ភ្នំពេញ ប៉ុស្តិ៍
ភ្នំពេញៈ នៅល្ងាចថ្ងៃទី១៧ ខែឧសភា តម្លៃ IPO របស់ Facebook នឹងត្រូវកំណត់។ មួយថ្ងៃបន្ទាប់ ការរំពឹងទុកអំពីការជួញដូរភាគហ៊ុននេះ នៅលើទីផ្សារទិញលក់ នឹងអាចកើនឡើងខ្ពស់ជាងតម្លៃនៅពេលធ្វើ IPO។
ក្រុមហ៊ុននេះរំពឹងថានឹងប្រកាសលក់ភាគហ៊ុន ៣៣៧,៥លានហ៊ុននៃភាគហ៊ុន ២,១ពាន់លានហ៊ុន។ ភាគហ៊ុនសរុបមាន ២,៨ពាន់លានហ៊ុនរាប់បញ្ចូលទាំងទុនបុគ្គលិក ក្នុងតម្លៃពី ២៨ដុល្លារ ទៅ៣៥ដុល្លារ ក្នុងមួយហ៊ុន។
ទឹកប្រាក់ប្រហែលជា ១១,៨ពាន់លានដុល្លារ ដែលទទួលបានពី IPO នឹងធ្វើឲ្យ Facebook ក្លាយទៅជាក្រុមហ៊ុនធ្វើ IPO អ៊ីនធឺណិតធំជាងគេនៅក្នុងប្រវត្តិសាស្ត្រ ហើយក្រុមហ៊ុននេះនឹងមានមូលធនទីផ្សារជិត១០២ពាន់លានដុល្លារ។
Google បង្កើនដើមទុនបាន ១,៦៧ពាន់លានដុល្លារពី IPO ក្នុងឆ្នាំ២០០៤ ធ្វើឲ្យក្រុមហ៊ុនអ៊ីនធឺណិតដ៏ធំនេះមានដើមទុនទីផ្សាររហូតដល់ ២៣ពាន់លានដុល្លារ។ ៨ឆ្នាំក្រោយមក ដើមទុនទីផ្សាររបស់ក្រុមហ៊ុននេះ បានកើនឡើងដល់ ១៩៨ពាន់លានដុល្លារ។
IPO ថ្មីបំផុតក្នុងប្រវត្តិសាស្ត្ររបស់អាមេរិក គឺ IPO របស់ក្រុមហ៊ុន Visa ជាក្រុមហ៊ុនសាជីវកម្មផ្តល់សេវាហិរញ្ញវត្ថុចម្រុះជាតិសាសន៍ ដែលបានបង្កើនដើមទុនរបស់ខ្លួនរហូតដល់១៧,៩ពាន់លានដុល្លារ។ ធនាគារកសិកម្មចិន ដែលបង្កើនដើមទុនរបស់ខ្លួន រហូតដល់១៩,២ពាន់លានដុល្លារ ជា IPO ធំជាងគេ ដែលមិនធ្លាប់មានពីមុនមក។
គេជឿថា១៥ភាគរយនៃប្រជាជនសរុបនៅលើពិភពលោក មានគណនី Facebook។
ក្រុមហ៊ុននេះអះអាងថា មានអ្នកប្រើប្រាស់ Facebook ៩០០លាននាក់ ក្នុងនោះ ៨៤៥លាននាក់ប្រើ Facebook ជារៀងរាល់ខែ ហើយ៤៨៣លាននាក់ ប្រើប្រាស់ជារៀងរាល់ថ្ងៃ។ អ្នកប្រើប្រាស់បានចុច «ចូលចិត្ត» ឬ «បញ្ចេញយោបល់» ចំនួន ២,៧ពាន់លាននាក់ ក្នុងមួយថ្ងៃ។
ទន្ទឹមនឹងនេះដែរ រូបថត ២៥០លានរូបត្រូវបានបង្ហោះលើទំព័រនេះ។ កាលពីខែមុន ក្រុមហ៊ុននេះ បានទិញភាគហ៊ុន Instagram ក្នុងតម្លៃ ១ពាន់លានដុល្លារ ដើម្បីចែករំលែករូបថតតាមទូរស័ព្ទចល័តដោយឥតគិតថ្លៃ។
