ភ្នំពេញ ប៉ុស្តិ៍
- Prev
- 1 of 2
- Next
ភ្នំពេញ : ប្រជាពលរដ្ឋខ្មែររាប់លាននាក់កាន់ព្រះពុទ្ធសាសនា ប៉ុន្តែបុគ្គលដែលមានការយល់ដឹងច្បាស់អំពីពុទ្ធសាសនាមានចំនួន តិចតួចនៅឡើយ។
ដើម្បីចែករំលែកចំណេះដឹងផ្នែកព្រះពុទ្ធសាសនាទៅដល់ពុទ្ធបរិស័ទ ជិតឆ្ងាយទាំងក្នុង និងក្រៅប្រទេស លោក ស្រុង ចាន់ណា ពុទ្ធសាសនិកដ៏ស្មោះស្ម័គ្រអាយុ៣០ឆ្នាំ សុខចិត្តចំណាយពេលវេលា និងថវិកាផ្ទាល់ខ្លួន រៀបចំចងក្រងបង្កើតគេហទំព័រថ្មីឈ្មោះថា «៥០០០ឆ្នាំ» សម្រាប់ឲ្យប្រជាពលរដ្ឋខ្មែរបានស្វែងយល់ពីព្រះធម៌ឲ្យបានកាន់តែ ច្បាស់ ចៀសវាងកំហុសឆ្គងតទៅទៀត។
លោក ស្រុង ចាន់ណា ជាប្រធានគ្រប់គ្រងទូទៅនៃក្រុមហ៊ុន Mobility One និយាយថា៖ «ខ្ញុំបង្កើតគេហទំព័រនេះ ក្នុងគោលបំណងបញ្ជ្រាបព័ត៌មានអំពីចំណេះដឹង និងបទពិសោធល្អៗ ដែលព្រះពុទ្ធជាអង្គម្ចាស់នៃយើងបានសម្តែងឡើង ជាការដាស់តឿនដល់សតិអារម្មណ៍មនុស្សគ្រប់រូបដែលកំពុងវិលវល់នៅ ក្នុងវាលវដ្តសង្សារដ៏ធំធេងនេះ»។
អ្នកបង្កើតវិបសាយ www.5000-years.org ដើម្បីផ្សព្វផ្សាយសាសនាព្រះពុទ្ធ រូបនេះយល់ឃើញថា ការផ្តល់ចំណេះដឹងផ្នែកពុទ្ធសាសនានៅកម្ពុជាមានកម្រិតនៅឡើយ ព្រោះកម្មវិធីបង្រៀន ព្រះធម៌គឺធ្វើឡើងតែនៅតាមទីអារាម។ ស្របពេលដែលបច្ចេកវិទ្យាកំពុងរីកដុះដាលលើវិស័យទូរគមនាគមន៍ លោកក៏បានសម្រេចចិត្តជ្រើសរើសយកការផ្សព្វផ្សាយព្រះធម៌ តាមប្រព័ន្ធអ៊ីនធឺណិត ដែលជាបណ្តាញទំនាក់ទំនងដ៏ធំមួយក្នុងស្រទាប់ប្រជាពលរដ្ឋកម្ពុជានា ពេលបច្ចុប្បន្ននេះ ព្រោះពួកគេអាចសិក្សាស្វែងយល់ពីព្រះធម៌តាមប្រព័ន្ធអ៊ីនធឺណិត មិនថានៅផ្ទះ នៅសាលារៀន ឬនៅទីណា ពេលណានោះទេ។
លោកបន្តថា ព្រះធម៌ជាឃ្លាំងទ្រព្យដ៏ល្អបំផុតនៃសេចក្តីសុខ បើបុគ្គលមានធម៌ នោះសេចក្តីសុខនឹងកើតមាន ចំពោះបុគ្គលប្រណិប័តន៍តាម ហើយក៏អាចឲ្យសង្គមទាំងមូលមានសុខសន្តិភាពដែរ។
យោងតាមលោក ស្រុង ចាន់ណា ធម៌ក្នុងសាសនាព្រះពុទ្ធ បុគ្គលណាសាបព្រោះពូជណាបានផលពីពូជនោះ។
