Headlines:

ការ​ដើរ​ក្បួន​ប្រឆាំង​ការ​សន្សំ​សំចៃ​ក្លាយ​ជា​ហិង្សា​ទូ​ទាំង​អឺរ៉ុប​ខាង​ត្បូង​



121116_19a
ក្រុម​អ្នក​តវ៉ា​ព័រទុយហ្គាល់ ប៉ះ​ទង្គិច​គ្នា​ជាមួយក្រុម​ប៉ូលិស ដែល​ការពារ​សភា ក្នុង​ពេល​កូដកម្ម​២៤​ម៉ោង​​។ Reuters

ក្រុង​ម៉ា្រឌីដ/​លីស្បោនៈ បាតុ​កម្ម​ជា​ច្រើន បាន​ក្លាយ​ជា​ហិង្សា​នៅ​អេស៉្បាញ និង​ព័រ​ទុយ​ហ្គាល់ បន្ទាប់​ពី​មនុស្ស​រាប់​លាន​នាក់​បាន​ចូល​រួម​ក្នុង​កូដ​កម្ម​ទូទៅ​មួយ​ដែល​ភាគ​ច្រើន​ដោយ​សន្តិ​វិធី​កាល​ពី​ថ្ងៃ​ពុធ​នៅ​ក្នុង​បញ្ហា​ប្រឈម​ទូទាំង​អឺរ៉ុប​ធំ​បំផុត​របស់​សហ​ជីព​ដែល​មាន ការ​រៀប​ចំ​ចំពោះ​គោល​នយោ​បាយ​សន្សំ​សំចៃ​ចាប់​តាំង​ពី​វិបត្តិ​បំណុល បាន​ចាប់​ផ្តើម​កាល​ពី​បី​ឆ្នាំ​មុន​។

នៅ​ក្រុង​លីស្បោន ការ​ដើរ​ក្បួន​បាន​បញ្ចប់​ជា​មួយ​អំពើ​ហិង្សា​មួយ កម្រិត​ដែល​គេ​មិន​ធ្លាប់​ជួប​ចាប់ តាំង​ពី​វិបត្តិ​នេះ​បាន​ចាប់​ផ្តើម​ដោយ​ប៉ូលិស​តាម​វាយ​ដំ​ក្រុម​បាតុករ​ដែល​បាន​គប់​ដុំ​ថ្ម និង​ដប​ដោយ​ធ្វើ​ឲ្យ​មនុស្ស​ជិត​៥០​នាក់ ត្រូវ​បាន​រង​របួស​។

ក្រុម​អ្នក​តវ៉ា​នៅ​ក្នុង​ក្រុង​ម៉ា្រ​ឌីដ បាន​ដុត​ធុង​សំរាម​ធ្វើ​ឲ្យ​មហា​វិថី​កណ្តាល​ក្រុង​ពោរ​ពេញ​ទៅ​ដោយ​ផ្សែង រី​ឯ​បាតុករ​នៅ​ក្រុង​បាសេឡូន​វិញ បាន​ដុត​រថយន្ត​ប៉ូលិស​។

ប៉ូលិស​ប្រឆាំង​កុប​កម្ម​បាន​បាញ់​គ្រាប់​កាំ​ភ្លើង​កៅស៊ូ​ដើម្បី​បំបែក​ក្រុម​អ្នក​តវ៉ា​នៅ​ក្នុង​ក្រុង​ទាំង​ពីរ​ជា​ទី​ដែល​មនុស្ស​ជាង​១៤០​នាក់ ត្រូវ​ចាប់​ខ្លួន ដែល​ក្នុង​នោះ​ប៉ូលិស​និយាយ​ថា​មាន​ពីរ​នាក់​កំពុង​កាន់​សម្ភារ​ផលិត​គ្រឿង​ផ្ទុះ រី​ឯ​៧០​នាក់​ផ្សេង​ទៀត ត្រូវ​គេ​រាយការណ៍​ថា​រង​របួស​។

ជើង​ហោះ​ហើរ​រាប់​រយ​ត្រូវ​បាន​គេ​លុប​ចោល សាលា​រៀនទាំង​ឡាយ​ត្រូវ​បិទ​ទ្វារ រោង​ចក្រ​នានា គាំង​ស្តូក​ពុំ​មាន​សកម្ម​ភាព​ហើយ​រថភ្លើង ស្ទើរ​តែ​មិន​ដំណើរ​ការ​នៅ​អេស្ប៉ាញ និង​ព័រទុយ​ហ្គាល់ ជា​ទី​ដែល​សហ​ជីព​បាន​ធ្វើ​កូដ​កម្ម​ទូទៅ​រួម​លើក​ដំបូង​របស់​ពួក​គេ​។​កូដ​កម្ម​មិន​ព្រម​ធ្វើ​ការ​ងារ​នៅ​ឯ​ប្រទេស​បែលហ្ស៊ិក​បាន​រំខាន​ដល់​សេវាកម្ម​ផ្លូវ​ដែក​អន្តរ​ជាតិ​។

