​

ផ្សារមូលបត្រ​កម្ពុជា​ ដែល​ទើប​តែ​ចាប់​បដិសន្ធិ​ យុវជន​កម្ពុជា​ពុំ​ទាន់​យល់​ច្បាស់​ពី​ជំនួញ​បែប​ថ្មី​នេះ​ ដូច្នេះ​អ្វី​ដែល​គួរ​តែ​បើក​ដំណើរ​ការ​បន្ដ​ទៀត​ ច្បាស់​ជា​វិស័យ​អប់រំ​ស្ដីពី​ចំណេះ​ដឹង​ផ្សារ​ហ៊ុន។ ពាក់ព័ន្ធ​នឹង​ប្រព័ន្ធ​អប់រំ​ផ្សារ​មូលបត្រ​ LIFT សូម​ណែនាំ​ប្រិយមិត្ដ​ឲ្យ​បាន​ស្គាល់​នូវ​មជ្ឈមណ្ឌល​បណ្ដុះ​បណ្ដាល​ ហិរញ្ញវត្ថុ​ (GFG Financial Centre) របស់​ក្រុមហ៊ុន Gold Financial Global Co., Ltd ដែល​បាន​ចុះ​ឈ្មោះ​ជួញដូរ Forex តាម​អ៊ីនធឺណិត​ដំបូង​គេ​បង្អស់​នៅ​កម្ពុជា​។

មជ្ឈមណ្ឌល​បណ្ដុះ​បណ្ដាល​ហិរញ្ញវត្ថុ បាន​ផ្ដល់​សេវាកម្ម​រៀបចំ​ផែនការ ការ​ស្រាវជ្រាវ​ផ្នែក​ទីផ្សារ​ និង​​វគ្គ​បណ្ដុះ​បណ្ដាល​។ គួរ​ឲ្យ​កត់​សម្គាល់​ថា ក្រុមហ៊ុន​ Gold Financial Global Co., Ltd ផ្ដល់​សេវាកម្ម​ប្រឹក្សា​ផ្នែក​ហិរញ្ញវត្ថុ ជំនួញ​ជួញដូរ​រូបិយ​ប័ណ្ណ​បរទេស មាស ប្រាក់ ប្រេង និង​វត្ថុ​មាន​តម្លៃ​ជា​ច្រើន​ទៀត​។ មួយ​វិញ​ទៀត ក្រុមហ៊ុន បាន​បើក​វគ្គ​បណ្ដុះបណ្ដាល​ខ្លីៗ​ដល់​សិស្ស​និស្សិត​លើ​ជំនាញ​ហិរញ្ញវត្ថុ ​ផង​ដែរ​។

លោក អ៊ីវ ពិសិដ្ឋ​ ដែល​ជា​ប្រធាន​គ្រប់គ្រង​ផ្នែក​បណ្តុះ​បណ្តាល​ និង​វិភាគ​ចំពោះ​ទីផ្សារ​ហិរញ្ញវត្ថុ​ប្រចាំ​ក្រុមហ៊ុន​បើក​សម្ពោធ​រយៈ​ ពេល​២​ឆ្នាំ​មក​ហើយ បាន​ថ្លែងថា ក្រុមហ៊ុន​ Gold Financial Global Co., Ltd ​​មិន​បាន​ផ្តោត​សំខាន់​លើ​ប្រាក់​ចំណេញ​ពី​វគ្គ​បណ្តុះ​បណ្តាល​នេះ​ទេ​ ប៉ុន្តែ​ក្រុមហ៊ុន​ចង់​បង្កើន​ធនធាន​មនុស្ស​ផ្នែក​ហិរញ្ញវត្ថុ​នេះ​។ ​ដូច្នេះ តម្រូវ​ការ​បុគ្គលិក​ជំនាញ​ ពិត​ជា​ចាំបាច់​ណាស់​ដើម្បី​បម្រើ​ការ​ចំពោះ​ផ្នែក​នេះ​។​