ទោះបីជាលោករវល់ការងារខាងក្រៅនិងការងារបង្កើតគេហទំព័រក៏ ដោយ ក៏លោកមានពេលច្រើនចូលរួមជាមួយគ្រួសារដែរ ហើយគ្រួសារលោកក៏បានគាំទ្រគំនិតលោកឲ្យធ្វើដូច្នេះផងដែរ។
ពុទ្ធសាសនិកដ៏ស្មោះស្ម័គ្ររូបនេះថ្លែងថា៖ «មួយជីវិតខ្ញុំ ក្រៅពីព្រះពុទ្ធសាសនាគឺខ្ញុំមិនមានជំនឿលើសាសនាណាឡើយ ជីដូន ជីតាខ្ញុំជាអ្នកជឿជាក់ធម៌ព្រះពុទ្ធ ដូច្នេះខ្ញុំក៏មិន ខុសពីជីដូនជីតាខ្ញុំដែរ»។
អ្នកស្រី ចន សុធា ជាភរិយាថ្លែងប្រាប់ ភ្នំពេញ ប៉ុស្តិ៍ ដោយទឹកមុខរីករាយថា៖ «ខ្ញុំសប្បាយចិត្តនឹងឲ្យគាត់ធ្វើការងារនេះ។ កិច្ចការមានប្រយោជន៍ដល់សង្គមខ្ញុំមិនដែលជំទាស់ឡើយ ហើយការងារក្នុងផ្ទះមិនជាច្រើនណាស់ណាដែរ ពួកយើងមានពេលច្រើនសម្រាប់សម្រាកលំហែបាន»។
អ្នកស្រីនិយាយថា គេហទំព័រដែលបង្កើតតាំងពីខែសីហាឆ្នាំមុននេះមានអ្នកចូលមើល ប្រមាណជា១០០០នាក់ក្នុងមួយថ្ងៃ។ ពុទ្ធបរិស័ទអាចចូលទាញយកអត្ថបទ ឬស្តាប់ការសម្តែងព្រះធម៌ ពុទ្ធប្រវត្តិសង្ខេប គម្ពីរព្រះត្រៃបិដក សៀវភៅធម៌ ការបង្រៀនព្រះធម៌ កំណាព្យស្មូត និងកម្មវិធីពុទ្ធសាសនាជាច្រើនទៀត។
លោក ស្រុង ចាន់ណា ប្ដេជ្ញាខិតខំចងក្រងប្រមូលឯកសារទាក់ទងនឹងព្រះធម៌នេះបន្ថែម ទៀត ដើម្បីឲ្យកូនខ្មែរ ទាំងអស់មានឱកាសបានស្វែងយល់ពីព្រះពុទ្ធសាសនា ជាសាសនារបស់ខ្លួន។
សម្រាប់ពុទ្ធសាសនិកវ័យក្មេងរូបនេះ ការអាន និងស្តាប់ព្រះធម៌ គឺជាផ្លូវមួយដែលត្រួសត្រាយវិបត្តិនៅក្នុងចិត្តមនុស្សគ្រប់ គ្នាឲ្យជ្រះថ្លា ចេះដឹងខុស ត្រូវ សនិងខ្មៅ មានសីលធម៌ក្នុងខ្លួន និងចេះអត់ឱន អធ្យាស្រ័យគ្នា ចេះទទួលខុសត្រូវនិងចេះដឹកនាំដំណើរជីវិតរបស់ខ្លួនទៅរកទីបរមសុខ ដូចដែលព្រះពុទ្ធទ្រង់ត្រាស់ថា នត្ថិ សន្តិ បរំ សុខំ (គ្មានសេចក្តីសុខណាស្មើ នឹងសេចក្តីស្ងប់នោះឡើយ) ។
លោកនិយាយថា៖ «ខ្ញុំចង់ឲ្យប្រជាពលរដ្ឋកម្ពុជាទាំងអស់ គប្បីយកពេលវេលាដែលសមគួរ ពីការងារឬការសិក្សា ស្វែងយល់ពីព្រះធម៌ឲ្យបានច្រើន សម្រាប់ជាមាគ៌ាដឹកនាំពួកយើងឆ្ពោះទៅរកសេចក្តីសុខទាំងអស់គ្នាគឺ ព្រះនិពាន្វ»៕
