ភ្នំពេញ ប៉ុស្តិ៍
ក្រុងប៉េកាំង : តៅហ៊ូគឺជាអាហារដែលបានចាប់កំណើតនៅប្រទេសចិន ក្នុងសម័យរជ្ជកាលស្ដេចហាន ដែលស្ថិតនៅចន្លោះប្រមាណ២០០ឆ្នាំមុន និងក្រោយគ្រិស្ដសករាជ។
តៅហ៊ូត្រូវបានកែច្នៃឲ្យមានសណ្ឋានច្រើន ដូចជា សណ្ឋានរឹង ទន់ល្មម និងទន់ខ្លាំង។
អាហារនេះក៏ត្រូវបានប្រជាជននៅតាមតំបន់ផ្សេងៗនៃទឹកដីដ៏ធំមហាសាល របស់ចិន យកទៅកែច្នៃចម្អិនដោយប្រើវិធីសាស្ត្រខុសៗគ្នា ដោយអ្នកខ្លះនិយមចម្អិនជាមួយទឹកស៊ីអ៊ីវ ខ្លះទៀតយកទៅផ្អាប់ធ្វើជាតៅហ៊ូស្អុយ នឹងខ្លះទៀតយកទៅខជាមួយសាច់សត្វផ្សេងៗតាមចំណូលចិត្ត។
ក្រៅពីយកចម្អិនជាម្ហូបទទួលទានជាមួយបាយ តៅហ៊ូក៏ត្រូវបានគេយកទៅចម្អិនជាបង្អែមក្ដៅៗសម្រាប់ទទួលទាននៅ រដូវរងា ដើម្បីកម្ដៅរាងកាយ និងបង្ការអាការផ្ដាសាយផងដែរ។
ដោយឡែកនៅវៀតណាម បង្អែមតៅហ៊ូត្រូវបានចម្អិនខុសៗគ្នាទៅតាមតំបន់នីមួយៗ។
នៅវៀតណាមខាងត្បូង បង្អែមតៅហ៊ូត្រូវបានគេចម្អិនជាមួយនឹងទឹកស្ករស អប់ដោយក្លិនផ្កាម្លិះ។ បង្អែមនេះត្រូវបានគេញ៉ាំក្ដៅៗក្នុងដូវរងា។ ចំណែកឯនៅរដូវក្ដៅប្រជាជននិយមបន្ថែមដុំទឹកកកតូចៗចូលក្នុងបង្អែម ។
ចំណែកនៅតំបន់កណ្ដាលនៃទឹកដីវៀតណាមវិញ បង្អែមតៅហ៊ូត្រូវបានចម្អិនជាមួយទឹកស្ករក្ដៅៗដោយមានបន្ថែមចំណិតខ្ញី។
ដោយឡែកចំពោះប្រជាជននៅភាគខាងត្បូង បង្អែមតៅហ៊ូត្រូវបានចម្អិនជាមួយខ្ញី និងទឹកដូង។ ជាទូទៅតៅហ៊ូនៅភាគខាងត្បូងច្រើនមានសណ្ឋានទន់ជាងតៅហ៊ូនៅតំបន់ដទៃ ទៀត៕
