Headlines:

ពល​រដ្ឋ​អៀរ​ឡង់​រាប់​ពាន់​តវ៉ា​​​ប្រឆាំង​នឹង​​ច្បាប់​រំលូត​កូន​



ក្រុង​ឌាប់ប្ល៊ីន​: មនុស្ស​រាប់​ពាន់​នាក់​បាន​ជួប​ជុំ​គ្នា​នៅ​ខាង​ក្រៅ​សភា​អៀរ​ឡង់​កាល​ពី​ថ្ងៃ​ពុធ​ដើម្បី​ទាម​ទារ​ឲ្យ​គេ​បន្ធូរ​បន្ថយ​ច្បាប់​រំលូត​កូន​ដ៏​តឹង​រ៉ឹង​បន្ទាប់​ពី​ស្ត្រី​ឥណ្ឌា​មាន​គភ៌​ម្នាក់​ដែល​គេ​បដិសេធ​មិន​ឲ្យ​រំលូត​កូន​ជា​ច្រើន​លើក​ច្រើន​សា បាន​ស្លាប់​នៅ​ក្នុង​មន្ទីរ​ពេទ្យ​អៀរ​ឡង់​មួយ។

នាង​សាវីតា​ហាឡាប​ផាណា​វ៉ារ​អាយុ​៣១​ឆ្នាំ​ដែល​បាន​ចូល​ព្យាបាល​ក្នុង​មន្ទីរពេទ្យ​សាកល​វិទ្យាល័យ​Galway នៅ​ភាគ​ខាង​លិច​អៀរ​ឡង់​កាល​ពី​ខែ​មុន​បាន​ស្លាប់​ដោយ​សារ​ការ​ធ្លាក់​ឈាម​មួយ​សប្ដាហ៍​បន្ទាប់​ពី​ការ​រំលូត​កូន​អាយុ​១៧​សប្ដាហ៍​របស់​នាង។

ស្វាមី​នាង​បាន​ប្រាប់​ប្រព័ន្ធ​ផ្សព្វ​ផ្សាយ​រដ្ឋ RTE​ថា សំណើ​ដដែលៗ​របស់​នាង​សុំ​រំលូត​កូន ត្រូវ​បាន​គេ​បដិសេធ​ដោយ​សារ​តែ​គភ៌​មាន ចង្វាក់​បេះ​ដូង​ទៅ​ហើយ​។

មនុស្ស​យ៉ាង​តិច​២​ពាន់​នាក់​បាន​ជួប​ជុំ​គ្នា​សម្រាប់​ពិធី​អុជ​ទៀន​បួង​សួង​ដើម្បី​ទាម​ទារ​ឲ្យ​រដ្ឋាភិបាល​ធ្វើ​ច្បាប់​ដើម្បី​បិទ​ចន្លោះ​ប្រហោង​ច្បាប់​ដែល​មិន​ច្បាស់​លាស់​នៅ​ពេល​ការ​គំរាម​ដល់​អាយុ​ជីវិត​ស្ត្រី​មាន​គភ៌​ម្នាក់​ត្រូវ​ផ្ដល់​យុត្តិ​កម្ម​ច្បាប់​សម្រាប់​ការ​រំលូត​កូន​។

នាង​អេមើរ ម៉ាក់​ណាល្លី វ័យ​៣៣ឆ្នាំ ជាស្ត្រី​មាន​គភ៌​៦​ខែ​បាន​និយាយ​ថា៖ «​ប្រតិ​កម្ម​របស់​ខ្ញុំ​គឺ​ខឹង​ណាស់​។ អាម៉ាស់​ណាស់ ដែល​រឿង​នេះ​បាន​កើត​ឡើង​នៅ​ក្នុង​ប្រទេស ខ្ញុំ​។ វា​គួរ​ឲ្យ​ខ្លាច​ដែល​គិត​ថា​ការ​ព្យា​បាល​បែប​វេជ្ជ​សាស្ត្រ​ត្រូវ​បាន​គេ​បដិសេធ​នោះ​»។

ដំណឹង​មរណភាព​របស់​នាង​ហា ឡាប​ផាណា​វ៉ារ បង្ក​ឲ្យ​មាន​រលក កំហឹង​តាម​ប្រព័ន្ធ​ផ្សព្វ​ផ្សាយ​សង្គម អៀរ​ឡង់​ដោយ​មនុស្ស​ជាង​៥ម៉ឺន​នាក់ បាន​ចូល​រួម​រំលែក​ទុក្ខ​ក្នុង​អត្ថបទ​ធំ​របស់​កាសែត​។

ការ​រំលូត​កូន​នៅ​តែ​ជា​បញ្ហា​មិន​ចុះ​សម្រុង​គ្នា​បំផុត​នៅ​អៀរ​ឡង់​ជា​ប្រទេស​និកាយ​រ៉ូម៉ង់​កាតូលិក​ភាគ​ច្រើន​ដែល​មាន​ច្បាប់​តឹង​រ៉ឹង​បំផុត​ខ្លះក្នុង​ពិភព​លោក​អំពី​ការ​រំលូត​កូន​បែប​វេជ្ជ​សាស្ត្រ​៕ PN