Headlines:

កូដ​កម្ម​ប្រឆាំង​នឹង​ការ​សន្សំ​សំចៃ​ផ្ទុះ​នៅ​អឺរ៉ុប​ខាង​ត្បូង



121115_18c
សមាជិក​សហជីពបិទ​ផ្លូវនៅ​ក្រុង​បាសេឡោន ក្នុង​កូដ​កម្ម​​​ទូ​ទៅ។ Reuters

ក្រុង​ម៉ា្រឌីដ/លីស្បោន​: បុគ្គលិក​កម្មករ​អេស្ប៉ាញ​និង​ព័រ​ទុយ​ហ្គាល់​រាប់​លាន​នាក់ បាន​ចូល​រួម​ធ្វើ​កូដ​កម្ម​ទូទៅ​ដំបូង​មួយ នៅ​ទូទាំង​ឧប​ទ្វីប​អ៊ី​បេរី កាល​ពី​ថ្ងៃ​ពុធ​ដោយ​បិទ​ការ​ដឹក​ជញ្ជូន​ផ្អាក​ជើង​ហោះ​ហើរ​និង​បិទ​សាលា​រៀន​ដើម្បី​តវ៉ា​ប្រឆាំង​នឹង​ការ​កាត់​បន្ថយ​ចំណាយ​និង​ការ​ដំឡើង​ពន្ធ។

សហ​ជីព​នៅ​ក្រិក​និង​អ៊ីតាលី​ក៏​ឈប់​ធ្វើ​ការ​និង​ធ្វើ​បាតុ​កម្ម​នៅ​ថ្ងៃ​«ទិវា​សកម្ម​ភាព​និង​សាម​គ្គី​ភាព​អឺរ៉ុប​»​ប្រឆាំង​នឹង​គោល​នយោ​បាយ​ត្បិត​ត្បៀត​ដែល​ក្រុម​មេ​ដឹក​នាំ​សហ​ជីព​បាន​ស្ដី​បន្ទោស​ពី​បទ​អូស​បន្លាយ​និង​ធ្វើ​ឲ្យ​វិបត្តិ​សេដ្ឋ​កិច្ច​នៅ​ឧប​ទ្វីប​នេះ​កាន់​តែ​អាក្រក់​។

ប៉ូលិស​អេស្ប៉ាញ បាន​ចាប់​ខ្លួន មនុស្ស​៣២​នាក់​តាំង​ពី​ព្រលឹម ខណៈ​ការ​វាយ​តប់​គ្នា​កើត​មាន​នៅ តាម​បង្កាន់​ដៃ​ដែក។ ការ​ប្រើ​ភ្លើង​បាន​ធ្លាក់​ចុះ ១១% ខណៈ​រោង​ចក្រ​ទាំង​ឡាយ​បិទ​ការ​ផលិត។ រថភ្លើង​ព័រទុយហ្គាល់​ស្ទើរ​តែ​មិន​រត់ ហើយ​មេត្រូ ត្រូវ​បាន​បិទ។

ប្រធាន​សហ​ជីព​កម្មករ​ទូទៅ UGT លោក​កាន់​ឌី​ដូ ម៉េន​ដេស បាន​និយាយ​ថា​៖ «យើង​កំពុង​ធ្វើ​កូដកម្ម​ដើម្បី​បញ្ឈប់​គោល​នយោបាយ​ធ្វើ​អត្ត​ឃាត​ទាំង​នេះ»។

ប្រធាន​សហ​ជីព Comisiones Obreras​ដ៏​ធំ​បំផុត​នៅ​អេស្ប៉ាញ​លោក​ហ្វឺរ​ណាន់​ដូ តូសូ​បាន​ថ្លែង​ថា ការ​សម្រប​សម្រួល​ពី​អន្តរ​ជាតិ​បង្ហាញ​ថា​៖ «​យើង​កំពុង​បង្កើត​ពេល​វេលា​ជា​ប្រវត្តិ​សាស្ត្រ​មួយ​នៅ​ក្នុង​ចលនា​សហ​ភាព​អឺរ៉ុប​»​។

អេស្ប៉ាញ​ដែល​កម្មករ​ម្នាក់​ក្នុង​ចំណោម​បួន​នាក់​គ្មាន​ការ​ងារ​ធ្វើ​ពេល​នេះ​កំពុង​ស្ទាក់​ស្ទើរ​ក្នុង​ការ​អំពាវ​នាវ​សុំ​កញ្ចប់​ថវិកា​សង្គ្រោះ​ពី​អឺរ៉ុប​ដោយ​លោក​នាយក​រដ្ឋ​មន្ត្រី​ម៉ារីយ៉ា​ណូ​រ៉ាចយ ព្យាយាម​បញ្ចប់​ការ​ជួយ​សង្គ្រោះ​ដែល​អាច​តម្រូវ​ឲ្យ​មាន​ការ​កាត់​បន្ថយ​ថវិកា តាម​អឺរ៉ុប​កាន់​តែ​ច្រើន។

កំហឹង​កាន់​តែ​ឆាប​ឆេះ​ឡើង​ចាប់​តាំង​ពី​សប្ដាហ៍​មុន​នៅ​ពេល​ដែល​ស្ត្រី​អេស្ប៉ាញ​ម្នាក់​បាន​លោត​ពី​លើ​ផ្ទះ​ល្វែង​សម្លាប់​ខ្លួន ខណៈ​មន្ត្រី តម្រួត​បាន​ព្យាយាម​បណ្ដេញ​នាង​ចេញ​នៅ​ពេល​ធនា​គារ​នាង បាន​ប្ដឹង​រឹប​អូស​ទូទាត់​នឹង​ប្រាក់​កម្ចី​។ ពល​រដ្ឋ​អេស្ប៉ាញ​បាន​ខឹង​សម្បា​ខ្លាំង​ចំពោះ​ធនាគារ​ដែល​កំពុង​ត្រូវ​គេ​ជួយ​សង្គ្រោះ​ជា​មួយ​សាច់​ប្រាក់​សាធារណៈ​ខណៈ​ពល​រដ្ឋ​សាមញ្ញៗ​រង​គ្រោះ។

លោក សាន់​ត្រា​ហ្គុង​សា​ឡេស​អាយុ​១៩​ឆ្នាំ​ជា​និស្សិត​ផ្នែក​កិច្ចការ​សង្គម​ដែល​ដើរ​ក្បួន​ជា​មួយ​ក្រុម​មិត្ត​ភក្ដិ​និង​អ្នក​តវ៉ា​រាប់​ពាន់​នាក់​ទៀត​បាន​និយាយ​ឲ្យ​ដឹង​ថា៖ «​យើង​កំពុង​ធ្វើ​ការ​តវ៉ា​ព្រោះ​ពួក​គេ​កំពុង​ព្រងើយ​នឹង​សិទ្ធិ​របស់​ពលរដ្ឋ​។ ពល​រដ្ឋ​កំពុង​ត្រូវ​គេ​បណ្ដេញ​ចេញ​ហើយ​ពួក​គេ​កំពុង​តែ​ដំឡើង​ពន្ធ​ដារ​»៕ PN