ក្រុម​បុគ្គលិក​កម្មករ ក៏​បាន​តវ៉ា​នៅ​ក្នុង​ប្រទេស​ក្រិក និង​បារាំង​ដែរ ដោយ​ប្រឆាំង​នឹង​គោល​នយោបាយ​សន្សំ​សំចៃ​ដែល​បាន​ធ្វើ​ឲ្យ​ខូច​ខាត​សេដ្ឋ​កិច្ច​ធ្ងន់​ធ្ងរ និង​បាន​ធ្វើ​ឲ្យ​អត្រា​គ្មាន​ការ​ងារ​ធ្វើ​ដ៏​ច្រើន​កាន់​តែ​អាក្រក់​។

ប៉ុន្តែ​បណ្តា​បាតុ​កម្ម​ដែល​រៀប​ចំ​ដោយ​សហ​ព័ន្ធ​សហជីព​អឺរ៉ុប​នេះ ហាក់​មិន​បាន​បង្ខំ​រដ្ឋា​ភិបាល​ដែល​រង​សម្ពាធ​ខ្លាំង​ឲ្យ​ផ្លាស់​ប្តូរ​យុទ្ធ​សាស្រ្ត​កាត់​បន្ថយ​ការ​ចំណាយ​របស់​ពួក​គេ​ទេ។

ប្រធាន​សហ​ជីព​ធំ​បំផុត​របស់​អេស្ប៉ាញ​ឈ្មោះ Comisiones Obreras លោក​ហ្វើ​ណាន់​ដូ តូ​សូ បាន​ប្រាប់​ហ្វូង​មនុស្ស​នៅ​ទី​លាន កូឡំ​បាស់​កណ្តាល​ក្រុង​ម៉ា្រឌីដ​ថា​៖​«​ក្នុង​វិធាន​ការ​សន្សំ​សំចៃ មាន​តែ​ការ​ធ្លាក់​ចុះ​នូវ​សេដ្ឋ​កិច្ច និង​ការ​គ្មាន​ការ​ងារ​ធ្វើ​តែ​ប៉ុណ្ណោះ​»​។

សូម្បី​តែ​បុគ្គលិក​កម្មករ​មិន​នៅ​ក្នុង​សហជីព​ក៏​បាន​ចូល​រួម​ការ​តវ៉ា និង​ការ​ដើរ​ក្បួន​ទាំង​នេះ​ផង​ដែរ​។

លោក Mariluz Gordillo វ័យ​៤២​ឆ្នាំ​ប្រតិបត្តិករ​ទូរស័ព្ទ​នៅ​ហាង​El Corte Ingles​នៅ​ក្រុង​ម៉ា្រឌីដ ដែល​មិន​មែន​ជា​សមាជិក​សហជីព​បាន​និយាយ​ថា​៖«​រឿង​នេះ​គឺ​មិន​មែន​នយោ​បាយ​ឬ​សហជីព​ទេ​។ នេះ​គឺជា​រឿង​សង្គម​និង​សេដ្ឋ​កិច្ច​។ ប្រសិន​បើ​យើង​ត្រូវ​បិទ​ប្រទេស​នេះ យើង នឹង​អាច​បញ្ចប់​វា​បាន​»​។

នៅ​ក្រុង​រ៉ូម ការ​វាយ​តប់​គ្នា បាន​កើត​ឡើង​រវាង​ក្រុម​ប៉ូលិស​ក្នុង​ឯក​សណ្ឋាន​បង្ក្រាប​កុប​កម្ម និង​ក្រុម​បាតុករ ដែល​បាន​គប់​ដុំ​ថ្ម ដប និង​កាំ​ជ្រួច​បុណ្យ​។ បាតុករ​ប្រមាណ​ជា​៦០​នាក់ ត្រូវ​បាន​គេ​ឃុំ​ខ្លួន​។ ក្រុម​អ្នក​តវ៉ា បាន​ចូល​កាន់​កាប់​ប៉ម​Leaning Tower ដែល​សង់​ក្នុង​មជ្ឈិម​សម័យ​នៅ​ក្រុង​ពីសា រយៈ​ពេល​មួយ​ម៉ោង​ដោយ​បាន​ព្យួរ​បដា​ដែល​សរសេរ​ថា​«​ក្រោក​ឡើង​។ យើង​នឹង​មិន​សង​បំណុល​របស់​អ្នក​ជំនួស​អ្នក​ទេ​»​។