លោក ពិសិដ្ឋ បាន​រៀបរាប់​ថា៖ «យើង​នឹង​អនុញ្ញាត​ឲ្យ​បេក្ខជន​ទាំងអស់​ចូលរួម​ក្នុង​វគ្គ​បណ្ដុះ​បណ្ដាល ​នេះ ដើម្បី​ជា​មូលដ្ឋាន​គ្រឹះក្នុង​ការ​យល់ដឹង​អំពី​មុខងារ​នៃ​ទីផ្សារ ដូចជា វិធីសាស្រ្ត​នៃ​ការ​វិភាគ ជំនាញ​អន្តរ​ទំនាក់​ទំនង​ជាមួយ​នឹង​ក្រុម​វិភាគ​ផ្សេង​ៗ​ទៀត។ វគ្គ​ខ្លីៗ​នេះ​ក៏​ផ្ដោត​ចម្បង​លើ​កត្តា​ដែល​ជះ​ឥទ្ធិពល ទៅ​ដល់​តម្លៃ​ឡើង​ចុះ​ ការ​ការពារ និង​យុទ្ធសាស្រ្ត​នៃ​ការ​ជួញដូរ​ផង​ដែរ​»។

ថ្មីៗ​នេះ ​GFG បាន​បើក​វគ្គ​បណ្តុះបណ្តាល​ «​វិថី​ឆ្ពោះ​ទៅ​ជីវភាព​សុខដុម» ដែល​ចែក​ជា​៥​វគ្គ។ វគ្គ​នេះ​បាន​ផ្តល់​នូវ​ចំណេះ​ដឹង​ជា​មូលដ្ឋាន និង​ការ​អនុវត្តន៍​យុត្ដិសាស្រ្ដ​លក់​ដោយ​ផ្ទាល់ ដើម្បី​ពង្រឹង​នូវ​ទស្សនៈ​ហិរញ្ញវត្ថុ​ជា​សកល​។ ម្យ៉ាង​វិញ​ទៀត វគ្គ​បណ្តុះ​បណ្តាល​នេះ បាន​ជួយ​បង្កើន​ចំណេះ​ដឹង​ប្រជាជន​ស្ដីពី​ទីផ្សារ​ហិរញ្ញវត្ថុ​អន្តរជាតិ​ និង​អប់រំ​យុវជន​ជា​ច្រើន​នូវ​ជំនាញ​ដើម្បី​សម្រប​ខ្លួន​ទៅ​តាម​តម្រូវការ ទីផ្សារ​។

លោក ពិសិដ្ឋ បាន​បញ្ជាក់​ថា៖ «ក្រុមហ៊ុន​របស់​យើង​តែងតែ​ផ្តល់​ឱកាស​ល្អៗ​សម្រាប់​អ្នក​ចូលរួម​ទាំងអស់ ដើម្បី​ធ្វើ​ការ​រួម​គ្នា​ជាមួយ​នឹង​ពួក​យើង​។ ជាក់ស្ដែង ពួក​គេ​ត្រូវ​បាន​អនុញ្ញាត​ឲ្យ​ប្រើ​ទ្រឹស្ដី​ដែល​បាន​សិក្សា​មក​អនុវត្ដ​ ហើយ​សិស្ស​ឆ្នើម​ចំនួន​៥​នាក់​ នឹង​ត្រូវ​ជ្រើសរើស​ឲ្យ​បម្រើ​ការងារ​នៅ​ក្នុង​ក្រុម​ហ៊ុន​នេះ​ផ្ទាល់​»។

