ភ្នំពេញ ប៉ុស្តិ៍
ក្រុងតូក្យូៈ បុរសជាតិជប៉ុន គិនីឆី អ៊ីតុ ដែលមានលំនៅដ្ឋាននៅជាយក្រុងតូក្យូបានក្លាយជាមនុស្សស្វាប្រើដៃ និងជើង រត់បានលឿនជាងគេបំផុតក្នុងលោក។
បុរសរូបនោះមានវ័យ២៩ឆ្នាំ បានទៅរស់នៅក្នុងព្រៃអស់រយៈពេលជិតដប់ឆ្នាំ ដើម្បីហាត់រៀនជំនាញរត់ដូចជាអម្បូរសត្វស្វាម្យ៉ាងឈ្មោះថា ប៉ាតាស (Patas) ដែលនៅតំបន់អាហ្វ្រិក។ ទីបំផុតគាត់បានទទួលកំណត់ត្រាពិភពលោករបស់ហ្គីណេស ចំពោះល្បឿនរត់ដោយប្រើដៃ និងជើងរបស់គាត់។
បុរសរត់លឿនដូចស្វារូបនេះបាននិយាយថា៖«អ្នកដឹងទេ! មុខមាត់ និងរាងកាយរបស់ខ្ញុំមើលទៅស្រដៀងនឹងសត្វស្វាអ៊ីចឹង។ ម្ល៉ោះហើយតាំងពីក្មេងមក មិត្តភក្តិខ្ញុំគ្រប់គ្នាតែងហៅលេងថា អាស្វា!អាស្វា!»។
មនុស្សស្វា អ៊ីតុ បានបន្តថា៖« វាបានកើតឡើងនៅពេលខ្ញុំបានឃើញសត្វស្វាមួយក្បាលរត់ក្នុងល្បឿន លឿនចំពោះមុខ ខ្ញុំក៏គិតថា ខ្លួនឯងអាចធ្វើដូចជាសត្វស្វានោះបាន។ ចាប់ពីពេលនោះមកខ្ញុំក៏ចាប់ផ្តើមរៀនរត់ដូចសត្វស្វាជារៀង រាល់ថ្ងៃតែម្តង»។
អស់រយៈពេល ៨ ឆ្នាំកន្លះ អ៊ីតុ បានចំណាយពេលរៀនដើរដោយប្រើដៃ និងជើងនៅបរិវេណភូមិដ្ឋានក្បែរផ្ទះដោយប្រើស្រោមដៃជើង។
ចំណុចពិសេសដែលបានជាប់កំណត់ត្រាពិភពលោកនោះ គឺការរត់ចម្ងាយ ១០០ម៉ែត្រដោយប្រើដៃ និងជើងរត់ ប្រើថិរវេលាមិនដល់២០វិនាទីផង៕ PR