យោង​តាម​តួលេខ​ដែល​គេ​ចេញ​ផ្សាយ​កាល​ពី​ថ្ងៃ​ពុធ​ឲ្យ​ដឹង​ថា​នៅ​ព័រ​ទុយ​ហ្គាល់​និង​ក្រិក ដែល​ប្រទេស ទាំង​ពីរ​សុទ្ធ​តែ​ត្រូវ​បាន​គេ​សង្គ្រោះ​ជា​មួយ​មូល​និធិ​អឺរ៉ុប និង​ក្រោម​កម្ម​វិធី​សន្សំ​សំចៃ​តឹង​រ៉ឹង ការ​ធ្លាក់​ចុះ​នៃ​សេដ្ឋ​កិច្ច​បាន​ដុន​ដាប​ខ្លាំង​ក្នុង​ត្រី​មាស​ទី​បី ។

អត្រា​គ្មាន​ការ​ងារ​ធ្វើ​នៅ​ព័រ​ទុយ​ហ្គាល់ បាន​ឡើង​ដល់​១៥,៥​ភាគ​រយ​ពុំ​ធ្លាប់​មាន​ពី​មុន​មក​រី​ឯ​នៅ​អេស៉្បាញ​វិញ​ក្នុង​ចំណោម​៤នាក់​ម្នាក់​គ្មាន​ការ​ងារ​ធ្វើ​។

ទិន្ន​ផល​សេដ្ឋ​កិច្ច​ក្រិក បាន​ធ្លាក់​ចុះ​៧,២​ភាគ​រយ​លើ​មូល​ដ្ឋាន​ប្រចាំ​ឆ្នាំ​ក្នុង​ត្រី​មាស​ទី​បី​ខណៈ​រដ្ឋ​ដែល​វ័ណ្ឌក​ដោយ​សារ​បំណុល​នេះ បាន​ដើរ​យ៉ាង​លំបាក ឆ្ពោះ​ទៅ​កាន់​វិបត្តិ​សេដ្ឋកិច្ច​ឆ្នាំ​ទី​៦​។

មនុស្ស​ស្ទើរ​តែ​២៦​លាន​នាក់ អត់​ការ​ងារ​ធ្វើ​នៅ​ក្នុង​សហ​ភាព​អឺរ៉ុប​ខណៈ​រដ្ឋា​ភិបាល​ជា​ច្រើន​កាត់ បន្ថយ​ការ​ចំណាយ​រដ្ឋ​។

ម្ចាស់​ហាង​គ្រឿង​រឹង​កុំព្យូទ័រ​នៅ​ក្រុង​បាសេ​ឡូន លោក​អេស្តេ​បាន កេសាដា វ័យ​៥៨​ឆ្នាំ បាន​និយាយ ថា៖ «គ្រប់​យ៉ាង​បាន​ផ្លាស់​ប្តូរ​ប្រាក់​បាន​បញ្ចប់​ជាមួយ​អ្នក​មាន អំណាច ហើយ​ប្រជាជន​គ្មាន​អ្វី​ទាំង​អស់។ ហេតុ​អ្វី​រឿង​នេះ​កើត​មាន​ឡើង»។

នៅ​ទូទាំង​អឺរ៉ុប​ខាង​ត្បូង បណ្តា រដ្ឋា​ភិបាល​កំពុង​ព្យាយាម​នាំ​យក ហិរញ្ញវត្ថុ​រដ្ឋ​ត្រឡប់​មករក​ផ្លូវ​ត្រូវ​វិញ​បន្ទាប់​ពី​ការ​ចំណាយ​ច្រើន​ហួស​ជា​ច្រើន​ឆ្នាំ។ ព័រទុយហ្គាល់​និង​ក្រិក​បាន​កាត់​បន្ថយ​ប្រាក់​ចូល​និវត្តន៍ ហើយ​អេស្ប៉ាញ​បាន កាត់​បន្ថយ​ប្រាក់​ឈ្នួល​ផ្នែក​រដ្ឋ​និង ការ​ចំណាយ​លើ​មន្ទីរ​ពេទ្យ និង សាលារៀន។ អ៊ីតាលី និង​បារាំង​ក៏​ស្ថិត​ក្រោម​សម្ពាធ ឲ្យ​គ្រប់​គ្រង​ឱន​ភាព​ថវិកា​របស់​ពួក​គេ​ដែរ៕ ​NR/IN