ជាមួយ​នឹង​បន្ទប់​រៀន​ផាសុកភាព​ដែល​បំពាក់​ដោយ​ឧបករណ៍​ទំនើបៗ សិស្ស-និស្សិត មាន​ឱកាស​​សិក្សា​នូវ​វគ្គ​ជំនាញ​ខ្លី​ៗ​នេះ​ ជាមួយ​នឹង​គ្រឹះស្ថាន​ GFG ក្នុង​តម្លៃ​ថោក​សមរម្យ​បំផុត​។​ លោក អ៊ីវ ពិសិដ្ឋ​ បាន​បង្ហើប​ប្រាប់​ថា អ្នក​ចូលរួម​ទាំងអស់​ចំណាយ​ត្រឹម​តែ​១០​ដុល្លារ​ប៉ុណ្ណោះ​សម្រាប់ ការ​ចុះ​ឈ្មោះ​ចូល​រៀន​ក្នុង​មួយ​វគ្គ​។ ពួក​គេ​នឹង​ទទួល​បាន​ការ​សិក្សា​ជាមួយ​នឹង​គ្រូ​ជំនាញ​ដែល​មាន​វិជ្ជាជីវៈ​ និង​បទពិសោធ​ពី​ទីក្រុង​ហុងកុង​ និង​ប្រទេស​វៀតណាម។​

ប្រធាន​គ្រប់គ្រង​ផ្នែក​បណ្ដុះ​បណ្ដាល​រូប​នេះ បាន​បន្ដ​ថា វគ្គ​សិក្សា​នីមួយៗ​តម្រូវ​ឲ្យ​មាន​អ្នក​ចូល​រួម​​ចំនួន​៦០​នាក់ ហើយ​បេក្ខជន​ទាំងអស់​ត្រូវ​បាន​លើក​ទឹក​ចិត្ត​ឲ្យ​ចូលរួម​ស្មើ​ៗ​គ្នា បើ​ទោះ​បី​ជា​ពួក​គេ​ពុំ​បាន​បញ្ចប់​ការ​សិក្សា​ផ្នែក​ហិរញ្ញវត្ថុ​ក៏​ដោយ​។​

លោក ពិសិដ្ឋ បាន​លើក​ឡើង​ថា​៖​ «​លក្ខណៈ​ពិសេស​ក្រុមហ៊ុន​គឺ គ្រប់​វគ្គ​ទាំង​អស់​គឺ​ផ្តោត​សំខាន់​ទៅ​លើ​កម្រិត​បឋម​ និង​មធ្យម​ ដូច្នេះ​ចំពោះ​អ្នក​មាន​ចំណាប់​អារម្មណ៍​លើ​ផ្សារ​មូលបត្រ​ និង​ទីផ្សារ​ហិរញ្ញវត្ថុ​ សូម​មក​ចូល​រួម​ឲ្យ​បាន​ច្រើន​ដើម្បី​ពង្រឹក​ដល់​សមត្ថភាព​របស់​ខ្លួន​»។​

តាម​រយៈ​ការ​សង្កេត​របស់​លោក អ៊ីវ ពិសិដ្ឋ បាន​ឲ្យ​ដឹង​ថា សិស្ស​ជាច្រើន​ដែល​បាន​ឆ្លង​កាត់​វគ្គ​បណ្តុះ​បណ្តាល​ពី​ក្រុមហ៊ុន​របស់​លោក អាច​ទទួល​បាន​នូវ​ឱកាស​ការងារ​ជាច្រើន​នៅ​ក្នុង​ក្រុមហ៊ុន ហិរញ្ញវត្ថុ​នានា ជា​ពិសេស​នៅ​ក្នុង​ទីផ្សារ​មូលបត្រ​ទៀត​ផង​។

ដើម្បី​ទទួល​បាន​ចំណេះដឹង​ផ្នែក​ហិរញ្ញវត្ថុ​ និង​ការងារ​ដ៏​សមប្រកប អ្នក​អាច​មក​ចូល​រួម​ជាមួយ GFG ដែល​គ្រាន់​តែ​ចំណាយ​ប្រាក់​បន្ដិច​បន្ដួច​ប៉ុណ្ណោះ​។ ​

សូម​បញ្ជាក់​ថា GFG​ មាន​ទីតាំង​ស្ថិត​នៅ​ផ្ទះ​លេខ​ ៣១​ ផ្លូវ​លេខ​២១៧​ សង្កាត់​វាលវង់​ ខណ្ឌ​៧មករា រាជធានី​ភ្នំពេញ ស្ថិត​នៅ​ចំពី​មុខ​ផ្សារ​ទំនើប City Mall៕