ភ្នំពេញ ប៉ុស្តិ៍
ក្រុងហាកូនីៈ នារដូវផ្ការីកឆ្នាំនេះប្រជាជនជប៉ុនបានរួសរាន់ទៅងូតទឹក កម្សាន្តលេងនៅរមណីយដ្ឋានអាងងូតទឹកមួយ ដែលមានការលាយស្រាក្រហមដ៏ល្បីម៉ាកបូជូឡៃ នូវ៉ូ (Beaujolais Nouveau) សម្រាប់ងូត។
អាងទឹកស្ប៉ា ហាកូនី កូវ៉ាគៀន យុននីសាន់ អាចដាក់មនុស្សបានចំនួន ២៤ នាក់។ វានឹងក្លាយជាទីកម្សាន្តដ៏សែនមនោរម្យរបស់ប្រជាជនជប៉ុននាពេល រាត្រីជាមិនខានឡើយ ជាមួយនឹងក្លិនស្រាក្រហម បូជូឡៃ នូវ៉ូ។
ជារៀងរាល់ថ្ងៃតំបន់រមណីយដ្ឋាននេះតែងតែនាំយកស្រាដ៏ច្រើនលើសលប់មកចាក់នៅក្នុងអាងងូតទឹកនេះ។
នាងមីកា អូគីស៊ូ ម្ចាស់រមណីយដ្ឋាន ស្ប៉ាងូតទឹកស្រាក្រហមនេះ បាននិយាយថា៖ «យើងព្យាយាមបំពេញនូវអ្វីៗជាតម្រូវការរបស់ភ្ញៀវគ្រប់រដូវកាល»។
នាងមីកា អូគីស៊ូ បានបន្តថា៖«ទោះបីជានៅខាងក្រៅមានអាកាសធាតុត្រជាក់ក្តី ក៏ប្រជាជនទាំងនេះមកងូតទឹកកម្សាន្ត និងស្ប៉ា ឲ្យបែកញើសជាមួយនឹងស្រាក្រហមនេះដែរ»។
ការចាក់ស្រាក្រហមមានរសជាតិផ្លែឈើទៅក្នុងអាងងូតទឹកនេះ នឹងជួយធ្វើឲ្យទឹកមានភាពក្តៅឧណ្ហៗ ។ ពិសេសនោះគឺតាមរយៈការប្រើស្រាក្រហមដែលមាននិមិត្តសញ្ញា ល្បីល្បាញលើលោក ម៉ាកបូជូឡៃ នូវ៉ូ៕ PR
