ភ្នំពេញ ប៉ុស្តិ៍
ក្រុមហ៊ុន និងសមត្ថកិច្ចប៉ុនប៉ងបិតបាំងព័ត៌មានបុគ្គលិកក្រុមហ៊ុនម្នាក់ស្លាប់
ភ្នំពេញ៖បុគ្គលិកក្រុមហ៊ុនម្នាក់អាយុ២៧ឆ្នាំត្រូវគេប្រទះឃើញដេកស្លាប់កាលពីថ្ងៃចន្ទ បន្ទាប់ពីបុរសរូបនោះបានចូលរួមស៊ីផឹកជាមួយនឹងមិត្តភក្តិនៅក្នុងខណ្ឌពោធិ៍សែនជ័យរាជធានីភ្នំពេញ។សមត្ថកិច្ចបានអោយដឹងថា អ្នករួមការងារម្នាក់របស់បុរសដែលស្លាប់នោះបានប្រទះឃើញសាកសពនៅក្នុងបន្ទប់ដេករបស់គេនៅក្នុងក្រុមហ៊ុនដែលគេធ្វើការហើយរាយការណ៍មកសមត្ថកិច្ចពីហេតុការណ៍ស្លាប់នោះ។សមត្ថកិច្ចបានទៅពិនិត្យសាកសពតែមិនមានសន្និដ្ឋានពីការស្លាប់នោះទេ។ទាំងក្រុមហ៊ុន និងសមត្ថកិច្ចចង់រក្សាការស្លាប់នោះមិនអោយគេដឹង៕
ដេកយប់ភ្លេចបិតទ្វារក្រុមចោរចូលប្លន់ម៉ូតូ និងគ្រឿងអលង្ការ
ភ្នំពេញ៖បុរសពីរនាក់បានឆ្មក់ចូលផ្ទះមួយកន្លែងប្លន់ម៉ូតូ២គ្រឿងនិងខ្សែកប្លាទីនមួយខ្សែកាលពីយប់ថ្ងៃចន្ទនៅក្នុងខណ្ឌដង្កោរាជធានីភ្នំពេញ។សមត្ថកិច្ចបានអោយដឹងថា ម្ចាស់ផ្ទះម្នាក់អាយុ៤៥ឆ្នាំបានចូលដេកភ្លេចបិទទ្វាររបងផ្ទះ។ពេលនោះចោរ២នាក់មានអាវុធខ្លីមួយដើមបានចូលទៅភ្ជង់ប្លន់យកម៉ូតូ២គ្រឿងពីរជនរងគ្រោះពីរនាក់អាយុ២៥ និង២៦ឆ្នាំ។ពេលនោះមានស្ត្រីម្នាក់ទៀតអាយុ៥៥បានចុះពីលើផ្ទះមកមើលបន្ទាប់ពីឮសំលេងរញ៉េរញ៉ៃហើយត្រូវពួកចោរប្លន់ខ្សែកប្លាទីនមួយខ្សែទំងន់៥ជី។បន្ទាប់មកពួកចោរបានជិះម៉ូតូដែលប្លន់បានម្នាក់មួយរត់គេចខ្លួនបាត់។សមត្ថកិច្ចកំពុងតែស្រាវជ្រាវកំណត់អត្តសញ្ញាណជនសង្ស័យដើម្បីធ្វើការចាប់ខ្លួនបញ្ជូនទៅតុលាការ៕
បងបង្កើតគាស់ផ្ទះប្អូនស្រីលួចទ្រព្យសម្បត្តិផ្គាប់ចិត្តស្រីស្នេហ៍
ភ្នំពេញ៖បុរសអាយុ៣៣ឆ្នាំម្នាក់និងសង្សាររបស់គេត្រូវបានសមត្ថកិច្ចចាប់ខ្លួនកាលពីថ្ងៃសៅរ៍បន្ទាប់ពីប្អូនស្រីរបស់បុរសរូបនោះបានដាក់ពាក្យបណ្តឹងប្តឹងគេពីបទគាស់ផ្ទះលួចទ្រព្យសម្បត្តិនៅក្នុងខណ្ឌពោធិ៍សែនជ័យរាជធានីភ្នំពេញ។សមត្ថកិច្ចបានអោយដឹងថាខណៈពេលដែលប្អូនស្រីរងគ្រោះជាប់រវល់ទៅលេងស្រុកកំណើតឯខេត្តកណ្តាលជនសង្ស័យបានគាស់ផ្ទះរបស់នាងលួចទ្រព្យសម្បត្តិមានទូរទស្សន៍មាសដែលសរុបជាទឹកប្រាក់ចំនួន១៨០ដុល្លាអាមេរិក។បន្ទាប់មកសមត្ថកិច្ចបានចាប់ខ្លួនជនសង្ស័យនិងសង្សាររបស់គេម្នាក់អាយុ២៣ឆ្នាំ។បុរសរូបនោះបានសារភាពថាពិតជាបានធ្វើសកម្មភាពនោះមែនព្រោះគេគ្មានលុយផ្គប់ចិត្តសង្សារបស់គេ៕
បុរសសសៃប្រសាទធ្វើអត្តឃាតរត់ចូលគោយន្តម្ចាស់គោយន្តវន្ត័ក
