Headlines:

អ៊ីរ៉ង់​ឲ្យ​​​សភា​បញ្ឈប់​ការ​​​​សួរ​ប្រឆាំង​ប្រធានាធិបតី​



121123_18a
ប្រធានាធិបតី​អ៊ីរ៉ង លោក​អះ​ម៉ាឌីនេចាដ លើក​ដៃ​ជាសញ្ញាជោគជ័យ ពេល​ទស្សនកិច្ច​ប្រទេ​សឥណ្ឌូនេស៊ី កាលពី​ថ្ងៃទី៩ វិច្ឆិកា។ Reuters

ក្រុង​តេអេរ៉ង់ៈ យោង​តាម​ទី​ភ្នាក់​ងារ​ព័ត៌​មាន​ក្នុង​ស្រុក​មួយ​ឲ្យ​ដឹង​ថា​មេ​ដឹកនាំ​កំពូល​អ៊ីរ៉ង់ បាន​បញ្ជា​ឲ្យ​សភា​បញ្ចប់​ការ​ចោទ​សួរ​លោក​ម៉ះមូដ​អះម៉ាឌីនេចាដ ជុំ​វិញ​ធ្លាក់​ចុះ​រូបិយប័ណ្ណ និង​វិបត្តិ​សេដ្ឋកិច្ច​ជាតិ។

ទី​ភ្នាក់​ងារ​ព័ត៌មាន IRNA បាន​និយាយ​កាល​ពី​ថ្ងៃ​ពុធ​ថា​លោក អាយ៉ា​តូ​ឡះ​អាលី ខា​ម៉េ​ណី​បព្វ​ជិត​វ័យ​៧៣​ឆ្នាំ​ដែល​កាន់​អំណាច​កំពូល​បាន​សម្តែង​កង្វល់​ថា​ការ​ចោទ​សួរ មុខ​សភា​នោះ នឹង​ផ្តល់​ប្រយោជន៍​ដល់​ក្រុម​សត្រូវ​របស់​អ៊ីរ៉ង់​។

លោក ខា​ម៉េ​ណី និង​លោក អះម៉ាឌីនេចាដ មាន​ការ​ខ្វែង​គំនិត​គ្នា​ជា​ច្រើន​ខែ​ហើយ ហើយ​វា​ហាក់​ដូចជា​ថា ក្រុម​ប្រឆាំង​ក្នុង​សភា​របស់​ប្រធានា​ធិបតី​រូប​នោះ កំពុង​ដើរ​តួ​ក្នុង​នាម​មេ​ដឹក​នាំ​កំពូល នៅ​ពេល​ដែល​ពួក​គេ​បាន​កោះ​ហៅ​លោក​មក​សាក​សួរ​។

នេះ​ជា​លើក​ដំបូង​ក្នុង​ប្រវត្តិ​សាស្រ្ត​ប្រធានា​ធិបតី​របស់​អ៊ីរ៉ង់​ហើយ​ដែល​លោក អះម៉ាឌីនេចាដ ត្រូវ​បាន​គេ​កោះ​ហៅ​មក​សភា​ដើម្បី​សាក​សួរ​កាល​ពី​ខែ​មីនា​។

ប៉ុន្តែ​លោក​អាយ៉ាតុលឡះ ដែល​មាន​សិទ្ធិ​សម្រេច​ចុង​ក្រោយ​លើ​បញ្ហា​រដ្ឋ​ទាំង​អស់ បាន​និយាយ​ថា​៖«​យើង​ទាម​ទារ​ឲ្យ​តំណាង​រាស្រ្ត​ជា​ទី​គោរព​ទាំង​អស់​កុំ​បន្ត​ការ​កោះ​ហៅ​នោះ​»​។

ដោយ​ថ្លែង​សំដៅ​ចំពោះ​លោក​ខាង​លិច មេ​ដឹកនាំ​កំពូល​រូប​នេះ បាន​ថ្លែង​ថា នៅ​ពេល​ដែល​កង្វល់​របស់​សភា​អំពី​សេដ្ឋ​កិច្ច​ជា​រឿង​វិជ្ជ​មាន ការ​ចោទ​សួរ​ប្រធានា​ធិបតី​នៅ​មុខ​ស្ថាប័ន​នេះ​គឺ​«ជា​អ្វី​ដែល​សត្រូវ​ចង់​បាន​»​។

លោក​ខា​ម៉េ​ណី បាន​បន្ត​ថា​៖ «​ប្រទេស​នេះ ត្រូវ​ការ​ភាព​ស្ងប់​ស្ងាត់​។ ក្រុម​អាជ្ញា​ធរ ក៏​ត្រូវ​ការ​វា​ផង​ដែរ​ដើម្បី​ធ្វើ​កិច្ច​ការ​របស់​ពួក​គេ​។ ពល​រដ្ឋ ក៏​ចង់​បាន​សន្តិ​ភាព​ផង​ដែរ​។

សមា​ជិក​សភា​៧៧​រូប ធ្លាប់​បាន​គាំ​ទ្រ​ផែន​ការ​ឈ្លេច​សួរ​លោក អះម៉ាឌីនេចាដ ហើយ​សំណួរ​ជា​ច្រើន ត្រូវ​គេ​រំពឹង​ថា​នឹង​ផ្តោត​លើ​ការ​ធ្លាក់​ចុះ​នូវ​រូបិយប័ណ្ណ​ជាតិ និង​អ្វី​ដែល​ពួក​គេ បាន​និយាយ​ថា ជា​ចំណាត់​ការ​លៃ​លក​មិន​ត្រឹម​ត្រូវ​នូវ​ប្រាក់​ដុល្លារ​ឧបត្ថម្ភ​ដោយ​រដ្ឋា​ភិបាល​ដែល​មាន​កម្រិត​រួម​មាន​ការ​នាំ​ចូល​រថយន្ត​ពី​បរទេស​រាប់​ពាន់​គ្រឿង​ផង​ដែរ​។

ទី​ភ្នាក់​ងារ​ព័ត៌​មាន Mehr បាន​រាយការណ៍​ថា អ្នក​នាំ​ពាក្យ​ម្នាក់​ក្រុម​សមា​ជិក​សភា​នោះ លោក អាវ៉ាស់ ហី ដាពួរ បាន​បញ្ជាក់​ថា​ការ​កោះ​ហៅ​នេះ ត្រូវ​បាន​គេ​ដក​វិញ​បន្ទាប់​ពី​ការ​ស្នើ​សុំ​ពី​លោក​ខាម៉េ​ណី។

ប្រធាន​សភា លោក​អាលី ឡារី​ចានី បាន​ទទួល​ស្គាល់​ការ​ទាម​ទារ​របស់​លោក​ខា​ម៉េណី​ដែល​ថា សភា​មិន​ត្រូវ​បន្ត​ការ​កោះ​ហៅ​មក ចោទ​សួរ​ទៀត​ទេ៕ ​NR