ភ្នំពេញ ប៉ុស្តិ៍
ភ្នំពេញៈ ទូរស័ព្ទ Nokia Asha 202 ដែលជាទូរស័ព្ទមានបណ្តាញអ៊ីនធឺណិតលឿន និងចំណាយអស់ប្រាក់តិចត្រឹម៨០ដុល្លារនោះ បានផ្តល់នូវហ្គេម EA ចំនួន ៤០ ដោយឥតគិតថ្លៃ ដែលក្នុងនោះមានដូចជា Tetris, Need for Speed, The run និង Bejeweled ជាដើម។
លោក Jerry Manus អគ្គនាយកប្រតិបត្តិក្រុមហ៊ុន Nokia ប្រចាំប្រទេសកម្ពុជា និងឡាវ បានមានប្រសាសន៍ថាNokia និង EA បានរួមសហការគ្នាច្នៃប្រឌិតនាំយកនូវហ្គេម EA ល្បីៗមកដាក់ឲ្យដំណើរការក្នុងទូរស័ព្ទ Nokia Asha 202ដែលមានតម្លៃសមរម្យជាទីបំផុត។
លោកបានបន្តថា ដើម្បីបានហ្គេមទាំងនោះលេង ម្ចាស់ Nokia Asha 202 គ្រាន់តែចុចលើប៊ូតុង EA ដែលមានដាក់បង្ហាញនៅលើអេក្រង់ទូរស័ព្ទ រួចទាញយកហ្គេមទាំង៤០នោះ ពី Nokia Store មកដាក់ក្នុងទូរស័ព្ទឲ្យបានក្នុងអំឡុងពេល៦០ថ្ងៃគិតពីថ្ងៃចុចលើ ប៊ូតុង EA លើកដំបូង។ ចំពោះហ្គេមទាំងនោះប្រសិនបើគិតជាទឹកប្រាក់មានតម្លៃរហូតដល់ទៅ១០០ដុល្លារសហរដ្ឋអាមេរិកឯណោះ។
លោកបានបញ្ជាក់ថា ហ្គេមទាំងនេះ ទទួលការពេញនិយមជាទីបំផុតពីបណ្តាប្រទេស កម្ពុជា ហ្វីលីពិន ឥណ្ឌា ប៉ាគីស្ថាន និងវៀតណាម។
ជាមួយនឹងភាពរីករាយលេងហ្គេម EA នៅលើទូរស័ព្ទ Nokia Asha 202 បន្ថែមលើសពីនេះទៅទៀតទូរស័ព្ទស៊ីម២នេះមានអេក្រង់ Touch ទំហំ 2.4 អ៊ីញ ដែលបង្កភាពងាយស្រួលជូនអ្នកប្រើប្រាស់ក្នុងការបើកអ៊ីនធឺណេត និងកម្មវិធីផ្សេងៗ។
ទន្ទឹមនឹងនេះភាពងាយស្រួលក្នុងការប្តូរស៊ីមដោយមិនចាំបាច់បិទ ទូរស័ព្ទ ចំពោះមុខងារ Sim Manager ដែលអាចឲ្យអ្នកប្រើប្រាស់កំណត់លក្ខខណ្ឌទៅលើស៊ីមកាតបានច្រើន រហូតដល់ទៅ៥ស៊ីមកាតឯណោះ។ ក្រៅពីនេះមានម៉ាស៊ីនថតទំហំ២មេហ្គាភិកសែលមុខងារសម្រាប់ចាក់ចម្រៀង និងបើកវិទ្យុអេហ្វអឹម Bluetooth និងអាចបញ្ចូលអង្គចងចាំបន្ថែមបានរហូតដល់ទៅ៣២GB ទៀតផង៕
