ភ្នំពេញ ប៉ុស្តិ៍
ជាលើកដំបូង និងក្នុងរយៈពេលជាង២០ឆ្នាំមកហើយ បន្ទាប់ពីមានការទទួលស្គាល់ជាផ្លូវការនូវសិទ្ធិកុមារ កុមារត្រូវបានផ្តល់លទ្ធភាពទទួលបានយុត្តិធម៌កម្រិតអន្តរជាតិតាមរយៈ នីតិវិធីបណ្តឹងដែលបានអនុម័តនាពេលថ្មីៗនេះ។ នេះបើតាមសេចក្តីប្រកាសព័ត៌មានរួមរបស់ក្រុមអង្គការមិនមែន រដ្ឋាភិបាលដែលចេញផ្សាយកាលពីថ្ងៃទី២៨ ខែកុម្ភៈ ពីទីក្រុងហ្សឺណែវ។
ដើម្បីឲ្យនីតិវិធីនេះ អាចអនុវត្តបានជាក់ស្តែងសម្រាប់ជនរងគ្រោះជាកុមារ បណ្តាប្រទេសនានា ចាំបាច់ត្រូវចុះហត្ថលេខា និងអនុម័តពិធីសារបន្ថែមលើសន្ធិសញ្ញាស្តីពីសិទ្ធិកុមារ មុនពេលសន្ធិសញ្ញានេះ ចូលជាធរមាន និងអនុវត្តប្រកបដោយប្រសិទ្ធភាព។ ពិធីចុះហត្ថលេខាជាផ្លូវការរបស់អង្គការសហប្រជាជាតិ ដែលបើកឱកាសឲ្យចុះហត្ថលេខា និងអនុម័តពិធីសារបន្ថែមលើសន្ធិសញ្ញាស្តីពីសិទ្ធិកុមារនេះ បានធ្វើឡើងកាលពីថ្ងៃទី២៨ ខែកុម្ភៈ ឆ្នាំ២០១២ នៅកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅ ទីក្រុងហ្សឺណែវ។
ប្រទេសចំនួន២០ មកពីជុំវិញពិភពលោក មានដូចជា ប្រទេសអូទ្រីស ប៊ែលហ្ស៊ិក ប្រេស៊ីល ឈីលី កូស្តារីកា ហ្វាំងឡង់ អាល្លឺម៉ង់ អ៊ីតាលី ឡុចហ្សំប៊ួរ ម៉ាល់ឌីវ ម៉ាលី ម៉ុងតេណេហ្គ្រោ ម៉ារ៉ុក ប៉េរ៉ូ ព័រទុយហ្គាល់ សឺបៀរ ស្លូវ៉ាគី ស្លូវ៉េនី អេស្បាញ និងអ៊ុយរ៉ុយហ្គាយ បានបង្ហាញភាពជាអ្នកដឹកនាំយ៉ាងម៉ឺងម៉ាត់ និងការប្តេជ្ញាចិត្តផ្នែកនយោបាយចំពោះកិច្ចគាំពារសិទ្ធិរបស់ កុមារតាមរយៈការចុះហត្ថលេខាលើពិធីសារបន្ថែមកាលពីថ្ងៃទី២៨ ខែកុម្ភៈកន្លងទៅនេះ។
ការចុះហត្ថលេខាលើពិធីសារនេះ គឺជាការបោះជំហានលើកដំបូងដ៏សំខាន់មួយ តែប្រទេសទាំងនោះ ក៏នឹងនៅតែចាំបាច់ត្រូវអនុម័តពិធីសារនេះ ដើម្បីអនុវត្តជាមួយបទប្បញ្ញាត្តិរបស់ខ្លួន ហើយយ៉ាងហោចណាស់ក៏មានប្រទេសចំនួន ១០ ដែរ ដែលត្រូវអនុម័តពិធីសារនេះ មុនពេលយកវាទៅអនុវត្ត។
តំណាងឲ្យសមាជិក និងដៃគូរបស់ខ្លួន លោកស្រី Lisa Myers ប្រធានក្រុមអង្គការមិនមែនរដ្ឋាភិបាលដើម្បីសម្ព័ន្ធសិទ្ធិកុមារ (NGO Group for the CRC) បានឲ្យដឹងថា៖ «វាជាក្តីសង្ឃឹមរបស់យើងថា ប្រទេសនីមួយៗ នឹងគោរពតាមតួនាទីរបស់ខ្លួនចំពោះកុមារ តាមរយៈការចុះហត្ថលេខា និងអនុម័តឧបករណ៍ច្បាប់នេះ ដោយមិនពន្យារពេល។ យើងត្រូវធានាថា ឧបករណ៍ច្បាប់ថ្មីនេះ នឹងចូលជាធរមានយ៉ាងឆាប់រហ័ស ដើម្បីយកមកអនុវត្តចំពោះកុមារដែលត្រូវការច្បាប់នេះ»។