ប៉ៃលិន៖បុរសមានជំងឺសសៃប្រសាទម្នាក់អាយុ៤១ឆ្នាំត្រូវបានគោយន្តបុកស្លាប់ភ្លាមៗនៅកន្លែងកើតហេតុកាលពីថ្ងៃសៅរ៍នៅលើផ្លូវមួយកន្លែងស្ថិតនៅក្នុងស្រុកសាលាក្រៅខេត្តប៉ៃលិន។សាក្សីម្នាក់អាយុ៥៥ឆ្នាំបានអោយដឹងថា បុរសដែលស្លាប់នោះមានជំងឺសសៃប្រសាទ។គេបានរត់នៅតាមផ្លូវហើយស្រែកថាពិបាកចិត្តណាស់មិនចង់រស់ទេ។បន្ទាប់មកគេបំរុងនឹងរត់ចូលគោយន្តអោយបុកស្លាប់តែត្រូវអ្នកភូមិឃាត់។ក្រោយមកទៀតនៅថ្ងៃដដែលនោះគេបានរត់ចូលគោយន្តដឹកដំឡូងមីមួយគ្រឿង។គោយន្តបានបុកគេនិងកិនក្បាលបុរសរូបនោះបែកស្លាប់ភ្លាមៗនៅកន្លែងកើតហេតុ។សមត្ថកិច្ចបានចុះមកពិនិត្យកន្លែងកើតហេតុហើយទាក់ទងហៅគ្រួសារជនរងគ្រោះមកយកសាកសព។រីឯគោយន្តត្រូវសមត្ថកិច្ចរឹបអូសទុកដោះស្រាយនៅពេលក្រោយ។
ប្រពន្ធប្តឹងប៉ូលិសអោយចាប់ប្តីលាក់កាំភ្លើងនៅផ្ទះ
ភ្នំពេញ៖តុលាការសាលាដំបូងរាជធានីភ្នំពេញបានចោទប្រកាន់បុរសម្នាក់អាយុ៥២ឆ្នាំដាក់ពន្ធាគារកាលពីថ្ងៃចន្ទពីបទកាន់កាប់អាវុធខុសច្បាប់។ហេតុការណ៍ដែលនាំអោយមានការចាប់ខ្លួនបុរសដែលជាអតីតទាហានរូបនោះបញ្ជូនទៅតុលាការគឺដោយសារតែប្រពន្ធរបស់គេបានរាយការណ៍មកសមត្ថកិច្ចពីរឿងប្តីរបស់គាត់បានលាក់កាំភ្លើងទុកនៅក្នុងផ្ទះ។ សមត្ថកិច្ចបានអះអាងថាការរាយការណ៍នោះគឺដោយសារតែប្រពន្ធរូបនោះខឹងនឹងបុរសជាប្តីដែលចុះចោលផ្ទះបន្ទាប់ពីពួកគេឈ្លោះគ្នាកាលពីថ្ងៃទី១៩ខែកមករាឆ្នាំ២០១២នេះ។ជនសង្ស័យបានសារភាពថាខ្លួនបានទិញកាំភ្លើងនោះតម្លៃ២០ដុល្លារពីមន្ត្រីសមត្ថកិច្ចម្នាក់កាលពីឆ្នាំ១៩៩៨។ប៉ុន្តែគេមិនដែលយកវាទៅប្រើប្រាស់ប្រព្រឹត្តបទល្មើសនោះទេគ្រាន់តែទុកវាដើម្បីការពារផ្ទះប៉ុណ្ណោះ៕
ខឹងប្រពន្ធមិនរៀបចំបាយឲ្យស៊ីទាញកាំបិតកាប់ក្បាល
ស្វាយរៀង៖ស្ត្រីអាយុ៣៦ឆ្នាំម្នាក់បានរងរបួសក្បាលយ៉ាងធ្ងន់ធ្ងរបន្ទាប់ពីប្តីរបស់នាងបានកាប់នាងមួយកាំបិតកាលពីថ្ងៃពុធនៅក្នុងស្រុកស្វាយទាប ខេត្តស្វាយរៀងពេលនាងកំពុងតែដេកបំបៅដោះកូនដែលមានជំងឺ។ស្ត្រីរងគ្រោះបាននិយាយនៅពេលកំពុងសម្រាកព្យាបាលនៅឯមន្ទីរពេទ្យថាប្តីនាងជាកម្មករសំណង់ម្នាក់នៅភ្នំពេញ។គាត់បានទៅមើលកូនឈឺតែមិនសូវគិតគូមើលកូនប៉ុន្មាននោះទេគិតតែពីផឹកស្រា។នៅថ្ងៃកើតហេតុនោះប្តីនាងបានចេញពីផ្ទះទាំងព្រលឹមទៅផឹកស្រាជាមួយនឹងអ្នកភូមិ។នាងរៀបចំដាំស្លរួចរាល់ហើយយកកូនទៅពេទ្យដាក់សេរ៉ូមដល់ល្ងាចទើបមកផ្ទះវិញ ប្តីក៏បានមកដល់ផ្ទះដែរ។នៅពេលដែលនាងកំពុងតែដេកបំបៅដោះកូនឈឺស្រាប់តែប្តីកាប់នាង