Facebook រកប្រាក់ចំណូលបាន ៣,៧ពាន់លានដុល្លារ កាលពីឆ្នាំ២០១១ ដោយកើនឡើងលើសឆ្នាំ២០១០ ចំនួន ៨៨ភាគរយ ហើយរកប្រាក់ចំណេញបាន១ពាន់លានដុល្លារ។ នៅត្រីមាសទីមួយ ឆ្នាំ២០១២ ក្រុមហ៊ុននេះ រកប្រាក់ចំណូលបាន ១ពាន់លានដុល្លារ កើនលើសរយៈពេលដូចគ្នា កាលពីឆ្នាំមុន៤៥ភាគរយ ប៉ុន្តែប្រាក់ចំណូលសុទ្ធបានធ្លាក់ចុះ ១២ភាគរយ។ ទាំងប្រាក់ចំណូល ទាំងប្រាក់ចំណេញ បានធ្លាក់ចុះ បើធៀបនឹងត្រីមាសទីបួន ឆ្នាំ២០១១។ បច្ចុប្បន្ន ក្រុមហ៊ុននេះ រកប្រាក់ចំណូលបាន ៤,៣៩ដុល្លារ ពីអ្នកប្រើប្រាស់ម្នាក់ ធៀបនឹង Google ដែលរកបានដល់ទៅ ៣០ដុល្លារ និង Yahoo ៨ដុល្លារ ក្នុងម្នាក់។
ការផ្សាយពាណិជ្ជកម្ម ស្មើនឹង៨២ភាគរយ ឬ ៨៧២លានដុល្លារនៃប្រាក់ចំណូលនៅត្រីមាសទីមួយរបស់ Facebook។ ចំនួននេះស្មើនឹង ១ភាគរយនៃការចំណាយសរុបលើការផ្សាយពាណិជ្ជកម្មនៅលើពិភពលោក ដែលមានតម្លៃ៥០៧ពាន់លានដុល្លារ។ ប្រាក់ចំណូលផ្សេងទៀតរបស់ Facebook បានមកពីឥណទាន Facebook ដែលជាប្រព័ន្ធទូទាត់ការទិញ application និងហ្គេមរបស់ Facebook ដែលរកប្រាក់ចំណូលបាន ១៨៦លានដុល្លារ។
ប្រាក់ចំណូលពី Zynga ដែលបានផលិតហ្គេម Farmville និងហ្គេមផ្សេងៗទៀត នៅលើ Facebook ស្មើនឹង ១២ភាគរយនៃប្រាក់ចំណូលសរុបរបស់ Facebook កាលពីឆ្នាំ២០១១។
ទោះបីចំនួន និងការរីកចម្រើនរបស់ក្រុមហ៊ុននេះ ពិតជាគួរឲ្យភ្ញាក់ផ្អើលក្តី ប៉ុន្តែការវិនិយោគនៅលើក្រុមហ៊ុននេះ មិនមែនគ្មានហានិភ័យនោះទេ ជាពិសេសគឺនៅថ្ងៃធ្វើការជួញដូរដំបូង។
IPO អ៊ីនធឺណិតពេលថ្មីៗនេះ ដូចជា IPO របស់ Pandora Media និង Groupon ត្រូវបានគេរំពឹងថានឹងទទួលបានផលចំណេញ នៅថ្ងៃធ្វើ IPO ហើយក្រោយមក វានឹងធ្លាក់ចុះ។ ឧទាហរណ៍ ភាគហ៊ុនរបស់ក្រុមហ៊ុនទាំងពីរ នៅតែលក់ក្នុងតម្លៃទាបជាងតម្លៃពេលបិទឈប់លក់នៅថ្ងៃដំបូង។
រដ្ឋាករទឹកភ្នំពេញ ជាឧទាហរណ៍ដ៏ល្អនៅក្នុងស្រុក ដែលតម្លៃរបស់វាបានឡើងខ្ពស់ជាងតម្លៃពេលធ្វើ IPO ប៉ុន្តែបន្ទាប់មក បានធ្លាក់ចុះវិញ ទាបជាងតម្លៃពេលចាប់ផ្តើមបើកលក់នៅថ្ងៃដំបូង៕ CS