ពិធីសារបន្ថែមនេះ នឹងពង្រឹងដល់សន្ធិសញ្ញាស្តីពីសិទ្ធិរបស់កុមារ និងពិធីសារដែលមានស្រាប់ក្នុងសន្ធិសញ្ញាស្តីពីការលក់កុមារ ពេស្យាកម្មកុមារ និងកាមសាស្រ្តកុមារ និងសន្ធិសញ្ញាស្តីពីការចូលរួមរបស់កុមារក្នុងជម្លោះប្រដាប់អាវុធ ។ ពិធីសារបន្ថែមនេះ នឹងផ្តល់ជូនកុមារ និងអ្នកតំណាងរបស់កុមារ ប្រសិនបើកុមារទាំងនោះ មិនអាចទទួលបានយុត្តិធម៌នៅក្នុងប្រទេសរបស់ខ្លួន នូវលទ្ធភាពប្តឹងឧទ្ធរណ៍ទៅគណៈកម្មាធិការអង្គការសហប្រជាជាតិស្តីពី សិទ្ធិកុមារ ដែលជាស្ថាប័នឯករាជ្យអន្តរជាតិ ទទួលបន្ទុកតាមដានការអនុវត្តសន្ធិសញ្ញា និងពិធីសារបន្ថែមរបស់ខ្លួន។
ការចុះហត្ថលេខាលើពិធីសារបន្ថែមនៅអង្គការសហប្រជាជាតិ គឺជាសមិទ្ធផលនៃការធ្វើយុទ្ធនាការយ៉ាងសកម្មរបស់សម្ព័ន្ធ អង្គការមិនមែនរដ្ឋាភិបាល ដែលតំណាងឲ្យអង្គការផ្នែកសិទ្ធិកុមារ និងសិទ្ធិមនុស្សជុំវិញពិភពលោកចាប់តាំងពីឆ្នាំ២០០៦មក។ សម្ព័ន្ធអង្គការមិនមែនរដ្ឋាភិបាលនេះ បានធ្វើយុទ្ធនាការទាមទារឧបករណ៍ច្បាប់ថ្មីនេះ ដើម្បីផ្តល់កិច្ចគាំពារដល់កុមារ ឲ្យស្មើភាពនឹងមនុស្សពេញវ័យនៅកម្រិតអង្គការសហប្រជាជាតិ។
សម្ព័ន្ធអង្គការមិនមែនរដ្ឋាភិបាល នឹងបន្តបំពេញការងាររបស់ខ្លួន ដើម្បីធានាឲ្យបានថាពិធីសារបន្ថែមទីបីនេះ នឹងអាចចូលជាធរមានក្នុងពេលដ៏ខ្លីខាងមុខនេះ ដោយសារការងារប្រកបដោយបទពិសោធស្តីពីពិធីសារនាពេលកន្លងមក បានបង្ហាញថា ពិធីសារលើទីបីនេះ មានសារៈសំខាន់។ សម្ព័ន្ធអង្គការមិនមែនរដ្ឋាភិបាល ក៏នឹងធ្វើការងារ ដើម្បីលើកកម្ពស់ការយល់ដឹង និងចំណេះដឹងអំពីពិធីសារទីបីនេះផងដែរដល់មនុស្សពេញវ័យ ក៏ដូចជាកុមារ និងការជំរុញឲ្យមានការគាំទ្រជាសាធារណៈ ដើម្បីធានាថា ពិធីសារនេះ នឹងត្រូវបានប្រើប្រាស់ ដើម្បីជំរុញឲ្យមានការផ្លាស់ប្តូរដ៏ពិតប្រាកដមួយចំពោះកិច្ចគាំពារសិទ្ធិរបស់កុមារជុំវិញពិភពលោក៕
(ក្រុមអង្គការមិនមែនរដ្ឋាភិបាលដើម្បីសម្ព័ន្ធសិទ្ធិកុមារ គឺជាបណ្តាញការងាររបស់អង្គការមិនមែនរដ្ឋាភិបាលជាតិ និងអន្តរជាតិចំនួន៨០ ដែលសហការគ្នាសម្របសម្រួលការអនុវត្តសន្ធិសញ្ញាអង្គការសហប្រជាជាតិ ស្តីពីសិទ្ធិកុមារ) BP