ខឹងទាញកាំបិតតាំងតោចំក្បាលហូរឈាមពេញខ្លួន។ ដៃម្ខាងឱបកូន និងដៃម្ខាងទៀតខ្ទប់ក្បាលដែលបែកស្រែកអោយគេជួយ។អ្នកជិតខាងបានចូលមកឃាត់ហើយរាយការណ៍ទៅប៉ូលិសនិងជួយយកនាងទៅមន្ទីរពេទ្យ។ប៉ូលិសបានឃាត់ខ្លួនប្តីរបស់នាង។ប្តីរូបនោះបានអះអាងថាគេខឹងនឹងប្រពន្ធមិនរៀបចំបាយទឹកអោយគេហូបបែរជាទៅបំបៅកូនធ្វើព្រងើយ។ទោះយ៉ាងណាប៉ូលិសគ្រាន់តែធ្វើការអប់រំបុរសជាប្តីនោះហើយដោះលែងអោយទៅផ្ទះវិញ៕
ប្រចណ្ឌប្តីទៅវាយគេដល់ផ្ទះគេវាយវិញដេកពេទ្យទាំងពីរនាក់
ស្វាយរៀង៖ស្ត្រីម្នាក់អាយុ៣២ឆ្នាំបានរងរបួសពេញខ្លួនបន្ទាប់ពីស្ត្រីអ្នកភូមិជាមួយគ្នាម្នាក់អាយុ៤៧ឆ្នាំបានវាយនាង និងគល់ឬស្សីកាលពីថ្ងៃចន្ទនៅផ្ទះនាងដែលស្ថិតនៅក្នុងស្រុកស្វាយជ្រុំខេត្តស្វាយរៀង។ស្ត្រីរងគ្រោះបានអោយដឹងថា ស្ត្រីម្នាក់នោះបានប្រចណ្ឌនាងជាមួយនឹងប្តីរបស់នាងហើយចេះតែជេរនាងជាច្រើនលើកច្រើនសារតែនាងមិនដែលតនោះទេ។នៅថ្ងៃកើតហេតុស្ត្រីរូបនោះបានមកដល់ផ្ទះរបស់នាងហើយជេរនាងជាខ្លាំង និងបានយកគល់ឬស្សីវាយលើរូបនាងបណ្តាលអោយរបួសក្បាល និងខ្លួន។នាងបានវាយដណ្តើមបានគល់ឬស្សីនោះហើយវាយការពារខ្លួនវិញធ្វើអោយស្ត្រីនោះរបួសដែរ។នាងបានអះអាងថានាងមិនដែលមានទំនាក់ទងស្នេហាជាមួយនឹងប្តីរបស់ស្ត្រីនោះទេព្រោះនាងក៏មានប្តីដែរ។ស្ត្រីទាំងពីរត្រូវបានបញ្ជូនទៅដេកនៅមន្ទីរពេទ្យតែមួយ។ប៉ូលិសកំពុងតែចាត់ការលើរឿងនោះព្រោះភាគីទាំងពីរចោទប្រកាន់គ្នាទៅវិញទៅមក៕
គ្រូមត្តេយ្យម្នាក់ត្រូវម្តាយសិស្សវាយបែកក្បាលរឿងចែកបបរ
ប៉ៃលិន៖អ្នកគ្រូបង្រៀនសាលាមត្តេយ្យម្នាក់អាយុ២១ឆ្នាំត្រូវបានម្តាយសិស្សរបស់នាងម្នាក់អាយុ៤២ឆ្នាំវាយបែកក្បាល នៅនឹងសាលារៀនដែលស្ថិតនៅក្នុងក្រុងប៉ៃលិនខេត្តប៉ៃលិនកាលពីថ្ងៃសុក្រ។អ្នកគ្រូរូបនេះបានអះអាងថាសាលារបស់នាងតែងតែចែកបបរដល់សិស្សសម្រាប់អាហារពេលព្រឹកនៅវេលាម៉ោង៩។នៅថ្ងៃកើតហេតុកូនស្រីរបស់ស្ត្រីរូបនោះមិនបាននៅចាំយកបបរហូបនោះទេដោយបានចេញទៅផ្ទះបាត់។ពេលមកវិញបបរអស់ទៅហើយ។ម្តាយរបស់សិស្សនោះខឹងព្រោះថា មិនចែកបបរអោយកូនរបស់គាត់ហើយបានវាយក្បាលនាងនឹងដងកាំបិតបែកក្បាលហូរឈាម។នាងត្រូវបានគេជួយបញ្ជូនទៅមន្ទីរពេទ្យ។គេមិនដឹងថា អ្នកគ្រូរូបនេះប្តឹងម្តាយសិស្សដែរឬយ៉ាងណានោះទេ៕
វាយគេពីរនាក់រត់ចូលប្រឡាយហែលគេចខ្លួនប៉ូលិសពទ្ធ័ចាប់បំពាក់ខ្នោះដៃ
