ភ្នំពេញ ប៉ុស្តិ៍
តើអ្វីជាស្ទីលផ្ទាល់ខ្លួនរបស់អ្នក?
រឹទ្ធ បញ្ញារ៉ា អាយុ២៣ឆ្នាំ ជានិសិ្សតឆ្នាំទីពីរនៃសាកលវិទ្យាល័យអាស៊ីអឺរ៉ុបផ្នែកគ្រប់គ្រង
«ខ្ញុំជាមនុស្សដែលចូលចិត្តផ្តើមគំនិតបង្កើតស្ទីលដោយខ្លួនឯង។ ខ្ញុំចូលចិត្តស្លៀកពាក់នូវសម្លៀកបំពាក់ណាដែលអាចធ្វើឲ្យខ្ញុំមើល ទៅសង្ហា និងថ្លៃថ្នូរ ប៉ុន្តែខ្ញុំមិនចូលចិត្តស្លៀកពាក់តាមស្ទីលកូរ៉េ ឬក៏ថៃនោះទេ។ ជាធម្មតាខ្ញុំតែងតែស្លៀកនូវសម្លៀកបំពាក់ម៉ូដថ្មីៗ ដោយបន្ថែមនូវក្រវិល នាឡិកា រួមជាមួយនឹងកាបូបស្ពាយស្អាតៗផងដែរ ដែលធ្វើឲ្យខ្ញុំកាន់តែមានភាពទាក់ទាញ ហើយជាស្ទីលដែលពេញនិយមសម្រាប់យុវវ័យ។ ខ្ញុំតែងតែចូលរួមនូវពិធីធំដុំ ថែមទាំងជាអ្នកបង្ហាញម៉ូដក្នុងការតាំងពិព័រណ៍មួយចំនួនដែរ។ ហេតុនេះហើយដែលធ្វើឲ្យខ្ញុំមានការប្រុងប្រយ័ត្នជាមួយនឹង ការរៀបចំខ្លួន ជាពិសេសការប្រើប្រាស់សម្ភារសំខាន់ណាស់សម្រាប់ខ្ញុំ»៕
រិន ចាន់រស្មី អាយុ២១ឆ្នាំ ជានិស្សិតឆ្នាំទីពីរនៃវិទ្យាស្ថានភាសាបរទេស
«សម្រាប់ខ្ញុំ ខ្ញុំតែងតែមានគំនិតថ្មីសម្រាប់អ្វីមួយដែលស័ក្តិសមទៅនឹងស្ទីលរបស់ ខ្ញុំ។ សម្ភារដែលខ្ញុំតែងតែទិញ និងស្លៀកពាក់នោះគឺជាវត្ថុដែលមានលក្ខណៈកំប្លែង ហើយខុសប្លែកពីអ្នកដទែបន្តិច។ បើនិយាយទៅខ្ញុំស្រឡាញ់សម្ភារដែលឡូយ ហើយពេញនិយមសម្រាប់ក្មេងស្រី។ ម៉្យាងទៀតអ្នកដទៃអាចនិយាយបានថា វាហាក់បីដូចជាចម្លែក។ ខ្ញុំទើបតែទិញវ៉ែនតាមួយដែលមានរាងដូចជាតុក្កតាមីកគី ម៉ោស។ ខ្ញុំចូលចិត្តម៉ូដបែបនេះដោយសារតែវាទំនងជាស័ក្តិសមនឹង ខ្ញុំ។ នេះគឺជាម៉ូតផ្ទាល់ខ្លួនរបស់ខ្ញុំ។ ខ្ញុំតែងតែគិតដល់អ្វីដែលមានគំនិតច្នៃប្រឌិតលើសពីម៉ូត ដើមរបស់វា ហើយពេលខ្លះវាក៏មានសារប្រយោជសម្រាប់ខ្ញុំដែរ ដោយសារតែខ្ញុំមិនបាច់ចំណាយលុយខ្ជះខ្ជាយទៅលើ សម្ភារថ្មីៗ ហើយឡូយឆាយឥតប្រយោជន៏ ព្រមទាំងមិនសូវស័ក្តិសមសម្រាប់ខ្ញុំនោះទេ»៕
អ៊ុន សាមៀន អាយុ១៩ឆ្នាំ ជាសិស្សនៃវិទ្យាល័យហ៊ុន សែនប៊ុនរ៉ានីវត្តភ្នំ
«ខ្ញុំជាអតិថិជនម្នាក់ នៅក្នុងចំណោមអតិថិជនរាប់លានអ្នកដែលឈ្លក់វង្វេងទៅនឹង ផលិតផលiphone។ វាគឺជាសម្ភារនិយមផ្ទាល់ខ្លួនរបស់ខ្ញុំ ពីព្រោះខ្ញុំអាចកម្សាន្តសប្បាយជាមួយវានៅពេល ណាក៏បានជាមួយនឹងមិត្ត ភក្តិរបស់ខ្ញុំ។ អ្វីដែលធ្វើឲ្យខ្ញុំពេញចិត្តបំផុតនោះគឺទំហំរបស់វា ពិតជាស្អាតហើយឡូយ។ ចំណែក