ធ​មិត្ត​PASOK​សង្គម​និយម​បាន​អនុ​ម័ត​សេចក្តី​ព្រាង​ច្បាប់​ដែល​មាន​៥០០​ទំព័រ​បន្ទាប់​ពី​ពាក់​កណ្តាល​អាធ្រាត្រ​។

ពួក​គេ ប្រមូល​បាន​១៥៣​សំឡេង​ក្នុង​ចំណោម​អាសនៈ​៣០០នៅ​ក្នុង​សភា​ដោយ​បក្ស​ប្រជា​ធិបតេយ្យ​ថ្មី និង​បក្ស​PASOK បណ្តេញ​តំណាង​រាស្រ្ត​៧​រូប​ពី​តំណែង​របស់​ពួក​គេ​ដោយ​សារ​តែ​មិន​គាំទ្រ​វិធាន​ការ​នេះ​។ សេចក្តី​ព្រាង​ច្បាប់​នេះ​រួម​មាន​វិធាន​ការ​ត្បិត​ត្បៀត​១៧​,២​ពាន់​លាន​ដុល្លារ​ដែល​រដ្ឋា​ភិបាល ត្រូវ​គេ​រំពឹង​ថា​នឹង​ដាក់​ឆ្លង​សភា​នៅ​ថ្ងៃ​អាទិត្យ​។

កាល​ពី​ក្បាល​ព្រលប់​ការ​ប៉ះ​ទង្គិច​គ្នា​បាន​ផ្ទុះ​ឡើង​នៅ​ពេល​ដែល​ក្រុម​អ្នក​តវ៉ា​មួយ​ក្តាប់​តូច បាន​ព្យាយាម​ទម្លុះ​របាំង​មួយ​ដើម្បី​ចូល​សភា​។ ប៉ូលិស​បាន​ឆ្លើយ​តប​ដោយ​ឧស្ម័ន​បង្ហូរ​ទឹក​ភ្នែក​គ្រាប់​បែក​ភ្លើង និង​កាណុង​ទឹក នៅ​ក្នុង​ការ​តវ៉ា​ប្រឆាំង​ការ​ត្បិត​ត្បៀត​មួយ​នៅ​ទី​នេះ។

នៅ​ខាង​ក្នុង​សភា ក៏​មាន​ភាព​ចលា​ចល​ផង​ដែរ​ដោយ​បុគ្គលិក​សភា​បាន​ដើរ​ចេញ​ពី​សម័យ​ប្រជុំ​មួយ​រយៈ​ពេល​ខ្លី​នៅ​ពេល​ពួក​គេ​ដឹង​ថា ប្រាក់​ខែ​ពួក​គេ​ត្រូវ​បាន​កាត់​៕ ​NR