កំពង់ឆ្នាំង៖ប៉ូលិសខេត្តកំពុងឆ្នាំងបានចាប់ខ្លួនបុរសម្នាក់អាយុ២៥ឆ្នាំកាលពីថ្ងៃពុធបន្ទាប់ពីជនរូបនោះបានវាយគេពីរនាក់នៅក្នុងក្រុងកំពង់ឆ្នាំង។ប៉ូលិលបានអោយដឹងថា ជនសង្ស័យមានទំនាស់ជាមួយនឹងបុរសចំណាស់ម្នាក់ហើយកាប់បុរសរូបនោះនឹងពូថៅហើយរត់គេចខ្លួនបាត់។មួយថ្ងៃក្រោយមកជននោះត្រឡប់ចូលភូមិវិញហើយមានជម្លោះ និងអ្នកភូមិម្នាក់។ពេលនោះគេបានវាយអ្នកភូមិនោះនឹងដំបងឈើមួយហើយបានរត់គេចខ្លួនម្តងទៀត។ជនរងគ្រោះបានប្តឹងមកប៉ូលិស។ប៉ូលិសបានស្រាវជ្រាវរកជនសង្ស័យកំពុងតែលាក់ខ្លួននៅក្នុងភូមិ។ពេលឃើញប៉ូលិសជនសង្ស័យរត់ចូលប្រឡាយបំរ៉ុងហែលគេចខ្លួនប៉ុន្តែត្រូវក្រុមប៉ូលិសពទ្ធ័ចាប់ខ្លួនបានហើយកសាងសំណុំរឿងបញ្ជូនទៅតុលាការ៕
បុរសជាកសិករត្រូវចាប់ខ្លួនបន្ទាប់ពីបាញ់ស្ត្រីម្នាក់បាក់ភ្លៅ
កែប៖បុរសម្នាក់អាយុ៤៨ឆ្នាំត្រូវបានប៉ូលិសចាប់ខ្លួនកាលពីថ្ងៃចន្ទពីបទប៉ុនប៉ងមនុស្សឃាតដោយចេតនាលើស្ត្រីម្នាក់នៅក្នុងក្រុងកែបខេត្តកែប។ប៉ូលិសបានអោយដឹងថា ជនសង្ស័យឈ្លោះគ្នាជាមួយនឹងស្ត្រីរងគ្រោះ។ពេលនោះជនសង្ស័យដែលជាកសិករបានយកកាំភ្លើងអាកាមួយដើមបាញ់ស្ត្រីរងគ្រោះចំភ្លៅហើយរត់គេចខ្លួន។គ្រួសារស្ត្រីរងគ្រោះបានដាក់ពាក្យបណ្តឹងទៅប៉ូលិស។ ប៉ូលិសបានចាប់ខ្លួនជនសង្ស័យរូបនោះបន្ទាប់ពីគេចូលផ្ទះវិញហើយបានកសាងសំណុំរឿងបញ្ជូនជនសង្ស័យទៅតុលាការ៕
ប្រុសស្រី៦នាក់ផឹកស៊ីស្រវឹងបោកចានឆ្នាំងត្រូវបូលិសឃាត់ខ្លួន
បាត់ដំបង៖ មនុស្ស៦នាក់ក្នុងនោះប្រុស៤នាក់ស្រី២នាក់ត្រូវបានប៉ូលិសចាប់ខ្លួនស្ថិតនៅក្រុងបាត់ដំបងកាលពីថ្ងៃចន្ទទី៦កុម្ភៈបន្ទាប់ពីស្រវឹងស្រាដោយបានប្រើអំពើហិង្សា និងបំផ្លាញទ្រព្យសម្បត្តិផ្សេងៗនៅក្នុងហាង។ម្ចាស់ហាងនិយាយថានៅក្នុងថ្ងៃកើតហេតុពួកគេបានមកផឹកស្រាជួបជុំផឹកស៊ីនៅក្នុងហាង។នៅដល់ពួកគេផឹកស្រាស្រវឹងពួកគេបានប្រើអំពើហិង្សាលើភ្ញៀវដើរជេរបង្កការភ័យខ្លាច និងបំផ្លាញរបស់របរដូចជាកែវចានបែកខ្ចេចខ្ចី។ភ្លាមនោះម្ចាស់ហាងបានទូរសព្ទទៅប៉ូលិសបានចាប់ខ្លួនពួកគេយកទៅឃុំមួយយប់។លុះដឹងខ្លួនឡើងពួកេកនៅតែប្រកែកថាមិនបានបោកចានឆ្នាំងនោះទេព្រោះស្រវឹងមិនដឹងខ្លួន។យ់ាងណាក៏ដោយប៉ូលិសបញ្ជូនពួកគេទៅកាន់តុលាការដើម្បីចាត់ការតាមផ្លូវច្បាប់ព្រោះម្ចាស់ហាងផ្តឹងទារសំណងការខូចខាត៕
ចោរម្នាក់ត្រូវពលរដ្ឋពលរដ្ឋព្រួតវាយប៊ិះស្លាប់
