ភ្នំពេញ ប៉ុស្តិ៍
ភ្នំពេញៈ មិនមានមនុស្សច្រើនទេ ដែលស្គាល់ឈ្មោះ Mohammed Bouazizi។
បុរសម្នាក់នេះ ត្រូវបានគេចាត់ទុកថា ជាកាតាលីករ ដែលជំរុញឲ្យមានបាតុកម្មនៅទុយនីស៊ី ដើម្បីបញ្ចប់របបគ្រប់គ្រងផ្តាច់ការរយៈពេល ២៣ឆ្នាំ របស់ បេន អាលី ។ លោក Bouazizi ដែលជាអ្នកលក់ម្ហូបអាហារធម្មតាមួយរូប បានដុតខ្លួនឯង ដើម្បីប្រឆាំងរដ្ឋាភិបាល។ ចលនានេះសាយភាយពាសពេញពិភពអារ៉ាប់ ហើយត្រូវបានគេស្គាល់ថា Arab Spring។ នៅប្រទេសអេហ្ស៊ីប របបគ្រប់គ្រងរយៈពេល៣០ឆ្នាំរបស់លោក ហូស្នី មូបារ៉ាក់ បានឈានដល់ទីបញ្ចប់ ហើយនៅប្រទេសលីបី សង្គ្រាមស៊ីវិលបានធ្វើឲ្យលោក មូម៉ារ កាដាហ្វី ស្លាប់ បន្ទាប់ពីបានដឹកនាំប្រទេសនេះ អស់រយៈពេល៤២ឆ្នាំកន្លងមក។
ការតវ៉ាទាមទារឲ្យមានការផ្លាស់ប្តូរ បានរីកសាយភាយជុំវិញពិភពលោក រាប់បញ្ចូលទាំងនៅប្រទេសយ៉េមេន អាល់ហ្សេរី ស៊ីរី ម៉ារុក អេស្ប៉ាញ ចក្រភពអង់គ្លេស និងថ្មីៗនេះ នៅប្រទេសរុស្ស៊ី។ ការបះបោរ និងផលវិបាកបណ្តាលមកពីការតវ៉ាទាំងនោះ បានធ្វើឲ្យទស្សនាវដ្តី Time ជ្រើសរើស «អ្នកតវ៉ា» ជាបុគ្គលប្រចាំឆ្នាំរបស់ទស្សនាវដ្តីនេះ។
ចលនា កាន់កាប់ទីកន្លែង(Occupy) រាប់បញ្ចូលទាំងចលនាOccupy Wall Street ជាផ្នែកមួយនៃរលកបាតុកម្ម និងការតវ៉ា ដែលកើតមានឡើងជុំវិញពិភពលោក ក្នុងឆ្នាំ២០១១នេះ។
សុភាសិតនយោបាយមួយ បានលើកឡើងឡើង «យើងមាន៩៩ភាគរយ» ទទួលបានភាពពេញនិយមក្នុងចំណោមចលនាយុទ្ធនាការប្រឆាំងវិសមភាព សេដ្ឋកិច្ចសង្គមកិច្ច អត្រាអត់ការងារធ្វើខ្ពស់ ភាពលោភលន់ អំពើពុករលួយ និងអាកប្បកិរិយាគ្មានសីលធម៌ ជាពិសេសធនាគារជាគោលដៅ។
ចលនានេះ បានសង្កត់ធ្ងន់ទៅលើក្តីបារម្ភកាន់តែច្រើនឡើងៗ ទាក់ទងនឹងការបាត់បង់ទំនុកចិត្តរបស់វិនិយោគិនចំពោះប្រព័ន្ធ ហិរញ្ញវត្ថុ និងទីផ្សារ ដែលជាប្រភពចម្បងនៃមូលធនសម្រាប់ការវិនិយោគក្នុងសាជីវកម្ម។
បញ្ហានេះ កំពុងធ្វើឲ្យមនោគមវិជ្ជាអ្នកគាំទ្ររបបមូលធននិយម ប្រឈមនឹងហានិភ័យខ្ពស់។
វដ្តវិលទៅវិលមកមិនចេះចប់មិនចេះហើយ ទាក់ទងនឹងរឿងអាស្រូវក្នុងសាជីវកម្ម ដែលផ្តោតជាសំខាន់លើភាពលោភលន់ ការបន្លំ និងការបោកប្រាស់ កំពុងបង្កឲ្យមានការយល់ឃើញថា រដ្ឋាភិបាល និងអ្នកបង្កើតបទប្បញ្ញត្តិ ខ្វះសមត្ថភាពក្នុងការប្រយុទ្ធប្រឆាំងនឹងបញ្ហានោះ។
បច្ចុប្បន្ន MF Global ដែលជាក្រុមហ៊ុន ដេរ៉េវេទីវ លំដាប់ពិភពលោកមួយ កំពុងស្ថិតក្នុងដំណាក់កាលកំណត់ទឹកប្រាក់ប្រមាណ ១,២ពាន់លានដុល្លារ ជាទុនរបស់អតិថិជន ដែលបាត់បង់។ក្រុមហ៊ុន ប៉ាន់ស្មានខុសចំពោះទិសដៅបំណុលនៅអឺរ៉ុប ដោយប្រើប្រាស់អានុភាពហិរញ្ញវត្ថុ៣០ដង។ បើតាមការយល់ឃើញ ក្រុមហ៊ុននេះ បានប្រើប្រាស់ប្រាក់របស់អតិថិជន ដើម្បីបំពេញការអំពាវនាវដ៏តិចតួចនេះ និងដើម្បីរក្សាសាច់ប្រាក់របស់ក្រុមហ៊ុន។
នៅពេលនោះ អគ្គនាយកក្រុមហ៊ុននេះគឺ លោក Jon Corzine ដែលជាអតីតអគ្គនាយក Goldman Saches និងជាអតីតអភិបាល និងសមាជិកព្រឹទ្ធសភា។ ផ្អែកតាមភស្តុតាងថ្មីៗនេះ មុនពេលសាកសួរ លោក Corizne ឲ្យដឹងថា វាមិនមែនជាបំណងរបស់លោក ក្នុងការរំលោភបំពានវិធានណាមួយឡើយ។
ពីខែតុលា Olympus Corporation ជាក្រុមហ៊ុនផលិតវ៉ែនតារបស់ជប៉ុន បានផ្ទុះរឿងអាស្រូវមួយពេលអគ្គនាយកទើបតែងតាំងថ្មីត្រូវបណ្ដេញចេញ បន្ទាប់ពីលោកបង្ហាញនូវការរៀបចំលាក់បាំងការខាតបង់ដ៏ ច្រើន និងយូរបំផុត នៅក្នុងប្រវត្តិសាស្ត្រសាជីវកម្មរបស់ជប៉ុន។ អ្នកតវ៉ាកំពុងកើនឡើង ខណៈចលនាទទួលបានឥទ្ធិពលកាន់តែច្រើន ហើយភស្តុតាងបង្ហាញពីការផ្លាស់ប្តូរក៏មានកាន់តែច្រើន។ ការស្រោចស្រង់ប្រព័ន្ធហិរញ្ញវត្ថុអាចពឹងផ្អែកបាន បើអ្នកគ្រប់ៗគ្នា ចេះស្តាប់ និងមានឆន្ទៈចង់ស្រោចស្រង់៕CS
