ភ្នំពេញ ប៉ុស្តិ៍
ភ្នំពេញ : វិធីសាស្ត្រវះកាត់សម្រកក្បាលពោះ ដែលភាសាអង់គ្លេសហៅថា Abdominoplasty ឬTummy Tuck ជាវិធីសាស្ត្រដែលកំពុងពេញនិយមក្នុងវិស័យវះកាត់កែសម្ជស្ស។
បែបបទក្នុងការរស់នៅ និងរបបអាហារជាកត្តាដែលធ្វើឲ្យបុគ្គលគ្រប់រូបមានបញ្ហាក្បាលពោះធំ។
ចំពោះស្ត្រី បញ្ហាបាត់បង់រាងរៅនៅលើផ្នែកពោះ និងចង្កេះ ច្រើនតែបណ្តាលមកពីការយារធ្លាក់ក្រោយពីមានគភ៌ ឬក្រោយពីព្យាបាលជំងឺធាត់ជាដើម។
ពេលមានគភ៌ ស្បែកពោះរបស់ស្ត្រីតឹងណែន ជាហេតុបណ្តាលឲ្យដាច់ស្រទាប់កូឡាហ្សែនក្រោមស្បែក និងបង្កទៅជាសង្វារ ដែលជាកង្វល់មួយសម្រាប់ស្ត្រីផងដែរ។ ការឡើងនូវទំហំពោះ និងការកើតឡើងនូវបញ្ហាស្បែកពោះយារធ្លាក់ បណ្តាលឲ្យបុរស-ស្ត្រីគ្រប់រូបពិបាកក្នុងការរស់នៅ ឬការស្លៀកពាក់ពុំបានសមសួនជាដើម។
វិធីសាស្ត្រជាច្រើនអាចឆ្លើយតបទៅនឹងបញ្ហាទាំងនេះ។ ក្នុងករណីកកខ្លាញ់នៅពោះ យើងអាចប្រើនូវវិធីសាស្ត្រមិនបាច់វះកាត់ដូចជា មេហ្សូតេរ៉ាពី បំបាត់ខ្លាញ់ និងកាបុកស៊ីតេរ៉ាពី ជាដើម។ ចំណែកឯបញ្ហាស្បែកយារធ្លាក់អាចកែកុនបានតាមរយៈម៉ាស៊ីន រ៉ាដ្យូហ្វ្រេកង់ (Radio Frequency) ។
រីឯការវះកាត់សម្រកក្បាលពោះ ជាវិធីសាស្ត្រដ៏មានប្រសិទ្ធភាពមួយ សម្រាប់ព្យាបាលបញ្ហាកកខ្លាញ់ និងការយារធ្លាក់ស្បែកពោះ។
ជាគោលការណ៍ ការវះកាត់នេះមានគោលបំណងយកចេញនូវខ្លាញ់ស្បែក ដែលយារធ្លាក់ចេញ ហើយទន្ទឹមនឹងនោះដែរ សាច់ដុំពោះដែលធូររលុងក្រោយពេលពពោះក៏ត្រូវបានធ្វើឲ្យតឹងណែន ផងដែរ។
ការវះកាត់ត្រូវអនុវត្តជាមួយជំនួយពីថ្នាំសណ្តំនៅក្នុងបន្ទប់ វះកាត់ដែលមានសុវត្ថិភាពបង្ការរោគ។ មុនពេលវះកាត់ វេជ្ជបណ្ឌិតនឹងធ្វើការថ្លឹងថ្លែងអំពីទំហំនៃការវះកាត់ និងបរិមាណខ្លាញ់ស្បែកត្រូវយកចេញ ជាពិសេសវាយតម្លៃថា ត្រូវធ្វើការបន្តឹងសាច់ដុំពោះដែរ ឬអត់? ស្នាមនៃការវះកាត់គឺស្ថិតនៅផ្នែកខាងលើនៃថ្ងាសក្រោម អាចត្រូវបានបិទបាំងដោយសារខោខ្លីបាន។ ក្នុងករណីល្មមៗ យើងធ្វើការវះកាត់ត្រឹមតែផ្នែកក្រោមផ្ចិតប៉ុណ្ណោះ ប៉ុន្តែក្នុងករណីចាំបាច់ ការវះកាត់ត្រូវធ្វើឲ្យបានធំ ហើយទីតាំងរបស់ផ្ចិតត្រូវប្តូរមកលើប្រមាណ ៨ សង់ទីម៉ែត្រខាងលើទីតាំងចាស់។ ក្រោយពេលវះកាត់ វេជ្ជបណ្ឌិតនឹងចាក់បញ្ចូលនូវបំពង់សម្រាប់បង្ហូរឈាម ដែលសេសសល់ចេញពីកន្លែងវះកាត់ ដើម្បីការពារការកកឈាម ឬការបង្កររោគផ្សេងៗ។ ថ្នេរទាំងឡាយអាចត្រូវបានកាត់ចេញនៅ១០ថ្ងៃក្រោយប្រតិបត្តិការ វះកាត់ ឬ អាចយូរជាងនេះក្នុងករណីចាំបាច់។
ថ្វីដ្បិតតែការវះកាត់នេះផ្តល់នូវភាពពេញចិត្តដល់អតិថិជន ប៉ុន្តែវាក៏អាចមានបញ្ហាជាច្រើន ដែលអាចកើតឡើង ក្រោយពីឆ្លងកាត់ការវះកាត់ដូចជា បញ្ហាលទ្ធផលពុំសូវល្អ បញ្ហាការបង្ករោគ បញ្ហាការរលួយឬដំបៅនៅលើទីតាំងវះកាត់ជាដើម។
ការពិភាក្សាជាមួយវេជ្ជបណ្ឌិត មុនពេលសម្រេចចិត្តទទួលការវះកាត់ មានសារៈសំខាន់បំផុតដើម្បីបានយល់ដឹងពីវិធីសាស្ត្រវះកាត់ ផលលំបាកក្រោយការវះកាត់ ឬសិក្សាពីវិធីសាស្ត្រគួបផ្សំផ្សេងៗ ដើម្បីទទួលបាននូវលទ្ធផលពេញចិត្ត។
ព័ត៌មានបន្ថែមសូមទំនាក់ទំនងគ្លីនិក Pearl Medical Center តាមទូរស័ព្ទ ០៨៨ ៣៣ ៧៧ ៧៧៧ អ៊ីមែល seihachirplast@yahoo.fr និងវិបសាយ www.pearlmedicalcenter.net៕