ភ្នំពេញ៖ ចោរអាយុ២២ឆ្នាំម្នាក់ត្រូវបានប្រជាពលរដ្ឋព្រួតវាយគ្នាបណ្តាលឲ្យរបួសធ្ងន់បន្ទាប់ពីចោរមួយនេះលួចម៉ូតូរបស់ប្រជាពលរដ្ឋម្នាក់ស្ថិតនៅខណ្ឌសែនសុខរាជធានីភ្នំពេញកាលពីអង្គារ៍ទី៧កុម្ភៈ។ប៉ូលិសនិយាយថា ប្រជាពលរដ្ឋបានព្រួតវាយចោរម្នាក់នេះបន្ទាប់ធ្វើសកម្មភាពលួចហើយជិះរត់។ប្រជាពលរដ្ឋនាំគ្នាវាយដោយកំហឹង។ប្រជាពលរដ្ឋនិយាយថាពួកគេបានឃើញចោរលួចនៅនឹងមុខតែម្តង។ចោរនោះបានរងរបួសធ្ងន់ធ្ងរតែត្រូវប៉ូលិសជួយអន្តរាគមន៍ទាន់ពេលវេលា។ប៉ូលិសនិយាយថា ពួកគេមិនគួរនាំគ្នាព្រួតវាយទាំងកំរោលនោះទេអាចក្លាយជាបទល្មើស គួរណានាំគ្នាប្រគល់ឲ្យប៉ូលិសដើម្បីចាត់ការតាមច្បាប់។បច្ចុប្បន្នប៉ូលិសបញ្ជូនជននេះទៅកាន់មន្ទីរពេទ្យដើម្បីព្យាបាលមុខពេលបញ្ជូនទៅកាន់តុលាការ៕
ពីរនាក់ចាប់ខ្លួនព្រោះជួញដូរគ្រឿងញៀន
ឧត្តរមានជ័យៈ៖បុរសពីរនាក់អាយុ២៩ឆ្នាំនិង២២ឆ្នាំត្រូវបាចាប់ខ្លួនបន្ទាប់ពីចោទពីបទជួញដូរថ្នាំញៀននៅស្រុកសំរោងខេត្តឧត្តរមានជ័យកាលពីថ្ងៃទីអង្គារទី៦កុម្ភៈ។ ប៉ូលិសបានរឹបអូសថ្នាំញៀនប្រភេទម៉ាទឹកកកចំនួន១៧កញ្ចប់ស្មើនឹង៨៦គ្រាប់និងឧបករណ៍មួយចំនួនទៀត។ប៉ូលិសនិយាយថា មុខពេលឈានទៅរកការចាប់ខ្លួនប៉ូលិសបានតាមដានជាយូរមកហើយក៏ដូចជាមានការត្អូញត្អែរពីសំណាក់ប្រជាពលរដ្ឋថាពួកគេល្បីក្នុងការជួញដូរនៅក្នុងភូមិនេះ។ប៉ូលិសបានចាប់ពួកគេនៅពេលដែលពួកគេកំពុងត្រៀមលក់គ្រឿងញៀន។ពួកគេបានសារភាពនូវទង្វើលរបស់ខ្លួនថាបានលក់យូរហើយ។ប៉ូលិសបានបញ្ជូនពួកគេទៅកាន់តុលាការ៕
ប្រពន្ធយកសង្សាមកដេកក្នុងផ្ទះ ត្រូវបុរសជាប្តីតាមទាន់
ភ្នំពេញ៖ប៉ូលិសខណ្ឌឬស្សីកែររាជធានីភ្នំពេញបានឃុំខ្លួនដើម្បីយកមកអប់រំនូវប្តីប្រពន្ធមួយគូនិងបុរសម្នាក់ពាក់ព័ន្ធនឹងការឈ្លោះគ្នាក្នុងផ្ទះសំណាក់កាលពីចន្ទ៦កុម្ភៈ។ប៉ូលិសនិយថាប្រពន្ធបានយកអតីតសង្សាមកដេកនៅផ្ទះសំណាក់ក៏ត្រូវបុរសជាប្តីតាមទាន់រួចក៏ឈ្លោះប្រកែកគ្នាផ្អើលអ្នកជិតខាង។តែអ្វីដែលមិននឹកស្មាននោះគឺថា បែរជាស្រី្តម្នាក់នោះមកវាយប្តីរបស់ខ្លួនវិញ។ប៉ូលិសបាននាំពួកគេទៅកាន់ការិយាល័យប៉ូលិសបានមកធ្វើកិច្ចសន្យា។រីឯប្រពន្ធវិញបើត្រូវប្តីប្តឹងថាសាហាស្មន់នោះនាងប្រាកដជាត្រូវចាប់ខ្លួន៕
ស្រ្តីចំណាស់ម្នាក់ស្លាប់ និងចៅស្រីរបួសដោយសារគ្រោះថ្នាក់ចរាចរ
ភ្នំពេញ៖ស្រ្តីចំណាស់អាយុ៧២ឆ្នាំម្នាក់ស្លាប់ និងចៅស្រីរបួសធ្ងន់ដោយសារគ្រោះថ្នាក់ចរាចរណ៍ស្ថិតនៅខណ្ឌមានជ័យក្រុងភ្នំពេញកាលពីថ្ងៃពុធទី៨កុម្ភៈ។ប៉ូលិសនិយាយថាអំឡុងពេលស្រ្តី និងកុមារជិះក្នុងរ៉ឺមកក៏ត្រូវរថយន្តមួយគ្រឿងជិះបុកបណ្តាលឲ្យស្រ្តីម្នាក់នោះធ្លាក់ពីលើរ៉ឺមកស្លាប់មួយរំពេច។ រីឯចៅស្រីរបួសធ្ងន់ត្រូវបានបញ្ជូនទៅកាន់មន្ទីរពេទ្យ។អ្នកបើកបរនោះបានគេចខ្លួនបាត់។ប៉ូលិសកំពុងតាមស៊ើបដើម្បីធ្វើការចាប់ខ្លួន រីឯអ្នកមើលឃើញហេតុការណ៍បានអាណិតស្រ្តីចំណាស់និងចៅនោះដែលរងគ្រោះ