ឯគុណភាពរបស់វាជាមួយនឹងមុខងារដែលពោរពេញទៅដោយគំនិតច្នៃប្រឌិត ដ៏អស្ចារ្យដែលលេចឡើងខុសពីផលិតផលដទៃ។ ម៉្យាងវិញទៀតមិត្តភក្តិរបស់ខ្ញុំភាគច្រើនសុទ្ធតែមានវានៅក្នុងដៃ ហើយពួកគេតែងតែធ្វើការផ្លាស់ប្តូរនៅពេលដែលវាចេញស៊េរី ថ្មី។ បច្ចេកវិទ្យាទំនើបនេះ ខ្ញុំអាចប្រើវាដើម្បីជជែកកម្សាន្តតាម Facebook ថតរូប លេងហ្គេម និងទំនាក់ទំនងជាមួយនឹងមិត្តភក្តិរបស់ខ្ញុំទាំងចាស់ និងថ្មី»៕
ម៉េង ហុង អាយុ១៩ឆ្នាំ ជា សិស្សនៃវិទ្យាល័យឥន្រ្ទទេវី
«សម្រាប់ខ្ញុំ ខ្ញុំចូលចិត្តស្ទីលដែលសាមញ្ញ ប៉ុន្តែគួរឲ្យចាប់អារម្មណ៍នៅពេលដែលខ្ញុំប្រើ ប្រាស់កាមេរ៉ារបស់ខ្ញុំ។ ខ្ញុំតែងតែដើរលេងជាមួយមិត្តភក្តិនៅ ពេលខ្ញុំទំនេរពីការសិក្សា ហើយខ្ញុំតែងតែយកកាមេរ៉ាជាប់តាមខ្លួន។ ខ្ញុំគិតថា ខ្ញុំអាចថែរក្សានូវអនុស្សាវរីយ៏ល្អៗ ហើយវាមើលទៅឡូយនៅពេលដែលខ្ញុំថតរូបជាមួយនឹងកាមេរ៉ានោះ ពីព្រោះការថតរូបគឺជាចំណង់ចំណូលចិត្តរបស់ខ្ញុំ។ ខ្ញុំចូលចិត្តធ្វើអ្វីដែលជាចំណូលចិត្តរបស់ខ្លួនឯងជាជាងយកគំរូ តាមអ្នកដទៃស្ទើរតែគ្រប់ពេល។ ដូច្នេះហើយ ទើបខ្ញុំចង់ថតរូបដែលស្អាតៗតាមរយៈជំនាញរបស់ខ្ញុំ។ ខ្ញុំចង់ធ្វើអ្វីដែលពោរពេញទៅដោយគំនិតច្នៃប្រឌិត និងមុនគេបង្អស់។ សម្ភារនិយមគឺជាផ្នែកមួយដែលសំខាន់ដែរសម្រាប់ខ្ញុំ ដោយសារតែវាអាចធ្វើឲ្យខ្ញុំសប្បាយចិត្ត និងធ្វើតាមចំណូលចិត្តខ្លួនឯង»៕
ញឹម វ៉ាន់ថា អាយុ២៤ឆ្នាំជា និស្សិតនៃវិទ្យាស្ថានស៊ីតិក
«ម៉ូដសម្ភារគឺពិតជាសំខាន់ណាស់សម្រាប់ខ្ញុំ ដោយសារថាខ្ញុំនៅក្មេង ខ្ញុំគិតថា ខ្ញុំចង់ធ្វើឲ្យជីវិតរបស់ខ្ញុំមានភាពសប្បាយរីករាយជាមួយនឹងការ លេងស្ទីលរបស់ខ្ញុំដើម្បីទាក់ ទាញចំណាប់អារម្មណ៍ពីអ្នក ដទៃ។ គ្មាននរណាម្នាក់ចង់ឲ្យអ្នកដទៃចាត់ទុកខ្លួនឯងថាជាមនុស្សក្រៅ សង្គមនោះទេ។ ខ្ញុំចង់ឲ្យខ្លួនឯងក្លាយទៅជាមនុស្សដែលទាន់សម័យ។ នេះគឺជាមូលហេតុដែលធ្វើឲ្យខ្ញុំប្រើប្រាស់នូវសម្ភារដែលទាន់ សម័យ ដូចជា ម៉ូតូ កាបូប ហើយសូម្បីតែស្បែកជើង។ នៅពេលដែលខ្ញុំប្រើប្រាស់សម្ភារជាស្ទីលផ្ទាល់ខ្លួនរបស់ខ្ញុំ អាចធ្វើឲ្យខ្ញុំបង្ហាញអ្នកដទៃពីខ្ញុំខ្លួនឯង និងអ្វីដែលខ្ញុំមាន។ មិនខុសគ្នាប៉ុន្មានទេខ្ញុំតែងតែបង្ហាញនូវស្ទីលរបស់ខ្ញុំតាមរយៈ Face book ហើយវាពិតជាគួរឲ្យចាប់អារម្មណ៍ណាស់។ វាអាចធ្វើឲ្យខ្ញុំមានមិត្តភក្តិកាន់តែច្រើន»៕