ធ្ងន់ធ្ងរ៕
បីនាក់ជាប់ទោសព្រោះលួចកុំព្យូទ័រជនបរទេស
ភ្នំពេញៈ៖បុរសអាយុ១៦ឆ្នាំ ១៧ឆ្នាំ និង ៣២ឆ្នាំត្រូវបានចាប់ខ្លួនកាលពីថ្ងៃសុក្រទី០៤កុម្ភៈ បន្ទាប់ពីសង្ស័យថាលួចកុំព្យូទ័រយួរដៃចំនួន៣គ្រឿងពីជនបរទេសម្នាក់ស្ថិតនៅខណ្ឌដូនពេញក្រុងភ្នំពេញ។ប៉ូលិសនិយាយថា បុរសបីនាក់នោះបានគាស់ផ្ទះជនសង្ស័យដែលជាជនជាតិចក្រភពអង់គ្លេសមានអាយុ៥០ឆ្នាំ។ជនសង្ស័យទាំងបីនាក់បានរត់គេចខ្លួនតែត្រូវបានជនសង្ស័យប្រទះឃើញក៏រាយការណ៍ទៅ សមត្ថកិច្ចដើម្បីធ្វើការចាប់ខ្លួន។ជនសង្ស័យបានសារភាពនូវទង្វើលរបស់ខ្លួន។ប៉ូលិសបានរៀបចំឯកសារដើម្បីបញ្ជូនសំណុំរឿងទៅកាន់តុលាការ៕
ចាប់ជនសង្ស័យពីរនាក់រឿងកាប់គេឲ្យរបួសធ្ងន់ព្រោះគំនុំ
បន្ទាយមានជ័យ៖បុរសពីរនាក់អាយុ១៦និង២៦ឆ្នាំត្រូវបានចាប់ខ្លួនបន្ទាប់ពីពួកគេចាក់ជនរងគ្រោះឲ្យរបួសនៅក្រុងប៉ោយប៉ែតខេត្តបន្ទាយមានជ័យ។ប៉ូលិសនិយាយថា បុរសពីរនាក់បានចាក់ជនរងគ្រោះដែលមានអាយុ២៦ឆ្នាំឲ្យធ្លាយពោះនឹងកាំបិតហើយបានរត់គេចខ្លួននៅពេលដែលជនរងគ្រោះបានដើរតាមផ្លូវតែម្នាក់ឯង។ជនរងគ្រោះបានរងគ្រោះជាទម្ងន់បណ្តាលឲ្យសន្លប់ធ្ងន់នៅកន្លែងកើតហេតុជាមួយនឹងថ្លុកឈាម។នៅពេលនោះដែលសាច់ញាតិបានប្រទះឃើញនិងបានបញ្ជូនទៅកាន់មន្ទីរពេទ្យ។ប៉ូលិសកំពុងធ្វើការស៊ើបអង្កេតចាប់ជនសង្ស័យពីរនាក់ទៀតដែលពាក់ព័ន្ឋ។ជនសង្ស័យបានសារភាពថាមកពីខ្លួនខឹងជនរងគ្រោះដែលយកប្រពន្ឋខ្លួន។យ៉ាងណាក៏ដោយប៉ូលិសបានបញ្ជូនជនសង្ស័យទាំងពីរនេះទៅកាន់តុលាការ៕
បើកបុកគេហើយប្រើអំពើហិង្សាទៀតត្រូវប៉ូលិសក្របួចបាន
សៀមរាប៖បុរសអាយុ៤៤ឆ្នាំម្នាក់ត្រូវបានគេចាប់ខ្លួនបន្ទាប់ពីបង្ករបួសស្នាមហើយប្រើអំពើហិង្សាទៀតទៅលើគូស្នេហ៍កាលបីថ្ងៃអាទិត្យទី០៥កុម្ភៈនៅក្រុងសៀមរាប។ប៉ូលិសនិយាយថាជនសង្ស័យបានជិះរ៉ឺកម៉កកង់បីក្នុងបំណងជិះបុកជនរងគ្រោះតែម្តង។រួចហើយក៏ប្រើអំពើហិង្សារួចក៏ព្យាយាមរត់គេចខ្លួនតែនៅតែប៉ូលិសចាប់បានដដែល។តែនៅពេលប៉ូលិសចាប់ខ្លួនបុរសរូបនេះបានបដិសេធទង្វើរបស់ខ្លួន។សាក្សីនិយាយថាបុរសជាមនុស្សឃោឃៅមិនគួរណាបង្កគ្រោះថ្នាក់ហើយថែមទាំងប្រើអំពើហិង្សាទៀត៕
ប៉ូលិសឆ្មក់ចាប់បុរស៤នាក់ពាក់ព័ន្ធនឹងសេពគ្រឿងញៀន
ភ្នំពេញ៖ប៉ូលិសចាប់ខ្លួនបុរស៤នាក់ដែលសេពគ្រឿងញៀននៅក្នុងផ្ទះជួលស្ថិតនៅខណ្ឌពោធិ៍សែនជ័យរាជធានីភ្នំពេញកាលពីសៅរ៍ទី០៤មករា។ប៉ូលិសនិយាយថា ប៉ូលិសបានចូលឆ្មក់ចាប់ក៏ឃើញពួកគេកំពុងជក់គ្រឿងញៀន។ប៉ូលិសបានរឹបអូសឃើញថ្នាំញៀន១១កញ្ចប់ និងឧបករណ៍ថ្នាំជក់ផ្សេងទៀត។ពួកគេតែងតែទិញថ្នាំយកទៅជក់ដោយគ្មានចូលសាលារៀន។ឪពុកម្តាយនិយាយថាពួកគេពិបាកប្រដៅណាស់។ប៉ូលិសថែមទៀតសង្ស័យថាពួកគេពាក់ព័ន្ឋជួញដូរគ្រឿងញៀនផងដែរតែពួកគេបដិសេធ។ប៉ូលិសបានបញ្ចូនពួកគេទៅកាន់តុលាការ៕
ដើរកាច់ម៉ូតូគេត្រូវជាប់អន្ទាក់ប៉ូលិស
រាជធានីភ្នំពេញ៖បុរសអាយុ៣៤ឆ្នាំម្នាក់ត្រូវបានគេចាប់ខ្លួនបន្ទាប់ពីលួចម៉ូតូជនរងគ្រោះដែលហេតុការណ៍ស្ថិតនៅខណ្ឌទួលគោករាជធានីភ្នំពេញកាលពីថ្ងៃអាទិត្យទី០៥កុម្ភៈ។ជនរងគ្រោះនិយាយថារូបគេបានទុកម៉ូតូនៅមុខផ្ទះរួចក៏ចូលទៅសំរាក។ជនរងគ្រោះនិយាយថារូបគេបានចាក់សោរម៉ូតូយ៉ាងត្រឹមត្រូវប៉ុន្តែចោរនោះនៅតែមានជំនាញលួចទៀត។ម្ចាស់ម៉ូតូបានប្រទះឃើញជនសង្ស័យជិះម៉ូតូរបស់ខ្លួនទើបរាយការណ៍ទៅប៉ូលិសដើម្បីចាប់ជននេះភ្លាមៗ។ជនសង្ស័យបានសារភាពនៅទង្វើរបស់ខ្លួនហើយនិយាយថានេះមិនមែនជាលើកទីមួយទេដែលខ្លួនបានលួចឆក់ប្លន់នោះ។បច្ចុប្បន្នប៉ូលិសបានបញ្ជូនជនសង្ស័យទៅកាន់តុលាការដើម្បីចាត់ការតាមច្បាប់៕
តួអង្គប្រុសស្លាប់តួអង្គស្រីរបួសធ្ងន់ដោយសារសាសងគ្នានៅផ្លូវស្ងាត់ត្រូវចោរប្លន់
ភ្នំពេញ៖ បុរសអាយុ២១ឆ្នាំម្នាក់ស្លាប់ភ្លាមៗនៅនឹងកន្លែងហេតុរីមិត្តស្រីរងរបួសធ្ងន់ធ្ងរ បន្ទាប់ពីចោរពីរនាក់ធ្វើសកម្មភាពប្លន់ម៉ូតូនៅខណ្ឌដង្កោរាជធានីភ្នំពេញ។ប៉ូលិសនិយាយថានៅថ្ងៃកើតហេតុពួកគេបាននិយាយផ្តោះផ្តងស្នេហានៅកន្លែងស្ងាត់បន្ទាប់មកមានបុរសពីរនាក់យកកាំបិតមកចាក់ខាងប្រុងបណ្តាលឲ្យស្លាប់ភ្លាមៗរីឯស្រ្តីរងរបួសធ្ងន់ធ្ងរត្រូវបានយកសង្រ្គោះបន្ទាន់។ពួកគេបានស្រែកឲ្យគេជួយដែរតែមិនល្អព្រោះកន្លែងនោះស្ងាត់ពេកគ្មានមនុស្សសោះជាហេតុធ្វើឲ្យពួកចោរយកម៉ូតូទៅបានដោយងាយស្រួល៕
លួចញយដងលួចចុងក្រោយជាប់អន្ទាក់ប៉ូលិស
កំពង់ធំ៖បុរសអាយុ២១ឆ្នាំម្នាក់ត្រូវបានចាប់ខ្លួនបន្ទាប់ពីលួចម៉ូតូជនរងគ្រោះនៅស្រុកស្ទឹងសែនខេត្តកំពង់ធំកាលពីថ្ងៃសុក្រ ទី៣មករា។ប៉ូលិសនិយាយថាបុរស៤នាក់ដែលបានប្រព្រឹត្តនូវបទល្មើសលួចម៉ូតូដែលទុកនៅមុខហាងខារ៉ាអូខេ។ជាសំណាងល្អប៉ូលិសដែលដើរល្បាតបានប្រទះឃើញភ្លាមៗរួចក៏ចាប់ខ្លួនតែម្តងប៉ុន្តែប៉ូលិសចាប់បានតែម្នាក់នោះទេរី៣នាក់ជាពាក់ពួកបានរត់គេចខ្លួនបាត់។ប៉ូលិសបានរកឃើញថាជននេះមិនមែនជាលើកទីមួយនោះទេដែលជននេះប្រព្រឹត្តបទល្មើសលួច។ប៉ូលិសបានបញ្ជូនជននេះទៅ កាន់តុលាការនិងស្វែងរកចាប់ជនសង្ស័យផ្សេងទៀត៕
បុរសពីរនាក់និងស្រ្តីម្នាក់ជាប់ចោទពីបទជួញដូរគ្រឿងញៀន
កណ្តាល៖បុរសពីរនាក់និងស្រ្តីម្នាក់ត្រូវបានចាប់ខ្លួនបន្ទាប់ពីពួកគេជាប់ចោទពីបទជួញដូរគ្រឿងញៀននិងប្រើប្រាស់គ្រឿងញៀននៅស្រុកសំរោងទងខេត្តកណ្តាលកាលពីថ្ងៃសៅរ៏ទី០៤កុម្ភៈ។ប៉ូលិសនិយាយថាប៉ូលិសបានចាប់ខ្លួនពួកគេខណៈដែលពួកគេកំពុងសេពគ្រឿងញៀននៅក្នុងផ្ទះជួល។ប៉ូលិសបានចូលឆ្មក់ពួកគេបន្ទាប់ពីអ្នកជិតខាងត្អូញត្អែរថាពួកគេល្បីខាងលក់ថ្នាំ។ប៉ូលិសបានរឹបអូសយ៉ាម៉ាមួយកញ្ចប់ធំ។ពួកគេបានសារភាពនូវទង្វើរបស់ខ្លួន។មនុស្សដែលពាក់ព័ន្ឋករណីនេះបានរត់គេចខ្លួនអស់។បច្ចុប្បន្នប៉ូលិសបានបញ្ជូនជននេះទៅកាន់តុលាការ៕
ហេតុតែចង់ប្លន់ម៉ូតូគេកាប់ជនរងគ្រោះឲ្យស្លាប់មួយរំពេច
បន្ទាយមានជ័យ៖បុរសបីនាក់ត្រូវបានចាប់ខ្លួនបន្ទាប់ពីពួកគេវាយតប់លើបុរសអាយុ២៧ឆ្នាំម្នាក់រហូតដល់ស្លាប់ភ្លាមៗដែលហេតុការណ៍នេះស្ថិតនៅក្រុងប៉ោយប៉ែតខេត្តបន្ទាយមានជ័យកាលពីថ្ងៃសៅរ៏ទី៤កុម្ភៈ។ប៉ូលិសនិយាយថានៅថ្ងៃកើតហេតុជនរងគ្រោះបាននិយាយជាមួយមិត្តភក្តិរបស់គេក៏ស្រាប់តែជនសង្ស័យបីនាក់យកចបជីកមកវាយសំពោងជនសង្ស័យបណ្តាលឲ្យស្លាប់តែត្រូវបានមិត្តភក្តិស្រែកឲ្យគេជួយទើបជនសង្ស័យទាំងបីនាក់នេះត្រូវប៉ូលិសចាប់ខ្លួនបាន។ពួកគេបានសារភាពថាពួកគេមានបំណងចង់ប្លន់ម៉ូតូតែមិនបានជោគជ័យ។បច្ចប្បន្នប៉ូលិសបញ្ជូនជនទាំងបីនាក់នេះទៅកាន់តុលាការ៕
លួចទូរសព្ទ័គេយកទៅលក់ត្រូវគេសង្ស័យចាប់បាន
ភ្នំពេញ៖បុរសពីរនាក់ត្រូវបានចាប់ខ្លួនបន្ទាប់ពីលួចទូរស័ព្ទទំនើបមួយគ្រឿងនៅខណ្ឌមានជ័យក្រុងភ្នំពេញកាលពីសៅរ៏ទី៤កុម្ភៈ។ប៉ូលិសនិយាយថានៅថ្ងៃកើតហេតុពួកគេបានលក់ទូរសព្ទ័ទំនើបមួយគឺIphone 4 ឲ្យអ្នកលក់នៅ សូរិយា។ស្រាប់តែអ្នកលក់សង្ស័យថាជារបស់ចោរក៏ប្តឹងប៉ូលិសគាប់ជួនប៉ូលិសកំពុងតាមចាប់ជនសង្ស័យនេះផងព្រោះមានបណ្តឹងពីប្រជាពលរដ្ឋថាបាត់ទូរសព័្ទ។ពួកគេបានសារភាពរួចប៉ូលិសក៏បានបញ្ជូនពួកគេទៅកាន់តុលាការ៕
សូមមិត្តអ្នកអាន ចូលរួមផ្តល់ព័ត៌មាន ទាក់ទិននឹងឧក្រិដ្ឋកម្មផ្សេងៗ រួមមានការរំលោភសេពសន្ថវៈ អំពើហិង្សាក្នុងគ្រួសារ និងអំពើល្មើសច្បាប់នានា តាមរយៈទូរស័ព្ទ ០១២ ៩២១ ០៥៣/០១២៥១៧៩៤៥។ ឬអ៊ីមែល:pk@phnompenhpost.com/editors@phnompenhpost.com/reporters@phnompenhpost.com
